Қашықтан тапсырған емтихан...

Пятница, 22 Май 2020 03:00

0b12a3b9-c04c-4823-ab61-82f9589e46d4

Елде пандемия басталғалы халықтың өмір сүру дағдысына біршама өзгерістер енді. Ақырындап бәрі онлайн форматқа ауыса бастады. Бұл көшке алғашқылардың бірі болып білім беру саласы қадам басқаны белгілі. Қашықтан білім алған студенттер үшін емтихан және дипломдық жұмыстарды қорғаудың жаңа тәсілі қолданылуда.

8b036355-211b-4417-900a-ba4e31290463Шымшаһардағы қара шаңырақ М.Әуезов атындағы ОҚМУ студенттері оқу жылының көктемгі емтихан сессиясын тапсыруды бастады. Университеттің оқу және оқу-әдістемелік жөніндегі проректоры, техника ғылымдарының кандидаты, доцент Роза Абишеваның айтуынша, пандемия кезіндегі емтиханға күндізгі бөлімде оқитын 13614 студент және 300 магистр қатысады. Ал қорытынды аттестаттауға 5267 студент жіберілген. Онлайн сессия ҚР Білім және ғылым министрлігі ұсынған барлық платформаларды пайдалана отырып, қашықтан оқыту технологиялары тәртібінде ұйымдастырылуда.
– Мемлекет басшысының қаулысымен елде төтенше жағдай жариялағаннан бастап барлық оқу процесі онлайн форматқа ауысты. Сабақтар кестеге сәйкес, видео лекциялар, персоналдық жеке т.б. жұмыстар рет-ретімен еш кедергісіз өтті. Қашықтан білім беру оқу ордамыз үшін таңсық емес. Оқу жүйесінің техникалық және технологиялық мүмкіндіктерінің арқасында білім беру барысында қиындықтар туындаған жоқ. Әлемдік және Қазақстандағы жоғары оқу орындары қолданған платформаларды кәдеге жаратып келеміз. Атап айтсақ, ИС ВУЗ, Прометей, Skype автоматталған жүйелері мен ZOOM, Cisco Webex Meetings, Moodle, Google Classroom, Microsoft Teams платформалары, iSpring, Teachbase интернет-ресурстары. Қашықтан оқыту жаһандану кезінде кеңінен қолдануды қажет ететін білім жүйесі. Осы кездегі оқу мүмкіндігінің бірден бір жолы екенін студенттеріміз де түсініп, өз тараптарынан олар да атсалысуда, - дейді Р. Жанысбекқызы.

Университетте қашықтан оқыту жағдайында сыбайлас жемқорлықтың алдын алу және академиялық адалдық талаптарының сақталуы назардан тыс қалмаған. Бұл жауапты міндет жоғары оқу орнының сыбайлас жемқорлыққа қарсы қызметін үйлестіруші құрылымдық буыны - «Парасат» басқармасына жүктеліпті. Ал дипломдық жұмыстар мен магистрлік, докторлық диссертациялардың қорғалу барысын «Шымкент-Адалдық алаңы» жобалық кеңсесі мен университеттің Сыбайлас жемқорлыққа қарсы іс-қимыл және құқық бұзушылық профилактикасы жөніндегі Қоғамдық Кеңесі қатаң бақылауда. Осылайша Мемлекеттік аттестаттау комиссиясы жұмысының барысы сырттан, құзырлы органдар тарапынан да қадағаланады, бұл ЖОО-ның ашықтығының дәлелі.
– Онлайн сессия студенттердің құлақтарына түрпідей тиіп, бойларын қорқыныш билеуі мүмкін деген ортақ тұжырымға тоқталдық. Оның алдын алу үшін стресс тест жүйесі арқылы пысықтау жұмыстарын әрі дайындық кезеңін ұйымдастырдық. Вебинарлар барысында студенттер өздерін мазалаған сұрақтарға жауап алды. Оған бір уақытта 1500-2000-ға жуық студент қатысты. Прокторинг жүйесі қолданылуда. Бейнеконференция арқылы өткен емтихан және дипломдық жұмыстарды қорғау толық жазылады. Проктор емтихан қабылдаушы оқытушының мамандығына сәйкес болмайды. Цифрлық волонтерларды қосып, студенттерді бағалау жүйесінің әділдігін қамтамасыз етеміз. Мұны тек амалсыздықтың шарасы, мәжбүрліктен деп қарап қоя салмай, керісінше өзімізді оқытудың келешектегі көрінісіне, яғни қашықтан оқыту жүйесіне әзірлеу деп қарауымыз керек, - дейді жауапты басшы.
Роза Абишева студенттер қауымы үшін пандемия кезінде бірқатар жеңілдіктер қарастырылғанын да мәлімдеді. Оның айтуынша, аталған жеңілдіктер аяғы ауыр немесе босанған, денсаулығы, отбасылық жағдайына байланысты қиындыққа тап болған студенттер өтініш беру арқылы жиынтық бағалауға қол жеткізе алады. Мақтааралдағы су алып кеткен ауылдарда тұратын студенттердің де жағдайы ескеріледі екен.

