Шымкент келбеті

Шымкентте екі бірдей әлеуметтік жоба іске қосылды. «Қайнар» бизнес орталығында кәсіпкерлерге және кәсіпкерлікті дамытуға бағытталған «Бизнес-Супермаркет» және «E-Commerce Center» орталығы ашылды.

Оның салтанатты ашылу рәсіміне Шымкент қаласының әкімі Ғабидолла Әбдірахымов, Шымкент қаласы мәслихатының хатшысы Ғани Ташқараев, «Қазпошта» АҚ Басқарма төрағасы Сәкен Сәрсенов қатысты.

– Бұл – әкімдік, «Қазпошта» АҚ және «Shymkent» ӘӘК» бірлесіп қолға алған жоба. Аталған екі орталықта кәсіпкерлікті дамытуға қолдау бағытында заманауи қызмет түрлері көрсетіледі.

Мұның аясында «Мен кәсіпкер боламын» атты әйелдер мен жастар кәсіпкерлігін дамытатын ең маңызды жоба іске қосылады. Оған бюджеттен биыл 600 млн теңге қарастырылды.

Кәсіппен айналысуға қабілетті және ынтасы бар шымкенттік әйелдер мен жастар үшін жаңа кезең басталды. Бұл жоба бойынша бюджеттен бөлінетін қаржы көлемін жыл сайын көбейтіп отырамыз.

Сондықтан жастарды, қыз-келіншектер мен аналарды кәсіпкер болуға шақырамын, – деді қала әкімі.

Қала басшысы инвесторлар мен кәсіпкерлерге қызмет көрсететін «Бизнес-Супермаркет» пен электрондық коммерцияға жәрдемдесетін «E-Commerce Center» орталығын аралап, жұмысымен танысты. Орталықта клиенттерге қолайлы жағдай жасалып, келіссөздер үшін арнайы зал қарастырылған және call-орталық жұмыс істеп тұр.
Ғабидолла Рахматоллаұлы «Интернет дүкен: оны қалай құруға және қалай дамытуға болады» деген тақырыптағы семинарға қатысты. Онда бизнеске қызығып жүрген азаматтарға орталықтың қандай тиімділігі бар, қандай баспалдақтардан өту қажет, мемлекеттен берілетін көмек түрлері, соңғы уақытта әлем бет бұрған «онлайн-дүкен» жайында ақпараттар берілді.

«Бизнес-Супермаркет» - инвесторлар мен кәсіпкерлерге қызмет көрсетеді

Жаңа орталықта кәсіпкерлер мен инвесторларға бизнесті құрудың барлық кезеңдерінде әдістемелік көмек беріледі, – деп түсіндірді «Shymkent» ӘӘК» АҚ басқарма төрағасы Рашид Аюпов. – Мұнда электронды форматта «бір терезе» қағидатымен қызмет алуына жағдай жасалған.

Сонымен бірге, кәсіпкерлер заңгерлік, бухгалтерлік, бизнес-жоба, бизнесті сүйемелдеу қызметтерін, «Атамекен» ӨКП-ның қызметтерін, ХҚО-ның қызметтерін, «Даму» КДҚ» АҚ ӨФ-ның, кедендік қызметтерді, логистика және рұқсат құжаттары бойынша және Шымкент қаласы әкімдігінің қызметтерін ала алады.

«Кәсіпкерлерге бұған дейін де мұндай қызмет көрсетілді, жаңа орталықтың ерекшелегі неде» деген сауалымызға басқарма төрағасы былай деп жауап берді:

– Орталықтың артықшылығы бұрын кәсіпкерлер идеяларымен келетін болса, енді мұнда дайын жобалар да бар. Сол жобамен кәсібін дамытуға мүмкіндік беріледі.

Екіншіден, қалада 75 мыңнан астам кәсіпкер бар. Олардың басым бөлігін сауда-саттық жасап, кафе-дүкендерінен қаржы тауып отырғандар құрайды.

Қарапайым ғана мысал, қалада көптеген азаматтар қатарынан дүкен салып, сол арқылы нәпақысын айыруға тырысуда. Алайда, олардың көбісі бәсекелестікке шыдамайды, жабылады, сауда тоқтайды дегендей.

