Шымкентте дәстүр сабақтастығын жалғап, көнекөз қариялардан аңшылық, саятшылық сырын үйренген Қажымұрат Күлпешов есімді азамат бар. Ол иттің төресі тазы ұстап, қазақтың саятшылық өнерін қайта жаңғыртсам деген ниетте. Кейіпкерімізбен қыз-қыз қайнаған қала тіршілігінен тысқарыға, жазық адырға шығып, жойылу қаупі төнген, үш ғасырлық тарихы бар тазы иттер хақында әңгіме өрбіттік.

500

Без имени-1

Елді үнемі таң қалдырудан шаршамайтын Шымкент бұл жолы да көпті елең еткізіп отыр. Үшінші мегаполис тұрғыны өзінің бау-бақшасында «домик в деревне» тұрғызып, кәсібін дөңгелетуде. Жаздың әдемі бір күнінде ерекше кәсіпті игерген іскер әйелдің баламасы жоқ бастамасымен танысып, сұхбаттасқан болатынбыз.

2Бүгінде Жансәуле Айнабаева (суретте) әулеттің қара шаңырағын ұршықша иіріп отырған сыйлы келін. Ата-енесін күтіп, күйеуі мен төрт перзентінің жағдайын жасайды. Үлкен шаңырақтың бар шаруасын тындырып, үзілмейтін қонақтарын да жадырай қарсы алып, барын алдарына қойып күтіп алады. Көпбалалы ана өз кәсібінің осы үйдің айналасынан алыстамағанын қалайды. Қандай іс бастаса да нәтижесін көрмейінше жаны жай таппайтын ол бау-бақшасын безендіру арқылы өз бизнесін қолға алды.
– Негізінде бұл менің атамның бағы. Келін болып түскен күннен бастап бұл бау маған ыстық көрінді. Бірақ жыл сайын жеміс ағаштарының өнімін алып, басқа уақыттарда қараусыз жатты. Осы жерді жарамды іске пайдалануды жиі ойлайтынбыз. Бірақ жайқалып өсіп тұрған ағаштарды кесуге қимайтын едік. Ұл-қыздарымның әр қуанышында осы бауға келіп суретке түсетінбіз. Өзім қиыннан қиыстырып үйдегі декорацияларды безендіріп жүремін. Алматыға қыдырып барғанымда дүкеннен әдемі үйшікті бір көргеннен ұнатып, үйге алдырдым. Әкелген кезде кішкентай қызымды соның алдына суретке түсірдім. Ол фонға тек қызым емес, үйімізге келген барлық туыстарым да суретке түсуге қызығатын. Содан осы бауды сурет түсіруге арналған аймаққа айналдыруды жөн көрдім, – дейді ол.
Кәсіпкердің талпынысы мен табандылығының арқасында бастаған ісі халықтың сұранысына ие болды. Адамның бойына қуат, көңіліне шабыт, сезіміне ләззат шапағын шашатын сұлулық пен әсем көріністі өз бақшасынан көре алған ол шалғайда орналасқан үйіне арнайы келетін отбасылар көп екенін айтады. Кәсіпкердің табиғат аясындағы ерекше көрінісін көруге келген шетелдіктер де оң бағасын берген екен.
– Бұл елімізде ғана емес, алыс-жақын мемлекеттерде жоқ кәсіп. Жобаның авторлық құқығы қорғалған. Паттентеп алғанмын. Ал фото аймаққа алты фон жасалған. Мұндағы әрбір заттың өз оқиғасы бар. Шетелден арнайы тапсырыспен алдырып безендірілген дүниелер де бар. Барлығы қолдан жасалған бұйымдар. Фотосессия жасауға келетін адамдар саны шектеулі. 6 адамға дейін кіреді. Фотозонаны бір сағат жалға алып, өздерінің фотографтарымен қалауынша сурет немесе видеороликке түсуіне болады. Мектеп бітірушілер, отбасылар және жас жұбайлар жиі келеді. Тіпті, жігіттер осы жерге келіп қыздарға ұсынысын жасап жатады, – дейді Ж.Мұратқызы.
Адал еңбекпен нәпақа тауып, жеке бизнесін ашып, шағын кәсібін дөңгелетіп жүрген кейіпкеріміз байлықты қол жайып көктен ғана емес, еткен еңбектен тілеу керек екенін айтады. Көпті қуантып, жұрттың қуанышына ортақтасып жүрген Жансәуле Айнабаева жазғы демалыспен қатар келген карантинде ұл-қыздары қарап отырмай, қолғабыс етіп жүргенін де тілге тиек етті.

 

1


– Қайткенде де қарекет қылсаң, маңдай теріңді төгіп еңбек етсең, бақыт басын иеді. Менің ата-енем мен өмірлік жолдасым жақсы жандар. Қандай істі қолға алсам да үнемі қолдау білдіріп отырады. Бұл – бизнесте маңызды. Қазір сұраныс бар, бастаған бизнесімнің бағыты жаман емес, – дейді іскер әйел.
– Қазақта «қимылдаған қыр асады» деген аталы сөз бар. Қазіргідей нарық қыспаққа алған заманда артық қаржы көзі болмаса да қиын, – дейді кейіпкеріміз сөз арасында. Кәсіпкердің шағын үйшіктерінің жанына жақын келіп, көздің жауын алатын сұлулыққа ұзақ қарап «ебін тапқан, екі асайды» деген тұжырым жасадық. Үйдің шаруасынан қол үзбей, осындай кәсіпті жүргізудің өзі қазақ келіндері үшін үлгі аларлық іс емес пе?

za kompyuterom 4 14055106

Шымшаһарда өз кәсібін бастауға ниеттілердің қатары жыл санап көбейіп келеді. Биылдың өзінде кәсіпкерлік негіздерін оқуға 2500 адам өтінім берген. Оның мыңнан астамы жобаны сәтті аяқтап, сертификатқа ие бола бастаған. Шымкент қаласының Кәсіпкерлер палатасы ұйымдастырып отырған «Бастау бизнес» жобасы карантиндік режим енгізілгелі онлайн форматқа көшіпті. Сала мамандарының қашықтан қызмет етуі қалай жүзеге асып жатыр? Онлайн оқудың орайын таба алды ма? Осыны сіз бен біз бірге білейік…

Қазір ел ішінде «жұмысты үйде отырып та атқаруға болады. Кеңседе кешке дейін отырудың қажеті шамалы» деген пікір қалыптасты. Көздерін жеткізіп барып айтып отырған пайымдары – бұл. Енді біреулері болса «жұмыс орныңда жауапкершілікті жақсы сезінесің» деген ұстанымда. Бұл әлеуметтік желідегі пікірлердің легі. Ал өңірлік кәсіпкерлер палатасының бөлім меңгерушісі Әділжан
Датқаев пандемия кезінде әрбір азаматтың денсаулығы маңызды деп біледі. Ол азаматтардың қауіпсіздігін қамтамасыз ету және коронавирустың таралуына жол бермеу мақсатында Шымкент қаласының Кәсіпкерлер палатасы қызметкерлерінің бір бөлігі қашықтан жұмыс істеу режиміне ауыстырылып, кеңес беру қызметі онлайн форматқа көшірілгенін айтады.