 

f8d862a5-0fbd-4147-8974-d38a60eb7465


– Шетелдік студенттерге сессияны 30-маусымға дейін ұзартып отырмыз. Педагогикалық іс-тәжірибесін жаңа оқу жылына ауыстырдық. Бұл ғылыми кеңестің шешімімен бекітілген. Жазғы оқу семестрі қашықтан өтеді. Қорытынды аттестаттауға жіберілген студенттер диплом жұмысы мен презентацияларын алдын ала электронды түрде ұсынады. Ал елдегі жағдай тұрақталғанда, оны қағаз күйінде тиісті мамандардың қолы және мөрімен қайта жинақталады. Әрине, әлемді әуреге салған COVID-19 инфекциясы сейілсін. Бастысы студенттер мен оқытушылар қауымының денсаулығын назарда ұстай отырып, заң аясында білім беру жұмыстарын әрі қарай жалғастыра бермекпіз, - деді университеттің оқу және оқу-әдістемелік жөніндегі проректоры.
Тоқсан ауыз сөздің тобықтай түйіні. Төтенше жағдайдың басты талабы «үйден шықпа» болса да, ғаламтор қуалаған көпшілік тау-тас кезіп жүр. Онлайн оқуды осы деп ұққан жұрт қазірдің өзінде онлайн оқудан шошып жүр. Алайда талай ел, талай ЖОО-ны бүгінде онлайн жүйеге өтіп, студенттерін жер-жерден жинап, онлайнның баршаға оңтайлы жүйе екенін іс жүзінде дәлелдеп отыр. «Ғылымсыз елдің күні – түн» демекші, университет студенттерінің білім-ғылымнан сусындануға деген ынталары жоғары екенін байқауға болады.

IMG-20181129-WA0047

Шымшаһарда «Ел үміті» жобасы арқылы алғыр әрі білімді оқушыларға ерекше жағдай жасалмақ. Қалада дарынды балаларға арналған жаңа орталық өз жұмысын бастады. Тарлан таланттар мен дара дарындарға есігін айқара ашқан су жаңа мекеме балалардың потенциалдық әлеуетін дамытуды мақсат етеді.

