Шымкент келбеті

ҚР Президенті Н. Назарбаевтың халыққа арнаған «Қазақстанның үшінші жаңғыруы: жаһандық бәсекеге қабілеттілік» Жолдауын талқылау бойынша облыстық ақпараттық-насихаттық топтың қала активімен кездесуі өтті. Жиынға қалалық бөлім басшылары, мәслихат депутаттары, үкіметтік емес ұйым өкілдері мен жастар ұйымдарының мүшелері қатысты.

Жиында баяндама жасаған облыс әкімінің бірінші орынбасары, облыстық ақпараттық-насихаттық топ жетекшісі Дархан Сатыбалды бұл стратегиялық құжаттың мемлекеттің өркендеуіне негіз қалайтынын айта келе, оның ішінде аймақтың дамуына жол ашатын басым бағыттарына кеңінен тоқталды.

– Еліміздің тарихи жаңа белесін бастаған маңызды құжатта Президент дамудың жаңа бағыттарын белгілеп берді. Онда, әсіресе, ұлттық экономиканы көтеруге ерекше көңіл бөлінді. Осыған сәйкес, агроөнеркәсіп саласын дамытуға, өңірге тартылған инвестициялар көлемін 2020 жылға қарай 14,5 пайыздан 25 пайызға дейін ұлғайтуға басымдық беріледі. Бұл үшін өңірдің барлық аудан-қалаларында инвесторлармен жұмыс істейтін арнайы мобильді топтар құрылды. Осы арқылы өңірдің экспорт айналымын еселеуге нақты жоспарлы қадам жасалуда, – деді Дархан Амангелдіұлы.

Елбасымыздың биылғы Жолдауында бизнес-ортаны түбегейлі жақсартуға және кеңейтуге, елімізде инвестициялық климатты нығайтуға, жаппай кәсіпкерлікті қолдау тетіктерін одан әрі жетілдіруге, соның ішінде отбасылық кәсіпкерлікті дамыту бағытында кешенді шаралар жүргізу қажеттігіне басымдық беріліп отыр. Бұл тұрғыда өңірде дамыған елдердің озық стандарттары мен тәжірибесін енгізу арқылы жүйелі жұмыстарды қолға алу қажеттігі нақтыланды.

Келелі кеңесте сөз алған облыстық ақпараттық-насихаттық топ мүшелері ОҚМПИ-ның Қазақстан тарихы және қоғамдық пәндер кафедрасының доценті, тарих ғылымдарының кандидаты Қайрат Сапарханұлы, қалалық мәслихат хатшысы Нұрлан Бекназаров, облыстық жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева Елбасы Жолдауындағы басым бағыттарды атап өтті. 

Жиынды қала әкімі Ғ. Әбдірахымов қорытындылады.

– Жолдауда негізінен кәсіпкерлікті дамыту, жұмыспен қамту сынды әлеуметтік салаларға басымдық берілген. Жұмыссыз жастардың қатарын азайту мақсатында мемлекет өз тарапынан ниетті азаматтарды кәсіпкерлік саласына баулып, ол үшін 16 миллион теңгеге дейін микронесие де ұсынуда. Тұрғындар саны 1 миллионға жуықтайтын Шымкент қаласында инвестиция тартудың мүмкіндігі де жоғары. Ендігі жерде, Елбасының алға қойған мақсат-міндеттерін жүзеге асыруда бірлесе қызмет атқарғанымыз жөн, – деді Ғабидолла Рахматоллаұлы. 

Ақпараттық-насихат топтары Елбасы Жолдауын халық арасында кеңінен түсіндіру шараларын жүргізетін болады.

«Нұр Отан» партиясы Шымкент қалалық филиалының кезектен тыс XXXI конференциясы өтті. Жиынға қала әкімінің орынбасары Қ. Нұртай, қалалық мәслихаттың хатшысы Н. Бекназаров және облыстық, қалалық мәслихаттың депуттаттары қатысты. Онда Жолдаудың бағыттары талқыланып, билік тармақтары арасында өкілеттіліктерді қайта бөлу мәселелері жөніндегі Үндеуінен туындайтын міндеттері туралы ұсыныс-пікірлер айтылды.

Жиынды «Нұр Отан» партиясының қалалық филиалының төрағасы Ө. Мелдеханов ашты. Ол конференция «Қазақстанның үшінші жаңғыруы: жаһандық бәсекеге қабілеттілік» атты жолдауымен үндесіп отырғанын айтып, оларды жүзеге асыру міндеті партияның қолдаушылары ретінде ортақ мақсат екенін жеткізді.