5– Шымкент қаласының Бас мемлекеттік санитариялық дәрігерінің Қаулысына сәйкес, бүгінде 80 пайыз қызметкерлер қашықтан жұмыс істеп жатыр. Тиісінше, біздің жобаларымыз да онлайн форматқа ауысты. Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасының екінші бағыты бойынша биыл 1850 адамды кәсіпкерлік негіздеріне оқыту көзделген болатын. Жоба түлектерінің 30 пайызына қаржылық қолдау немесе грант бөлінеді деп меже қойғанбыз. Алайда «Бастау бизнес» жобасына сұраныстың өсуіне және халықтың ынтасына сәйкес, қатысушылардың санын 4000-ға дейін көбейттік. Бүгінгі таңда оқыту жүйесін жүзеге асыратын atameken.co платформасына 2500 шымкенттік жобаның бірінші ағымына қатысуға өтінім берген. Ал былтырғы Жастар жылына орай «Жас кәсіпкер» аталымы бойынша 1400 жас, «Бастау бизнесті» 2955 адам оқыды, - дейді Әділжан Әбдіқайырұлы.
Әділжан Датқаев аталған жобада екі түрлі сертификат қарастырылғанын айтады. Бірі бизнес негіздерін оқығаны үшін берілсе, екіншісі тесттен жақсы нәтиже алып, өз бизнес- жобасын ұсынғандарға жобаны сәтті аяқтағаны туралы сертификат табысталады екен. Екінші жағдайдағы түлектер мемлекеттік гранттар мен микроқаржы ұйымдарының 6 пайыздық жеңілдетілген несиелерін алуға үміткер бола алады. Биылғы жылдың бір ерекшелігі көпшілік «стипендия» деп келген қаражат төленбеген. Ә. Датқаев бұл ақшаны жобаға қатысушылардың оқуға келіп-кетуіне қарастырылғанын айтады. Оқыту онлайн өткендіктен, тиісінше жолақысы да қысқартылған.
– Бастауды оқып бітіргесін қорытынды тест тапсырады, сосын бизнес жоба жазатын конструктор ашылады. Бизнес жобасын осында толтырады. Толтырған жобаны Нұр-Сұлтан қаласында арнайы эксперт-маркетологтар бағалайды. Қатысушылар жобаны аяқтады деген сертификат алу үшін эксперттер тексерген жобадан мүмкін болатын 30 баллдан 18 балл жинауы керек. Жинай алмаса, қатысты деген сертификат береді. Жобаны аяқтады деген сертификат алған кез-келген адам грантқа қатысу үшін Шымкент қалалық жұмыспен қамту орталығына өтініш білдіреді. Арнайы комиссия алдында өз жобасын осы жерде қорғайды. Халықты жұмыспен қамту орталығында комиссияға жобаны онлайн /оффлайн қорғайды. Ал комиссия құрамына қоғам белсенділері, кәсіпкерлер мен БАҚ өкілдері кіреді. Сабақтар 21 күнге жоспарланады. Бұл деген сөз 21 күн бойы оқу дегенді білдірмейді. Сабақты тез игеретіндер ары кетсе, 8-9 күнде бітіруіне болады. Ол енді қабілетіне байланысты. Бұл жерде жоба қатысушыларына кәсіпкерліктің негіздерін, басты қағидаларын үйретеді. 12 модуль, 52 сабақ, - дейді Ә.Датқаев.
Ал 8 жылдан бері кәсіпті енді бастағандар мен бизнесмендерге маркетингтік зерттеу, қаржылай есептеу, болжам жасау, сату, өнімдерін өткізу, сынды кәсіпкерлік негіздерін үйретіп жүрген бизнес-тренер әрі жеке кәсіпкер Анар Мұхамедқалиева аталған жоба халыққа балық емес, қармақ ұсынатын бағдарламаның бірі деп біледі.
1– Біздің жобаға қатысатын көпбалалы, жұмыссыз, еңбекке қабілетті мүмкіндігі шектеулі азаматтар, елге оралған қандастардың арасында цифрлық сауаттылығы төмен азаматтарымыз бар. Оларға онлайн оқыту кезінде алдымен платформаны қолдануды, содан соң бизнес бастаудың негізгі қағидаларын оқыттық. Онлайн форматта оқыту әдісі бірінші жыл болған соң, әрине бастапқыда кемшіліктер кездеседі. Бірақ қазіргі таңда, онлайн платформасы қажетті деңгейде жұмыс жасап, тыңдаушылырымызға үйлерінде отырып-ақ, кәсіпкерлік негіздерін үйренуге қолайлы мүмкіндік туғызуда. Оқуды аяқтаған соң, қатысушылар жеңілдетілген несие немесе қайтарымсыз грант ала алады. Ең бастысы оларды бизнес-тренерлер 12 ай бойы сүйемелдейді, - дейді ол.
«Атамекен» Ұлттық кәсіпкерлер палатасында төртінші жыл қатарынан, бизнес-тренер болып жұмыс атқарып, жұмыссыздарды кәсіпке баулып жүрген Ерболат Әмірханов та жобаның тиімділігін тілге тиек етті.
IMG-20200719-WA0008– Қазіргі таңда оқу Atameken.co және Open Study.kz cайттары арқылы жүзеге асырылуда. Бастау бизнес жобасына қатысып, кәсіпкерліктің қыр-сырын үйренемін деген адамдар өте көп. Мұны бізге оқуға тіркеліп жатқандардың санына қарап байқауға болады. Атап айтсам, қазір 2-ші топты оқыту кезеңі жүріп жатыр. Жалпы екі топты қоса алғанда 230 адам тіркелген. Осындай үдеріспен 20 бизнес жаттықтырушы дәріс өткізіп келеді. Барлығы өз жұмыстарын жетік меңгерген бизнес-тренерлер деп айтуға болады. Оқу 10-маусымда басталды. Курсты аяқтау мерзімі - 21 күн деп белгіленген. Оқу курсы 52 видеосабақ пен тесттерден құралған. Бір күнде қатысушыларымыз 11 сабақты оқып, меңгеруіне болады (лимит). Әр қатысушы, оқу процесі кезінде бизнес-тренермен тікелей жұмыс жасап, консультациялар алады. Жалпы, оқу курсы, қандай кәсіп ашып, кәсіпті дұрыс жүргізу дағдыларына үйретіп, болашақ кәсіпкерлерді дайындап шығарады. Мына індет барша адамзатқа өз зардабын тигізіп жатқанын және әлі біраз уақытқа созылатынын ескере отыра, барша қазақстандықтарға сабырлы болып, бірлесе отырып, барлық қиындықтарды жеңеміз деп сенемін, - дейді Е. Әмірханов.
Жобаны сәтті аяқтап шыққан жас кәсіпкерлердің пікірін білу мақсатында түлектермен тілдескен едік. Анар Абдурашитқызы аталған жоба жайлы туыстарынан естіп, бірден жолдама алуға асыққанын айтады.
3– Жұмыспен қамту орталығынан жолдама алуға екі күндей уақытым кетті. Онлайн оқу уақыт жағынан өте тиімді болды. Видеосабақтар түсінікті етіп әзірленген. Ауыл шаруашылығын жүргізіп, егіншілікпен айналыссам деймін. Үлкен көлемде анар, құрма, жаңғақ (фисташки) ексем деген жоспарым бар.
Біздің мемлекетімізде көп мөлшерде тонналап саудалайтын анар баулары жоқ. Ол шет елдерден келеді. Осы кәсіпті отбасымызбен қолға алып, дамытсақ деген ой келді. Қазіргі кезде мемлекет тарапынан каржылай әлеуметтік қолдаулар бар. Соның ішінде өте жақсы нәтиже көрсетіп келе жатқан «Атамекен» Ұлттық кәсіпкерлер палатасы қарапайым халықты бизнес бастауға бейімдеп, тиісті білім беріп, нақты шаруаны игеруге қол ұшын беруде. Бизнеске қолдау, шағын бизнесті дамыту - бүгінгі күннің өзекті мәселесі. «Бастау бизнес» сияқты жобалардың берері көп. Жұмысты неден бастау қажеттігін ұғындыратын оқу курсының берері көп. Бизнес-жоспар жасау, оны дамыту, шағын кәсіпкерлікке бет бұру - тыңғылықты еңбек пен терең білімді қажет етеді.
Қазіргі оқу курстары арқылы және мемлекеттік бағдарламалар арқылы көпбалалы ата-аналарға, аз қамтылған отбасыларға, жастарға өте жақсы көмек болып жатыр, - дейді жас кәсіпкер.