Ал жаңа ашылып отырған жобамызда сол кәсіп ашқандарға бәсекелестікті азайту үшін бағыт-бағдар бере аламыз, деп Рашид Аюпов орталық қызметінің тағы бір пайдалы тұсын атап өтті.

«E-Commerce Center» орталығы

«E-Commerce Center» – электрондық коммерцияға жәрдемдесетін орталық. Бүгінгі күні дүниежүзілік сауданың 60%-нан астамы электрондық саудаға ауысқан.

«Shymkent» ӘӘК» АҚ басқарма төрағасы Рашид Аюпов сауданың заманауи бұл түрі Шымкентте әлі қолға алынбағанын алға тартты. Қазір осы бағытты дамытуға күш салынуда.

«Қазпошта» АҚ-ның Басқарма төрағасы Сәкен Сәрсеновтың айтуынша, өткен жылы Қазақстанда электрондық коммерция айтарлықтай өрге басқан.

Нәтижесінде нарықта ол 300 млрд. теңгені құрап, елімізде жеткізілген сәлемдемелер көлемі шамамен 35,1 млн данаға жеткен. Бұл 2017 жылмен салыстырғанда 60%-ға артық. Интернет-сатып алушылардың жалпы көлемі өткен жылы 2,3 миллион адамға жеткен.

– «E-Commerce Center» Нұр-Сұлтан, Алматы, Қарағанды қаласынан кейін республикада төртінші болып ашылып отырған орталық. Бүгінгі таңда кәсіпкерлер тауарларын онлайн-дүкен арқылы сатуға мүмкіндігі бар.

Тіпті бұл арқылы дүниежүзілік нарыққа шыға алады. Өзінің тауарын сатады не сатып алады. Егер кәсібін онлайн-дүкен арқылы дамытқысы келетін кәсіпкер болса, орталыққа келеді.

Біз интернет-сайт ашып беруге, сол арқылы тауарын нарыққа шығаруға және жеткізу логистикасын қамтамасыз етуге көмектесеміз, – деді «E-Commerce Center» департаментінің директоры Бек Арпабаев.

Осы тұста өткен жылдан бастап Қазақстанда интернет-дүкендер үшін 5 жылға КТС-ты (корпоративтік табыс салығы) және ЖТС-ты (жеке табыс салығы) алып тастау түрінде салықтық артықшылықтар қолданысқа енгенін айта кетейік.

Мамандар келтірген дерекке сүйенсек, Қазақстанда бүгінде электрондық коммерция саласына 1700 кәсіпкер тартылса, Шымкентте бұл бойынша қазірдің өзінде 150 кәсіпкер оқудан өтіпті.

«Мен кәсіпкер боламын» жобасы іске қосылды

«Қайнар» бизнес орталығында «Мен кәсіпкер боламын» жобасы да іске қосылды. Бұл Шымкент қаласында жастар және әйелдер кәсіпкерлігін дамытудың 2019-2021 жылдарға арналған бағдарламасы аясында жүзеге асады.

Оған қаланың жастары мен әйелдер қатысып, мынадай 5 бағыттағы кәсібін дамытуға көмектеседі.

1.Жастар және әйелдер кәсіпкерлігіне 1% жеңілдікпен несие беріледі. Несие сомасы 5 млн теңгеге дейін;

2. Мини-агрофермаларды ұйымдастыруға жер учаскелерін беру;

3. Көше саудасы объектілері үшін жер учаскесін беру. Мұнда қызмет көрсету (әсемдік салоны, аяқ киім шеберханасы, ателье, көлік жөндеу) және сауда (көкөніс, азық-түлік, газет, кәдесый, гүл сатуға) жер телімдері беріледі.

4. Электронды коммерцияны ынталандыруға қаржыландыру.

5. Франшизаны қаржыландыру. Франшиза сатып алу шығындарын 1 млн теңгеге дейін өтейді.

Толық ақпарат алу үшін мына мекенжайға хабарласуға болады: Шымкент қаласы, Бəйдібек би даңғылы, «Қайнар» бизнес орталығы, (Бəйдібек би ескерткішіне қарама-қарсы).

Байланыс телефон: 39-20-22, 39-33-25

Шымкентте емхана ішінен дәріханалар ашылды. Қазіргі таңда 13 мемлекеттік емханада жаңадан ашылған дәріханалар халыққа қызмет көрсетуді бастап кеткен.

