136 баланы асырап алған

Пятница, 06 Декабрь 2019 05:50

Жыл басынан бері үшінші мегаполисте 57 563 азаматтық хал актісі тіркелген. Өткен жылдың 11 айлық көрсеткішімен салыстырғанда, АХАТ бөлімінің қызметіне жүгінгендер едәуір артқан. Тиісінше, неке бұзуға өтініш қалдырғандардың қатары жыл санап өсіп отыр.

403

Үшінші мегаполистің жайдарманшылары маусымдық ойынды аяқтап, жылдың үздік командалары анықталды. Жастар жылы аясында ұйымдастырылған жарыста жастар қала әкімінің кубогі үшін сайысты.

318

Ізгілікте жарысқан жастар

Среда, 04 Декабрь 2019 04:41

Игі істің иелері қаламызда жетерлік. «ASAA» жастар бірлестігінің еріктілері «Жеңіс» жобасы аясында қайырымдылық жұмыстарымен айналысып жүр. Дәлірегі, соғыс ардагерлері мен тыл еңбеккерлерін құрметтеп, қолғабыс жасауда.

Табысым 101 мың теңге болғанда...

Среда, 27 Ноябрь 2019 03:58

Үшінші мегаполисте жұмысшы жастарға арналған сатып алу құқығынсыз берілетін жалдамалы пәтерге құжаттар қабылдау қызу жүруде. Қалалық тұрғын үй және тұрғын үй инспекциясы басқармасы орналасқан ғимаратқа ат басын бұрып, баспанадан үмітті жастардың жағдайымен танысып қайттық. Бірі қолына құжатын, енді бірі баласын арқалап келген жастардың қарасы қалың. Ұзын-сонар кезекте тұрған қыз-жігіттердің бар ойы – баспаналы болу.

DSC 0304

Мемлекеттік бағдарламаға қатысуға өтініш беруге келген жастың бірі – Ақбота Үсембекқызы. Жасы 28-де. Шаңырақ көтергендеріне үш жыл болыпты. Әзірге екі жасар қызы бар. Жолдасы жалдамалы жұмысшы болып нәпақа айырса, өзі тігін шеберханасында пішуші екен.

– Жастар жылында жұмысшы жастарға баспана беріледі дегенді естіп, қуанған отбасының бірі едік. Кейін шарттарымен таныса келе аздап күдерімізді үзгендей болдық. Бірақ, нар тәуекел деп, тиісті құжаттарды жинап, өтініш беруге келдік. Менің айлығым – 80 мың теңге. Қолыма тиетіні 60 мың. Ал жолдасым 80-90 мың теңге көлемінде табыс табады. Пәтер жалдап тұрамыз. Қазір 2 бөлмелі пәтерге 40-50 мың теңге төлейміз. Коммуналды шығындар мен азық-түлік бар, қызымыздың балабақшасына, киім-кешегіне айлықтан-айлыққа амалдап жетеміз.

Той-томалақ болса, қарызданып қалатын кездер болады. Егер айлығым 101 мың теңге болса, үйдің бастапқы сомасын амалдап жинар едік. Біз, тіпті, үй кезегіне тұра алмайды екенбіз. Мемлекет тарапынан әлеуметтік көмек алып көрмеппін. Өз күшімізбен оқыдық, үйлендік, жұмысқа тұрдық. Баспана алуға келгенде мемлекеттен қолдау болса деген тілегім бар. Осы 904 пәтердің біріне қолымыз жетсе, қанекей?! Әттең ондай мүмкіндіктен қағылып отырмыз, - дейді жас.

Ақботадай іштей қынжылған жастың санында есеп жоқ шығар, сірә?! Шымкент қалалық статистика департаментінің 2019 жылғы III тоқсанында жариялаған мәліметтеріне сәйкес, орташа айлық жалақы бағалау бойынша 141 007 теңгені құраған. Бұл – еңбек нарығындағы жұмыс күші (15 және одан жоғары жастағы экономикалық тұрғыдан белсенді азаматтар) 430,7 мың адамға шаққандағы орташа көрсеткіш. Оның ішінде 282,7 мың адам жалдамалы қызметкер екен.