P.S. Берілген мүмкіндікті қалт жібермей, уақыт пен ресурстарды тиімді пайдалана білген әрбір азамат қашанда қоғамда көш ілгері жүретіні ақиқат. Ал өз кәсібін дамытып, еліміздің экономикасына үлес қосуға ынталы жандардың қатары артқаны қуанышты еселей бермек.

 

DSC 8081

«Тынысы таралып жатыр». Иә, осылай басталатын хабарламаларды әлеуметтік желілер мен месенджерлерде жиі оқып жүрміз.

DSC 8066Жақындары хәл үстінде жатқанын айтып көмек сұраған, дәрі-дәрмек, оттегі баллонын іздеп сабылғандар саябырсығандай бүгінде. Өмірмен арпалысып жатқандар да аз емес. Бұл жолы тіршілікке тыныс сыйлаған жандардың ерлігі хақында қалам тербегім келіп отыр. «Оңтүстік» индустриалды аймағына жолымыз түсіп, «AirGaz» ЖШС зауытының қара жұмыстың қазанында қайнаған майталмандарымен жүздесіп, әңгімелескен едік.
Қаладағы саусақпен санарлық оттегі шығаратын орынның бірі саналатын зауыттың директоры Асқар Батырханов соңғы айда оттегі баллондарына сұраныс бес есе артқанын айтады. Күндіз-түні тынымсыз еңбектеніп жатқан өндіріс орнына бұл үдеден шығу оларға үлкен жауапкершілік жүктейтінін жеткізді.
– Біздің негізгі тұтынушыларымыз металлургия, нефтехимия, нефтегаз саласы. Елде төтенше жағдай жарияланып, блокпосттар қойылып, көп орынның жұмысы тоқтады ғой. Сәйкесінше сұраныс та азайды. Сол кезде біз мықты деген мамандарымызды жұмыстан шығаруға мәжбүр болдық. Өйткені оларға жалақы төлеуге мүмкіндік болмады. Бұл бір. Екінші, бұған дейін тек бір ауысымда қызмет еттік. Қазір жағдай басқа. Сондықтан маман тапшылығы қатты сезіліп отыр. Екі-үш ай болды осында қона жатып жұмыс істеп жүрміз. Сағатына 100 баллон толтырамыз. Таңертең жұмысқа кіріскеннен түнгі 1-2-ге дейін тоқтамаймыз. Өзімнен бастап бәріміз зауыттың ішіндеміз. Барлығымыз да баллондарды толтырумен айналысудамыз, - дейді «AirGaz» ЖШС директоры.
Кәсіпкер зауыттың қауіпті кәсіпорындар қатарына жататынын көпшілікке тағы бір мәрте ескертеді. Мұндағы жұмысшылар алдымен қауіпсіздік ережесімен танысып, кейін арнайы оқудан өтеді. Егер жоғары қысымда жұмыс істеуге рұқсат алмаса, жұмысқа қабылданбайды. Маман тапшылығын сол сынақтан мүлт кететіндердің көптігімен байланыстырады. Ал қалғаны жұмыстың ауыртпалығына шыдас бермейді екен.
– Шыны керек мына жағдайға ешкім дайын болған жоқ. Біріншіден, қазір қызметкерлер өте қатты шаршап жұмыс істеп жүр. Ал жаңадан келгендер тек бір күн ғана жұмыс істеп, бұл тегеурінге шыдамаймыз деп кетіп жатыр. Екінші проблемамыз, қазір мына зауытта пайдаланылатын бөлшектер істен шықса, сонда қиын болайын деп тұр. Себебі зауыттың мұндай режимде жұмыс істеуіне қажетті қосалқы құрылғылар жетіспейді.