– Қазақстандықтар үшін үшінші жаңғырту жөнінде бірнеше міндет қойылып отыр. Елдің жаһандық бәсекеге қабілеттілігін қамтамасыз ететін экономикалық өсімнің жаңа моделін құру қажеттілігі айтылды. Бұл жаңғыру – қазіргі жаһандық сын-қатерлермен күрес жоспары емес, болашаққа, «Қазақстан – 2050» стратегиясының мақсаттарына бастайтын сенімді көпір болмақ, – деді Ө. Мелдеханов. 

Конференцияда «Нұр Отан» партиясы Еңбекші аудандық филиалының төрағасының бірінші орынбасары Бердіқұл Садықов, Шымкент қалалық мәслихатының депутаты Ғани Ташқараев, «Көпсалалы» бастауыш партия ұйымының төрайымы Анар Аманқұлова баяндама жасап, Елбасы Жолдауын белсенді түрде жүзеге асыруға шақырды. 

Конференция барысында Шымкент қаласы №1 сайлау округіне Төреайым Сұлтанова және №5 сайлау округі бойынша мәслихат депутаттығына Мұрат Орманов кандидат ретінде ұсынылып, қабылданды. Сонымен қатар жиында 2017 жылдың 22 ақпан күні «Нұр Отан» партиясы Оңтүстік Қазақстан облыстық филиалының кезектен тыс XXXI конференциясына Шымкент қалалық филиалынан сайланатын делегаттар тізімі таныстырылды.

Нұрлан Бекназаров – бұған дейін де өкілетті билікте қызмет етіп, көптеген игі істердің атқарылуына үлес қосқан абыройлы азамат. Осыған дейін Шымкент қалалық мәслихатының үш рет хатшысы болса, екі шақырылымда мәслихатта тексеру комиссиясының төрағасы болған, яғни депутат болып бес рет сайланған. Бүгінгі әңгімемізде Нұрлан Құдиярұлы қаланың қазіргі әлеуметтік-экономикалық даму бағыты бойынша атқарылған жұмыстар мен алдағы жаңа міндеттерді баяндап берді.

– Нұрлан Құдиярұлы, жуырда ғана Елбасымыз Нұрсұлтан Әбішұлы Назарбаевтың билік тармақтарының өкілеттіктерін қайта бөлу туралы Үндеуі жарияланды. Елбасы Үндеуінің маңызы мен мәні неде? 

– Елбасының Үндеуде айтылған бастамалары өте дер кезінде көтеріліп отыр. Бұл – егемен еліміздің тұрақты дамуын қамтитын жаңа жоспар және келешек ұрпақтың болашағын ойлағаннан жасалған қадам. Үндеудің негізгі мәні – Қазақстан Республикасының Президенті өзінің бірқатар өкілеттілігін Парламент пен Үкіметке беру. Бұл реформа басқару жүйесінің тиімділігін арттыруды көздейді. Ұсынылып отырған реформаның ерекшелігі билік өкілеттіліктерін сарабдалдықпен қайта бөлуде, тұтастай саяси жүйені демократияландыруда жатыр деп Елбасының өзі де атап өтті. Біріншіден, бұл дегеніміз – Президенттің әлеуметтік-экономикалық процестерді реттеудегі біршама өкілеттіліктерін Үкіметке және басқа да атқарушы органдарға беру. Сонда бұл салаға Үкімет, министрліктер және әкімдіктер толықтай жауап беретін болады. Екіншіден, одан да күрделі міндет – билік тармақтары арасындағы қарым-қатынасты конституциялық деңгейде теңгерімді ету. Яғни, осы реформаның аясында Үкіметті жасақтаудағы Парламенттің рөлін күшейту. Елбасы Үндеуінде айтылғандай, Парламент сайлауында жеңген партия Үкімет құрамын анықтауда түбегейлі ықпал ететін болады. Бұл министрлер кабинетінің өкілетті билік алдындағы жауапкершілігін арттырады. Тиісінше, биліктің заң шығарушы тармағының атқарушы билікке бақылауын күшейтеді. Елбасының мемлекеттік басқаруды жаңғырту туралы бастамасы өте құптарлық. Бұл – жеткен жетістіктерімізді сақтап, одан әрі үздіксіз дамуға бағытталып отыр. 

– Қазір жер-жерлерде Елбасының биылғы «Қазақстанның үшінші жаңғыруы: жаһандық бәсекеге қабілеттілік» атты Жолдауы жан-жақты талқылануда, ел дамуына серпін берген маңызды құжатты түсіндіру шаралары жүргізілуде. Биылғы Жолдаудың басты ерекшелігі неде деп ойлайсыз? Оның еліміз үшін стратегиялық маңыздылығы қандай?