Осы ретте 101 мың теңге көлемінде табыс табатын жастардың үлес салмағы қанша деген сауал алдыңыздан кесе көлденең шығуы да орынды. Бұл сұрақты жуырда брифинг барысында қалалық отбасы, балалар және жастар ісі жөніндегі басқармасының басшысы Ж.Қалтаев мырзаға қойған болатынбыз. Ал қалалық статистика департаментінің жауапты мамандарынан хабарласып білмек болғанымызда ешбірі дөп басып айтып бере алмады. Бір білетініміз, шамамен 5-6 мың жас аталған байқауға қатысады деп күтілуде.

Егер бес күнге жалғасатын байқаудың бастапқы сағаттарының өзінде жүздеген адам келсе, онда өтінім беруші жастардың қатары алғашқы күтілген саннан әлдеқайда көп болуы да ықтимал. Бірақ, бәрінің табысы жете ме деген сұрақ жауапсыз қала бермек.

 DSC5673

Құжатын өткізуге келгендерге қарағанда баспанадан үміттілер көп дерсіз. ХҚКО-ның біріне бас сұғып, бір жапырақ анықтама алмақ болып едік. Ол жақта да сол баяғы ұзын-сонар кезек. Сағаттап сабылып жүріп, құжаттарын өткізгендері үлкен үмітпен қайтып жатты. Тұрғын үй және тұрғын үй инспекциясы басқармасының есепке алу және тұрғын үйлерді бөлу бөлімінің басшысы Жұлдызай Ордабекованың сөзінше, құжаттарды қабылдау таңғы сағат 9-да басталған.

– Бұған дейін де хабарлағанымыздай, қойылатын талаптарға сай үй алуға үміткер жас екі жыл міндетті түрде Шымкент қаласында тұрақты тіркеуде тұруы керек. Дәл осы уақыт аралығында иелігінде жылжымайтын мүлкі болмауы тиіс. Айлық жалақысы соңғы алты айға 40 АЕК кем болмауы керек, ол дегеніңіз – 101 мың теңгеден төмен емес деген сөз. Егер жас отбасы ретінде өтінім қалдырса, ерлі-зайыптының екеуі де 29 жасқа толмаған болса, айлық табысы қоса есептеледі.

Өтінім берушінің депозиттік шотының болуы да назарға алынады. Екі-үш сағаттың өзінде талаптарға сай келетін, құжаттары толық 50-ге жуық жастың өтінімін қабылдап үлгердік. Келіп жатқан жастардың көбі дерлік депозиттік шот пен айлық алып жүрген жеке шотын шатастырып алып жатыр. Мамандар әр аудан бойынша құжаттар қабылдауда.

Ал ай сайынғы пәтерақыны комиссия мүшелері енді бекітеді. Комиссия құрамына өзгерістер енгізіліп жатыр. Тағы бір айта кетерлігі, қатысушы жастардың арасында Тұрын үй жинақ банкінде шот аштырмағандарына арнайы банк консультанттарын алдырттық. Осында отырып-ақ шот аштырып, төлем жасауына болады. Құжат тапсырудың соңғы күні – 29 қараша, - деді Ж.Сәрсенбекқызы.

Үйлі болуға асыққан жастарды әңгімеге тартқанымызда аңғарғанымыз, әлі де жүйеміз қағазбастылықтан арылмай келеміз. Құжат түгендеудің өзінде талаптар қатал. Бір есіктен екіншісіне жетудің өзі мұң. Жұмысынан сұранып келгендерін ескеру де керек сияқты. Бірақ оны елеп жатқан ешкім жоқ. Елімізде жұмысшы жастарға үлестірілетін пәтерлердің құжаттарын бірінші болып қабылдауды бастаған Нұр-Сұлтан мен Алматы қалаларының жастары барлық құжатты онлайн режимде өткізгенін сұрап білдік. Бұған жету үшін бізге де біраз жыл керек шығар деген ойға келдік.

Ал қалалық отбасы, балалар және жастар ісі жөніндегі басқармасының басшысы Жандос Төлембекұлының айтуынша, жалдамалы баспана конкурсының жеңімпаздары балдық жүйемен анықталады. Ол ҚР Ақпарат және қоғамдық даму министрінің 2019 жылғы 29 тамыздағы №318 бұйрығына сәйкес жүргізілмек.