Әдебиет пен өнерде, бiлiм мен ғылымда сайдың тасындай небiр сайыпқырандар шыққан үшінші мегаполисте таланттардың жаңа буыны танылмақ. Дарын орталығының директоры Раушан Омарханқызының айтуынша, жаңа мекеме Тұңғыш Президент – Елбасы қорының бастамасымен ашылып отыр. «Ел үміті» жол картасы қаладағы дарынды және өнерлі жастарды анықтап, оларды республика көлемінде таныту мақсатында іске қосылған.
– Орталықтың жұмысы үш бағытта жүргізіледі. Алдымен аталған мекеменің сайты арқылы ата-ана мен оқушы тіркеліп, тест тапсырады. Екінші кезеңге өткендерді әңгімелесу арқылы іріктейміз. Базаға енген жастарды қалауына қарай олимпиадаларға жолдасақ, басқаларын ғылыми жобаларға дайындаймыз, сайыстар ұйымдастырып ынталандырамыз. Оқушылардың өнерін шыңдауға, спортпен шұғылданып, шығармашылығын дамытуға барлық жағдайды ұйымдастырамыз. Бірақ елдегі төтенше жағдайға байланысты пандемия аяқталғанша жұмысымызды онлайн форматта жүргізіп жатырмыз, - дейді Р. Жеренова.
Енді ғана құрылған орталық аз ғана уақыттың ішінде жас дарындармен тіл табысып үлгеріпті. Мекеме басшысының сөзіне сүйенсек, онлайн форматта ұйымдастырылған байқаулар өз нәтижесін беріп келеді.
– Сәуір айын ғасырда біртуар тұлғаларымызға арнадық. Әл-Фарабидің 1150 жылдығына орай «Ғалым болғым келеді» тақырыбында оқушылар арасында эссе жазу шығармашылық байқауын ұйымдастырдық. Жас қылқалам шеберлері «Біз біргеміз» тақырыбын арқау етіп, сурет салудан сайысты. Абай Құнанбаевтың - 175 жылдығына орайластырылған «Көзімнің қарасы» ән байқауы да өз дәрежесінде өтті. Сол сияқты ертегі оқу челленджін атап өтуге болады. Мені қуантқаны – оқушылардың ынтасы. Біз олардың санына емес, жасаған жұмыстарының мән-мағынасына үңілдік. Алдағы уақытта да зияткерлік сайыстар жоспарға сәйкес өткізіледі, - дейді орталық директоры.
Мекеме жас дарындардың шығармашылық қабілеттерін дамыту мақсатында жоғары оқу орындарымен байланыс орнатып, ғалымдардың дәрістерін ұйымдастыруды көздеп отыр. Орталық мектептегі меңгерген білімді одан әрі тереңдете түспек. Жалынды жас ғылыми-инновациялық дағдыларын дамытады.
– Баланы заман талабына қарай көрегендікпен икемдеп, өз заманының озық өнегесін санасына сіңіре білу, оларды шығармашылық бағытта жан-жақты дамыту – бүгінгі күннің басты талабы. Кейбір отбасылар балаларының болашағына немқұрайлық танытып жатады. Ата-ана перзентінің бойындағы қабілетін ашуға ұмтылуы қажет. Жұрттың баласы оқыған оқуына түсіріп, кейде қателікке бой алдырып жатқанын көреміз. Негізі баланың қабілетін ерте жастан анықтаған дұрыс. Әркім жанына жақын іспен шұғылданса ғана кез келген салада прогресс байқалады. Біздің орталық міне, сондай дарынды балалар мен жеткіншектерді анықтау үшін, оларды қолдау мақсатында құрылып отыр, - деді Раушан Омарханқызы.
Дарынның ендігі өткізетін сайысы – математика пәнінен бастауыш сыныптарға онлайн олимпиада. Оған 3-4-сынып оқушылары қатыса алады, дейді орталық мамандары.Өзіндік қиындығы бар сын сағатында әр қатысушы математикадан 30 тест орындайды. Жеңімпаздар әдеби кітаптар, алғыс хаттармен марапатталатын болады.

 

Ерекше соңғы қоңырау…

Пятница, 15 Май 2020 02:32

1495766946 article b

Санаулы күндерден кейін оқу жылы аяқталуға жақын. Қашықтан білім алған оқушылар үшін төртінші тоқсанда өзгеріс көп болды. Тіпті, мектеп бітіруші түлектер соңғы қоңырау сыңғырын ести алмаймыз ба деп қорыққан-ды. Ұлттық бірыңғай тестілеу тағы бар. Хош, коронавирусқа байланысты білім саласында қандай өзгерістер енгізілді?

