Шымкент келбеті

Шымкентте Ішкі істер органының 25 жылдығына арналған салтанатты шара сала мамандарының қырағы қызметін ұлықтауға арналды. Жиынға қатысқан қала әкімі Ғабидолла Әбдірахымов қоғам тыныштығын күзеткен қызметкерлерді кәсіби мерекесімен құттықтап, ізгі лебізін жеткізді.

– Полиция қызметкері болу оңай емес. Ол үшін байыпты білім, шыныққан білек те, айбарлы жүрек те керек. Сабыр мен төзім, қажыр мен қайрат та қажет. Жылдам әрекет ету, ұстамды әрі сыпайы болу да маңызды. Погон әрине әдемі, бірақ оны тағып жүру үлкен жауапкершілікті жүктейді. Олай болса, осындай толып жатқан талаптың үдесінен шығу сіздерге міндет, – деді Ғ. Рахматоллаұлы.

Өз кезегінде, Шымкент қалалық ішкі істер басқармасының басшысы, полиция полковнигі Арман Бейсенбаев қоғамдағы полиция қызметкерінің еңбегін айрықша атап өтті. Сонымен қатар, жыл басынан бері тіркелген құқық бұзушылық саны біршама төмендегенін жеткізді. Тиісінше, мемлекет тарапынан саладағы материалдық базаны нығайту қызметі де артып келеді. Мәселен, 2014 жылы қала аумағында полицияның бар болғаны 29 учаскелік бекеті болса, қазір олардың саны – 68-ге жеткен. Сондай-ақ, қала аумағындағы 17 стационарлық бекетке қосымша тағы 10 бекет салу жоспарлануда. 2015 жылы жол полицейлерінің қызметінде бар болғаны 5 эвакуатор болса, бүгінде тағы 5 эвакуатор мен 30 «Киа Серато» көлігін сатып алуға қаржы бөлінген.

– Қазақстан полициясы күнінде жауапты қызметті абыроймен атқарып, қоғам тыныштығын күзеткен жандарға ризалық сезімін білдіріп, алғыс айтуға тиіспіз. Бастысы, бұл күн бейбіт уақытта жергілікті тұрғындардың тыныштығы мен қауіпсіздігі үшін өз өмірлерін құрбан еткендерге лайықты құрмет көрсету болып саналады, – деді Арман Арун-Рашидұлы.

Салтанатты шара барысында қала әкімі Ғабидолла Әбдірахымовқа «Қазақстан полициясының 25 жылдығы» естелік медалі табыс етілді. Сондай-ақ, ІІ дәрежелі «Айбын» орденінің иегері Тұрар Артықбаев пәтер кілтіне ие болды.

Бұл кеште қызметтік міндетін атқару кезінде қаза болған полицейлердің есімі аталып, марқұмдардың туыстарына сый-сыяпат тапсырылды.

«Біз тәуелсіздікке қол жеткіздік, енді сол тәуелсіздіктің касиетті белгілерін де ерекше қадірлеп, қастерлеуіміз керек. Әрбір азамат Қазақстанның Туын, Елтаңбасын, Әнұранын тұмардай қасиет тұтуы кажет, Елдігіміздің сыналатын бір тұсы осы». 

Нұрсұлтан Назарбаев, ҚР Президенті

Жер бетіндегі барша халықтың, барлық мемлекеттің өзіндік бет-бейнесімен қатар ұлттық рәміздері аталады. Тіпті, желбіреген Байрағы, жарқыраған Елтаңбасы, ұрандаған Гимні сол ұлттың бітім-болмысын, жаратылысын әйгілеп тұратындай. Сол себепті де әркім өзінің рәмізімен мақтанады, рәмізімен қуанады. Жастарды отансүйгіш, патриот етіп тәрбиелеудің негізгі жолы – ұлттық рәміздерді насихаттау.

Ұлттық рәміздеріміздің тарихы ерте замандардан басталады. Өзге халықтар секілді қазақ елінің де әрбір ру-тайпасының өзіне тән таңба белгілері, жалауымен қатар Гимні болған. Тәуелсіздік алып, етек-жеңімізді жинаған тұста мемлекеттік рәміздерді дайындау аса жауапкершілікпен қолға алынды. Елбасымыздың тапсырмасы бойынша құрылған Мемлекеттік кеңестің талқылауына Тудың – 1200, Елтаңбаның – 245, Әнұранның 750 нұсқасы ұсынылған екен. 

Бүгінде еліміздің мемлекеттік рәміздері дүниежүзіне кеңінен танылды. Қазақ елін осы рәміздеріміз арқылы әлемдік қоғамдастық толық мойындады. Аспанкөк туымыз БҰҰ-ның алдында және еліміздің шетелдердегі елшіліктері мен өкілдіктері орналасқан ғимараттарда желбіреп тұр. Сонымен қатар, әлемдік спорт бәсекелерінде еліміздің саңлақтары Әнұранымызды шырқап, Туымызды биіктерден көрсетіп жүр. Міне, бұл – тәуелсіздігіміздің, азаттығымыздың айқын көрінісі болса керек.