– Елбасы Жолдауы – еліміздің даму жолын айқындаған өте маңызды құжат. Мемлекет басшысы қай Жолдауында болмасын халықтың жағдайын бір сәтке де ұмытқан емес. Бүгінде межеленген міндеттердің бәрі жыл өткен сайын бірте-бірте орындалып келе жатыр. Әрине, биылғы Жолдаудың маңыздылығын тақырыбынан-ақ аңғаруға болады. Қазір әлем жаңаруға бет бұрды. Президент бұл ретте Жолдауда негізгі бес басымдықты баса айтты. Мәселен, экономиканың жеделдетілген технологиялық жаңғыртылу мәселесіне ерекше назар аударуы еліміз үшін аса маңызды дер едім. Елбасымыз атап өткендей, елімізде 3D-принтинг, онлайн-сауда, мобильді банкинг, цифрлық қызмет көрсету секілді денсаулық сақтау, білім беру ісінде қолданылатын және басқа да перспективалы салаларды дамыту керек. Осыған орай, Үкіметке «Цифрлы Қазақстан» жеке бағдарламасын әзірлеуді тапсырды. Бұл өз кезегінде экономиканы барынша дамытумен бірге қолданыстағы құрылымдарды жетілдіруге мүмкіндік береді. Отбасылық бизнес, қаржылық сауаттылық, тағы басқа қажетіліктер осыдан бастау алады. Елбасы айтқан тағы бір маңызды басымдық – бизнес ортаны түбегейлі жақсарту және кеңейту. Біздің стратегиялық мақсатымыздың бірі – елдің ішкі жалпы өніміндегі шағын және орта бизнестің үлесі 2050 жылға қарай кем дегенде 50 пайыз болуын қамтамасыз ету керек делінген. Жалпы алғанда, Елбасы өз Жолдауында Қазақстан дамуының жаңа бағыттарын айқындап, белгілеп берді. Түптеп келгенде, бұл ең алдымен халықтың әлеуметтік жағдайын күшейтуге ықпал етеді.

– Енді Шымкент қаласының бүгінгі әлеуметтік-экономикалық даму бағытына тоқталсақ. Қазіргі таңда қаламызда Ұлт жоспары «100 нақты қадам» бойынша атқарылған жұмыстар барысы қалай?

– Шымкент – еліміздегі даму көрсеткіші қарқынды, миллионға жуық тұрғыны бар үш мегаполистің бірі. Қаланың әл-ауқаты да жылдан-жылға артып, жақсарып келеді. Тіпті, Шымкентке келген әр сапарында Президент мұндағы оң өзгерістерге ризашылығын білдіреді. Елбасымыз: «Шымкент – шырайлы шаһар. Экономикасы, кәсіпорындары дамыған қонақжай қала» деп жоғары баға берген болатын. Өздеріңізге мәлім, осы аптада қала әкімі Ғабидолла Әбдірахымов 2016 жылы атқарылған жұмыстардың қорытындысы бойынша және қаланың алдағы 5 жылға арналған даму жоспары жөнінде тұрғындар алдында есеп берді. Әрине, шаһар басшысы Ғабидолла Рахматоллаұлының тұрақты қадағалауының арқасында қаламызда соңғы кездері шешімін тапқан шаруалар аз емес. Қала жаңарып, игі істер молайып жатыр. Жалпы, Шымкент соңғы бесжылдықта әлеуметтік-экономикалық тұрғыдан өрлеу мен жаңғырудың жаңа кезеңін өткеруде. Бұл ретте қаланың 2020 жылға дейінгі әлеуметтік-экономикалық даму тұжырымдамасы іске асырылуда. Қала аумағы кеңейіп, шаһарға 40-тан астам елдімекен қосылғалы бері жұмыс ауқымы да айтарлықтай артты. Қазір Бас жоспарға сәйкес, қала шекарасы 3 есеге ұлғайды. Соңғы санақтың қорытындысы бойынша қазір мұнда 910 мыңдай адам тұрады. Биыл бірінші жартыжылдықта халық саны миллионға жетеді деп жоспарланып отыр. Әрине, ең негізгі міндет – қала тұрғындарын толғандырған өзекті мәселелерді шешу, инфрақұрылым жұмыстарына басымдық беру. Бұл өз уақытымен орындалуда.

– Тұрғындарды алаңдатқан мәселелер рет-ретімен шешімін табуда дедіңіз. Осыған кеңірек тоқталып өтсеңіз.