Енді диспансерлік есепте тұратын азаматтар алысқа сабылмай тегін дәрі-дәрмекті емхана ішінен алады. Мегаполистегі медицина саласында тағы қандай жаңалықтар бар?

Тұрғындарға қолайлы

Шымкенттегі №7 емханаға қала аумағындағы 13 елдімекеннен 62 мыңнан астам тұрғын тіркелген. Олардың басым бөлігі Тоғыс, Қарабастау, Жалын, Бадам-1,2, Маятас, Жыланбұзған, Қарақия және Қаратөбе секілді қалаға қосылған елдімекендердің тұрғындары.

Қазіргі уақытта емхана ұжымы цифрландыру жүйесіне толық өткен. Соның нәтижесінде тұрғындарға көрсетілетін медициналық көмектің қолжетімділігі артып, сапалы қызмет көрсетілуде.

Шалғайдағы тұрғындар үшін дәріхананың ашылуы жағымды жаңалық болды. Өйткені жүрек аурулары, қан қысымы, қант диабеті секілді дерттермен диспансерлік есепте тұратындар аз емес.

Солардың бірі – Дастан Бултенов қант диабетімен есепке алынып, дәрігерлер тұрақты қабылдауға дәрі тағайындағанына бірнеше жыл болған.

– Мемлекеттен тегін дәрі-дәрмек беріледі. Бұрын ол дәріні алу үшін орталықтағы дәріханаға баратынмын. Ары-бері жүруге уақыт кететін. Енді емханадан ашылған мынадай дәріхана біз секілді қарияларға ыңғайлы болды, - дейді зейнеткер.

Қалалық №7 емхананың бас дәрігері Айман Оспанова дәріхананың тұрғындар үшін тиімді бірнеше тұсын былай түсіндірді:

– Бұрын «СК Фармация» қандай жекеменшік дәріханамен келісім-шартқа отырса, тұрғындар дәріні сол жерден алатын. Қазір тікелей өзі қарасты емханадағы дәріханаға келеді.

Мұның тиімділігі сол – диспансерлік есепке тұрған азаматтар дәрігердің қабылдауында болып, емдік рецепт тағайындағасын дәрісін бірден емхана ішінен алып кетеді.

Екіншіден, бұл жүйеде мамандар қандай препараттар жеткіліксіз немесе қаншасы қорда тұрғанын, пациенттердің дәрілерін алған-алмағаны бақылауға алып, күнделікті сарапатама жасайтындықтан, дәрі-дәрмек тапшылығы туындамайды деп күтілуде.

Мобильді қосымша – көмекке

Шымкентте смартфондық ақпараттық жүйеге күні бүгінге дейін 154 609 азамат тіркелген. Нәтижесінде тұрғындарда мобильді қосымша арқылы лабораториялық анализдердің қорытындысын алуға мүмкіндік бар.

Жалпы, №3 емханада жыл басынан 11 мыңнан аса тұрғынға талдау нәтижесі электронды түрде берілген.

– Мобильді қосымшаның уақыт үнемдеуде тиімді екенін түсінген тұрғындар саны күн санап артуда. Қазір мамандарымыз аптасына 100-ге жуық адамды тіркеуге алып жатыр.

Мекемеде 20-60 жас аралығындағы 10 886 интернет пайдаланушы тіркелді. Бірінші тоқсанның өзінде мобильді қосымшамен 8 мыңға жуық тұрғын дәрігер қабылдауына жазылып, 107-і үйіне шақырды.

Сондай-ақ, жаңашылдықтың бірі - кез келген азамат смартфонындағы қосымшасы арқылы анализдердің нәтижесін көре алады.

Нақтырақ айтқанда мобильді қосымша арқылы қан талдауы, несеп секілді 30-ға жуық лабороториялық анализ түрін көруге мүмкіндігі бар, - дейді Динара Жұмадилова.

Дәрігерлердің жүктемесі төмендеді

Шымкент қалалық денсаулық сақтау басқармасының мамандары қалада жыл басынан бері 48 учаскелік аймақ ашылғанын жеткізді. Оның 28-і жалпы тәжірибелік учаскелер болса, 15-і - педиатриялық.