 

DSC 8045DSC 8068

 

Жұмыс тоқтаған заматта жабдықтар мен агрегаттар, детальдары ауысады. Майының деңгейі, оның сапасы тексеріліп тұрады. Машиналарды келесі күнге дайындап, басқа жерін ауыстырамыз. Ал бұзылған кезде тиісті құрылғыларды алдыра салатын шекаралар жабық. Шетелдердегі ахуал да оңай емес. Қазір осында жүрген қызметкерлердің барлығын да мен батыр деп айта аламын. Себебі олар ештеңеге қарамай, өз денсаулықтары мен бастарын бәйгеге тігіп, жұмыс істеуде. Олар да шаршап, титықтап кетеді. Мен де ет пен сүйектен жаралған адаммын. Бірақ басшы ретінде қарамағымдағыларға үнемі қолдау көрсетуім керек. «Сендер майданның алдыңғы шебіндесіңдер. Көрінбейтін жаумен күресіп жатырсыңдар», - деп демеу білдіріп жүрмін, - дейді ол.
Әке жолын қуған ол бүгінгі ел игілігі үшін атқарып жатқан жұмысын өмірінің соңына дейін Оңтүстік өңірінің денсаулық сақтау саласына қызмет сіңірген алтын қолды дәрігер Тілеулес Тіленұлы Батырхановтың еңбегінің жалғасы деп біледі. «Ал үй іші мен жақындарының жүзін көрмей, қызмет етіп жүрген жұмысшылардың жігерінің жасымауына халық себепші. Олардың ақ батасы мен қолдаулары әрбіріміз үшін ауадай қымбат» дейді, зауыт басшысы.
– Қарапайым халықтан көмек те келіп жатыр. Сайрамдықтарды ерекше атап өткім келеді. Жұмысымыздың ауыр екенін естіп, біліп дереу көмекке ағылды. Айтар алғысым шексіз. Қай күні бір келіншек келіпті. – Не көмек керек? – деп. Тамақ жағынан көмектессе болатынын айттым. Сонымен күнде тамақ беріп жіберіп жүр. Осында қызмет етіп жүрген балаларға соның өзі үлкен медеу. Себебі олар қатты титықтап кеткенде «сендер халық үшін жүрсіңдер» деп еңселерін көтеремін. Сол елден қолдау болғанда жігіттер кәдімгідей қанаттанып қалады. Бір жағынан әкімдік тарапынан тасымалдау жағына көңіл бөлінді. Шаһар басшысына өз жағдайымызды жеткіздік. Зауыттың шығыны да еселеп өсіп жатыр. Мынандай дүрбелеңде экономикалық жоспарымыз өзгерді. Керекті құрал-жабдықтарды АҚШ доллары және еуромен сатып алуға тура келеді. Валюта бағамы да құбылмалы. Осы жағы кәсіпкер ретінде мені алаңдатып отыр, - дейді ол.
Қанша сақтанғанымен бүгінде зауыт қызметкерлерінің денсаулықтары сыр бере бастаған. Дене қызуы көтеріліп, тұмауратып қалғандар да бар. Зауыт басшысы дәрі-дәрмек медициналық құрылғылар қажеттігін жасырмады. Тұрғындарға айтары – қатаң тәртіп індетке тоқсауыл екенін ұмытпаса дейді. Өйткені көзбен көргені мен естіген жағдайлары есті шығарады.
– Адамдарға нағыз ес жинайтын кез келді. Жасыратыны жоқ, таныстарымыз келеді «жақыным қатты қиналып жатыр, тез баллон толтырып беріңізші» деп. Қайдан жұқтырды деп сұрасаң, тойға барған еді. Құдалыққа барып еді. Құдайыда болған дейді. Бәрінің сценарийі бір... Әрбір машинаны жіберген сайын ішіндегі баллон азайып келсе екен деп тілеп отырамыз. Егер азайса, онда адам тірі қалды деген сөз. Ал баллон көбейіп қайтып келсе, ар жаққа аттанғандардың да саны өсті деген сөз, - дейді кәсіпкер.
Асқар Тілеулесұлы оттегінің бағасы тұрақты екенін мәлімдеді. Дегенмен қиын қыстау кезде қой терісін жамылған қасқырлар да кездескенін айтады. Олар негізсіз ақша қосып сатқанын естіген. Ендігі жерде осындай жағдай қайталанса, ондай адамдарды зауыттан аттап бастырмайтынын айтты.

 

DSC 8082DSC 8110


Ал жасы алпысты алқымдаған аға зертханашы Мадина Сүлейменқызы да осы зауыттың қызметкері. Ол аталған өндіріс орнындағы медициналық және техникалық мақсатта пайдаланылатын оттегінің сапасын бақылайды. Мынадай қиын шақта Мадина ханым да әріптестеріне барынша қолдау білдіріп жүр. Негізгі қызметін зауыттағы аппараттарды іске қосқанда атқарғаннан кейінгі бос уақытында ұлғайған жасына қарамастан баллон тасиды. Ал кешкілік жиырма шақты қызметкерге күнделікті тамақ даярлайды. Алайда онысын өзі мақтан көрмейді. Керісінше, қысылтаяң шақта халыққа қызмет ету азаматтық борышым деп санайды.
– Қазір бізде ешкім жұмыс таңдап жатқан жоқ. Дәл бүгінгі күрделі кезеңде жұмыс істеп жүрген әріптестерімнің барлығы да ерекше құрметке лайық дер едім, - дейді зауыт майталманы.
Иә, зауыт жұмысшылары қазір мынау мен істейтін жұмыс, мынау сен істейтін жұмыс деп бөлмейді. Оған көзіміз кәсіпорын ішінде өткізген бірнеше сағат ішінде жетті. Қарбалас жұмыс. Дамылдап жатқан жан жоқ. Дәрігерлер аурухана ішінде науқасты құтқару үшін қалай барын салса, мұндағылар да уақытында жеткізілген бір баллон бір адамды ажал тырнағынан арашалап қалатынын сезіп, жанталасады.
Марат Сапақ осы зауытта цех шебері әрі көлік жүргізушісі. Қалада тұрса да, балаларын күнде көре алмайды. Тек арасында жарты сағат қана көріп, мауқын басып жүргенін айтады. Ал ұзақ аялдауға уақыт жоқ.
– Алғашқыда біз бір ауруханаға 30-50-ін апарсақ, қазір бір ауруханның өзі 200 баллон алып жатыр. Жағдай сол – жеткізуге үлгеру боп тұр. Балонның босағанын күтіп ауруханада түнеп қалып жүрген кездеріміз бар. Ал кейде тоқтаусыз тасып кетеміз. Алып келген балондарымыз жарты сағат ішінде таусылып қалған да кездер болды. Негізі жұмыс уақыты тоғыздан алтыға дейін еді. Енді қазіргі жағдайға байланысты тәулік бойы жұмыс істеуге мәжбүрміз. Сондықтан да шығар, шыны керек, бәрі шаршаңқы. Сырттан адамдар көмектесуге келіп жатыр. Сонда да жұмыс көп. Қазір тек машинаны жүргізбейміз. Балондарды саламыз, тасимыз. Жұмыс таңдап жатқанымыз жоқ. Ауруханадан «оттегі бітті» деген хабар жеткен кезде қатты асығамыз. Сондайда жол бергісі келмейтін жүргізушілер де бар. «Кислородтың» не үшін керек екенін білмейтіндер шығар олар. Жайлап бәрі дұрысталса деп тілейміз. Көлікте асығып келе жатқанда, кейде жол бермей тұрып қалатындар бар, солар жұмысымызға түсіністік танытса деймін. Жедел жәрдем секілді біздің де қазіргі жұмысымыз адамның өмірін аман алып қалуға бағытталған, - дейді көлік жүргізушісі.
Марат мырза бізбен осылай қысқа сөйлесті де жолға аттанды. Келесі көлікке қарай аяңдадық. Толтырылған баллондарды көлікке тиеп жүрген шағын денелі ер-азамат. Көтергені өз салмағынан әлдеқайда ауыр. Жүзінен шаршағаны да білінеді. Бірақ оның ешбіріне қарайтын емес. Жүк тасушы һәм оператор Николай Кольнов те әріптесінің сөзін қоштады.
– Таңғы 4-ке дейін де жұмыс істейтін кезіміз болады. Адам өмірін құтқару үшін жанымызды салып жүрміз. Әр баллон 85-90 келі тартады. Менің салмағым 63 келі. Бірақ оған қарап отыратын, шаршадым дейтін жағдай емес. Ауырып жатқандардың барлығының тез сауыққанын қалаймын, - дейді ол.
Байқағаныңыздай қаламыз бен облысты оттегімен қамтамасыз етіп отырған зауытқа жұмыс күші «ауадай» қажет. Жалақысы да төленеді. Тек кейінгі кезде келген мамандар бір күннен артық шыдамай кетіп қалып жатыр деп қынжылады зауыт басшысы. Бәрі де жұмыстың ауырлығын алға тартады екен. Ал тынымсыз еңбек етіп жүрген жұмысшылар «әр алған демі үшін күресіп жатқан адам сезетін қиындықпен салыстырғанда бізге түскен қиындық түк те емес» дейді.