– Бүгінде қалада ең бірінші кезекте инфрақұрылым жұмыстарына ерекше екпін берілуде. Елбасы белгілеген тапсырмаға сәйкес, қаланың көркеюі жолында мемлекеттік бағдарламалар аясында жүйелі жұмыстар жүзеге асып жатыр. Осы мақсатта Шымкент қаласы әкімдігі тарапынан қала тұрғындарына көрсетілетін қызметтердің барлық түрін «бір терезе» жүйесі арқылы атқаратын «Фронт-офис» орталығы ашылды. Сөз реті келгенде айтарым, жуырда қала әкімінің есебінде тұрғындар тарапынан осы орталықтың атауын өзгерту туралы ұсынысқа орай бұдан былай ол «Халық кеңсесі» деп аталатын болды. Көпшілікті мазалаған мәселенің бірі ол – ауызсу. Осы орайда 2016 жылы 98 мың халқы бар 7 елдімекен ауызсумен қамтылып, таза суға қосылған халық саны 83 пайыздан 92 пайызға жетті. Сондай-ақ осы жылы 68 мың халқы бар 6 елдімекен электр желілерімен қамтылып, оның көрсеткіші 84 пайыздан 88 пайызға өсті. Ал көгілдір отынға келсек, 2016 жылы 30 мың халқы бар 4 елдімекен газбен қамтылды. Яғни, қамту деңгейі 82 пайыздан 90 пайызға артып отыр.

– «Қала таза болса, көңіліміз таза болады» деп жиі айтып жатамыз. Шымкенттің тазалығына қаншалықты мән берілуде? Қаланы көріктендіру бойынша жұмыстардың нәтижесі қандай?

– Қала тазалығы – әкімдіктің басты назарында. Бұл бағытта қала әкімдігі арнайы жоспар бекітіп, сол бойынша жұмыстар атқаруда. Қазіргі таңда қаланың орталық бөлігімен қатар, 4 аудан әкімдігі тарапынан шағынаудандардың ішкі орамдық санитарлық тазалығына мән берілуде. Қомақты қаражат бөлінген. Бөлінген қаржыға шет аймақтардағы елдімекендердің санитарлық тазалығы қадағаланады, бей-берекет қоқыстарды шығару, аулаларда тазалық жұмыстары жүргізіледі. Білесіздер, Шымкент қаласының әкімдігі мен «ОҚО Азаматтық Альянсы» қауымдастығы бірлесіп, «Таза қала» байқауын ұйымдастырып келеді. Жалпы соңғы жылдары тазалық мәселесіне қолдау жоғары деңгейде деп айтуға болады. 

Былтыр қалада 24 мыңнан астам қылқанжапырақты, 50 мыңдай жай жапырақты және 24 мыңнан астам бұтақшалар егілді. Жасыл желектерді суару үшін 3 скважина орнатылды. Тағы бір ерекше айта кетерлігі, бүгінде облыс әкімі Жансейіт Қансейітұлының бастамасымен өңірімізде «Шатқал» бағдарламасы қолға алынуда. Бұл бағытта Шымкентте 5 саябақ салыну жоспары іске аса бастады. Бағдарламаның бірінші кезеңінде «Шымсая» саябағына 1718 түп көшет егілсе, «Самал» саябағына 5 мың түп ағаш көшеттері отырғызылды. Бұл жұмыстар әлі де жалғасын табатын болады. Тазалық мәселесінде тұрғындар да бейжай қарамаса деймін. Әрбір игі іске қолдау білдіріп, тазалық шарасында белсенділік танытып үлес қосса, міне ол – азаматтық белгісі. Меніңше, әркім өзінің тұрған жерінің патриоты болу керек. Бүгінде аймақ басшысы Жансейіт Қансейітұлы облыс орталығы Шымкентті еліміздегі ең үлгілі қалаға айналдыру бағытында жинаған тәжірибесі мен бар күш-жігерін жұмсап, барлық саланың өркендеуіне ерекше көңіл бөлуде.

– Қала әкімі халыққа есеп беру кездесуінде шаһардың қарқынды дамуы үшін қомақты қаражат бөлініп жатқанын айтып өтті. Биылғы жоспар бойынша ол қаржы қай салаларға көбірек бөлінбек? Осы туралы толығырақ айта кетсеңіз. 