Рәміздер дегенде, жиі көзге шалынатыны, әрине, елдің байрағы. Ертеректе елдің байрағы бейбіт кезде құрметпен сақталып, тек жаугершілік кезде ғана шығарылған. Тудан айырылу ер-азамат үшін өліммен тең болған. Даңқты қолбасшы, қазақтың көрнекті жазушысы Бауыржан Момышұлының: «Ту – қасиет! Ту – әскерлердің ар-намысы!» – деуі соның дәлелі. 

1992 жылдың 4 маусымы ел тарихына алтын әріптермен жазылған айтулы күн. Өйткені дәл осы күні Қазақстан Республикасының Жоғары Кеңесі тәуелсіз елдің мемлекеттік Туы мен Елтаңбасын бекітті. Дәл осы күні Тұңғыш Президент Нұрсұлтан Әбішұлы Назарбаев көк Туға тағзым етті. Ал «Қазақстан Республикасының Мемлекеттік рәміздері туралы» Конституциялық заңы 2007 жылы 4 маусымда қабылданды. Осы заңға сәйкес, жыл сайын 4 маусым елімізде Мемлекеттік рәміздер күні ретінде мерекеленеді. Ортасында күн, оның астында қалықтаған қыран, сабының тұсында ұлттық өрнек нақышталған Туымыз әрқашан биіктен көрінсін, асқақтасын деген тілек көкейді кернейді. Тарих беттеріне көз жүгіртсек, сондай бір қиын-қыстау кезеңде ұлы дана бабаларымыз Төле би, Қазыбек би, Әйтеке би маңызды жиыннан кейін, Әбілхайыр хан үш жүздің басын қосып, Бөгенбай батырға қазақтың туын ұстатқан деген дерек бар.

Шындығында, рәміз – мемлекеттің төлқұжаты. Сол себепті, әрбір жасқа Отан, Қазақстан, туған жер мен ел туралы толық түсінік беріп, дүниетанымын кеңейту кемел келешектің кілті саналады. Ал бойында еліміздің ұлттық рәміздері туралы мақтаныш сезімі қалыптасқан ұрпақтың Отанына деген адалдығының менмұндалап тұрары анық. 

Жуырда ғана интернет желісінен бір әдемі бейнетүсірілім көрдік. Онда Түркия көшелерінің бірінде ағайынды екі баланың желбіреген Туды сүйіп, маңдайына басқаны анық көрсетілген. Қос бүлдіршіннің отаншылдығы кеудеге мақтаныш сезімін ұялатады. Расында жас өскін балаларды отансүйгіштікке, адамгершілікке, ел мен жерге, мемлекетке адал қызмет етуге, елінің Туын, Елтаңбасын, Гимнін қастерлеуге, халқының тегін, тарихын білуге тәрбиелеу әрбір қазақстандықтың басты міндеті болуы тиіс. Сонда ғана еліміздің іргесі бүтін, шаңырағы берік бола түседі.

Ойды ой қозғайды. Осындайда «Көк тудың желбірегені» әні еріксіз ойға оралады. Әйгілі әннің авторы, ақын Алмас Ахметбек баспасөзге берген сұхбатында көк туымыздың көңіл толқытатын ерекше қасиеті барын айтады. 

– 1993 жылы азаттықтың он төртінші айында алғаш рет туған елімнің топырағына табаным тигенде, Қорғас бекетінен желбіреген Туымызды көрдім. Тудың құдіреті жүрегімді шарпып өткендей болды. Адамдардың асқақ сезімін аспаннан ағыл-тегіл шашып, мемлекеттілігі бар ел екенін меңзеп тұрған талай жұрттың желбіреп тұрған жалауын көріп жүрміз, бірақ сол сәтте көз алдымда тұрған ту мен үшін басқа еді. Ақында аяқасты келетін алақұйын сезім, шалқып келетін шабыт деген болады. Тап сол сәтте ту маған ғана арнап тіл қатып тұрғандай көрінді. Сондай көңіл күйдің әсерімен жазылған өлеңнің алғашқы шумағы:

– Көк тудың желбірегені
Бақыттың елжірегені,
Қиырда қалған қазақтың
Ата жұртына жете алмай
Көзінің мөлдірегені,  – деп өрілді.

Кейін сахнадан оқыған кезімде жарқ етіп, жай түсіріп өтетіндей отты өлең болғанын сезініп жүрдім. Кейін еліміздегі танымал сазгерлер бұл өлеңге әндер жаза бастады.

Елтаңбаға көз салсақ, күн сәулесі шарпыған көк аспанды шаңырақ, жұлдыз, қанатты тұлпар, бидай сабақтары әдіптегенін байқаймыз. Мемлекеттік Елтаңбаның негізіне шаңырақ бекерден бекер алынбаған. Өйткені, Елтаңбаның жүрегі іспеттес шаңырақ әлемнің біртұтастығын, мемлекеттің бастауы – отбасы ошағын бейнелесе, қанатты тұлпар мәңгілік өмір, шексіз даму және Қазақстан секілді бір шаңырақ астында өмір сүріп жатқан халықтардың рухани байлығының белгісі іспетті. Қанатты тұлпар болашаққа көз тіккен жас ұрпақтың асқақ арманы. Бес жарық жұлдыз Отанның бағы биіктеп, бақыты нұр шашып тұрғанын білдіреді. Бидай сабақтары – молшылықтың нышаны. Аспаны ашық, жұлдызы жарқыраған, шаңырағы биік, жеңімпаз, берекелі елдің перзенті болу әркімнің мақтанышы. 

