Шымкент келбеті

Қала күні мерекесінде Шымкенттің өсiп-өркендеуiне үлес қосқан азаматтар марапатқа ие болды. Оларға қалалық мәслихаттың шешiмiмен «Шымкент қаласының Құрметтi азаматы» атағы берілді.

Енді «Құрметтi азаматтар» қатарына тағы 10 адам қосылып отыр. Қала күнi мерекесiнде марапатталған азаматтар:

• Балабиев Қайрат Рахымұлы, «Әлем-БТ» ЖШС жобасының үйлестiрушiсi.
• Бейсеев Әнуарбек, «Ұстаз нұры-информ» газетiнiң бас редакторы.
• Егiзбаев Мұқан Кеңесбекұлы, ОҚО ДСБ «Облыстық клиникалық ауруханасы» МКҚК- ның бас дәрiгерi.
• Жүзбаева Нәбира Жүзбайқызы, зейнеткер, байырғы ұстаз.
• Көлбаев Ошақбай Оспанұлы, зейнеткер, Шымкент қалалық ардагерлер кеңесiнiң пленум мүшесi.
• Өмiрәлиев Әлiбек Кәденұлы, зейнеткер, ОҚО аумақтық сайлау комиссиясының төрағасы, Шымкент қалалық ардагерлер кеңесiнiң пленум мүшесi.
• Құрманбаев Алданазар, еңбек ардагерi.
• Сәрсенов Нұрдәулет Жұмағұлұлы, «Оңтүстiк капитал» Ассоциациясының бас директоры.
• Сұлтанбеков Әдiлхан Ысқақұлы, «Шымкент-Дезинфекция» ЖШС-нiң директоры.
• Темiр Өмiрбек Темiрұлы, зейнеткер, отставкадағы судья, Шымкент қалалық ардагерлер кеңесiнiң мүшесi.

Айта кетейiк, облыс орталығының «Құрметтi азаматы» атағын 95 азамат алған болатын. Қала әкімдігі мамандарының айтуынша, бұл атақ қаланың экономикалық-әлеуметтiк дамуына үлес қосқан азаматтарға қоғамдық ұйымдардың ұсынуымен, қалалық мәслихаттың шешiмiмен берiлiп келедi.

Шымкент қаласында 107 жастағы қария тұрады. Екі ғасырдың куәгеріне айналған Назым Мәмбетәлі жасы жүзден асса да әлі тың. Он ұл-қызынан 31 немере, 19 шөбере сүйіп отыр. Өткен аптада қала әкімі Ғ. Әбдірахымов шежірелі қарт тұрғынды арнайы құттықтады. Теледидар сыйлап, оған зор денсаулық, жанұясына бақыт тіледі. Бейбіт күндерімізді орнатуға үлес қосқан қазыналы қарттарымыздың барлығы ұзақ ғұмыр кешіп, аман болуына тілек білдірді.

Назым әже 1909 жылы Отырар ауданында дүниеге келген. Бізге ананың аппақ жаулығы – ана жүрегінің шексіз мейрімі мен кіршіксіз пейіліндей көрінді. Ал жүзін торлаған әжімдер басынан өткен аумалы-төкпелі тағдырынан хабар бергендей.

– Міне, өздерің көргендей аманмын. Алла денсаулық берсе, тағы осынша жасаймын,-деп әзілдеп қойды. Жүз жеті жасындағы өмірінде аштықты да, соғысты да, ұжымдастыру мен тәркілеуді де көрді. Ес білгеннен бастап еңбек етті.

– Соғыс жылдары тылда еңбек еттім. Қайда жұмсаса сонда бардық. Қолымыздан келгенше жеңісті жақындатуға өз үлесімізді қостық. Қазір Аллаға шүкір, балаларым, немере-шөберелерім қасымда. Ел аман, жұрт тыныш. Не ішемін, не киемін деп уайымдамайсың. Еңбекпен бәрін табуға болады, – деді Назым әжей ағынан жарылып.