– Нәтижелі жұмыспен қамтуды және жаппай кәсіпкерлікті дамытудың 2017 - 2021 жылдарға арналған «Еңбек» мемлекеттік бағдарламасына сәйкес халықты жұмыспен қамту мәселелері бойынша уәкілетті орган бекіткен нарықта сұранысқа ие 100 (жүз) кәсіп тізбесіне сәйкес кәсіпті меңгерген өтініш берушіге 10 балл есептеледі.

Отбасылы болған жағдайда - 5 балл, некеде тіркелген әр жылы үшін 2 балл беріледі. Балалары болған жағдайда біріншісіне - 1, кейінгі әр бала үшін 2 балдан жазылады. Сол сияқты жеке кәсіпкерлік қызметті жүзеге асырған кезде кемінде 1 жыл – 5 балл, әр жыл үшін 1 балдан есептеледі.

Өтінім берушінің түрлі қызмет салаларында жеке жетістіктері болған жағдайда еншісіне 2 балл қосылады. Осылай талаптарға толық сәйкес келетіндерді балдық жүйемен комиссия мүшелері 15 күн ішінде анықтайды. Одан соң 15 (он бес) күнтізбелік күн ішінде өтініш беруші мен уәкілетті орган арасында тұрғын үйді жалдау шарты жасалады, - деді Ж.Қалтаев.

Түйін.

Елімізде баспананың қолжетімді болуына арналған мемлекеттік бағдарламалардың түр-түрі бар. Бірақ тәуелсіздік алғалы бері пәтерден пәтерге көшіп-қонып жүретін отбасылардың қатары көбеймесе, азаяр түрі жоқ. Жастар жылында жұмыс істейтін жастар қолдау тауып, баспаналы болып жатса, қуанар едік. Бірақ берілетін үйлер жалдамалы екені ойландырады.

Бес жылдан кейін одан да көшуге тура келеді. Осы уақыт аралығында уәкілетті орган тарапынан қадағаланып, сол жұмысшы жастар баспана алуға қажетті бастапқы жарнаны жинап үлгерсе, үлкен көмек болмақ. Әрине, жақсыдан үміттеніп, бір қуанышты хабардың боларынан күдерімізді үзбегеніміз абзал.

Желіден тапқан миллиондар...

Пятница, 22 Ноябрь 2019 06:01

Сапар – кәсібін интернетпен байланыстырған жас. Дәлірегі, маркетолог. «Promotion marketing agency» ЖШС-нің негізін қалаушы кәсіпкердің қарамағында өзі секілді еңбекқор 10 жұмысшысы бар. Бүгінде ірі компаниялар мен кәсіпкерлерге әлеуметтік желі арқылы өнімдерін сатуға көмектесіп жүр. Қолынан іс келетін адамға бизнес ашып бере алады. Бізді қызықтырғаны оның бизнесі емес, білімі еді. Өйткені, Сапардың жоғарғы білімі туралы дипломы жоқ. Есесіне, 21 жасында миллионер атанды.

DSC 9396

Жұмысқа тұруға асықтым

Шымкенттегі колледждердің бірінде ақпараттық технологиялар мамандығын тәмамдаған Сапар Әбдірахманның еңбек жолы өзге қатарластарына қарағанда ертерек басталған. Бір өкініштісі, үш жылдық арнаулы білімімен жұмысқа орналасу мүмкін болмапты. Содан ол арман қуып елордаға аттанады. Алайда тәтті қиялы іске аса қоймаған көрінеді. Құрылыстан бір-ақ шыққан жас шаштараз, даяшы, асаба, әнші болып күнелтуге тура келген сәтсіздікке толы кездерін қазір жымиып еске алады.

