Шымкент келбеті

«Болашағы жарқын Оңтүстік жастары» атты өңірлік жастар форумына республикалық, облыстық жастар ұйымдары мен облыстағы белсенді жастар және БАҚ өкілдері, барлығы 400-ге жуық азамат қатысты.

Шараның ашылу салтанатында сөз алған өңір басшысы Жансейіт Түймебаев кез келген мемлекеттің дамуы мен экономикасының өсуі жастардың қатысуынсыз мүмкін еместігін айтып, болашағымыз жастардың қолында екенін жеткізді.

Облыстық жастар саясаты басқармасы ұйымдастырған форумда еліміздегі мемлекеттік жастар саясатының жүзеге асырылуы мен ауыл жастарын бизнеске тарту, жастар мен жасөспірімдер арасындағы қылмыс пен құқықбұзушылықтың алдын алу мәселелері қаралды.

Сонымен қатар, жылдың үздік сала мамандары облыс әкімінің алғыс хатымен марапатталып, үндеу жарияланды.

Бүгінде облыстағы жастар саны 800 мыңға жуық. Еске сала кетейік, осы жылдың 1 желтоқсан күні Астана қаласында республикалық жастар форумы өтеді. Оған өңірімізден 102 делегат барады.

«Қазтелерадио» акционерлік қоғамы OTAU TV жерсеріктік телевизиясы абоненттеріне арналған кезекті акциясын қорытындылады. Акция ережелеріне сәйкес телеарналардың «Толық» топтамасына 3 айдан 12 айға дейінгі мерзімде қосылу қажет болатын.

«Random» кездейсоқ сандар генераторы арқылы бірінші орын және бас жүлде жеңімпазы – автокөлік иегері, Алматы облысы, Алакөл ауданы, Жұмахан Балапанов ауылының тұрғыны Садуақасова Жанар Асылбекқызы анықталды. Сондай-ақ, Қызылорда қаласының тұрғыны Досмағанбетов Мұрат Iphone 6 сыйлығын иеленсе, үшінші орында тоңазытқыш ұтып алған Алматы облысы, Қарасай ауданы Алмалыбақ ауылының тұрғыны Мирманов Алпамыс Жақсылықұлы.
Бұл ұтыс ойыны 2015 жылғы 1 қазаннан бастау алған акциялардың қорытындысы болды. Осыған дейін ұтыс ойынының екі кезеңі өткізілген болатын: бірінші аралық ұтыс ойыны жеңімпазына Smart TV теледидары табысталып, ал екінші аралық ұтыс ойыны жеңімпазы Үндістанға Гоа аралына екі адамға арналған сапарды ұтып алған болатын.
Акцияның аяқталу қорытындысы бойынша – «Қазтелерадио» АҚ 7-қазанда жеңімпаздарды құттықтау бойынша салтанатты шара өткізген болатын.
– Бүгінгі күні, OTAU TV жерсеріктік телевизиясын пайдаланушы абоненттер саны 1 миллионнан асты, бұл шамамен 4 миллионнан астам отандастарымыздың қатарын құрайды. «OTAU TV» жерсеріктік телерадио хабарларын тарату қызметтеріне қосылу, еліміздің барлық аумағында қолжетімді. «Қазтелерадио» хабар тарату сапасын арттыру мен телерадио арналардың оңтайлы тізімін қалыптастыру бойынша тұрақты түрде жұмыстар жүргізіп отырады. Мысалы, 2017 жылдың 1-ші тоқсанында біз өз тұтынушыларымызға HD-сападағы телеарналардың кең таңдауын ұсынуды жоспарлап отырмыз. Бүгінгі акция біздің тұтынушылар үшін алғаш немесе соңғы рет өткізіліп тұрған жоқ. Қазіргі уақытта, мысалы 4-қазан мен 4- қараша аралығында планшет ұтыс ойыны акциясы өтуде. Бұл жылдың аяғына дейінгі соңғы акция емес, сондықтан ақпараттарды қадағалаңыздар, біз алдағы уақыттарда абоненттерімізді көптеген жаңалықтарымызбен қуантатын боламыз», – деді салтанатты шарада «Қазтелерадио» АҚ Коммерциялық директоры, Басқарма мүшесі Евгений Галкин.