– Әрине, бөлінген қаражат ел игілігіне жұмсалатыны анық. Ол қаражат ең алдымен қаланың инфрақұрылым жұмыстарын жақсартуға бағытталмақ. Көшелер мен аулаларды жарықтандыру – кезек күттірмейтін мәселелер. Сонымен қатар шалғай елдімекендерде өзекті мәселелер бар. Қазір жаңа мектептердің құрылысы жүруде. Биыл күзде бірнеше білім шаңырағы пайдалануға берілмек. Алдағы екі жылда үш ауысымды мектептер мен ирригациялық жүйелер мәселесі толық шешіледі деп отырмыз. Биыл Шымкенттегі металлургтер стадионы қайта жаңғыртылады. Сосын қалаішілік жолдарға ерекше мән берілуде. Былтыр тек қана аяқжолдарды салуға 1 млрд теңге жуық қаражат бөлінді. Бұған дейін ондай қолдау болған емес. Көшелер мен саябақтарда спорт алаңшалары көбеюде. Аулаларды жаңарту жұмыстары жалғасуда. Міне, мұның бәрі де тұрғындардың жайлы қалада өмір сүруі жолында атқарылып жатқан игі жұмыстар. Негізгі мақсат – Шымкентті ең қауіпсіз қалаға айналдыру. Биыл көшелер мен аулаларға видеобақылау құрылғылары орнатылады. Бұл әрине, шымкенттіктердің қаланың кез келген жерінде күндіз де, түнде де емін-еркін жүруіне қолайлы жағдай туғызу. Қаланың 2016 жылғы бюджетіне тоқтала кетсек, былтыр 69 млрд теңгені құрады. Қаржының басым бөлігі, қалада инженерлік жүйелер өзекті болғандықтан, осы саланы дамытуға бағытталды. Қуантарлығы сол, биыл бюджет қаржысы еселеніп, ел қазынасынан қаланы дамытуға қосымша 40 млрд теңгеге жуық қаражат бөлінуде. Қазірдің өзінде бюджет қаржысы 110 млрд теңге деп бекітіп отырмыз. Жыл соңына дейін қаражат мәселесі тағы төрт мәрте қосымша бекітіліп, нәтижесінде бұл қаражат одан да көбейеді деген жоспар бар.

– Қалалық мәслихат құрамының жаңарғанына да көп бола қойған жоқ. Халық сенімін арқалаған депутаттарға сайлаушылар аманаты қандай жауапкершілік жүктейді?

– Қалалық мәслихатқа 29 депутат сайланған. Барлығы да білімді, тәжірибелі азаматтар. Мәслихат депутаттарының негізгі міндеті – халық пен билік арасындағы алтын көпір қызметін атқару. Бұл міндетімізді мүлтіксіз орындап келеміз деп сеніммен айта аламын. Елімізге белгілі ғалым Мырзатай 

Жолдасбеков: «Мемлекетке қызмет ету дегеніміз – Отанға, келешекке қызмет ету» дейді. Бұл орайда халық қалаулылары өздеріне жүктелген депутаттық міндеттерін қал-қадірінше адал атқарып жатыр.

– Әңгімеңізге рахмет!

Сұхбаттасқан 
Сәбит ТАСТАНБЕК

ҚР Парламенті Мәжілісінің депутаты Бақтықожа Ізмұхамбетов Оңтүстікке келген сапарында облыстың ардагерлерімен жүздесіп, Елбасының Жолдауы туралы ой бөлісіп, пікір алмасты.

Жиынды жүргізіп отырған облыстық ардагерлер кеңесінің төрағасы Жеңісбек Мәуленқұлов кеңестің бүгінгі тыныс тіршілігі, ардагерлерге жасалып отырған қамқорлық, атқарылып жатқан жұмыстар жөнінде қысқаша баяндады.

– Өткен жылы өңірдегі демалыс орындарында 12822 ардагер демалып, емделді. «Әжелер алқасы» салт-дәстүрді жаңғырту, отбасылық құндылықтарды ұрпақ санасына сіңіру мақсатында ерен еңбек етіп келеді, – деді ол.

Одан кейін сөз алған Парламент Мәжілісінің депутаты, сондай-ақ, Орталық ардагерлер кеңесінің төрағасы Бақтықожа Салахатдинұлы Жолдауға байланысты пікірін білдіріп, Оңтүстік Қазақстан облысының әлеуметтік-экономикалық саладағы потенциалына оң пікір білдірді.

– Еліміздің көптеген өңірлері Оңтүстік Қазақстан облысындағыдай шаруашылықпен біте қайнасып отырған жоқ. Суы пайдаланылмай, жері бос, қараусыз жатқан аймақтар бар. Мемлекет субсидия бөлген, бірақ, жер игерілмеген. Есесіне, «ауылда жұмыс жоқ» деп қол қусырып отыр. Қалауын тапса, жер игеру, өнім өндіру, мал шаруашылығымен айналысу үлкен табыс көзі. Мысалы, қазіргі таңда Қазақстан астық өндіруден алғашқы үштікке кірді, ал экспорттаудан әлемде І орында тұр. Бірақ, бұдан да көп өнім алуға мүмкіндігіміз бар. Оған Канадаға барған сапарымда көз жеткіздім. Ол елдің шаруалары 1 гектардан 30-40 центнер өнім алады екен, ал біз әзірге 1 гектардан шамамен 15 центнер өнім алып отырмыз, – деген Бақтықожа Ізмұхамбетов Қазақстанды өркендету мүмкіндіктерін айта келе, жастардың жұмыссыздық мәселесін де алға тартты: – Жастарымыз еңбекке құштар болса, елді биік белестерге шығарып, жетістігін еселейді. 2007-2012 жылдары Батыс Қазақстан облысын басқардым. Сол кездері террористік әрекеттердің орын алғаны баршаға мәлім. Біз осы бағытта болашағымызды жалғайтын жастарымызбен жұмыс жүргізуіміз керек. Қазір әлеуметтік желіде жасөспірімдердің санасын улап, соңында өзіне қол жұмсауға мәжбүр ететін ойындар шықты. Мемлекет басшысының Жолдауындағы бес бастаманы негізге ала отырып, жұмыла жұмыс істейік, деді Б.Ізмұхамбетов. 