Сондықтан елімізді, жерімізді, рәміздерімізді, Отанымызды құрметтеу, отаншылдық, патриоттық сезімін нығайту – әрбір азаматтың парызы! Туған жер деген киелі ұғымды әрбір қазақстандық құрмет тұтуға, қастерлеуге тиіс.

СІЗ НЕ ДЕЙСІЗ?

Алмас ӨТЕШОВ,
ауыр атлетикадан әлем чемпионатының күміс жүлдегері:

«Рәміздерді құрметтеу – баршаға міндеттелуі керек»

– Менің пайымдауымша, мемлекеттік рәміздерді сыйлау-сыйламау еліміздегі әр адамның еркінде болмауы тиіс. Өзім әнұранды білмейтін адамды құрметтемеймін. Елдің негізгі нышандарын құрметтеу – баршаға міндеттелуі керек. Еліміз Азаттыққа қолы жеткенше арғы бабамыз Күлтегін жазғандай, нешеме рет «қара терін төгіп, қызыл қанын ағызды». Міне, бүгінде сол зұлмат заманның бәрі де артта қалды. Ендігі міндет – елдік нышандарды әрбіріміз жиі дәріптеуіміз керек.

Берік СҰЛТАН,
блогер:

«АҚШ-та әнұранды шабыттана шырқадым»

– Өткен мамыр айында боксшымыз Қанат Исламды қолдап, АҚШ-тың Флорида штатына бардық. Сонда үлкен бокс аренасында əнұранды орындадық. Көңілім толқып, рахаттанып айттым. Айтқанда да айқайлап, жан-жағыма естіртіп айттым. Шетелде көк туды ұстап, əнұран орындау деген басқаша сезім екен. Меніңше, мемлекеттік рәміздер, бұл – елдігіміздің ең басты тірегі.

Шымкент қаласы әкімдігінің бүгінгі аппараты халыққа жаңашыл әрі тиімді тәсілмен қызмет көрсетудің үлгісін танытып келеді. Соңғы жылдары әкімдікте reseptiоn-қызметі қалыпты тәжірибеге енді.

Бұл яғни тұрғындардың әкімдікпен байланыс жүйесін жеңілдететін процесс. Сондай-ақ Қазақстанда тұңғыш рет Халықтық кеңсе Шымкентте ашылды. Мемлекеттік қызмет көрсетудің жаңаша үлгідегі бұл жаңа орталығы білім, жер қатынастары, тұрғын-үй коммуналдық шаруашылығы, жұмыспен қамту және әлеуметтік бағдарламалар саласына орай 400-ге тарта қызмет түрі бойынша өтініштер қабылдай алады.

– Шымкент қаласы әкімдігіне оның аппараты, төрт аудандық әкімдік пен ведомоствоға қарасты 15 бөлім кіреді,– дейді Шымкент қаласы әкімдігі аппаратының дербес басқарма қызметінің бас инспекторы Алмаз Ижимов. – Әкімдік штаты 509 бірлікті құраса, бүгінде 484 мемлекеттік қызметші қызмет атқаруда. Оның ішінде бір саяси қызметші – қала әкімі, «А» корпусының төрт өкілі, яғни аудан әкімдері бар. Қалғандары– «Б» корпусының мемлекеттік қызметшілері. Қалалық әкімдік қызметкерлерінің орташа жасы 36,5-ті құрайды. Олардың ішінде 29 жасқа дейінгілері – 163, 30 бен 39 аралығындағылар – 165, 40-49 жас аралығындағылар – 80, ал 50 жастан жоғарылар – 76 адам.

Әкімдік қызметкерлері түгелге дерлік жоғары білімді. Оның ішінде төрт маман Қазақстан Президенті жанындағы мемлекеттік басқару Академиясын бітірген, екі қызметкер «Болашақ» бағдарламасы бойынша шетелдің жоғары оқу орындарында білім алған. Төрт қызметкер осы бағдарлама бойынша шетелдік, 15 маман қазақстандық жоғары оқу орындарында магистр дәрежесін иеленген. 122 қызметшінің екі және одан да көп мамандығы бар.

Шымкент қалалық әкімдігінде бір ғылым докторы, екі ғылым кандидаты жұмыс істейді.

–Биыл «Б» корпусындағы қазақстандық мемқызметшілер аттестациядан өтті. Осы сынақта біздің қызметкерлер түгелдей өздерінің жоғары кәсіби біліктілігі мен білімділігін көрсете білді,– дейді А. Ижимов. – Аттестация қорытындысы бойынша 340 қызметші өз лауазымдарына лайық деп табылды. «Б» корпусының 369 өкілінің 15-інің қызметін жоғарылату ұсынылды.

Ия, халық қызметшілері саяси сауаттылығымен де, кәсіби біліктілігімен де мемлекеттік саясатты мерейлі атқарып келеді.

Өңірлік коммуникациялар қызметінде өткен брифингте ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ОҚО бойынша департаментінің басшысы Әли Көмекбаев осылай мәлімдеген. Елбасының «100 нақты қадам» ұлт Жоспарында мемлекеттік қызметтің кәсібилігін арттыру тапсырмасы аясында жүргізілген кешенді аттестаттау қорытындысы белгілі болды.