P.S:

Жұмыла көтерген жүк жеңіл! Біз осылай ойлап тұрғанда тағы бір көліктің баллонға толтырып, жүріп кеткені анық. Әр көлік асығып барады. Біреудің әкесін, біреудің анасын, біреудің бауырын құтқаруға...

vlcsnap-2020-04-22-17h55m13s694

Елімізде төтенше жағдай жарияланып, карантиндік шектеулер енгізілгеннен бері қала көшелерінде арнайы киімде тұрғын үйлерді, қоғамдық көліктер мен аялдамаларды залалсыздандырып жүрген қызметкерлерді жиі көреміз.

Бет-аузы тұмшаланған, арқасына арнайы ерітінді құйылған үлкен «сөмке» арқалағандардың кім екенін көрмегенімізбен жасаған жұмыстары көзге түсіп тұрады. Содан-ақ тұрғындардың қауіпсіздігі үшін еңбек етіп жүргенін сезесің. Абай ауданы әкімдігінің бір топ қызметкерімен санитарлық тазалық жұмыстарының қалай жүргізіліп жатқанының куәсі болдық.
Жұмыс уақытының басталуына ыңғайлап Абай ауданы әкімдігінің ғимаратына жақындадық. Бізді халықпен жұмыс жүргізу бөлімінің басшысы Бауыржан Данайұлы бастаған жауапты мамандар қарсы алды. Бөлім басшысы қаладағы залалсыздандыру жұмыстары туралы жан-жақты әңгімелеп тұрғанда ғимарат алдына екі арнайы техника тоқтады. Кейін бекітілген көп қабатты тұрғын үйдің ауласына жол тарттық. Келген бойда уақыт жоғалтпай бірден іске кірісіп кетті. Бірі дезинфекциялық сұйықтықты арнайы аппаратқа құйып дайындаса, арнайы қорғаныш киімін киген екіншісі ерітінді құйылған ыдыстан дихлормен үйлердің кіреберістерін залалсыздандыруға кірісті.
Бір қызығы арнайы қорғану киімін киіп, 15 келі моторды арқалаған жігіттің бірі заңгер болып шықты. Таңғалдық, таңырқадық. Кім екенін білгіміз келіп, тезірек танысуға асықтық. Өзін Нұрсұлтан Қыдырмын деп таныстырған жігіт «Жастар практикасы» бағдарламасы арқылы жолдамамен аудан әкімдігіне тап болыпты. Ол наурыз айынан бері коронавирусқа қарсы дезинфекциялау жұмыстарына атсалысып келеді.
– Былтыр қолыма диплом алып, маман атандым. Бірақ өз салам бойынша жұмысқа орналасудың реті келмеді. Бір жылдай Сайрам ауданындағы бір фирмада жұмыс істедім. Ақпан айында қалалық Жұмыспен қамту орталығына жұмыссыздар қатарына тіркеліп, араға екі апта салып жолдама арқылы Абай ауданына келдім. Айлық жалақым – 66 мың теңге. Барға қанағат етемін, – дейді жас маман.
Нұрсұлтанның айтуынша, басында қала тұрғындары олардың жұмысын дұрыс түсінбеген. Түсінбегеннен бұрын қабылдай алмаған. Көбісінде үрей, қорқыныш басым болыпты. «Бізді улап жатыр» деп қорыққан көрінеді. Түрлерін көріп, «Не үшін мұндай киім киіп алған?» деп шошыпты. Сонда олар ерінбей бәріне жағдайды түсіндірген. Кейін келе халықтың көздері үйрене бастаған. Ал бүгінде аула мен тұрғын үйдің алдын залалсыздандырып кетерде алғыс естіп жатады екен. Заңгер жігіт өзінің әсерімен де бөлісті.
– Арнайы қорғаныш киімдерін киіп, барынша сақтық шараларын ұстанамыз. Залалсыздандыру жұмыстарын жүргізіп болған соң, үнемі айран ішеміз. Ал қорғаныш киіміне тоқталып өтсем, ыңғайсыз. Ішіне мүлдем ауа кірмейді. Екі өкпеңді қысып, қара терге түсіреді. Өзіңді қораптың ішіндегі балық секілді сезінесің. Аквариум болса, бір жөн. Мынау ауа өткізбейтін, артық қимыл жасауға келмейтін қорап сияқты. Дегенмен күнделікті киген соң етіміз үйреніп кеткендей. Ал мынау сөмке етіп арқалаған аппараттың салмағы ауыр. Мотордың өзі 15 кг болса, сұйықтық дәрісі тағы осынша келі шығады. Осылайша, бүкіл әлемді алаңдатқан қауіпті індетпен күрес бір минутқа толастамайды. Коронавирустан ертерек құтылып, бұрынғы өмірге оралсақ деп жүрміз. Замандастарымыздың денінің саулығын тілеймін, - дейді ол.
Халықпен жұмыс жүргізу бөлімінің басшысы Бауыржан Данайұлы ауданда жалпы 453 көпқабатты тұрғын үй мен 258 аула бар екенін айтты. Екі-екіден бөлінген он бригада аудан аумағына дезинфекция жасайды екен.