Кездесуге жиналған ардагерлер Елбасының Жолдауы бойынша түсіндіру жұмыстарын жүргізіп, жастардың тәрбиесіне, еңбекке баулу ісін жандандыруға бұдан әрі де атсалысатындарын мәлімдеді.

– Елбасының жаңа Жолдауы жастарымызға жігер сыйлады. Маңызды құжаттың мағынасы терең, бағыты айқын деп ойлаймын. Соның бір айғағы және ерекшелігі – жастарға деген үлкен жауапкершіліктің артуында. Биыл Президент бастамасымен «Баршаға арналған тегін кәсіптік-техникалық білім беру» жобасы іске асырылмақ. Бұл жұмыссыз жастарға тиімді мүмкіндік болады. Өйткені, жастар – мемлекеттің болашағы. Жолдау жастардың сеніміне үлкен серпін беріп, оларды білімге, еңбекке және табандылыққа талпынуға үндейді. Елімізде жаңадан ашылып жатқан өндірістік орындар көп екенін ескерсек, кәсіптік білім алған мамандар шоғырын даярлауға Елбасымыздың ерекше ден қойып отырғаны бекер емес.. 

Бұл жағынан біздің облысымызда ауқымды жұмыстар атқарылып жатқанын көріп жүрміз. Мемлекет басшысының жастарға қамқорлығының арқасында көптеген игі істер жүзеге асуда. Мәселен, өткен жылы Жастар сарайы күрделі жөндеуден өткізіліп, пайдалануға берілді. Мұның өзі жастардың жиі бас қосып, қоғамдық мәселелерге белсенділікпен атсалысуына ықпал етіп отыр.

ҚР Президенті Н.Назарбаевтың «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына арнаған Жолдауы Шымкент қаласының мекемелер мен оқу орындарында қызу талқылануда. Соның бірі – «Қазығұрт» шағынауданындағы №66 жалпы орта мектебінде жергілікті тұрғындарға Елбасы атап өткен міндеттердің бағыттары түсіндірілді.

Жиынға қалалық ішкі саясат бөлімінің басшысы Қанат Қалыбеков, Абай ауданы әкімінің орынбасары Гүлсара Тәшімова, сондай-ақ, білім беру мекемелерінің басшылары қатысты. Баяндамашылар Жолдауда сөз болған бес басымдықты атай келе, олардың жүзеге асырылуы экономиканың барлық саласындағы өсу ырғағының жоғарлауын қамтамасыз ететіндігін жеткізді. 

– Елбасының жыл сайынғы Жолдауын жұртшылық асыға күтеді. Өйткені Жолдауда таяу уақыттағы беталысымыз, елдің даму бағыты айқындалады. Бұл жолы жаңа формада жария етілген Жолдауда экономикалық реформаларды одан әрі тереңдетуге, әлеуметтік сала өркенін осы деңгейінен төмен түсірмеуге айрықша мән берілген, – деді №49 орта мектебінің директоры Сәуле Өтебаева.

Алдағы жылдардың бағдарын белгілеген саяси құжатты жүзеге асыру арқылы елдің әлеуметтік ахуалы нығайып, экономикадағы тұрақтылыққа қол жетпек. Жиында жарыссөзге шыққан азаматтардың ортақ ой-пікірі осыған саяды.

ҚР Президентінің «Қазақстанның Үшінші жаңғыруы: жаһандық бәсекеге қабілеттілік» атауымен жариялаған Жолдауы мазмұны жағынан ерекше құжат болып табылады. Осы орайда, ҚМДБ ОҚО өкілдігінің ұйымдастыруымен облыстық орталық мешітінің мәжіліс залында өткен «дөңгелек үстел» жиынында Жолдаудың негізгі бағдары жан-жақты талқыланды.