Департамент басшысының айтуынша, өңірдегі 8 489 мемлекеттік әкімшілік қызметшінің 6483-і аттестация тапсырса, қалғаны бос орындар мен аттестациядан босатылғандар. Жалпы облыстағы 63 комиссия өздеріне жүктелген жұмысты жақсы атқарып шығып, аттестаттауды өз деңгейінде өткізді. Облыста аттестаттаудың тестілеу сатысынан өткен мемлекеттік қызметшілердің нәтижесі мынадай: «өте жақсы» нәтиже алғандары – 1766, «тиімді» – 4482, «қанағаттанарлық» – 222, «ең төмен» деген көрсеткішті – 13 азамат алған. Ал  аттестаттаудан оң нәтижемен аяқтаған 239 қызметші жоғарылатуға ұсынылған.

Облыс әкімі Жансейіт Түймебаев медицина қызметкерлері күні мерекесі қарсаңында Шымкентте денсаулық сақтау саласының бірқатар ардагерлерін қабылдап, «Облысқа сіңірген еңбегі үшін» медалімен марапаттады.

Өңір басшысының қолынан марапат алғандардың қатарында денсаулық сақтау саласының үздік қызметкерлері болды. Атап айтсақ, осы салада 54 жыл еңбек еткен 81 жастағы Тұрсынбек Оразалиев, дәрігер-диетолог, медицинада 45 жылдық еңбек өтілі бар Роза Қуандықова, педиатрияға 44 жылын арнаған Жұмабай Әденов пен науқастарды емдеуде жаңа техналогоияларды ендіруге атсалысқан Раушан Жылқышиева, зейнетке шықса да өңір медицинасын дамытуға әлі де атсалысып келе жатқан «Шымкент қаласы және Оңтүстік Қазақстан облысы интертич отбасылық-дәрігерлік амбулатория» жеке мекемесінің директоры Мария Әлжанова бар. 

Сондай-ақ, салтанатты жиында аймақ басшысы емдеу-алдын алу мекемелеріне 29 жаңа санитарлық көліктің кілтін салтанатты түрде табыс етті. Айта кетейік, соңғы 5 жылда бюджет есебінен алғашқы медициналық-санитариялық және жедел жәрдем көмегіне 273 дана санитарлық автокөлік, оның ішінде 163 данасы ауылдық жерлерге сатып алынған.

Соңғы рет сыңғыр қаққан күміс қоңырау үні Шымкент қаласындағы 7431 мектеп түлегіне өмірдің жаңа бір белесін нұсқады. Саналы тәлім-тәрбие берген «алтын ұямен» қоштасқан жас түлектерді алда Ұлттық бірыңғай тестілеу, мемлекеттік емтихандар және арман мен үмітке толы өмірдің сан тарау жолдары күтіп тұр.

А. Пушкин атындағы №1 мектеп-гимназиясының бітіруші-түлектерінің салтанатты жиынына облыс әкімі Жансейіт Түймебаев пен қала әкімі Ғабидолла Әбдірахымов қатысты. Айта кетейік, аталмыш мектеп оқушылары ҰБТ қорытындысы бойынша бірнеше жылдар бойы қаладағы үздік мектептер қатарында келеді. Осы орайда, облыс әкімі оқушыларды, ұстаздарды, ата-аналар қауымын кезекті оқу жылының аяқталуымен құттықтап, ізгі лебізін жеткізді.

– Ел болашағы жастардың қолында. Қандай мамандықтың иесі болсаңыздар да бастысы, ұлтжанды ел азаматы болуды ұмытпаңыздар.

Елімізде қазіргі таңда балаларымыздың сапалы әрі заманға лайықты білім алуына қажетті барлық жағдайлар жасалған. Жыл өткен сайын білім саласын жақсартуға бағытталған жұмыстардың ауқымы кеңейіп келеді. Биыл облыстағы білім саласын дамытуға бюджеттен 44 миллиард теңге қаржы бөлінген. Яғни, бұл көрсеткіш алдыңғы жылмен салыстырғанда 10 пайызға артық. Өткен жылы 6 білім беру нысаны пайдалануға берілді. Биыл тағы 5 жаңа, 3 қосымша ғимарат тапсырылады, – деді Жансейіт Қансейітұлы.

72 түлегін үлкен өмірге шығарып салған А. Пушкин атындағы №1 мектеп-гимназиясының ұжымы үшін өткен оқу жылы аса олжалы болды. Мектеп оқушылары халықаралық және республикалық деңгейдегі математика және ПОНИ байқауларында, «Русский медвеженок» зияткерлік байқауларында топ жарып, үздік нәтижелерін әйгіледі.

Мекеме директоры Гүлназ Әбілдаеваның айтуынша, «Алтын белгіге» үміткер Русалина Саркисова, «Үздік аттестат» иелері Әйгерім Жаңабаева мен Анастасия Малыхина қай кезде де мектеп ұжымының мақтанышына айналған. Салтанатты шара барысында облыс әкімі Жансейіт Түймебаев пен қала әкімі Ғабидолла Әбдірахымов мектеп бітіруші түлектермен мектеп вальсін билеп, естелікке суретке түсті. Шара соңында түлектер алдағы өміріндегі сәттіліктің белгісі ретінде ақ көгершіндерді ұшырды. 