тажиеваҮшінші мегаполисте биыл 8470 түлек мектепті бітіргелі жатыр. Оның ішінде 6046-ы қазақ тілінде, 1545 оқушы орыс тілінде, ал қалған 879-ы өзбек тілінде аяқтайды.
Шымкент мектептеріндегі 6840 түлек ұлттық бірыңғай тестке қатысуға ниет білдірген.

– Өздеріңізге белгілі, оқушыларымыз биыл 4-тоқсанды қашықтан дәріс ала отырып аяқтайды. Яғни, 9(10) сыныптардың білім алушылары үшін қорытынды бітіру, ал 11(12) сыныптардың түлектері үшін мемлекеттік бітіру емтихандарын тапсырмай-ақ, жылдық баға қорытындысымен білімін аттестаттандыру енгізіліп отыр. Түлектер өздерінің он бір жыл білім алған алтын ұяларымен қоштасса, ұстаздар өздерінің сүйікті шәкірттерін үлкен өмірге қанаттандырады. Бұл сәт әрбір мектеп бітіруші түлекке тарихи оқиға. Енді алдымызда мектеп бітіру кештері және Ұлттық бірыңғай тестілеуге қатысу секілді жауапты шаралар тұр, – дейді Шымкент қаласы білім басқармасының басшысы Жанат Тәжиева.
Шаһардың бас ұстазының сөзінше, білім сынағын тапсыруға өтініш білдіргендер жалпы түлектердің 80,7 пайызын құрайды. Қалада ұлттық бірыңғай тестілеуді өткізуге жоғары оқу орындары жанынан 4 пункт белгіленіпті.
- Жоғары оқу орындарының базасында орналасқан тест өткізу пунктерінде барлық материалдық жабдықтар әзірленген. 5g үлгідегі тұншықтырғыш, металл іздегіш құрылғылары мен қоса әр аудитория талапқа сай дайындалған. Бейнебақылау орнатылады, түлектердің ата-аналры, туыстарына да арнайы орындар болады, – дейді Ж.Тәжиева.
Биыл ұлттық бірыңғай тестілеуде 11-сыныптың 4-тоқсанында өткен бағдарлама бойынша сауалдар болмайды. Өйткені, оқушылар бұл жылы карантин мен төтенше жағдайға байланысты соңғы тоқсанды қашықтан оқыды. Сондықтан осындай жеңілдік жасалып отыр. Алайда, тест тапсырудағы талап қатал. Егер оқушы білім сынағы кезінде ұялы телефон немесе түрлі көмекші құралдар пайдаланғаны дәлелденсе, жинаған ұпайы желге ұшады.
– Тестілеу маусымның 20-сы мен 5-шілде аралығында Шымкенттегі 4 пунктте өтеді. Білім сынағы дәстүрлі форматта ұйымдастырылады. Бірақ, санитарлық режим қатаң сақталуы тиіс. Түлектер бір-бірінен алшақ отыруы үшін бір мезетте аудиторияда болатын оқушылардың саны да шектеледі. Ал екі тоқсанды қашықтан оқыған оқушылар аттестат алу үшін мектепке баратын болды. Соңғы қоңырау 3-4 маусым күндері мектеп ауласында, ашық аспан астында мектеп бітіруші түлектердің ғана қатысуымен өтеді. Мұндай шараларға рұқсат беру эпидемиологиялық жағдайдың біршама жақсаруы нәтижесінде мүмкін болып отыр, – дейді Жанат Арысбекқызы.
Айтпақшы, «аста-төк дастархан, қызылды-жасылды киім-кешек, кортеж жасап, қыдыру секілді басы артық шығынға биыл жол жоқ», – дейді білім басқармасының басшысы.
Түлектерге білімін растайтын аттестат соңғы қоңырауда табыс етілмек. Ал оған түлектер тек мектеп формасымен келулері тиіс. Тәртіпке бас имегендерге қатаң шара көріледі. Айта кетейік, Ұлттық бірыңғай тестілеуді тапсырғанын растайтын сертификатты тек электорнды түрде ала алады.