Шымкенттік белгілі хирург Мәди Бегалиев медицинаны дамытуға қосқан үлесі үшін Сызғанов атындағы Хирургия ұлттық ғылыми орталығының алтын медалімен марапатталды. Құрмет наградасын ОҚО денсаулық сақтау басқармасының басшысы Сейтжамал Пакеев тапсырды.

Әзірге елімізде бұл марапаттың екі иегері ғана бар. Соның бірі – шымкенттік хирург Мәди Бегалиев. Оның ота жасап келе жатқанына 33 жыл. Соңғы 6 жылдан бері Шымкенттегі жедел жәрдем ауруханасын басқарып келеді. 

Тәжірибелі маман осы уақытқа дейін 8 мыңға жуық күрделі ота жасады. Ол өңірде бірінші болып бүйректі трансплантациялау отасын жасаған.
Еске сала кетсек, Хирургия ұлттық ғылыми орталығы алтын медалімен дәрігерлерді 2013 жылдан бері марапаттап келеді. Ол дәрігерлердің жаңа жетістіктерге ұмтылуы үшін ынталандыру ретінде беріледі.

ОҚМПИ студенттері Қазақстанның еңбек сіңірген әртісі, жезтаңдай әнші Нұржамал Үсенбаевамен кездесті. Елге қызмет еткен елеулі тұлғаларды оқу орнына шақырып, студенттермен кездесу ұйымдастыруды институт ректоры Оңалбай Аяшев дәстүрге айналдырған.

– Нұржамал консерваторияның 5 курсында оқып жүргенде Қыз Жібектің рөлін сомдады. Сол қойылымнан кейін жазушы Ғабит Мүсірепов маңдайынан сүйіп «Міне, менің Қыз Жібегім дәл осындай болуы тиіс» деген. Қымбатты жастар! Өмірде зор жетістікке жету үшін үлкен қалада, мәдени ошақтың ордасында дүниеге келу шарт емес. Бойыңдағы талантты бағалау қажет. Бағым жансын деген әр жас арманына үлкен құштарлықпен талпынуы тиіс. Армандау керек және сол арманға жету жолында аянбай еңбек ету керек, – деді О. Аяшев.

Екі сағатқа созылған кездесуде ОҚМПИ жастары Қазақ академиялық опера және балет театрының соло-әншісі Н. Үсенбаеваның өнерін тамашап, өздерін қызықтырған сұрақтарға жауап алды.

«Бүгінгінің Қыз Жібегінен» ОҚМПИ қошеметін аямады. Айтыскер ақындар жұлдызы жанған қазақтың ерке, дара қызына арнап жырдан шашу шашса, оқу орнының ректоры О. Аяшев «ОҚМПИ профессоры» атағын құрметпен тапсырды.

– Бұл кездесу маған керемет әсер қалдырды. Опера әншісі ретінде осынша тыңдарманым барын білмеппін. Алдағы уақытта туған жерге жиі келетін боламын, – деді Н. Үсенбаева.

МҮГЕДЕК ЖАНДАР – МЕМЛЕКЕТ ҚАМҚОРЛЫҒЫНДА

Облыстық Орыс драма театрында ОҚО прокуратурасының бастамасымен және облыстық әкімдіктің ұйымдастыруымен «Мүгедектер» күніне орай «Біз біргеміз» атты акция өтті. Оған мекемелерден бөлек, белгілі кәсіпкерлер, облыстық мәслихат депутаттары және басқа да қонақтар қатысты.

Алғашқы қадамын қайырымдылықтан бастаған өңір басшысы Жансейіт Түймебаев облыс көлеміндегі атқарылған жұмыстарға баға беріп өтті.