Әшір қартпен бірге Назым әжеміз 10 ұл-қыз тәрбиелеп өсірді. Оқытты-тоқытты, бүгінде елдің азаматтары қатарында жүргеніне шүкіршілік етеді. Бүгінде өмірден ерте кеткен ұлының шаңырағындағы келіні Раяның аялы қамқорлығының арқасында ұрпақ рахатын көріп отыр.
Екі ғасыр куәсі болу оңай емес. Соған қарамастан ардақты ана қуатты. Ауырған кезі жоқ. Ол ұзақ жасаудың сырын бірінші кезекте еңбекпен байланыстырады. Сосын, дұрыс тамақтану мен күтімнің арқасы деп біледі.

– Анамыздың денсаулығы жақсы. 107-ге келсе де, бәрін таниды. Немере-шөберелерімен ой бөліседі – дейді қызы Күлсінай Әшірқызы.
Жақсылық пен жамандықты, бейнет пен зейнетті, қиындық пен қуанышты қатар көрген анаға қарап, қарттықтың ешқашан жаспен өлшенбейтініне, көңілдің қартаймайтынына көзіміз жетті. Айналасына шуағын түсіріп, шұғыласын шашып отырған Назым әжемізге біз де мықты денсаулық, немере, шөбере, неменелерінің қызығын көре беруді тіледік.

Бүгінде қалада жасы жүзден асқан 19 адам тұрады.

Қала күні қарсаңында Шымкент қаласының əкімі Ғабидолла Əбдірахымов №4 облыстық перинаталдық орталықта болып, ең жас азаматқа туу туралы куәлігін тапсырды.

«Қазығұрт» шағынауданында тұратын Асанова Ақбота мен Хансейіттің бұл жетінші сəбиі. Əкесі Ербатыр деп есім беріпті. Жыл басынан бері облыстағы 22 300-інші сəби болып дүние есігін ашып отыр.

– Бұған дейін бес қыз, бір ұлымыз бар еді, енді серік болып Ербатырымыз өмірге келді. Бойы 56 см, салмағы 3 келі 800 гр. Сəбиіміз екеуіміздің денсаулығымыз, көңіл күйіміз жақсы. Келіп, арнайы сыйлығын тапсырып, құттықтаған шаһар басшысына алғысым шексіз, – дейді батыр ана.
Қала әкімі нəрестеге ұзақ ғұмыр тілеп, балалар арбасы мен төсек-жабдығын сыйға тартты.

«ШЫРАЙЛЫ ШЫМКЕНТ» БАЙҚАУЫ МӘРЕСІНЕ ЖЕТТІ

Қала күні мерекесі қарсаңында «Шырайлы Шымкент» республикалық байқауының жеңімпаздары анықталды. Қалалық балалар мен жасөспірімдер сарайында өткен марапаттау рәсіміне қала әкімі Ғабидолла Әбдірахымов қатысты.

Байқауды Шымкент қаласы әкімдігінің тапсырысымен «Жаңа дәуір» қоғамдық бірлестігі ұйымдастырды. Журналистер мен блогерлер арасындағы байқау жеңімпаздары «Үздік баспасөз жарияланымы», «Үздік теле-радиобағдарламасы», «Үздік Интернет-БАҚ жарияланымы» және «Әлеуметтік желілер мен блог-посттардағы үздік жазба» номинациялары бойынша марапатталды.

– Бүгінгі «Шырайлы Шымкент» республикалық байқауының жеңімпаздарын марапаттау рәсімі қала күнін тойлау мерекесіне тұспа-тұс келіп отыр. Түрлі буын өкілдерін біріктіретін бұл тамаша және жарқын мереке барлық қалалықтар үшін сүйікті мейрамға айналған. Бүгінде Шымкент қарқынды дамып, ажарлана түсті. Қаланың көшелері мен саябақтары көркейіп, көз қызықтырады. Жаңа шағынаудандар салынып, тұрғын үйлер бой көтеруде. Бұл әрине, қала тұрғындарының еселі еңбегінің нәтижесі, – деп атап өтті Ғабидолла Рахматоллаұлы.