Тәтті де, сәтті бизнес

Пятница, 15 Май 2020 02:29

Жансая

Шәкәрім атамыз «Бұл ән – бұрынғы әннен өзгерек» дегендей, биылғы көктем бұрынғы көктемдерден өзгерек болып тұр. Қала көшелері бос қалып, адамдар үйлеріне қамалды. Иә, бұрын соңды болмаған әлемдегі ахуал көпшілікке оңай тимеді. Жас кәсіпкер Жансая Ержанова дүниежүзін шарлаған індет адамзатқа ортақ ой салғанын айтады.

Шымкент тұрғыны Жансая Ержанова елге оралғалы ерекше кәсіпті қолға алған. 27 жастағы бойжеткен құрамында қанты жоқ, табиғи өнімдерден ғана тұратын дәмді шоколадтарды дайындаумен айналысып жүр. Жас кәсіпкер бизнестің қыр-сырын шетелде үйренген.
– Университетті тәмамдаған жылы кәсіп бастауға бекіндім. Алғашқыда Қытайдан тауар алдырып, саттым. Автокөлік бизнесінде де өз бағымды сынап көрдім. Жарнама агенттігін енді қолға алғанымда шетелге оқуға грант жеңіп алып, бизнестен уақытша кеттім. Молдавия еліндегі белді университеттердің бірінде бизнес және әкімшілік мамандығы бойынша білім алдым. Дипломдық жұмысым шоколад бизнесі жайында болды. Оны жақсы деген бағаға қорғап шықтым, – дейді жас кәсіпкер.

 

89896


Жансаяның бұл бизнесті таңдауы да бекер емес. Ол тәтті құмарлығының арқасында жарты жылда 20 келі артық салмақ жинаған. Кейін құрамында қант жоқ шоколадты іздеуге көшкен.
– Шетелде жүріп артық салмақ жинаймын деп мүлдем ойлаған емеспін. Тәттіден бас тарту да оңайға соқпады. Бір күні супермаркетте жүріп қантсыз жасалған шоколадқа көзім түсті. Бірақ бағасы қалтамды көтермеді. Айдың соңында студенттің қалтасында санаулы тиын ғана қалады ғой. Кейін үйге келген бойда ғаламтордан қант қоспай шоколад жасауды үйрене бастадым. Дайын рецептерге өз қалауым бойынша қоспалар қосып, жаңаша дәм беретін тәтті жасадым. Оны құрбыларым мақтап, жеп алды. Содан бастап шоколад жасауға қызығушылығым оянды. Ақшамды үнемдеп, Украинаның Одесса қаласында орналасқан Шоколад музейінде болдым. Ол жерде шоколад шеберханасында қосымша сабақ алдым. Менің сапарым одан әрі жалғаса түсті. Шоколадтың отаны Бельгия, әрі қарай Австрия, Франция, Чехия, Венгрия, Румыния, Германия елдеріне барып тәттілер жайында зерттеу жұмысын жасап қайтқаным бар, – дейді кейіпкеріміз.
Ол туған елге оралғанда осы бизнесті бастаудың тетіктерін қарастырған. Кәсіпкерді қолдауға арналған инновациялық идеялар байқауында жеңіске жетіп, қайтарымсыз грантқа ие болған.
– Біз табиғи таза өнімдерді қолдана отырып, жүз пайыз шоколад жасаймыз. Бүгінгі таңда авторлық 18 рецептіміз бар. Оның 60 пайызы қантсыз жасалады. Құрамында ешқандай химиялық қоспалар жоқ. Әрбір ингредиент адам денсаулығына пайдалы. Имунитетті көтеруге үлесін қосады. Қолдан жасалған шоколадтардың дәмі мүлде бөлек болады. Бұл шоколадтардың калориясы жоқ деп айтпаймын. Көбірек жеп қойсаңыз, әрине, салмақ қосасыз. Өйткені, оның құрамындағы кептірілген жемістер сияқты қоспалар да бар, - дейді Жансая.
Ең қызығы, рецептердің барлығын Жансаяның өзі ойлап тапқан. Әрине, бастапқыда бәрі ол ойлағандай болмай шыққан. Дегенмен уақыт өте келе тәжірибенің ықпалымен, дәмі тіл үйіретін тәттілер пайда бола бастапты.
Елдегі төтенше жағдайдан кейін жас кәсіпкер белді бекем буып, дағдарысқа қарамастан іске кірісуге әзір. Ал Жансая қазақтың қайсар қызы ғана емес, білікті экономист екенін көрсеткісі келеді.