– Білім алып жүрген жылдары көздегенім тек қызыл диплом болатын. Сондағы бар ойым ата-анамды үздік бағаға бітіріп қуантамын деп түсініппін. Жетісайдан бала арманымен келген Сапардың шырайлы шаһардағы студенттік жылдары зымырап өте шыққанын да байқамай қалдым. Бәрінен де жұмысқа орналасу қиынның қиыны болды. Жарты жылдай екі қолға бір күрек таппай, сандалып жүріп алдым. Ақыры бір мәнісі болмаған соң, тәуекелге бел буып еліміздің бас қаласына аттандым.

Онда ағам жұмыс істейтін. Көптің қатарында бөліп-жармай реті келген жұмысты істеуге тура келді. Ағам темір жол саласында бір бос жұмыс орынның барын айтты. Оқыған мамандығым бойынша жұмыс істеймін-ау деген іштей қуаныш сезілді. Бірақ ол қуанышым көпке ұзамады. Аты дардай компанияның іші толған орыс тілді кадрлар жиналған. Бес ай әрең шыдадым, – дейді Сапар Мұқтарұлы.

Жоғары оқу орнына түсуге емес, Сапар жұмысқа орналасуға асыққанын айтады. Сөйтіп жүргенде кәсіпкер ағаларынан ұсыныс түсіп, тауарын сатып көзге түседі. Бір айда тапқан табысы да көңілге демеу болыпты. Сонда жеке кәсібін бастауға ниеттенген. Алматыда интернет маркетинг бойынша сабақ алып, осында жүріп алғашқы миллионын тапқан. Бір жылдан бері еліміздің үшінші мегаполисінде қазақша интернет жарнамасымен айналысады.

– Барды бағаламаймыз. Қазір мүмкіндіктер дәуірі. Тіпті, әлеуметтік желі арқылы пайда табуға болады. Инстаграмнан тапқан табысыммен он отбасыны асырап отырмын. Тиыннан теңге құрап жүріп, үйлендім. Ұлым бар. Жалқаулыққа салынған жастардың емес, үнемі ізденісте жүретін жандардың қатарынан табылғым келетін.

Армандар алдамайды. Мақсатымның орындалып жатқанына қуанамын. Бастысы дүниенің соңына түскен жоқпын деп түсінемін. Замандастарыма ақыл-кеңесімді айтып жүремін. Тіпті, табысқа жету жолындағы өзімнің жеке семинар-тренингтерімді өткіздім. Бас-аяғы 5000-ға жуық адам қатысыпты. Бұл да бір жетістік деп білемін, – дейді маркетолог.

Арманым – инвестор атану

«Алма піс, аузыма түс» демей-ақ қолдағы бар мүміндікті жарата білген Сапардың алға қойған мақсаттары айқын, жоспары нық. Бір қызығы ол әр салада өз мүмкіндіктерін сынамақ. Жарнамамен тағы екі жыл айналысса, келесі үш жылда IT-маманы ретінде танылмақ. «Оған колледжде алған білімім жеткілікті» дейді. Ал, ең үлкен арманы – инвестор атану.

75

– Талапшыл басшымын деп айта аламын. Әріптестерім әр үш ай сайын жаңарып отырады. Оның өзіндік сыры бар. Бір орында тұрақтап қалуға болмайды. Онда өсу байқалмайды. Үнемі адам өз-өзін жетілдіріп отыруы керек. Спортпен күнделікті шұғылдану қажет. Әлемге әйгілі бизнесмендердің өмірлік ұстанымдарына зер саламын.

Ұқсамасақ та, тырысып бағамын. Нәтижесін уақыты келгенде көреміз. Қазір тұтынушылардың қазақ тілге деген сұранысын арттыру үшін мейілінше жарнаманы қазақша береміз. 20 компаниямен серіктеспіз. Қаланың дамуы экономикаға оң әсерін тигізсе, жастардың ой-өрісі, танымының дамуы халықтың әл ауқатын арттыруға әкеледі.

Жаппай кәсіп ашып жатса, нұр үстіне нұр болар еді, әрине. Заманның сұранысына сай, бәсекеге қабілетті болу керек деп ойлаймын. Сонда ғана дамыған елдердің қатарына енеміз. IT саласы арқылы сервистік қызметтердің сапасын арттыруды басты назарға алып отырмыз. Тауарды сіз іздеп бармайсыз, олар сізді іздеп үйіңізге келетін жобалар жасаймыз,– дейді ол.