Соның ішінде 11 учаске Нұрсәт шағынауданындағы №3 емханадан ашылған. 58 мың тұрғын тіркелген медициналық ұйымда 12 мыңдай азамат түрлі дертпен диспансерлік тізімге алынған, 9 мыңы - ересектер.

– Учаскелік дәрігерлердің жұмысын жеңілдетуде 6 жасқа дейінгі балаларға 11 педиатриялық аймақ ашылды. Соның нәтижесінде жалпы тәжірибелік аймаққа тіркелген халық саны 2500-ден 1500-ге төмендеді, - дейді №3 емхана бас дәрігерінің міндетін атқарушы Динара Жұмадилова.

Осындай жаңашылдықтардың нәтижесінде Шымкентте жыл басынан бері жалпы тәжірибелік дәрігерлердің жүктемесі 2000 адамнан – 1789-ға, педиатр жүктемесі 1000 баладан 838-ға төмендеген.

Бүгінгі күні ақ халаттылардың жүктемесін азайтып, сапаны жақсартуда мемлекеттік-жекеменшік серіктестіктері және шағын жекеменшік клиникаларды жетілдіру жұмыстары қарқынды жүруде.

Алғаш рет буынға тіліксіз ота жасалды

Шымкент қаласындағы №1 клиникалық ауруханада буынға алғаш рет тіліксіз ота жасалды. Дәрігерлер жабық операцияны жол-көлік оқиғасы кезінде зардап шеккен 19 жасар қызға жасаған. Ота кезінде мамандар бойжеткеннің аяғындағы үзілген сіңірін хирургиялық жолмен байлап берді.

Айта кетейік, жабық операция Алматы қаласындағы Қазақ медициналық үздіксіз білім беру университетінің профессоры, медицина ғылымдарының кандидаты Арман Әбдіразақовтың жетекшілігімен өтті. Білікті маман ота жасау арқылы жергілікті ақ халаттылармен тәжірбие алмасқан.

Шеберлік сабағы кезінде білікті маманның жетекшілігімен аурухана базасында 2 науқастың тізі буынына тіліксіз ота жасалды. Мұндай операция жасау үшін травматологтар «Артроскоп» аппаратын қолданып, аяқтағы жарақатты хирургиялық жолмен емдеп берді.

Бұрын езіліп кеткен жілікшелерді жалғау үшін тізені тіліп, буындарды ашуға тура келетін. Енді науқастың денесінің екі-ақ жері тесіледі.

«Бұл әдістің науқастардың ертерек аяғынан тік тұрып кетуіне пайдасы көп және денеге тыртық түспейді», - дейді мамандар.

Шымкент қалалық кардиологиялық орталық тәулік бойы қала, облыс тұрғындарына кардиологиялық, кардиохирургиялық және аритмологиялық көмек көрсетеді.

Осыған байланысты көп жағдайда қосымша зертханалық тексерулер жүргізуге және кеңес беруде түнгі уақытта, демалыс, мереке күндері мамандарды орталыққа шақыруға тура келеді.

Дәрігерлер үйінен орталыққа, сосын үйіне қызметтік көлікпен жеткізіледі. Мұның бәріне сарапта жүргізгенде бір шақыртудың өзіне қызметтік көлікке 1427 теңге жұмсалып, орталыққа жетуге 40 минуттан 1 сағатқа дейін уақыт кететіні анықталды.

Енді қалалық кардиологиялық орталық мамандарды тасымалдаудың жаңа форматына көшіп, қаладағы такси паркімен келісім-шарт жасасты.

Бір шақырудың бағасы – 500 теңге (барып-қайту 1000 теңге), ал дәрігерлерді жеткізу уақыты – 20 минут. Сала мамандары бұл уақыт пен қаржыны үнемдеуге пайдасы тиеді деп отыр.

Үшінші мегаполисте «Қазақстан – біздің үйіміз!» акциясы басталды. Экологиялық акцияны Әл-Фараби ауданы әкімдігі Қошқар ата өзені бойын тазалаудан бастап, оған тазалық мекемелері, жоғарғы оқу орындарының студенттері, ІІМ оқу орталығының сарбаздары және қала тұрғындары атсалысты.

– Қошқар ата өзені қалалықтардың ғана емес, сырттан келген қонақтардың да демалатын орнына айналды.