 

Бір шынаяқ кофе

Среда, 29 Апрель 2020 01:04

22658735654065468 1d41

Ол миллионды шаһарда тұрып, бірнеше істі қатар алып жүр. Бұл жолы SalemCoffee, Global Coffee кофеханалар желісінің негізін қалаушыларының бірі –
Данияр Мамирхановтың табыс хикаясын әңгімелейміз.

31cf1faae457a4e50bafe3795911f362– Кофеханалар желісін құру қазіргі таңда өз кәсібін дамытамын деген жастар үшін таптырмас бизнес-идея. Алайда істі енді бастаған біз үш дос болып, осыдан төрт жыл бұрын тәуелкелге бел буып, алғашқы нүктені аштық. Басында бәрі қызық әрі қиын болып көрінді. Бертін келе тәжірибе жинақтай отырып, қаладағы кофеханаларды 19 кофе-барға жеткіздік. Еліміздің бірнеше өңірінде серіктестеріміз бар. Межеміз – әлемдік брнед атану, – дейді жас кәсіпкер.
Қалада кофе ішу мәдениетін қалыптастыруға үлес қосып жүрген Данияр шаһар көлемінде өткізілетін мерекелік іс-шаралар мен қоғамдық жұмыстарға белсене араласады. Өзбек этномәдени бірлестігінің мүшесі әрі қалалық жастар мәслихатының депутаты елдегі елеулі оқиғаларға да үн қосып келеді.
– Қазақстанның дамуы отандастарымыздың азаматтық ұстамына байланысты. Жастар мәслихаты құрылғалы қайырымдылық шаралар мен түрлі деңгейдегі жиындарға атсалысып келеміз. Заман талабы – жастардың жан-жақты болуы әрі жаңа технологияларды игеру болып табылады. Әр адамның санасында жетістікке жету жайлы ең үлкен үміттер мен алуан қорқыныштар шоғыры ұя салған. Кез-келген жетістіктің шыңын бағындырушының тарихына үңілсек, олардың асқақ арманды табанды мақсатпен ұштастыра отырып, тер төккенін байқаймыз. Оны байқау үшін бір ортада адамдармен біте қайнасып жүріп көз жеткізу керек, – дейді ол.
Қарамағында бірнеше этнос өкілдері жұмыс істейтін кофеханалар желісі ынтымақ пен бірліктің арқасында татулық символына айналған. Данияр қаланың барлық тұрғыны бейбітшілік пен келісім сақтауға, бір-біріне өзара құрмет көрсетуге және өзара келісім жасасуға өз үлесін қосып жатқанын айтты. Бауырлас елдің бірлігі бекем екенін тілге тиек еткен кәсіпкер 1 Мамыр – Қазақстан халқының бірлігі күнімен құттықтауды ұмытпады.
– Бірінші мамыр - бірліктің ерекше мерекесі. Ынтымақтастығы жарасқан елде тұрақтылық сақталып, болашақтың дамуы да баянды болмақ. Қазақстандық ұлтаралық татулық үлгісі де осыған негізделген. Түп-тамыры түркілерден тарайтын бауырлас қазақ пен өзбек ел болып, егемендік алғаннан бері де туысқандық, тату көршілік қатынастан айнымай келеді. Бүгінде әрбір қазақстандық этникасына қарамастан, өзін үлкен отбасының бір бөлігі сезінеді. «Байлық – байлық емес, бірлік – байлық» деген сөз бар. Еліміздегі 130-дан астам этнос өкілдерінің бірлігі жоғалмасын. Әлемді жаулаған жаман дертті де бірге жеңеміз,–дейді Д.Мамирханов.
Кәсібін ашып, тірлігін дөңгелетіп отырған Даниярдың берекелі ісі көпке үлгі. Елге еңбекқорлығымен танылып келе жатқан жастың талабына қарап таңданбасқа болмайды. .