Байқаудың мақсаты – бұқаралық ақпарат құралдарында Шымкент қаласының әлеуметтік-экономикалық және мәдени дамуына бағытталған, қаланың туристік және инвестициялық әлеуетін насихаттайтын мақалалар жариялау, сюжеттер трансляциялау және әлеуметтік желілерде посттар жазу арқылы Шымкент қаласының имиджін қалыптастыру. Сонымен қатар, бұқаралық ақпарат құралдарының ақпарат таратудағы үлесін, журналистер мен блогерлердің кәсіби ынтымақтастығын арттыру. Ұйымдастырушылардың айтуынша, байқауға қатысушылар қаланың жаңаша келбетін көрсетуге, жаңа қырын танытуға талпынғаны байқалады.

Сонымен, «Үздік Интернет-БАҚ жарияланымы» номинациясы бойынша І-ші дәрежелі диплом «TENGRINEWS.KZ» ақпараттық порталына берілді. ІІ-ші дәрежелі дипломмен OTYRAR.KZ ақпараттық медиа-порталы марапатталды. ІІІ-ші дәрежелі дипломға «BNEWS.KZ» – қазақ ақпараттық агенттігі лайық деп танылды. «Nur.kz» ақпараттық порталының тілшісі Алиса Масалева «Ең көп оқылған мақала» номинациясын иеленді.

«Үздік теле-радиобағдарламасы» номинациясы бойынша І-ші дәрежелі диплом «24 KZ» ақпараттық телеарнасына, ІІ-ші дәрежелі диплом «Айғақ» және «TVK» телеарналарына берілді.

«Үздік баспасөз жарияланымы» номинациясы бойынша І-ші дәрежелі диплом қалалық «Панорама Шымкента» газетінің тілшісі Галина Германға табыс етілді. ІІ-ші дәрежелі дипломмен «Оңтүстік Қазақстан» қоғамдық-саяси газетінің тілшісі Жәмила Мамырәлі, ІІІ-ші дәрежелі дипломмен Оңтүстік Қазақстан облыстық сотының баспасөз хатшысы Қабыл Дүйсенби марапатталды.

«Әлеуметтік желілер мен блог-посттардағы үздік жазба» номинациялары бойынша І-ші дәрежелі диплом Әсет Әссандиге бұйырды. ІІ-дәрежелі диплом Руслан Сембиев пен Асхат Шотаевқа, ІІІ-дәрежелі диплом Мейірман Сауранбековке берілді.
Байқау жеңімпаздары мен жүлдегерлері бағалы сый-сыяпаттарға ие болды.

Шымкентте Қазақстан Республикасының Конституция күніне арналған «Айбары мықты – Ата заң» атты салтанатты іс-шара өтті. Оған облыс әкімі Бейбіт Атамқұлов, қала әкімі Ғабидолла Әбдірахымов, мәслихат депутаттары мен қала тұрғындары қатысты.

Салтанатты шара Ата заң туралы бейнероликтен басталды. Облыс халқын осы айтулы күнмен облыс басшысы арнайы құттықтады.

– Еліміздің Ата заңы – Конституция күнімен шын жүректен құттықтаймын. Халқымыздың сан ғасырлар бойғы асыл арманы орындалды. Осыдан 21 жыл бұрын әлемдік өркениеттің шыңына ұмтылған Қазақстан тарихи, тағдырлы шешім қабылдады. Жасампаз, жаңа дәуірге қадам басты. Сол күннен бастап Ата заң біздің бүкіл жарқын істеріміздің қайнар бастауына айналды. Конституциямыз жаңа дәуірдегі еліміздің қуатты мемлекетке айналуына кепіл болады деп сенемін, – деді облыс әкімі.

Сондай-ақ, өңір басшысы ел Тәуелсіздігіне 25 жыл толуына орай, облысымызда 25 мектеп, 25 спорт алаңшасы пайдалануға берілетінін, 25 елдімекен тұрғындары ауызсу, көгілдір отын, жарықпен қамтылатынын, 25 инвестициялық жоба жүзеге асырылатынын мәлімдеді. 

Салтанатты шарада Бейбіт Бәкірұлы өңірдің өсіп-өркендеуіне үлес қосқан әр саладағы үздік қызметкерлерді «Облысқа сіңірген еңбегі үшін» төсбелгісімен, облыс әкімінің Құрмет грамотасымен, Алғыс хатымен марапаттады. 