Аталмыш шараға Қазақстан мұсылмандары діни басқармасының ОҚО бойынша өкіл имамы А. Керімбек, ОҚО Ассамблеясы төрағасының орынбасары М. Қалмұратов, облыс әкімі аппаратының «Қоғамдық келісім» коммуналдық мемлекеттік мекемесінің басшысы Е. Байқонақов, М. Әуезов атындағы ОҚМУ-нің аға оқытушысы, т.ғ.к. құқықтану доценті Ғ. Маймақов және қала, аудан имамдары мен «Шымкент» медресе-колледжінің ұстаздар қауымы қатысып, өз ойларын ортаға салды.
– Жолдауда ел экономикасын жедел өркендетумен қатар, білімді дамыту, руханиятымызды жаңғырту, қауіпсіздік шараларын күшейту, діни экстремизмнің алдын алу, қылмыстық жазасын өтеп жатқан азаматтарды теологиялық тұрғыдан сауаттандыру мәселелері де айтылды. Бұл тұрғыда, Елбасының әсіресе, ғаламтор арқылы діни мазмұнда теріс мәліметтер тарататын ақпарат көздерінің жолын кесу жөнінде айтқан тапсырмасы дер кезінде көтерілген мәселе деп айтар едік, – деді облыс имамы Ахметжан Пірәліұлы.
Жиынға қатысушылар саяси құжатта көрсетілген тапсырмалар мен міндеттерді жүзеге асыруға бар күш-жігерін салатынын жеткізді.

«Қазір – ақпараттық соғыс жүріп жатқан кезең. Бұл жағдай сандық технологияларды дамыту керектігін меңзейді. Адамзат баласы ғарышқа жол салуға әрекет етіп жатқаны да белгілі. Сол себепті, ендігі кезекте өнім шығару мен ақыл-ой арқылы қаржы табуды 50 пайызға дейін көтеру керек». Елбасы Жолдауы талқыға түскен жиында М. Әуезов атындағы ОҚМУ-дың "Саясаттану және халықаралық қатынастар" кафедрасының меңгерушісі Сәкен Мәжінбеков осылай деді. Әл-Фараби ауданы әкімдігі мен қалалық білім бөлімі бірлесе ұйымдастырған жиында пайымды пікірлер ортаға салынды. Алдымызда жүктеліп отырған басымдылықтар сөз болды.

Елбасының Қазақстан халқына арнаған Үндеуі мен «Қазақстанның үшінші жаңғыруы: жаһандық бәсекеге қабілеттілік» атты Жолдауын насихаттау жиынына зиялы қауым өкілдері, білім саласының қызметкерлері, ұстаздар, ата-аналар, ардагерлер қатысты. Жолдау білім саласын дамытуға көп басымдық жүктеп отыр. Өз бетімен іздену дағдыларын дамытуға, ақпараттық технологияларды меңгеруге, баса көңіл бөлу керек. 

Әл-Фараби ауданының әкімі Бауыржан Қалжанов биылғы Жолдау жүктеген міндеттерді жүзеге асыру басты мақсат екеніне тоқталса, М.Әуезов атындағы ОҚМУ-дың «Саясаттану және халықаралық қатынастар» кафедрасының меңгерушісі Сәкен Аралбайұлы халықаралық қатынастардағы жағдайларды сөз етті. Аудандық ардагерлер кеңесінің төрағасы Мұқан Омаров «ұрпақ тәрбиесінде ата-баба дәстүрін басты идеология етіп алу керек» деген пікірін білдіре келе, мектептерде бастауыш ардагерлер ұйымдарын құруды қолға алу керектігін сөз етті.
Жиынды қорытындылаған қалалық білім бөлімінің басшысы Ж.Тәжиева ұстаздарды ғылыми-технологиялық жетістіктерді пайдалануға шақырып, оқушылардың шет тілдерін білуі керектігіне назар аударды.

Кеше қала әкімдігінің мәжіліс залында ҚР Президентінің Қазақстан халқына арнаған Жолдауы талқыланды. Жиынға қала әкімі Ғабидолла Әбдірахымов қатысып, төрағалық етті.

Жолдаудың негізгі бағыттарын саралаған басқосуға Шымкент қалалық мәслихатының депутаттары, құрылымдық бөлім басшылары, қала аумағына қарасты төрт аудан әкімі және мектеп басшылары қатысты. Қала әкімі жиынға қатысушыларды 2017 жылы Елбасы белгілеп берген саясат пен бағыт-бағдарды негізге ала отырып жұмыс істеуге шақырды.

– Елбасы Жолдауында технологияны меңгеру, осы саладағы біліктілікті арттыру, кәсіпкерлікті қолдау және дамыту, халықты тұрғын үймен қамтамасыз ету, инфрақұрылымды дамыту жөнінде айтылған тапсырмалар біздің күнделікті жұмысымызбен тікелей байланысты. Шымкент қаласында 60 мың гектар жер ауыл шаруашылығына арналған. Соның барлығын сумен қамтамасыз ету жүйесін жаңа технологиялық әдістермен қолданып, дұрыс пайдалануымыз қажет. Сондай-ақ, инфрақұрылымның басым бағыты қала сыртындағы тұрғын алаптар мен шағынаудандарда жүзеге аспақ. Қала тұрғындары орталыққа оңай келіп-кете алатындай жағдай жасалуы тиіс, – деді қала әкімі.