Сондықтан өзен бойының таза болуы маңызды, - дейді акцияға қатысқан Жастар орталығы жанындағы еріктілер мектебінің мүшесі Ж.Ашимова. Аталған мектептен акцияға 50-ден аса жас қатысқан.

- Қаланың тазалығына аудан тұрғындары белсенді қатысып, демалыс аймағын ретке келтірді. 10-нан аса техника жұмылдырылды. Акция бір айға созылып, ауданға қатысты барлық аймақтарда тазалық жұмыстары жүреді, - деді Әл-Фараби ауданының әкімі Ғ.Мәуленқұлов.

Аудан әкімі шымкенттіктерді қаланың көркеюіне үлес қосып, әрбір көше, аулаларды таза ұстауға шақырды.

Шымкентте 1128 дәрігер «Ауруларды басқару бағдарламасы» бойынша біліктілігін арттырып, жалақылары 20 пайызға өсті.

Бұл туралы еліміздің денсаулық сақтау министрлігінің жауапты хатшысы Болат Төкежанов бастаған жұмысшы топтың үшінші мегаполиске жасаған іс-сапары кезінде айтылды. Қала әкімінің орынбасары Гүлжан Құрманбекова күтіп алған министрлік өкілдері қаладағы бірқатар медициналық ұйымдардың жұмысымен танысты.

Министрлік өкілдері көпсалалы №2 аурухана мен қалалық №6 емханаға барды. Сала мамандары №6 емханада «Триаж» жүйесінің жұмыс істеу тәртібі, шұғыл медициналық көмек көрсету, күндізгі станционар жұмысы және қызметкерлердің «Ауруларды басқару бағдарламасы» бойынша жұмыс істеу тәртібімен танысты. Аталған бағдарлама бойынша медициналық ұйымда да 150 медицина маманы оқыту курсынан өтіп, жалақылары 20 пайызға көтерілген.

Жұмысшы топ бұған қоса қалалық диагностикалық орталықта медициналық қызмет көрсету стандарты сынды бірнеше тақырыптар бойынша семинар өткізді.

Шымкентте рұқсат құжаты жоқ қоғамдық 139 нысан жұмыс істеп тұр. Өз қызметінің басталғаны туралы хабарлама бермеген мейрамхана, тойхана, кондитерлік цехтардың тізімі ақпараттық порталдарда жарияланғанымен, ешбірі құжат алуға асықпаған. Бұл туралы ақпараттық-коммуникациялық орталықта өткен брифингте Шымкент қаласы қоғамдық денсаулық сақтау департаментінің мамандары мәлімдеді.

– Республикадағы маңызы бар үшінші қала болғандықтан, талаптың да деңгейі соған сәйкес болуы қажет. Халықтың саулығы бірінші кезекте екенін ескерсек, тамақтандыру орындары заң талаптарына сай жұмыс істеуі керек. Жаз мезгілі жақындап келеді, сол себепті өткен жылы балмұздақтан улану секілді жағдайлардың қайталанбағаны дұрыс. Бүгінгі таңда аталған 139 нысан заңға түбегейлі қарсы жұмыс істеуде. Кәсіпкерлердің жауапсыздығынан ешқандай құжаты жоқ. Ол орындардан қазірдің өзінде қаншама тұрғын тамақтанып, тапсырыс беруде, - деді Шымкент қаласы қоғамдық денсаулық сақтау департаменті басшысы Әбдіманап Төлебаев.
«Қара» тізімде «Батырхан», «Бақсарай» тойханасы, «Империал» секілді мейрамханалар бар. Қоғамдық денсаулық сақтау мамандары тұрғындарға тізімге іліккен орындарда тамақтануда сақ болуды ескертеді.
Брифингте қоғамдық тамақтандыру бойынша кәсіп ашқан азаматтар да шақырылып, оларға рұқсат беру құжатының маңыздылығы түсіндірілді. Қоғамдық денсаулық сақтау департаменті кәсіпкерлерге түсінікті әрі ыңғайлы болу үшін қажетті құжатты алудың электронды форматын да әзірлеген. Басқосу барысында осы ақпараттар жайында парақшалар таратылды.