Шара соңы жергілікті өнерпаздар дайындаған мерекелік концертке ұласты.

Облыс әкімі Бейбіт Атамқұлов Рио Олимпиадасының жүлдегерлері – Жазира Жаппарқұл мен Отгонцэцэг Галбадрахты қабылдап, сый-құрмет көрсетті.

Күміс жүлдегер Жазираға «Нұрсәт» шағынауданынан екі бөлмелі пәтер және «Toyota Land Cruiser 200», ал дзюдошы қызға – бір бөлмелі пәтер мен «Toyota Land Cruiser Prado» көлігі берілді. Көңілдері алып-ұшқан қос спортшы да ел ағаларына дән риза.

– Жетістік оңайлықпен келмейді. Жарқын жеңіс келесі Олимпиадада жалғасады деп сенеміз. Бұл сый-сияпатты бүкіл Оңтүстік жұртшылығының атынан берілген алғыс деп біліңіздер. Жолдарың әрдайым ашық болсын, – деді Б.Атамқұлов жүлдегерлерді құттықтап. Өңір басшысы ОҚО денешынықтыру және спорт басқармасының басшысы Әлібек Нұртаевтың да еңбегін атап өтті.

Жазира көптің көзінше пәтерін ата-анасына сыйлайтынын айтты. Ал көлікті өзі жүргізбек. Дайындыққа қаңтар айында кіріседі. Кездесуге келген жеңімпаз қыздың әкесі Әбдірахман Құдайқұловтың көңілі толқып тұр. Жазирасы халықтың қызына айналғанына куә болу үлкен қуаныш.

– Елбасыға, облыс басшыларына рақмет. Жазирам халқының қызы болды ғой. Келесі Олимпиадада алтын аламын деп айтты. Тіл-көзден аман болса, ол арманына жетеді деп сенемін, – дейді көңілі толқыған әке.

Дзюдошы Отгонцэцэг Галбадрах бір ай тынығып, жаттығуға қайта кіріседі. Жаңа жылдан бастап Гранд-Слам, Гран-при жарыстарына қатысады. Келесі жылғы басты сын – әлем чемпионаты. Қос батыр қыз да енді алдағы жарыстарға тыңғылықты дайындалмақ.

«Түркістан» сарайында «Білімді ел – мәңгі ел» тақырыбында өткен білім беру қызметкерлерінің тамыз кеңесінде облыс педагогтары бас қосты. Алқалы жиынға облыс әкімі Бейбіт Атамқұлов, ҚР Білім және ғылым министрлігінің Білім және ғылым саласындағы бақылау комитеті төрағасының орынбасары Талғат Ешенқұлов, облыстық білім басқармасының басшысы Қуандық Құлажанов, аудан-қала әкімдері мен білім саласының қызметкерлері қатысты.
Тамыз кеңесінде алдымен сөз алған облыстық білім басқармасының басшысы Қуандық Құлажанов облысымызда жыл басынан бері 67 білім нысанының құрылысы жүргізіліп жатқанын жеткізді.
– Оның 30-ы пайдалануға берілсе, тағы 9-ы жыл соңына дейін оқушыларды қабылдауға сақадай-сай болмақ. Ал қалған нысандардың құрылысы келер жылы аяқталады, – дейді облыстың бас педагогы.