Жалпы, өткен оқу жылында Оңтүстік өңірінің оқушылары республикалық Олимпиада сындарында 30 жүлделі орынға қол жеткізіп, 6 білім грантын иеленіпті. Бұл қатарда, жас ғалымдарымыз жаратылыстану-математика бағыты бойынша «Ең үздік олимпиадалық команда» аталымын жеңіп алса, түрлі халықаралық олимпиадалар мен ғылыми жобалар байқауларында 50-ден аса жүлделі орындарға ие болды.

Бүгінгі мектеп бітірушілерінің 1370-і «Алтын белгіге», 863-і «Үздік аттестатқа» үміткер. Ұлттық бірыңғай тестілеуге 23 760 бітіруші өтініш білдіріпті. Бұл – түлектердің жалпы санының 71,8 пайызы. Ал Шымкент қаласы бойынша 5 230 түлек ҰБТ тапсырмақ.

Мектеп бітірушілер 29 мамыр – 9 маусым аралығында қорытынды аттестаттаудан өтсе, 20 маусым – 1 шілде аралығында ҰБТ тапсыратын болады.

ҚР Қарулы Күштерінің құрылғанына биыл – 25 жыл. Уақыт талабына сай әскери құрылымдар жаңарып, оның күш-қуаты жылдан-жылға нығайып келеді. Біздің өңір – еліміздің Оңтүстік қақпасы. Мұнда Шымкент горнизонына қарасты 10 әскери құрылымдық бөлім Оңтүстік шекарасының тұтастығы мен тыныштығын сақтауда қызмет етуде. Осы мерейлі датаға орай, Шымкент қаласында салтанатты іс-шаралар ұйымдастырылды.

Тірегіміз – тыныштық

Отан қорғаушылар күні 500 жауынгерден құралған әскери оркестр «Ордабасы» алаңынан «Орталық» саябаққа дейін салтанатты маршпен жүріп өтті. Мерекелік жиынға қатысқан облыс әкімі Жансейіт Түймебаев өңір халқын Отан қорғаушылар күнімен және ҚР Қарулы күштерінің мерекесімен құттықтады. Облыс әкімі әрбір Тәуелсіз мемлекеттің ең басты мақсаты – ел тыныштығын қорғау, мемлекет тұтастығын сақтау екенін атап өтті. Қоғамның және әрбір қазақстандықтың қауіпсіздігін қамтамасыз етушілер қандай марапатқа болса да лайықты екенін жеткізді.

– Бүгінде Елбасының, Қазақстан Қарулы Күштерінің Бас қолбасшысы Нұрсұлтан Назарбаевтың стратегиялық көрегендігімен ел армиясының жаңа келбеті, отаншыл рухы қалыптасты. Қарулы Күштер мемлекетіміздің тұрақты кепіліне айналды. Сондықтан, бұл күн – Отанды қадірлейтін, оның тарихын құрметтейтін, айбынды әскеріміздің атағын асқақтатқан, мемлекетіміздің қуатын айғақтайтын күн, – деді Жансейіт Қансейітұлы.

Бұдан соң, өңір басшысы елдің қорғаныс қабілетін күшейтуге, ұлттық қауіпсіздікті қамтамасыз етуге үлес қосқан 17 азаматты Қазақстан Республикасының «Құрмет» орденімен, ҚР мемлекеттік наградасы «Ерлігі үшін» медалімен және «Облысқа сіңірген еңбегі үшін» белгісімен, ОҚО әкімінің Грамотасы мен Алғыс хатымен марапаттады.

Сонымен қатар, 10 азамат ҚР Қорғаныс министрінің «Мінсіз қызмет үшін» медалімен наградталды.

Концерттік бағдарламамен жалғасын тапқан мерекелік шарада «Мәңгілік ел тұғыры – Қуатты Армия» – театрландырылған көрінісі қойылып, патриоттық әндер шырқалды. Сонымен қатар, тұрғындар тікелей көрсетілім арқылы Астана қаласында өткен ҚР Қарулы Күштерінің 25 жылдығына арналған әскери парадты тамашалады.

Айта кетейік, Астанадағы «Қазақ елі» алаңында өткен шеруде 5 мыңнан астам әскери қызметші салтанатты маршпен жүріп өтті. 300-ге жуық әскери техника мен заманауи қару-жарақ түрлері жұртшылық назарына ұсынылды. Сондай-ақ, 70-ке жуық әуе техникасы Қазақстанның авиациялық әлеуеті мен жауынгерлік әзірлігін байқатты.

Ерлік пен бірлікті қастерлеген мереке

Жеңіс күніне арналған шара «Қаһарман Ұлт» шеруімен бастау алып, оған 1,5 мыңнан астам тұрғын қатысты. Мерекелік шарада Әскери үрмелі аспаптар оркестрі тақырыптық марштар орындады. Салтанатты шара «Абай» саябағындағы «Мәңгілік алауға» гүл шоқтарын қою рәсімімен жалғасын тапты.