Шымкентте балаларды кәсіпкерлікке баулу жұмыстары басталды. Мегаполисте алғаш рет «Shymkent» ӘКК» АҚ мен «Nur Otan» партиясы қалалық филиалының ұйымдастыруымен балалар жәрмеңкесі ұйымдастырылды.

Арбатта өткен жәрмеңкеде 6-14 жас аралығындағы 100-ге жуық жеткіншек өздері жасаған тауарлары мен бұйымдарын ұсынды. Солардың бірі - Марсел Ділдабаев анасымен иіс сабын қайнатуды үйреніп жүр. Жәрмеңкеде өзі жасаған сабындарды сатуға болатынын естігенде тіптен қуанған.

– Сабыннан әртүрлі жемістің иісі шығады. Келе сала екеуін сатып үлгердім, - деді балақай.
Жәрмеңкенің мақсаты - балаларды кәсіпкерлікке баулу. Осылайша олар бір күн бойы өздерін кәсіпкер ретінде сезініп көреді.

– Балаларды кәсіпкерліктің негізіне үйретуді мақсат етіп отырмыз. Мұнда олар кәсіпкерліктің қыр-сырымен танысады, еңбекті бағалауға, қадірлеуге үйренеді әрі жұмыс істеуге қызығушылығы оянады.

Бұл жеткіншектердің өрісін шығармашылық әрі бизнес жағынан бірге дамытатын жоба. Мұндай жәрмеңкелер әлемнің 100-ден астам елінде өткізіледі, – деді «Nur Otan» партиясының Шымкент қалалық филиалы төрағасының бірінші орынбасары Б.Нарымбетов.

Ұйымдастырушылар жәрмеңкені аралап көріп, балалардың еңбегімен танысты. Б.Нарымбетов жәрмеңкеде алғаш болып 7 жасар Арина мен 9 жасар Әлімжанның қолөнер бұйымдарын сатып алды.

Айта кетейік, Қазақстанда бірінші болып Шымкентте өткен жәрмеңкеде балалар 225 мың теңге табыс тапты. Олар бұл қаржының 10 пайызын «Жануарларға арналған екінші үй» қайырымдылық қорына аударды.

Шымкентте көп балалы аналарға қызмет көрсететін орталық өз жұмысын бастады. Бұған дейін қалада аналар кеңес сұрап, құжат өткізетін мекеме біреу ғана болса, енді төрт ауданнан бөлімше ашылып отыр.

Шымкенттік Мөлдір Жақыпбекова – төрт баланың анасы. Көп балалы аналарға әлеуметтік қолдау жасалады дегенді есітіп, орталыққа келгенін айтады.

– «Өрлеу» бағдарламасы бойынша құжат тапсырған болатынмын. Енді әр балаға 21 мың теңге берілетінінен хабардар болып, кеңес алуға келдім. Мамандар қажетті ақпаратты түсіндіріп берді, - дейді көп балалы ана.
Еңбекші ауданы бойынша Қапал батыр көшесінен ашылған орталықта келушілер үшін ыңғайлы жағдай жасалған. Күту залында аналар емін-еркін отыра алады.

– «Нұр Отан» партиясының кезекті XVIII cъезінде Елбасы халықтың тұрмыс сапасын жақсартуға бағытталған нақты мемлекеттік бастамалар тапсырды. Қала әкімі Ғ.Әбдірахымовтың қолдауымен төрт ауданнан орталық ашылды. Қазір аналарға құжат тапсыру барысы түсіндірілуде. Ал 1-30 сәуір аралығында әлеуметтік көмек алу бойынша құжат қабылдау басталады, - деді қала әкімінің орынбасары Г.Құрманбекова.

Айта кетейік, Шымкентте 30 мыңға жуық көпбалалы аналар бар. Енді көп балалы аналар әлеуметтік көмек алу үшін кеңес алып, құжат өткізуде өз аудандарында ашылған орталықтарға бара алады.
Орталықтардың мекенжайы:

Еңбекші ауданы бойынша – Қапал батыр көшесі, н/ү;
Абай ауданы бойынша – Мәделі қожа көшесі, н/ү (халыққа қызмет көрсету орталығының ғимараты);
Әл-Фараби ауданы бойынша – Ш.Қалдаяқов көшеі, 13А;
Қаратау ауданы бойынша – Бәйдібек би көшесі, н/ү.