 

33


– Біз наурыз айында бастадық. Алғашында әскери қызметкерлер мен жасұландықтар жұмылдырылды. Олар аудан аумағына төрт рет дезинфекция жасады. Ал «Шымкент жасыл қала» тарапынан екі рет санитарлық тазалық жүргізілсе, аудан әкімдігінің қызметкерлерімен бесінші рет залалсыздандыру жұмыстарына шығып отырмыз. Қалалық энергетика және коммуналдық шаруашылық басқармасы дезинфекциялық сұйықтықты күнделікті беріп отырады. Күніне шамамен 2,5 тонна дайын дәрі алып себеміз, - дейді Бауыржан Қалмұратов.
Ал Абай ауданы әкімідігінің Халықпен жұмыс жүргізу бөлімінің бас маманы Қанат Керімбеков дезинфекциялық тазалау жұмыстарына кіріспес бұрын үш күн қалалық энергетика және коммуналдық шаруашылық басқармасында арнайы мамандардан аппараттардың қалай жұмыс істеуін, дәрілерді өз мөлшерінде қосуды үйренгенін айтады. Оның айтуынша дезинфекция құрылғысын бұрын-соңды қолына алып көрген емес.
– Сұйық дәрі адамдардың бет-жүзіне түспеуі керек. Ауладағы ойын алаңшалары мен қоқыс жәшіктеріне, орындықтарға себіледі. Тұрғындарға кепкен соң ғана отыруға кеңес беріледі, - дейді Қанат Шалдарбекұлы.
Біз күнде көріп, кейбіріміз елемей жүрген залалсыздандырушылардың жұмысы ауыр екенін осыдан-ақ түсінуге болады. Олар да дәрігерлер секілді күні-түні коронавирустық инфекциямен күрестің алдыңғы шебінде жүр. Қауіпті індеттің алдын алып, тіпті, дерт анықталған ошақты қорықпай залалсыздандырып жүрген мамандардың еңбегін де бағалап, мақтан тұтуымыз керек.

 

Күнгейдегі күнбағыс та ерекше

Пятница, 10 Июль 2020 03:50

2020 06 22 aqyldy-qala

Күнделікті тіршілікте күнбағыс дақылынан өсімдік майы алынса, дәні шемішке түрінде базарларда сатылып жатады. Одан май алынғаннан кейін басқа да дүниелерді өндіруге мүмкіндік бар.

Майдан кейін күнбағыста күнжара қалса, оны төрт түлік түрлері жейді. Ал сабағын турап доңыз мақұлығына береді екен. Себеті де құр босқа далада қалмайды, оны әбден ұнтақ етіп, малдың азығы ретінде кәдеге жарайды. Күнбағыстың пайдалы жағы тек осымен шектелмейді. Тіпті, еліміздің бірқатар өңірлерінде күнбағыстың кейбір түрлерін малға қажетті сүрлем есебінде егетіндер де бар. Ал қаламызда жайқалып тұрған «күнбағыстан» тұрғындар смартфондарын қуаттап, жалпыға қолжетімді Wi-Fi пайдалануына болады. Иә, орайын келтірсең, күнбағыс табыстың көзі емес пе?
5a86a0d192878Жуырда үшінші мегаполистегі саябақтар мен қоғамдық орындарға орнатылған «Ақылды күнбағыс» ақпараттық-танымдық жүйесі іске қосылғанын ақпарат құралдары жарыса жазған болатын. Осы ретте ақылды технологияның идея авторларымен сұхбаттасудың сәті түсті. Жоба жетекшісі Нұрлыбек Жұматаев пен жас өнертапқыштар жалпы кешеннің жасалу технологиясына тоқталды.
– Соңғы бес жылдан бері қалаға қандай ақылды жоба қосуға болатынын зерттеп келемін. Миллонды шаһардың ақылды қала атануына өзіміздің үлесімізді қосып, тұрғындардың тұрмыста қолдануына қолайлы құрылғы жасау да біздің негізгі мақсатымыз болды, - дейді Silkway халықаралық университетінің Ғылым және инновациялар жөніндегі проректоры Н.Жұматаев.
Аталған қондырғыларды «NURCOMTEL» мекемесі қала әкімдігімен бірлесе отырып, шаһардағы саябақтар мен қоғамдық орындарға орнатқан. Қазіргі таңда «Ақылды күнбағыс» электронды жүйесінің 20 данасы Тәуелсіздік, Орталық, Металлург, Жеңіс, А. Асқаров атындағы дендросаябағы мен Қошқар ата өзені жағалауына қойылды. Нұрлыбек Срайылұлының айтуынша, жаңа жоба студенттермен ақылдаса келе дүниеге келген. Жобаның атауы мен сыртқы пішіні қаланың ыстық әрі шырайлы екенін көрсетеді дейді өнертапқыштар.
– Құрылғы күн көзінен қуат алатын панельдер мен аккумуляторлар арқылы жұмыс істейді. Ол бір уақытта 6 смартфонды қуаттауға қауқарлы. Төрт сағатта аккумуляторлар бір тәулікке жететін энергия жинайды екен. Жиналған қуат ұялы телефондарды, планшеттерді қуаттауға, жарықтандыру шамдарын жағуға, танымдық кешен құрылғысын іске қосуға жұмсалады. Дөңгелек пішінде арнайы тынығатын орындықтар орналастырылды. Онда отырған демалушылар тегін интернет желісіне қосылуына да болады. Құпия сөз (пароль) ретінде көрнекті ақын Абай Құнанбаевтың туған жылы мен 2020 жылы атап өтілетін мерей тойын қатар жазу арқылы Wi-Fi желісін қол жеткізеді. Қала тұрғындары мен қонақтары арнайы «Ақпараттық қызмет көрсету» қосымшасы арқылы қаламыздағы көрікті жерлер, архитектуралы нысандар, саябақтар, тамақтану орындары және ойын-сауық кешендері туралы қазақ, орыс,ағылшын тілінде мәлімет алып, олардың орналасқан нүктесін картадан тауып алуына болады. Қазір қазақ тіліндегі фильмдер мен ән-күйлерді қосымшаға енгізудеміз,- дейді Н.Жұматаев.
Жас өнертапқыштар Бақдаулет Болат, Ерназар Байділдаев, Даулет Кожахан үш жігіт те бірінші курста оқиды. Олардың ұйымшылдығы мен ізденісінің жемісі ретінде жаңа жоба дүниеге келіп отыр. Ғылыми жетекшісінің айтуынша, үштіктің потенциалы жоғары. Олар мобильді қосымшалар, сайт тағы да басқа IT бағдарламаларын жасай алады.
– Университеттегі алғашқы жобамыз болған соң, біз үшін үлкен тәжірибе болды. Бір қолымызға бургер, бір қолымызға сусын ұстап саябақтарды араладық. Базарлардан қажетті материалдарды да іздедік. Бастысы көпшілік қолданып, қаламызға келген қонақтарға да ұнаса, жұмысымыздың ақталғаны деп білемін, - дейді Ерназар Байділдаев.
Ал Бақдаулет Болат мұнымен шектеліп қалмайтындарын айтты. Олар қазір аялдамалар мен жаяу жүргіншілер жолағын трансформациялауға кірісіп кетті. Демек, бұл үштік шымкенттіктерді әлі де талай таң қалдыра бермек.