Шараға қатысқан облыс әкімі Жансейіт Түймебаев Ұлы Отан соғысының ардагерлері мен тыл еңбеккерлерін және барша оңтүстікқазақстандықтарды Жеңістің 72 жылдығымен құттықтады. 

– Ұлы Отан соғысы біздің халқымыздың, әкелеріміз бен аналарымыздың биік рухын, ерлігі мен қаһармандығын әлемге танытты. Сондықтан Жеңіс күні аға ұрпақтың ерлігін мәңгілікке ел жадында сақтауға арналған ең қастерлі мереке. Бейбіт өмір үшін, ұрпақтың бақытты болашағы үшін отқа түсіп, қайғы-қасірет шеккен, соның бәрін қайыспай жеңе білген ардагерлердің жанкешті ерлігі мен еңбегі жадымыздан ешқашан өшпек емес. Сондықтан да Елбасымыз соғыс және тыл ардагерлеріне қолдау көрсетіп, олардың хал-ахуалын көтеруге көп көңіл бөліп келеді. Президент сонау зұлматты соғыста жеңіске бірліктің арқасында ғана жетуге мүмкін болғанын үнемі еске салып отырады. Біздің ардагерлеріміз – еліміздегі достық пен келісімнің берік іргетасы, – деді Жансейіт Қансейітұлы.

Ұлы Отан соғысы және тыл еңбеккерлеріне арналған әскери өмірден театрландырылған көріністер қойылып, ардагерлерге дала асханасынан дәм ұсынылды. Айта кетейік, Ұлы Отан соғысына Оңтүстік Қазақстаннан 140 мыңнан астам адам аттанып, олардың жартысына жуығы туған жерге оралмаған. ІІ Дүниежүзілік соғыста жанқиярлық ерлігі үшін оңтүстікқазақстандық 51 азаматқа Кеңес Одағының батыры атағы берілсе, 8 жерлесіміз «Даңқ» орденінің иегері атанды. Жаужүрек қайсарлығы үшін мыңдаған ардагерлеріміз түрлі орден, медальдармен марапатталған. Бүгінде от пен оқтың арасынан елге аман-сау оралған майдангерлердің 233 ҰОС ардагерлері, ал, 996-сы соғысқа қатысушылар мен мүгедектеріне теңестірілгендер болса, 19 199-ы тылда тынымсыз еңбек еткен.

Ұлы Жеңістің 72 жылдығына орай, соғысқа қатысушы майдангерлерге биыл 100 айлық есептік көрсеткіш көлемінде, яғни, 226,9 мың теңге біржолғы материалдық көмек берілді. Ал оларға теңестірілген және тыл ардагерлеріне 5 АЕК, яғни, 11345 теңге мөлшерінде біржолғы әлеуметтік қолдау көрсетілді. Сондай-ақ, 233 ҰОС ардагеріне 100 мың теңгенің көлемінде сый-сияпат жасалып, құрмет көрсетілген.

Ұрпақтың бақытты болашағы мен бейбіт өмір сүруі үшін шайқасқан ҰОС ардагерлеріне жыл сайын әлеуметтік қолдау, лайықты құрмет көрсетіліп келеді. Бұл қатарда, оларға медициналық көмек республикалық әрі өңірлік деңгейде ақысыз көрсетіледі. Жыл сайын аға ұрпақ өкілдерін сауықтыру мақсатында 7,8 мың жекелеген санаттағы азаматтарға облыстағы түрлі сауықтыру орталықтарына жолдама беріледі. Сондай-ақ, өңірде «Қамқорлық» акциясы шеңберінде демеушілер есебінен Ұлы Отан соғысы ардагерлеріне коммуналдық қызметтерге жеңілдік ұсынылды.

Құрметті шымкенттіктер!

Сіздерді 7 мамыр – Отан қорғаушылар күнімен және 9 мамыр – Ұлы Жеңіс күнімен шын жүректен құттықтаймыз!

Бір-біріне ұласқан осынау қасиетті де қастерлі мерекелер қарсаңында Сіздердің қайсарлықтарыңызға, жанкешті ерліктеріңізге құрмет көрсете отырып, ыстық ықыласпен алғыс айтамыз!

Жеңіс жалауының желбіреген күніне 72 жыл толып тарих қойнауына өшпес ерлікпен еніп барады. Бұл мереке – соңғы демі қалғанша күрескен жанқиярлық ерліктің нәтижесі, халқымыздың ерлігі мен даңқының жарқын көрінісі. 

Бүгінгі Тәуелсіздік тұғырының берік, еліміздің өркендеуі мен бірліктің бұзылмас қамалы осынау мерекенің жемісі.

Аға ұрпақ алып берген Жеңіс – бүгінгі күні де бізді жетістіктерге жігерлендіреді, жанымызға қуат береді, қиындықтарды жеңіп, алға ұмтылуымызға көмектеседі.

Біздің парызымыз – бұл алапат соғыстағы Жеңістің бізге қалай келгендігін ұғыну, қаза тапқандарды қадір тұтып, арамызда жүрген ардагерлерге ұдайы қамқорлық көрсету. Бүгінгі буын Жеңіс солдаттары алдында мәңгілік қарыздар, сондықтан да ардагерлерге жан-жақты әлеуметтік қолдау көрсету үшін барлық мүмкіндіктер жасалуда. 