– Денсаулыққа баса назар аударуымыз қажет. Бала анасының құрсағында жатқаннан оның дүниеге дені сау болып келуін қамтамасыз етуіміз керек. Ал науқас болып туған жағдайда дер кезінде көмек көрсетілсе, біздің облыстағы мүгедектер саны бүгінгіден де азаятыны сөзсіз. Жалпы, мүмкіндігі шектеулі жандардың жағдайын жасау шаралары облыстың шалғайдағы ауыл-аудандарында қарқынды жүруі тиіс, – деді Ж.Түймебаев
Ұйымдастыру шарасының бастамашысы болған Оңтүстік Қазақстан облысының прокуроры Ибраһим Иманов:

– Мемлекеттік қамқорлықтан бөлек, өңірімізде «Біз біргеміз» атты қайырымдылық акциясы жолға қойылды. Акция аясында және іс-шаралар жоспарына сәйкес кәсіпкерлер демеушілік жасап, 7 мүгедек жанға спорттық және электронды қол арбаларын сатып алуға көмектесті. Мүгедектер арасында волейболдан өтетін жарыстарда облыс намысын қорғап жүрген 12 спортшысы бар команданы түгелдей дерлік қажеттіліктермен қамтамасыз етті. 4 мүгедек ноутбуктармен, тағы 13-і білім арттыруға қажетті құрал-жабдықтармен қамтылды. Сондай-ақ, 57 мүмкіндігі шектеулі жандар жұмысқа алынды. Осы орайда, облыстық мәслихаттың депутаттары С.Сейітжанов, Қ.Балабиев, Қ.Молдасейітов, Н.Әбішев, М.Төлтебаев, Д.Ахметов сынды азаматтарға қайырымдылық шараларында белсенділік танытқаны үшін алғыс білдіреміз, – деді.

Мемлекет басшысының тапсырмасына сәйкес, 2016 жылы мүгедектерді әлеуметтік қолдау мақсатында облыстық бюджеттен 6 млрд 274 млн теңге жұмсалған. Нәтижесінде, 1566 нысандағы пандустың 403-і ретке келтіріліп, 44 жерге арнайы дыбыс беретін бағдаршам, 51 нүктеге арнайы жол белгілерінің көрсеткіштері, мүгедектерге арналған 13 автотұрақ салынды. Жеке кәсіпкерлердің қолдауымен 370, ал жұмыспен қамту орталығы арқылы 2114 мүгедек жан жұмысқа орналасты.

Шымкенттегі Шәмші Қалдаяқов атындағы «Арыс жағасында» VII ретро-фестивалінде VII Шәмші Қалдаяқов атындағы «Менің Қазақстаным» халықаралық ән байқауының жеңімпаздары марапатталды. «Шәмші әлемі» гүлзарында өткен салтанатты шарада облыс әкімі Ж.Түймебаев жеңімпаздарды марапаттап, оларға сый-сияпат жасады.

Халықаралық ән байқауының бас жүлдесіне қызылордалық Назым Сағынтай лайық деп танылды. І орынға Оңтүстік Қазақстан облысының намысын қорғаған Диана Хашимжанова ие болса, ІІ орын алматылық Тілекбай

Нағымбаев пен астаналық Еркебұлан Тұрмағамбетовке бұйырды. Ал астаналық Жалғас Сұлтанов пен Марат Айтымбай және Лаура Айтбаевалар (Қарағанды) жүлделі ІІІ орыннан көрінді.

Сондай-ақ, салтанатты шарада облыс әкімінің арнайы жүлдесімен Қытай Халық Республикасынан келген Асылхан Дәстүр марапатталса, арнайы диплом қырғызстандық Биназира Аблаеваға табысталды.

Ұрпақ тағдырына атүсті қарамайтын ұлағатты ұстаздардың ерен еңбегі елімізде лайықты бағаланады. Соның бір дәлелі ретінде «Мұғалімдер күні» мерекесіне орай, қала әкімі Ғабидолла Әбдірахымов ҚР Тәуелсіздігінің 25 жылдық мерекесі қарсаңында өз саласында елеулі еңбек етіп келе жатқан ұлағатты ұстаздарды марапаттады. «Rіхоs Kһadisһа» қонақүйіндегі салтанатты жиынға облыстық білім басқармасының, «Нұр Отан» партиясының өкілдері, қалалық мәслихат депутаттары, ардагер ұстаздар, қаладағы 129 жалпы орта білім беру, 88 мектепке дейінгі және 8 қосымша білім беру мекемелерінің басшылары қатысты.