25 ЖЫЛДЫҚҚА – 25 ЖАҢА МЕКТЕП

Былтыр облысымыздағы 1022 мектепте 584 мыңнан астам оқушы білім алса, олардың қатары биыл 27 мыңға артқалы отыр. Оның 164 мыңы Шымкент қаласының оқушылары. Жыл өткен сайын бала санының еселеп артуына, демографиялық өсімнің көбеюіне байланысты орын тапшылығы да туындап жатқаны жасырын емес. Тамыз кеңесінде баяндама жасаған облыс әкімі Бейбіт Атамқұлов ел Тәуелсіздігінің 25 жылдығына орай 25 жаңа мектеп оқушыларға есігін айқара ашатынын мәлімдеп, қуанышты жаңалықпен бөлісті. Бұл білім ордаларында 10 мыңға жуық оқушы білім нәрімен сусындамақ. Ал қала аумағында «Қаратөбе» шағынауданында 600 орынды, «Ынтымақ» шағынауданында 900 орынды жаңа білім ұясы пайдалануға беріледі.
– Облысымызда халықтың демографиялық өсімі жылдан-жылға жоғарылап келеді. Сол мақсатта өңірдегі үш ауысымға өту қаупі бар, тар ғимараттардың орнына 2017-2020 жылдар аралығында 205 мектеп салынуы керек, – деді облыс әкімі Бейбіт Атамқұлов.

69 МЫҢ БҮЛДIРШIН БАЛАБАҚША КЕЗЕГIНДЕ ТҰР

Өңірде балабақша мәселесі де өзекті болып тұр. 1500-ден астам мектепке дейінгі ұйымда 1 мен 6 жас аралығындағы 168 мың бала тәрбиеленуде. Балаларды балабақшамен қамту 82,3 пайызды құрап, республикалық көрсеткіштен 0,3 пайызға артса да, әлі 69 мың бала кезегін күтіп жүр. Облыс әкімі Бейбіт Атамқұлов 2020 жылға дейін 177 балабақша ашылатынын жеткізді. 

– Бұл мәселені шешу үшін біз жаңа қадамдарға баруымыз қажет. Күні кеше ғана облысымызға жұмыс сапарымен келген Премьер-Министр Кәрім Мәсімовтің қатысуымен алқалы жиын өтті. Сол жиында мектепке дейінгі ұйымдар мен білім мекемелерін мемлекеттік-жекеменшік әріптестік жүйесіне көшіру мәселесі көтерілді. Айта кетейін, біздің облыс бірінші болып балабақша жүйесін мемлекеттік-жекеменшік әріптестік шеңберінде кеңейтуді қолға алды. Былтыр осындай қолдаудың нәтижесінде 70 мектепке дейінгі ұйым ашылды. Жүйелі жұмыс ары қарай да өз жалғасын табатын болады, - деді облыс әкімі.
Ал Шымкентте 2015 жылы 4 мемлекеттік, 39 жекеменшік балабақша ашылған. Бұл сандардың қатары осы жылы да артары анық.

ПСИХОЛОГТАРҒА БІЛІКТІЛІК ЖЕТІСПЕЙДІ

Тамыз кеңесінде тек жетістіктер ғана жіпке тізілген жоқ, кемшіліктер де ортаға салынды. Соңғы жылдары Оңтүстік Қазақстан облысында кәмелетке толмаған жасөспірімдер арасында суицид оқиғалары жиілеген. Осы жылдың 7 айында 49 оқиға тіркеліп, 22 жасөспірім өмірмен қоштасқан. Бүгінде өңірдің түкпір-түкпіріндегі білім ордаларында жұмыс істеп жатқан психологтардың 66 пайызға жуығы жоғары оқу орнын сырттай бітірген мамандар екен.
– Сырттай оқып, қолына диплом алған психологтардың басым бөлігінің біліктілігі жоғары емес. Біздің психологтар суицидке бейіл балаларға алдын ала диагнозды дұрыс қоя алмайды. Әр баланың өз мінез-құлқын, табиғи болмысын, отбасылық жағдайын жете зерделемейді. Бұдан бөлек біздің облысымызда жұмыс істеп жүрген екі ғана суицидолог бар. Бұл өте аз. Егер өзіне-өзі қол жұмсау фактілері көбейіп кетсе, сол мектепке психологты жұмысқа алған директор да жауапты болуға тиіс. Әр баламен жеке дара, сондай-ақ, олардың ата-аналарымен бірлесе жұмыс атқару керек. Біз бүгін орын алып отырған кемшіліктерді де айтып өтуге тиіспіз, – деді Бейбіт Атамқұлов.