Жеңіс күні қарсаңында Тәуелсіз еліміздің мемлекеттік мерекесі – 7 мамыр – Отан қорғаушылар күнін атап өтеміз. Биыл ҚР Қарулы күштерінің құрылғанына 25 жыл толып отыр. Бұл күні – Қарулы күштер қатарында қызмет еткендер мен сапта жүргендерге құрмет көрсетеміз. 

Отан қорғаушылар күні Отанды қадірлейтін, оның тарихын құрметтейтін, ерлік пен жауынгерлік күшке ие нағыз ерлердің мерекесіне айналды. Бұл күн – қайсар мінезді ата-бабамыздың жауынгерлік дәстүрінің заңды жалғасын тапқан күні.

25 жылдық қалыптасу кезеңінде ұлттық әскер күштері азаматтардың еңсесін тіктеп, еркіндігін кеңейтіп, аянбай еңбек етуде.

Бүгінгідей айтулы мерекеде барлық бастаған бастамалар оң жемісін беріп, еліміздің көркейуіне аянбай еңбек еткен азаматтарымыздың еңселері биік, мерейлері үстем болсын! 

Жұдырықтай жұмылған, білектей біріккен кеңпейіл Қазақ елінің көк байрағы мәңгі бейбітшілік аспанында желбірей бергей!

Баршаңызға – дендеріңізге саулық, шаңырақтарыңызға шаттық, бақ пен береке тілейміз!

Мереке құтты болсын!

Ұлы Жеңістің 72 жылдық мерейтойына орай қаламыздағы «Grand Holiday» мейрамханасында кең дастархан жайылып, концерт қойылды. Кеудесі ордень-медальға толған тарихымыздың тірі куәгерлерінің бірі мейрамхана ішіне таяқтарын сүйеніп әупірімдеп кіріп келе жатса, енді бірін ұрпақтары қолтығынан демеп дастархан басына жайғастырып жатты.

Мерекелік жиынды облыс әкімінің орынбасары Ербол Садыр ашып, сөз сөйледі. 

– Осынау Ұлы Жеңістің 72 жылдық мерекесінде өткенімізді зерделеу, майдангерлер рухына тағзым ету – біздің перзенттік парызымыз. Ұлы Отан соғысына облыстан 140 мыңнан астам азамат аттанып, оның 71-і елге оралды. Оның ішінде 51 «Кеңес одағының батыры», 1 «Халық қаһарманы» және 8 «3-ші дәрежелі Даңқ орденінің ковалері» атағын алған. Биылғы Жеңістің 72 жылдық мерекесінде 233 ҰОСА мен 19 мыңнан астам тыл еңбеккерлеріне құрмет көрсетілуде. 

Құрметті Ұлы Отан соғысының ардагерлері! Сіздердің қан майдан шебіндегі ерліктеріңіз, тылдағы ерен еңбектеріңіздің арқасында бүгінгі ұрпақ келісіммен бейбіт өмір сүруде. Отан үшін отқа түсіп, қан майдандағы жеңіске деген табандылықтарыңыз үшін Сіздердің алдарыңызда бас иіп, алғыс білдіреміз, – деді Ербол Әбілхайырұлы.

Шымкент қаласының мәслихат хатшысы Нұрлан Бекназаров пен қала әкімінің орынбасары Гүлжан Құрманбекова да ардагерлерге алғысын білдірді. 

Есімі ел есінен кетпейтін ерлермен, ардақты ардагерлердің бір-екеуін сөзге тарттық. 

Сарыағаш ауданы, Ошақты ауылынан келген Жаңбырбай Байдаров Ұлы Отан соғысының басынан аяғына дейін қатысқан. Берлин түбіне дейін барып, Жеңісті сол жақта тойлаған. Сталинград майданы даласындағы өшпес ерлігі үшін Жаңбырбай атамызға «Қызыл жұлдыз» медалі берілген. 

– Соғыс аяқталғаннан кейін де екі жыл қираған қалаларды қалпына келтіру үшін еліміздің батыс өңірінде қызмет атқардым. Содан 1947 жылы туған жерге жалғыз өзім аман оралдым, – дейді соғыс ардагері. Елге оралғаннан кейін 33 жыл мұғалімдік қызмет атқарып, зейнеткерлікке шыққан. 

Ізет Тұрғынова – Тыл ардагері. 1941 жылы соғыс басталысымен, жаңадан отау құрған екі жас тағдырдың тәлкегімен екіге айрылады. Күйеуін майдан даласына алып кетеді. Өзі бес жыл бойы күн-түн демей колхозда жер жыртып, бидай орады. – Соғыс аяқталып, жұбайым елге аман оралған соң төрт ұл, төрт қыз дүниеге келді, қазір солардың ортасындамын, – дейді Ізет апамыз тағдырына тәубе етіп. 

Бүгінде сұм соғыстың сұрапылын бастан өткерген олардың әрқайсысы ел назарынан тыс қалған емес. Ұлы Жеңістің 72 жылдық мерекесіне орай, 105 Ұлы Отан соғысының ардагеріне 226 900 теңге (100 АЕК) көлемінде 23,8 млн теңге біржолғы материалдық көмек көрсетілді.