Ал білім саласының мамандарына балаларды мектеп жасынан-ақ кәсіби мамандануға бейімдеу қажеттігін ескертіп, сол бағытта жұмыс жасауға үндеді. Қала әкімі тұрғын үй кезегінде 28 мың, ал жер алу үшін кезекте 90 мыңнан астам қала тұрғыны өтініш білдіргенін айтып, бұл ретте «Нұрлы жер» бағдарламасының тиімділігі зор болатынын мәлімдеді.

Жиынға қатысқан Шымкент қаласының Құрметті азаматы Әділхан Сұлтанбек ақсақал қаланы көркейтудегі игілікті істері үшін Ғ. Рахматоллаұлына алғысын білдіріп, осы бағытта тер төгіп жүрген сала мамандарына, қаланың белсенді жастарына ақ батасын берді. Жиынды қала әкімі қорытындылады.

– Елбасының Жолдауын мұқият оқып шықсаңыздар көп шаруадан хабардар боласыздар. Жолдау халыққа арналды, сондықтан бүгінгі жиынға қатысушылар оны түсіндіруге міндеттіміз. Осы мақсатта белсенді түрде бірге жұмыс жасайтын боламыз, – деді Ғ.Әбдірахымов.

Марат ТАМАБАЕВ,
қалалық мәслихат депутаты:

Сот беделі – мемлекет беделі

– Мемлекет басшысы Қазақстан халқына арнаған Жолдауында «Сот жүйесіне деген сенімнің артуына қол жеткізу қажет. Судьялардың жұмысына заңнан тыс кез келген ықпалды жою маңызды» деді.
Кез келген мәселені сот арқылы шешу – халықтың өз құқықтарын талап ете алатын сауаттылығын танытады. Мысалы, мынадай дау туындады делік. Сіз бір нысанды жалға алып, кішігірім асханаңызды аштыңыз. Сонда коммуналдық төлемдерге байланысты түбіртек қағазынан заңсыз қосылған соманы байқадыңыз. Мұндай жағдай жиі орын алса, сіздің шағын кәсібіңіз тоқырайтыны анық. Сондықтан әу бастан-ақ сотқа арызданып, құқығыңызды қорғаңыз. Алайда, күнделікті өмірде кездесіп жатқан мұндай арыз-шағымдарды халық ескере бермейді. Тіпті, малын ұрлатып, үйі тоналған тұрғындар да көбіне жазған арызына байланысты сот шешімін күтпейді. Себебі, мұндай істердің қаралатынына сенбейді. Сондай-ақ, «сот беделін арттырайық, сеніңіз» деп біз қанша жерден насихаттағанымен, халықтың ойы өзгермейді. Оны өзгерту – құқық қорғаушылардың қолында. Халықпен етене жақын байланыс орнатулары қажет. Азаматтардың құқығын қорғауда еңбек ететін қызметкерлер, әсіресе, учаскелік полиция қызметкерлері, сот орындаушылар, медиаторлар қарапайым тұрғындарға жақындауы керек. Тыңдаған арыз-шағымдарын жауапсыз қалдырмай шешім шығарып, оны таныстырып, түсіндіру жұмыстарын жүргізуімен еленуі тиіс. Елбасының саясатын қолдау бағытындағы жұмыс істеудің көрсеткіші де сол болмақ.

Берікбол ЖАРЫЛҚАСЫН,
IT маманы:

Цифрлық индустрия – игілікке

Елбасы өз Жолдауында жаңа IT технологияларға қатысты орынды пікір білдірді. Жасыратыны жоқ, көпшілік Президент айтып өткен цифрлық технологияны оның ішінде онлайн-сауда, мобильді банкинг, цифрлық қызмет көрсету түрлерін біле бермейді. Егер бұны толығымен жүзеге асыра алсақ, Жолдауда көрсеткендей бірқатар жеңілдіктерге қол жеткізер едік. Мәселен, шамамен екі жыл бұрын ғана пайда болған kaspi.kz көптеген адамдардың қолын ұзартып отыр. Бұл сервис арқылы үйден шықпай-ақ қажетті зат сатып алуға болады, коммуналдық және тағы басқа көптеген қызмет түрлеріне төлем жасауға болады. Міне, бұл цифрлық жаңа технологияның тиімділігі. Енді осындай қызметтерді білім, денсаулық және тағы басқа салаларда дамыту керек. Бұл тұрғындардың біршама уақытын үнемдеуге септігін тигізер еді. Елбасы айтқандай, бүгінде халықтың жаңа технологияларға өтетін кезеңі келді деп ойлаймын.