Үрей адамды билесе...

Среда, 01 Июль 2020 04:54

Елімізде эпидемиологиялық ахуалдың тұрақсыздығына байланысты бірнеше қалада қатаң шектеу режимі күшіне енуі мүмкін. Рас, төрт айға созылған карантин қай-қайсымызға болмасын оңай тиіп жатқан жоқ. Әлеуметтік желі мен мессенджерді кезген әртүрлі қауесет те адамдарды әлекке салып бітті. Күйзеліс күйретпесін десеңіз, маман кеңесіне мұқият зер салыңыз. Арт-терапевт, тәжірибелі психолог Ләззат Нұрпейісова сұхбат барысында карантиннің адам психикасына әсері жөнінде әңгімеледі.

44444– Ләззат ханым, коронавирус адамзаттың күнделікті өмір салтын түбегейлі өзгертті десек болады. Карантин режимінде адамдардың оқшаулануы, бір сарынды өмір жүйке жүйесіне ауырлық түсіргені бар. Адамдар қазіргі жағдайда эмоцияға бой алдырмас үшін нені ескеруі керек?

– Біріншіден, карантиндік жүйеге бағыну, бір тәртіпті ұстану көпшілік үшін оңай болмағаны байқалды. Бұл ретте адамдардың жауапкершілігі сынға түсті. Бірі санитариялық талаптарды сақтап, сақтық шараларына құлақ асса, енді бірі мүлдем кері әрекеттерімен көзге түсіп жатты. Әдеттегі өмір сүру салтымыз өзгергенде, әсіресе, жеке таңдауымыз болмаған жағдайда, біз шағын дағдарысты бастан өткереміз. Карантин жарияланған алғашқы күннен бастап ситуацияны адамдар әртүрлі қабылдады. Бірақ, оның қандай экономикалық, әлеуметтік, психологиялық жағдайларға әсер ететінін біраз оқшауланғаннан кейін сезіне бастады. Бұл ол адамдардың сенімсіздігінің пайда болуына алып келді. Экстремалдық жағдайда өзінің эмоциясын реттей алмайтын адамдарға біршама қиын болды. Тіпті, отбасылық кикілжің мен ұрыс-керістер де жиіледі. Бұл ішкі тұрақсыздықтан деп айтуға болады. Қазіргі коронавирус дағдарысы біздің қаламыз не елімізді ғана емес, бүкіл әлемді дүрліктіріп отыр. Көпшілік үміт пен үрейдің арасында қалдық деп айтып жатыр. Ең алдымен адам бойын билеген үрейді жеңу керек. Адамдар мүмкіндігінше, ақпаратты ойларды қабылдап және оны басқара білгені жөн. Жағымсыз ақпаратты ішінде жинамағаны дұрыс.

– Қарап отырсақ, үйден шықпайтын халықтың абдырап қалғанын да байқауға болады. Оқшаулану кезінде отбасы мүшелері және балалармен қандай қарым-қатынаста болу қажет?

– Оқшауланудың адам психикасына әсері болады. Мұндай кезде мүмкіндігінше, бір отбасында тұратын жақын адамдар бірін-бірі қолдап, біріне-бірі көмекке келіп, түсіністікпен, ынтымақтастықпен өмір сүргені абзал. Жұмыла көтерген жүк жеңіл демей ме, міне, бұл жағдайда ұйымшылдық жеңілдік әкеледі. Қазіргі сананы тұрмыс билеген заманда балаларға ата-аналарының сөйлесуі, қарым-қатынасы жетіспейді. Карантин кезінде осы олқылықтың орнын толтыруға мүмкіндік туып отыр. Балалармен ашық сөйлесіп, бірге армандап, бірге болашаққа жоспар құру керек. Бірге фильм көріп, ойын ойнаған дұрыс. Дәмді тамақ жеу де адамның көңілін толтырады. Көтеріңкі көңіл күй, жақсы эмоция адамның иммунитетін көтеретіні анық. Жақсы ой мен жылы сөзден артық көмек бола алмайтынын да ескерген дұрыс.

– Ауыр дерт тек адамдардың денсаулығына емес, пандемия салдарынан көпшіліктің кәсібіне де айтарлықтай шығын әкелуде. Жұмысынан айырлып, табыссыз қалған адамдардың көңіл-күйі де өзгеретіні белгілі. Мұндайда күйзелісті қалай жеңуге болады?

– Карантин жағдайында жұмысқа шыға алмай, жұмысқа шыққан күннің өзінде де табысты бұрынғыдай таба алмай, қиналып отырған отбасылардың бар екені белгілі. Әрине, әркімнің табыс табуы мен күнкөріс деңгейі оның экономикалық сауаттылығына байланысты ескеру керек. Осыдан он жеті жыл бұрын Киев қаласында миллионер Бодо Шефердің айтқаны әлі күнге мен үшін өзектілігін жоғалтқан емес. Оның сол кездегі бізге айтқан кеңестерінің бірі, алты айлық шығынды бөлек жинау болатын. Яғни, табысынан айрылған кезде адамның кризистен құтқаратын жолы деп қарауға болады. Қазіргі жағдайға баға беру тіптен қиын. Бастысы табысынан айрылған отбасылар салы суға кетіп, құрдымға кетпестен керісінше, мүмкіндігінше ақша табудың жолын қарастырған дұрыс деп айтқан болар ем. Әрине, бұл жерде интернеттің мүмкіндігі мол екенін ұмытпау керек. Қашықтан білім беріп, кеңес алудың да жолдарын қарастыруға болады.

– Стрессті көп жағдайда елей бермейтініміз рас. Одан келер қауіпті өзіңіз толығырақ айтып өтсеңіз.