Жиынға қатысушыларға алдымен, LED-экран арқылы арнайы дайындалған фильм және облыстық драма театры ұжымының орындауында көрініс ұсынылды. Мерекелік шарада саналы ғұмырын ұрпақ тәрбиесіне арнаған 6 мұғалім Шымкент қаласы әкімінің «Алғыс хатымен» және арнайы сыйлығымен марапатталды.

– Шәкірттерге білім беріп, жақсы қасиеттерді бойына дарытатын және алдағы жарқын өміріне бағыт-бағдар көрсететін ол, ең алдымен – мұғалім. Сол себептен де, ұрпақ тәрбиесі жолында қызмет етіп келе жатқан ұстаздардың атқарар рөлі ерекше. Бүгінгі қоғамда, ұстаздар күні – орны бөлек, дәрежесі биік, ең ұлық та ұлағатты мереке. Ұлт болашағын қалыптастыруда уақытпен санаспай атқарған қажырлы еңбектеріңіз үшін ұстаздар, сіздерге алғыс білдіремін, – деді Ғабидолла Рахматоллаұлы.

Сондай-ақ, салтанатты жиында шәкірттеріне тәрбие тағылымын дарыта білген ұстаздар қауымына облыстық білім басқармасының, Шымкент қалалық мәслихатының және «Нұр Отан» партиясы қалалық филиалының «Алғыс хаттары» табыс етілді. Айта кетейік, қазіргі таңда, Шымкент қаласындағы барлық педагогтар саны – 16 мыңнан асады.

Арнайы тағайындалған марапат пен сый-сияпатты қабыл алған ұстаздар өз өнерін ұсынған шәкірттерімен қосыла ән шырқады.

Халқымыз қариясын қазынаға балайды. Үлкенді ақылдың кені санап, құрмет көрсетеді. Сол бір тамаша дәстүр Қарттар күні жалғасын тапты.

Мереке күні ардагерлеріміз «Алтын сарай» мейрамханасында бас қосты. Шымкент қаласы әкімдігі ұйымдастырған шара жоғары деңгейде өткізілді. Қала басшысы Ғабидолла Әбдірахымов қариялар мен ақжаулықты аналарды мейрамымен құттықтады.

– Сіздерді БҰҰ Бас Ассамблеясы қарттар күні деп жариялаған, бүгінгі мейірім мен ізгілік мерекесімен шын жүректен құттықтаймын. Бәріңіз кейінгі ұрпақты ізгілік пен мейірбандылыққа, Отанымызға адал қызмет етуге үйретіп келесіздер. Араларыңызда бүгінге дейін ел игілігі үшін түрлі қоғамдық ұйымдарда еңбек етіп жүргендер аз емес. Сіз бен біздің қолдауымызға мұқтаж жандардан жүрек жылуын аямайық.Сіздерге зор денсаулық, берекелі ұзақ ғұмыр тілеймін. Әрқашан ықыласқа бөленіп, арамызда жүре беріңіздер! – деді Ғ. Әбдірахымов.

Бүгінде Шымкентте 70 мыңға жуық зейнеткер, соғыс және еңбек ардагерлері бар. Олардың 8 мыңы көпбалалы аналар, 141-і Ұлы Отан соғысының ардагерлері.

Қазіргі таңда Шымкентте 70 мыңға жуық зейнет жасындағы қарттар мен ардагерлер тұрады. Қала әкімдігі ардагерлерімізді ардақтап, оларды қашанда, қамқорлық аясынан тыс қалдырған емес. Осының айғағындай, мерекелер кезінде қарттарымызға түрлі әлеуметтік көмек көрсетіліп келеді. Сондай-ақ қалалық жұмыспен қамту және әлеуметтік бағдарламалар бөлімі тарапынан ҰОС мүгедектеріне, қаза болған әскери қызметкерлердің отбасына, тыл еңбеккерлеріне, ҰОС қатысушыларына теңестірілгендерге әлеуметтік көмектер берілді.