Сонымен қатар, Ұлы Отан соғысының ардагерлеріне қосымша өмір сапасын жақсартуға 100 мың теңге төленді. 

Шымкент қаласында 5186 ҰОСА теңестірілгендер мен тыл еңбеккерлеріне 11 345 теңге (5АЕК) көлемінде 58,8 млн теңге жергілікті бюджет есебінен біржолғы материалдық көмек берілді. 

7 мамыр Отан қорғаушылар күніне орай, 1913 Ауған, Семей, Чернобыль қатысушылары мен мүгедектеріне 453 480 теңге (20 АЕК) көлемінде 86,3 млн теңге біржолғы материалдық көмек ұсынылды.

Елдегі достық пен өзара түсіністіктің шынайы көрінісін ұлықтаған 1 мамыр – Қазақстан халқының бірлігі күні мерекесі Шымкент қаласында кеңінен аталып өтті.

Әл-Фараби алаңына жиналған көпшілік назарына «Бірлік. Ынтымақ. Достық» хореографиялық қойылымы ұсынылды. Сондай-ақ, бір сәтте 1000 күйші Құрманғазының «Балбырауын» күйін орындады. «Мәңгілік ел» бейнесінде безендірілген көлік, «Алтын адам» кейпіндегі 20 салт аттының шеруі жергілікті тұрғындардың көңілінен шықты.

Мерекелік шараға облыс әкімі Жансейіт Түймебаев, қала басшысы Ғабидолла Әбдірахымов, зиялы қауым өкілдері қатысты. Жиында аймақ басшысы барша оңтүстікқазақстандықтарға ізгі лебізін жеткізді.

– Халқымызда «Бақ қайда барасың – ынтымаққа барамын» деген дана сөз бар. Елдік болмысымызға тән бұл ұғымды тәуелсіздіктің тұғырлы, мемлекеттің ғұмырлы болуына өзек еттік.

Бірлікті басты байлығымыз – Тәуелсіздіктің арқауы етіп айшықтадық. Елбасымыз ұсынған жол, жұрт болып жұмыла ұстанған саясат ширек ғасырда жемісті нәтижесін берді. Бүгінгі Қазақстан бірлігі бекем, тірлігі келіскен, ынтымағы жарасқан елге айналды. Жеткен жетістіктеріміз бен алған асуларымыз аз емес. Бүгін біз Ұлы даланың ұлағатымен Мәңгілік Ел құруға қадам бастық. Күн сайын құбылған замананың иіріміне төтеп беретін қуатты мемлекетті жасақтаудың қамына кірістік. Елеулі өзгерістер қоғамның барлық саласын қамтып отыр. Жалпыұлттық жаңғыру саяси-экономикалық салалармен қатар, азаматтық санаға да серпіліс алып келмек, – деді Жансейіт Қансейітұлы.

Салтанатты жиында облыс әкімі елдегі этносаралық татулық пен қоғамдық-саяси тұрақтылықты сақтауға сүбелі үлес қосқан өңірдегі 18 этномәдени бірлестік өкілдеріне «Бауырмал» сыйлығын табыс етті.

Бүгінгі таңда өңірде 100-ден астам этнос өкілдері тату-тәтті өмір сүріп, бірлесе еңбек етіп келеді. 20 этномәдени орталық пен оның аудан, қалалардағы 51 филиалы арқылы әр этностың салт-дәстүріне, әдеп-ғұрпына, мәдениетіне байланысты түрлі іс-шараларды өткізуіне қолайлы мүмкіндіктер жасалған. Сонымен қатар, этномәдени орталықтар жанынан ашылған 17 жастар қанаты мен 11 жексенбілік мектебі нәтижелі жұмыс істеуде.

Мерекелік шара концерттік бағдарламаға ұласып, танымал эстрада әншілері қала тұрғындарына әсерлі кеш сыйлады. Шараға «КешYou» және «Орда» топтары қатысты.

Хасан БАЦИЕВ,
«Қоғамдық келісім» КММ-нің сарапшысы, облыстық шешен-ингуш этномәдени бірлестігінің төрағасы:

Ынтымақты сақтау – өркендеудің басты шарты

– 130-дан аса ұлт пен ұлысты бір шаңырақ астында ұйытып отырған елімізде бірлік күнін атап өту жыл сайынғы дәстүрге айналған. Бұл мереке ел халқын татулық пен тұтастыққа, ынтымақ пен келісімге, бейбітшілік пен бірлікке үндейді. Мемлекеттік саясаттың басты басымдықтарының бірі де осы – ұлтаралық және дінаралық келісімді сақтау.
Қазақстан халқының бірлігі күні мерекесі бүгінгі таңда бейбіт өмір мен ынтымаққа тұрмыс кешіп отырған ел тұрғындары үшін ыстық ықылас пен достық ниеттің дәстүрі, асыға күтер мейрамы. Бұл күн – әрбір қазақстандық үшін Отанға деген сүйіспеншілік пен патриоттық сезімнің, азаматтық борыш пен жалпы ұлттық келісімнің мерекесі. Бұл күн ел азаматтары ұлт пен ұлыстың өткен кезеңдегі тарихы мен оның сабақтарын дәріптеп, әлемдік қауымдастық тарапынан жоғары бағаланған қазақстандық татулық пен келісімді паш етеді.