ҮШ ҰСТАЗҒА ПӘТЕР КIЛТIН ТАПСЫРДЫ

Білім беру саласы қызметкерлерінің облыстық тамыз педагогикалық кеңесінде облыс әкімі Бейбіт Атамқұлов үш мұғалімге пәтер кілтін тапсырды. №66 «Қазығұрт» жалпы орта мектебінің дене шынықтыру пәні мұғалімі Бағлан Баймаханов 3 бөлмелі пәтердің кілтін алса, №23 мектеп-лицейдің тарих пәні мұғалімі Жанар Мұстафаева мен №55 жалпы орта мектебінің бастауыш сынып мұғалімі Муккарам Тұрғынова 2 бөлмелі пәтердің кілтіне ие болды. Енді олар «Нұрсәт» шағынауданындағы жаңадан салынған көпқабатты үйдің тұрғындары атанбақ.

Бұл қуанышты сәт бар уақытын сарп етіп, ел ертеңі саналатын ұл-қыздарды тәрбиелеп, аянбай тер төгіп жүрген ұстаздар қауымын бір серпілтіп тастады.
– Шынымды айтсам, ерекше толқып тұрмын. Мен үшін ерекше есте қалатын тарихи сәт. Ұстаздық атты ұлы жолды таңдағаныма өкінбеймін. Алты жылдан бері сабақ беріп келемін. Барлық мұғалімдер осындай бақытқа кенелсін деп тілеймін, – дейді Бағлан Баймаханов.
Бұдан бөлек, үздік нәтижеге қол жеткізіп, біліктілігімен көзге түскен ұстаздар Білім және ғылым министрлігінің, облыс әкімінің Алғыс хатымен, Ыбырай Алтынсарин атындағы төсбелгімен марапатталды.
Екі сағаттан астам уақыт ішінде баяндама жасаған, жарыссөзге шыққан азаматтар дарынды, білімді ұл-қыздарды тәрбиелеу әдістерімен бөлісіп, орта білімнің жаңартылған мазмұнына көшу, ұстаздың қоғамдағы рөлін көтеру жайын талқылады. Ұстаз ұлы есім, әрбір жанның өміріне жол сілтейтін шамшырақ, жарық жұлдыз секілді. Әріп танытып, өмір сүруге баулыған мұғалімге бас имейтін жан жоқ шығар, сірә. Ендеше, сөз соңын ұлағатты ұстаздарға толағай табыс тілеп, түйіндейміз.

Шымкент қаласының әкімі Ғабидолла Әбдірахымов Байланыс және ақпарат қызметкерлері күні мерекесіне орай бірқатар журналистерге құрмет көрсетті. Қаланың әлеуметтік-экономикалық дамуында елеулі еңбек етіп жүрген БАҚ өкілдері «Barvilla» мейрамханасында бас қосты.

Қала әкімі Ғабидолла Рахматоллаұлы көпшілікті мерекемен құттықтап, қаланың түрлі саладағы жетістіктерін нәсиxаттап жүрген бірқатар журналистерді марапаттады.
– Қала өміріндегі елеулі оқиғаларды бұқараға жылдам әрі жан-жақты жеткізіп жүргендеріңізге алғыс айтамын. Бүгінгі қоғамдағы түйткілді мәселелерді шешуде бұқаралық ақпарат құралдарының орны зор. Сіздер халық пен билік арасында «алтын көпір» бола білдіңіздер. Сіздерге шығармашылық жетістіктер тілеймін! – деді қала әкімі.

Мерекелік кеште қала әкімінің арнайы Алғыс xаты «ТВК» телеарнасы директорының орынбасары Ринат Хамидуллинге, республикалық «Қазақ әдебиеті» газеті және «Жас Алаш» газеттерінің Оңтүстік Қазақстан облысындағы меншікті тілшісі Ғалымжан Елшібайға, «Оңтүстік Қазақстан» газетінің бұқарамен байланыс бөлімінің меңгеруші Жеңіс Баһадүрге және тағы басқа азаматтарға табыс етілді.