Салтанатты шарада сөз алған қалалық ардагерлер кеңесінің төрағасы И. Рысбай қарияларға жылы лебізін жеткізді.

– Біз жыл сайын мерекені атап өтуді жақсы дәстүрге айналдырдық. Жастық жалыны мен бойындағы күш-жігерін елдің дамуына жұмсаған қарияларымызды бүгінде жас буынның қамқорлыққа алып, сыйлауы орынды. Оларға қамқорлығымызды көрсету – біздің басты міндетіміз, – деді.

Қариялар мерекелік дастарханда бас қосып, арқа-жарқа болды.

Ш. Қалдаяқов атындағы «Тұмар» фольклорлық ансамблі, халықаралық байқаулардың жүлдегері Асыл Жандәулетов қарияларымызға әннен шашу шашты.

Осы орайда аға буын өкілдері мерекені ұйымдастырғандарға алғыстарын айтып, елімізде бейбітшілік пен тұрақтылық баянды болсын деген тілектерін жеткізді.

Шымкентте «Үлгілі отбасы» байқауының жеңімпаздары анықталды. Шымкент қалалық ардагерлер кеңесі мен қалалық ішкі саясат бөлімі сайысты биыл екінші рет ұйымдастырып отыр. Байқау отбасының мәртебесін биіктету, қарттарды құрметтеуге бағытталған.

Байқауда бес отбасы өз өнерлерін көрсетті. Жиында Шымкент қалалық ардагерлер кеңесінің төрағасы Исамуддин Рысбай отбасы құндылығын сақтау маңызды екенін, қазіргі кезде салт-дәстүрден ажырап бара жатқанымызды атап өтті.

Отбасы мүшелері сайыс барысында шашбау тағу, тұсаукесер, беташар сынды дәстүрлерімізді жаңғыртты. Одан бөлек, салт-дәстүрлер бойынша қойылған сауалдарға жауап берді.
Шымкент қалалық ардагерлер кеңесі төрағасының орынбасары Әбдіманап Ақмолда бастаған қазылар сайыстың қорытындысын шығарды.
Сонымен, биылғы байқаудың жеңімпазы – Қансейітовтер отбасы. Үлгілі отбасыға 200 мың теңге қаржылай сыйақы берілді. Әбілхановтар отбасы екінші (150 мың), Қанаевтар отбасы үшінші орынды (100 мың) иеленді. Сондай-ақ, Әлназаровтар отбасы ынталандыру сыйлығымен (10 мың) марапатталды.

Ел Тәуелсіздігінің 25 жылдығы және өзбек этносының тілі, мәдениеті және салт-дәстүрі күніне орай "Абай" саябағында «Алтын күз» мерекелік іс-шарасы ұйымдастырылды. Салтанатты шарада облыс әкімінің орынбасары Ұласбек Сәдібеков, Қазақстан Республикасының Өзбекстан Республикасындағы Төтенше және Өкілетті елшісі Ерік Өтембаев сөз сөйлеп, қоғамдық келісім мен елдің бірлігі мемлекетіміздің басты байлығы екендігін атап өтті.

Елдегі тұрақтылықты, қазақстандық бірегейлік пен бірлікті нығайту мақсатында өткен шараға Өзбекстандағы қазақ мәдени орталығының өкілдері, Қазақстан халқы Ассамблеясының мүшелері, облыстық этномәдени бірлестіктер төрағалары, өзбек этномәдени бірлестігінің аудан, қалалардағы филиалы басшылары мен өкілдері, өзбек халқының зиялы қауым өкілдері қатысты. Мерекелік жиында ынтымақтың ұйытқысы болып жүрген азаматтар Қазақстан халқы Ассамблеясының және облыс әкімінің «Алғыс хатымен» марапатталды.