ТҮЙІН.

Халықаралық сарапшылардың болжамдарына сәйкес, 2023 жылға қарай электрондық коммерцияның әлемдік нарығы 2,8 трлн АҚШ долларына дейін жетеді-мыс. Ал еліміз цифрлық жүйеге толық көшті деуге әлі ерте. Бір ғана тамақтану орындарына тоқталсақ. Шымкентте 1500-ден астам мейрамхана болса, соның тек 20 пайызында ғана онлайн төлем жүйесі бар. Ал базарлар мен сауда орындарындағы сатушылардың тек қолма-қол есеп айырысатыны айтпаса да түсінікті жағдай. Ал Сапар секілді жастардың кәсіпкерлерге цифрлық сауатты үйретуі ішкі әрі отандық өнімнің нарыққа енуіне үлкен септігін тигізері анық. Жастар жылы бізге не берді деп емес, біз Жастар жылында не тындырдық дейтін Сапардай алғыр өрім жігіттер ел үшін қызмет істеуден жалықпаса... Ал ол санаға сілкініс алып келетіні сөзсіз.

ФОТО: Береке СЕЙІТЖАППАР

Көшелерге – жаңа атау

Среда, 20 Ноябрь 2019 03:40

Биыл миллионды қаладағы 24 шағынаудан мен 361 көшеге жаңа атау беріледі. Оның ішінде мегаполиске бес жыл бұрын қосылған елдімекендердің көшелері қайта аталмақ.

көше атауы брифинг

Жуырда қалалық мәслихат депутаттары тұрақты комиссиясының көпшілік тыңдауында қаладағы шағынаудандар мен көшелерге атау беру және қайта атау мәселесі қараған болатын. Көпшілік тыңдауда туындаған сауалдарға Шымкент қаласы мәдениет, тілдерді дамыту және архивтер басқармасының бөлім басшысы Сәкен Әбдіжаппар баспасөз брифингінде жауап берді.

С.Сәкенұлының айтуынша, ҚР Үкіметінің 2014 жылғы 24 ақпандағы №138 қаулысының нормаларына сәйкес Шымкент қалалық мәслихаты тарапынан өткізілген көпшілік тыңдауға 24 шағын-аудан және 361 көшеге атау беру, қайта атау бойынша ұсыныс енгізілген. Оның ішінде 305 атауы жоқ, 28 атауы қайталанатын, моральдық тұрғыдан ескірген 28 көше бар.

Қала аумағына кейіннен қосылған 40 елдімекенде атауы бірдей Ә.Молдағулова, М.Мәметова, А.Құнанбаев, Ю.Гагарин көшелері анықталған. Халық қалаулыларының жалпы тыңдалымында аталған көшелерге қайта атау беру мәселесіне қатысты ұсыныстар қаралған. Мысалы, Абай ауданына қарасты Игілік тұрғын алабындағы Ю.Гагарин көшесін – Айсакөл, ал Еңбекші ауданы Жұлдыз тұрғын алабындағы Ю.Гагарин көшесін – Асубұлақ деп өзгерту енгізуді ұсынған.

Сондай-ақ, Абай, Әл-Фараби, Еңбекші, Қаратау аудандары әкімдіктері тарапынан түсіндіру жұмыстары жүргізіліп, көше тұрғындарымен келісіліп, хаттамасы түзілгенін айтады. Ал былтыр 280 көшеге қайта атау берілген. Айта кетейік, қазіргі таңда Шымкент қаласында барлығы 97 шағынаудан, 2129 көше бар.

Жастарға – 904 пәтер

Среда, 20 Ноябрь 2019 03:31

Жұмысшы жастарға берілетін жалдамалы пәтерлерге өтінімдер қабылдау конкурсы басталды. Нақтырақ айтсақ, қаладағы жұмыс істейтін, 29 жасқа дейінгі жастар жыл соңына дейін 1, 2 және 3 бөлмелі пәтерге ие болады.