Сонымен бірге, қалалық мәслихат хатшысы Нұрлан Бекназаров та белсенді БАҚ өкілдерінің еңбегін атап өтті.
Қала өмірінің тыныс-тіршілігін насихаттауда «Шымкент келбеті» және «Панорама Шымкента» газеттерінің де үлесі зор. Әдеттегідей, қала әкімдігі әріптестеріміздің еңбегін назардан тыс қалдырған жоқ. «Шымкент келбеті» газеті бас редакторының орынбасары Сәбит Тастанбекұлы қала әкімінің, «Панорама Шымкента» газетінің жауапты хатшысы Әсел Хамзина қалалық мәслихаттың Алғыс хатын иемденді.

Осы аптада байланыс және ақпарат саласы қызметкерлері төл мерекесін атап өтті. Сөздің құдіретін сезінген, ақпарат айдынының жаршысы бола білген журналистер, баспа ісінің үздіктерінің еңбегі еленді.
Қаламгерлер – қоғам айнасы. Елдің руханияты мен мәдениетіне, әлеуметтік-экономикалық дамуына ерекше үлес қосатын да осы сала өкілдері. Облыс әкімі Бейбіт Атамқұлов «Grand Holidayhall» мейрамханасында өңіріміздің дамуына еселі еңбек еткен БАҚ қызметкерлерін құттықтап, бағалы сыйлықтармен марапаттады.

Бәрі де өз ісінің майталмандары, жас ұрпақты тәрбиелеуде жанкешті еңбек етіп жүргендер. Бұқаралық ақпарат құралдарының көп шоғырланғаны да Оңтүстік өңірі екені белгілі.
Облыс әкімі Б.Атамқұлов пен облыс әкімінің орынбасары Ұ.Сәдібеков, облыстық мәслихат хатшысы Қ.Айтөреев өңірдің қоғамдық-саяси, әлеуметтік-экономикалық және мәдени тыныс-тіршілігін белсенді насихаттаған, қоғамдық сананы қалыптастыруға үлес қосқан азаматтарға лайықты құрмет көрсетті.
– Журналистика – қоғамды тәрбиелейтін, оның санасын өзгертіп, өсіретін негізгі күш. Баспасөз бетінде батыл жазатын әр адам құрметке лайық. Қоғамның дамуына да ақпарат саласы өкілдерінің қосар ықпалы зор. Сіздер – Президентіміздің жасампаз идеяларының төңірегіне қоғамды топтастыру, ұлтты ұйыстыруға зор үлес қосып келесіздер. Алдағы уақытта да егемен еліміздің игілігі үшін жемісті еңбек ете берулеріңізге тілектеспін, – деді облыс әкімі құттықтау сөзінде.
Төл мерекелерінде жалпы 100-ден астам қаламгер сый-құрметке бөленді. Атап айтқанда, «Оңтүстік Қазақстан» газеті бас редакторының бірінші орынбасары қызметін атқарған ардагер журналист Асхан Майлыбаева мен облыс әкімдігінің фототілшісі Хусан Азизов «Облысқа сіңірген Еңбегі үшін» медалімен марапатталды.

БАҚ-тағы Үздік жарияланым аталымы бойынша да марапаттар өз иелерін тапты. Тәуелсіздігіміздің 25 жылдығын кеңінен насихаттағандардың қатарында «Айғақ» телеарнасы, ал басылымдар арасында «Жанубий Қозоғистон» газеті үздік шықты.
Биылғы «Алтын қауырсын» аталымы «Южный Казахстан» газетінің тілшісі Алиса Масалёваға, тележурналистер арасындағы «Алтын микрофон» номинациясы «ТВК» телеарнасы директорының орынбасары Ринат Хамидулинге бұйырды.
Журналистерге ҚР Ақпарат және коммуникациялар министрлігінің «Ақпарат саласының үздігі» төсбелгісі де берілді. Бұл номинацияның иегерлері – «Қазақстан-Шымкент» телеарнасының бас режиссері Арыстан Отарбаев пен «Оңтүстік Қазақстан» газеті бас редакторының орынбасары Ертай Бекқұлов.
Бұдан бөлек, «Отансүйгіштік мемлекеттік рәміздерді құрметтеуден басталады» атты ҚР Мемлекеттік рәміздері туралы бұқаралық ақпарат құралдарындағы үздік жарияланымдар мен Ел Тәуелсіздігінің 25 жылдығына арналған «Облыстың дамуы фотограф көзімен» фотоконкурсының жеңімпаздарының да есімі белгілі болды.
Мерекелік жиында облыстық ішкі саясат басқармасының басшысы Болат Төлеген, Қазақстанның құрметті журналисі Байдулла Қонысбек, Халықаралық Алаш сыйлығының иегері Мархабат Байғұт та құттықтау тілегін арнап, жеңімпаздарға сый-құрмет көрсетті.