– Стресс – бұл қысым. Қандай да бір жағымсыз ойды ойлаған сайын адам қысыла береді. Адам уайымға берілсе, арты депрессияға ұласуы мүмкін. Оның арты түрлі ауруларға да душар болумен аяқталуы да ғажап емес. Қысымнан шығудың бірден бір жолы – позитивті ойлай білу. Адам ұйқысынан оянғаннан бастап көтеріңкі көңіл күйде жүріп, мейлінше ашық-жарқын болып, ортада өзін еркін ұстауы қажет. Кез келген дағдарыс жаңа идеялардың, жаңа жоспарлардың туындауына алып келеді. Сондықтан, бұл жерде жеке тұлғаның экстремалдық ситуациядан шығу әрекетін ұтымды пайдаланып, ішкі психологиялық резустарын қолдана алу керек. Сіздің жағдайыңыз жеке басыңызға тікелей әсер етеді. Демек, қобалжудың себептері бар. Бірақ, ең бастысы, өз-өзіңізді сабырға келтіріп және бойыңызда эмоционалдық тұрақтылықты қалыптастыру керек. Стресс жағдайында адам өзінің шынайылығын жоғалтады. Жағымсыз эмоциялар, қорқыныш және ертеңгі күнге сенімсіздік жұмыс жасауыңызға әсер етеді.

– Әңгімеңізге рақмет!

f7deb5fc-e65e-4838-95a5-87be81a994f3

Қазіргі кезде шаһардағы эпидемиологиялық ахуал көңілді ала-құла күйге түсіріп тұр. Науқастар саны күн санап көбеймесе, азаятын түрі жоқ. Дәрігерлеріміз коронавирус пандемиясымен күресте аянбай тер төгуде. Билік пен халық ақ халатты абзал жандарды бүгінгі күннің қаһарманына балап, алғыстарын жеткізіп келеді. Індет өршіп тұрған кезде жұртшылыққа шынайы ақпарат таратудың маңызы зор. Ал аурудың ошағында жүрген қалалық денсаулық сақтау басқармасының баспасөз хатшысының еңбегі елеуге тұрарлық. Бұқаралық ақпарат құралдары қызметкерлері күні қарсаңында осы мекеменің баспасөз хатшысы Лаура Нақыпқызымен сұхбаттасудың сәті түсті.

– Лаура Нақыпқызы, биыл дәрігерлер үшін үлкен жауапты кезең десек болады. Коронавирус инфекциясымен алдыңғы шепте күресіп жүріп дәрігерлердің вирус жұқтырып алып жатқанын естіп, жазып та жүрміз. Қауіптің ортасынан ақпарат тарату оңайға соқпаған болар?

–Иә, қазір дәрігерлер үшін әрбір минут пен секунд бағалы. Науқастар саны күрт көбейгендіктен, көптеген медицина қызметкерлері ауруханада түнеп, күн-түн демей қалтықсыз еңбек етуде. Оларға жүктелген міндет қаншалықты ауыр екенін жандарында жүрген соң түсінемін. Адам өміріне араша түсіп, аурумен күресу оңай шаруа емес. Ол үшін алтын қолды дәрігерлерге мың алғыс. Адамдар жаппай ауырып, ауруханада жатқандар көбейген сайын халыққа дер кезінде сақтық шараларын ескертіп, шынайы ақпарат таратуға тура келеді. Мұндайда дәрігерлердің алтын уақытын босқа өткізбеуге тырысамыз. Тиісті мәліметтерді алып, дер кезінде бұқаралық ақпарат құралдарына жеткізіп отырамыз.

– Сіздің атыңыз аталғанда журналистен гөрі, дәрігердің бейнесі көз алдымызға елестейді. Журналистикаға қалай келдіңіз?

– Әрбір адамның бала күнгі арманы мен мақсаты болады. Газет, журналдар мен телеарналардан ақпарат таратып, халықтың мұң-мұқтажын жеткізген журналистерге қарап қызығатынмын. Өскенде журналист боламын деп өзіме мақсат қойдым. Арманыма қол жеткізіп, жоғары оқу орнына оқуға түскеннен бастап ақпарат саласында жұмыс істеп келемін. 19 жасымда «Сайрам» телеарнасына жұмысқа орналастым. Қолыма микрофон ұстап, алғаш түсірілімге барғаным әлі есімде. Тұрғындар ауылдың ауыз су, жол мәселесімен шақырған болатын. Телеарна арқылы халықтың үнін билікке жеткізіп, мәселелері шешімін тапқанда, іштей қатты қуандым. Кейін келе, тележүргізуші ретінде өз мүмкіндігімді сынап көрдім. Осылай қолыма диплом алып, маман атанғанымша тілшілік тіршілікті қатар алып жүрдім. Кейін «Отырар» телеарнасына ауыстым. Сол кездері медиахолдинг басшысы Валентина Куликова маған денсаулық туралы материалдар жасауға тапсырма беретін. «Сен денсаулықтың адамысың» деп жиі айтатын. Телеарнада дәрігерлердің қызметі туралы жазып жүріп медицина саласына деген қызығушылығым оянды. Сол қызығушылық осы салаға алып келді.

– Баспасөз хатшысы—журналист па, мемлекеттік қызметші ме?

–Шынын айтқанда бұл – екі мамандықты да бір-бірімен ұштастырып жүрген маман дер едім. Журналист халық пен биліктің арасындағы көпір болса, баспасөз хатшысының жұмысы соған ұқсайды. Біз тұрғындарды медицина саласында болып жатқан жаңалықтардан құлағдар етіп, халықтың мәселесін тиісті жауапты мамандарға жеткіземіз. Бұрындары тек бұқаралық ақпарат құралдары арқылы көпшілік шұғыл хабарламалар мен маңызды жаңалықтарды хабарланса, қазір әлеуметтік желі арқылы да жүйелі түрде жаңалықтармен бөлісіп келеміз. Біздің міндет тек ақпарат тарату деп айтудан аулақпын, сол көтерілген мәселелердің де оңтайлы шешілуіне атсалысамыз.
– 28 маусым – Байланыс және ақпарат қызметкерлерінің күні. Осыған орай ақ тілегіңіз болса...
Журналистер қауымы бастарына қанша қауіп пен қатер төніп тұрса да, оқиға орнынан табылып, шынайы ақпарат жеткізіп жатады. Қаламы қарымды әріптестеріме ең алдымен денсаулық тілеген болар едім. Әлеуметтік желі мен бұқаралық ақпарат құралдары дамыған тұста төртінші билік өкілдері көтерген кез келген мәлесе шешімін табады деп сенемін. Түйткілді проблемаларды шешіп, халықтың алғысына бөлене беріңіздер.

Страница 1 из 33