DSC 0304

Шымкент қаласының ақпараттық-коммуникациялық орталығында өткен баспасөз брифингінде қалалық отбасы, балалар және жастар істері жөніндегі басқармасының басшысы Ж. Қалтаев пен Шымкент қаласы тұрғын үй және тұрғын үй инспекциясы басқармасы басшысының міндетін атқарушы М.Әбдінұров сатып алу құқығынсыз берілетін баспанаға кімдер қатыса алатыны туралы баяндады.

Жалдамалы пәтерлер ҚР Үкіметінің 2018 жылғы 22 маусымдағы № 372 қаулысымен бекітілген «Нұрлы жер» мемлекеттік тұрғын үй бағдарламасында белгіленген талаптарға сәйкес жұмыс істейтін жастарға 5 жыл мерзімге жалға беріледі.

Ж.Төлембекұлының айтуынша, соңғы екі жылда қалада тіркеуде тұратын, осы уақыт ішінде тұрғын үйге меншік иесі болып табылмайтын, ай сайынғы табысы 40 АЕК (101 мың теңге ) кем емес, банкте жинақ (депозиттік) шоты бар, 29 жасқа дейінгі және отбасылы жастар аталған жалдамалы пәтерлер байқауына қатыса алады.

Үшінші мегаполисте жалпы 904 пәтер беріледі деп жоспарланған. Оның 304-і жаңадан тұрғызылса, қалғаны нарықтағы үйлерден үлестіріледі. Осы мақсатқа 6,5 млрд теңге қаржы бөлініпті. Сатып алу құқығынсыз жалға берілетін тұрғынжайлар 2021 жылды қоса алғанда 3 жыл бойы беріледі. Ай сайын төленетін пәтерақы 10-12 мың теңге көлемінде болмақ.

Сала мамандарының болжамына қарағанда аталған байқаудың ауқымы кең. Кемі 5000-6000 жас қатысады деп күтілуде. Бүгінде үй кезегінде тұрған жастар саны 10 мыңға жуық.
Елбасының тапсырмасына сәйкес, жұмысшы жастарды қолдау мақсатында берілетін баспаналарға өтінімдер 25-29 қараша күндері қабылданады. Егер байқауға қатысушы жастың құжаты қате болған жағдайда қосымша бір жұмыс күні беріледі, дейді спикер.

Тиісті құжаттар тізімін shymkent.gov.kz сайтынан көруге болады. Конкурсқа қатысу үшін құжаттарды Республика даңғылы, 12а ғимаратының бірінші қабаттында орналасқан Шымкент қаласы тұрғын үй және тұрғын үй инспекциясы басқармасына өткізу қажет.

Қосымша ақпарат үшін телефон: 24-74-85.

Бие сүтінен балмұздақ жасады

Пятница, 15 Ноябрь 2019 03:49

Ш ымкенттік өнертапқыштар бие сүтінен үш түрлі балмұздақ жасады. 40-тан астам белсенді биологиялық компоненттері бар саумалдан жасалған балмұздақтың бір ерекшелігі қант диабетіне шалдыққандар да аталған тәтті өнімді алаңсыз жей алады екен. Жаңа өнімнің жаңалығы да тап осы калориясының төмен болуында.

IMG-5371

Химия-биология бағытындағы Назарбаев Зияткерлік мектебінің мұғалімі Гаухар Шалабайдың жетекшілігімен аталған мектептің 11-сынып оқушылары Аружан Ендібаева мен Әлия Елшібай. балмұздақтың үй жағдайында жасалу технологиясын көрсетіп, пайдалы тұстарын айтып өтті.

Өнертапқыштардың айтуынша, бие сүті және табиғи таза өнімдерден әзірленген балмұздақтың калориясы кәдімгі тәттілерге қарағанда 2-3 есе төмен. Аталған өнімнің тағы бір пайдалы тұсы баланың иммунитетін көтеруге болады екен.

Ізденімпаз оқушылар шоколад қосылған, С дәрумені бар және апельсин дәмді балмұздақтарды сынамадан өткізіп көрген. Олар өз өнімдеріне «Kazakh ice» деп атау берген. Тіпті, ою-өрнекпен арнайы қаптамасы да жасалған.

Бүгінде жас өнертапқыштар жаңа өнімді нарыққа енгізуге әрекет жасап жатқанын айтады.

Страница 1 из 27