Ақпарат саласы – бәсекелестіктің нағыз қайнаған ордасы. Сөз бәйгесінде үздік шыққандардың арасында «Шымкент келбеті», «Панорама Шымкента» газеттерінің қызметкерелері де бар. БАҚ саласында еселі еңбек етіп жүрген «Шымкент келбеті», «Панорама Шымкента» газеттерінің Директор-Бас редакторы Айгүл Қапбарова облыс әкімінің Құрмет Грамотасын иеленді. «Панорама Шымкента» газеті бас редакторының орынбасары Эльмира Бердіғалиеваға Қазақстан Журналистер одағының Алғыс хаты табысталды. Сонымен қатар, ҚР Мемлекеттік рәміздері туралы бұқаралық ақпарат құралдарындағы үздік жарияланымдар бойынша «Шымкент келбеті» газетінің тілшісі Тағабай Қасымов, Ел Тәуелсіздігінің 25 жылдығына арналған фотоконкурста тағы бір әріптесіміз Әйгерім Бегімбет жүлдегер атанды. «Панорама Шымкента» газетінің беттеуші-дизайнері Медет Самылтыров та Жұмамұрат Тұяқбаев атындағы арнайы сыйлыққа ие болғанын айта кетейік.
Бүгінде өңірімізде 253 бұқаралық ақпарат құралдары халыққа қызмет көрсетіп келеді. Оның 175-і газет, 48-і журнал, 13-і телеарна болса, ғаламтор бетінде 13-і сайт және әуе толқынында 4 радио жұмыс істейді. Жалпы еліміздегі бұқаралық ақпарат құралдарының шамамен 30 пайызы Оңтүстік Қазақстан облысына тиесілі.

Оңтүстік Қазақстан облысының әкімі Б. Атамқұлов ҰБТ барысында жоғары нәтиже көрсеткен «Алтын белгі»  иегерлерін салтанатты түрде марапаттады.

Кеш барысында өңір басшысы түлектерге: «Бұл қуаныш – 11 жылғы үздіксіз еңбектің жеңісі. Тәжірибелі ұстаздардың еңбегі және ата-аналардың ақ тілегі. Сіздердің биылғы жеңістеріңіз Тәуелсіздіктің 25 жылдығына тұспа-тұс келіп отыр. Сол Тәуелсіздігіміздің тірегі, егемен елдің ертеңі ретінде Сіздерге, болашақта мәңгілік елдің бір кірпіші болып қалануларыңызға шын жүректен тілектеспін», – деген жүрекжарды лебізін білдірді.
Айта кетейік, биыл облысымызда 31 288 оқушы мектеп бітірді. Оның ішінде 19 798 түлек Ұлттық Біріңғай тест тапсыруға өтініш беріп, 19 691-і тестке қатысты. Түлектердің сынақта жинаған орташа көрсеткіші – 77,96 балды құрады. Сынақ нәтижесі бойынша өңірдегі 6 түлек 125 балл жинаса, 124 балл жинаған оқушылар саны 18-ге жеткен. Оның 11-і Шымкент қаласынан, тағы төрт оқушы Арыс қаласынан, ал Ордабасыдан – 2, Мақтааралдан 1 оқушы бар. 36 оқушы Білім және ғылым министірлігінің бұйрығымен халықаралық олимпиада және ғылыми жоба жарыстарының жеңімпаздары ретінде ҰБТ тапсырудан босатылған. Ал 3 438 оқушы 100 балдан жоғары жинап, алтын белгіге үміткер 1 439 оқушының 581-і сенімді ақтаған.

Назерке ҒАЙБУЛЛАЕВА,
Қ. А. Ясауи атындағы ХҚТУ-нің студенті