 

sumka

Қазіргі нарықта былғарыдан жасалған кәдесыйларға сұраныс бар. Заманауи әмиян, белдік пен қолдорбаларды дәстүрлі оюмен өрнектеп, таза былғарыдан кәдесый жасайтындардың қатары да жыл санап көбейіп келеді. Бірі – қолөнермен ерте жастан айналысса, енді бірі – оны оңай меңгеріп кәсібін дөңгелетіп әкеткен. Былғарыдан бұйым жасап машықтанған кейіпкеріміз Ербол Жақыпұлы тиімді әрі пайдалы этнобизнеске қалай келгенін әңгімелеп берді.

717f377d-737e-4830-8774-ebba8bd3a241Әр отбасында ұрпақтан ұрпаққа жалғасатын жақсы дәстүр болады. «Ат тұяғын тай басар» дегендей, «Кәсіп пен нәсіптің» бүгінгі кейіпкері Ербол Алмағамбет ерте жасынан еңбекке епті болып өскенін айтады.
– Қазір 6-курста оқимын. Мамандығым – жалпы медицина. Сабақтан қолым қалт еткенде ізденіп жүріп, бір жыл бұрын кәдесый жасауды қолға алдым. Жеке кәсіпкер болудың ең жақсы тұсы ешкімге тәуелді емессің, өз еркің өзіңде. Өзіңе өзің бисің, - дейді жас кәсіпкер.
Оның айтуынша, қазір интернет дүкен ашып отандық өнімді жарнамалауға да, саудалауға да болады. Таза қара мал терісін баптап, былғарыдан тапсырыс берушінің сұранысына қарай әмиян, белдік, сағат, қолдорбаларды жасайды. Ою-өрнекпен көмкерілген қолөнер бұйымына тіпті түрлі жазу да жазылады. Әуелде шырайлы шаһарда басталған кәсіп қазір Алматы қаласында жалғасып жатыр екен. Яғни, уақытша Алматыда жасалып, басқа қалаларға жеткізіледі.
Ербол ұлттық нақыштағы бұйымдарды нарыққа шығару, оған тұтынушылардың сұранысын арттыру оңай емес екенін айтады. Кез келген кәсібінің көркіне әр беретін ұлттық ою-өрнектер екенін жасырмай айтқан Ербол Алмағамбет алдынан қандай қиындықтар кездессе де, бұл кәсіптен бас тартпайтынын алға тартты.
– Бұйырса жалпы тәжірибелі дәрігер болу ойда бар. Бірақ «жігітке жеті өнер де аз» деген ұстанымда өмір сүремін. Бұл – кәсіп. Қаншама адам осы этнобизнестен пайда тауып отыр. Біз мемлекеттік бағдарламаларға қатысып көргеніміз жоқ. Бірақ мемлекет бізге не береді деп қол қусырып отырудан аулақпыз. Біреуге пайдамыз тисе қуанамыз, әрине.
Бүгінде ұлттық оюмен көмкерілген өнімдеріне тек Шымкентте ғана емес, өзге өңірлерде де сұраныс жоғары. Дегенмен, кәсіпкер саннан бұрын сапаға баса назар аударатынын және әрбір бұйымның дизайны, стилі ерекше болғанын қалайтынын айтады.
– Санға емес, сапаға жұмыс істейміз. Сұраныс көп екен деп, қаптатып өнім шығара бергім келмейді. Баппен, байыппен тұтынушыларға сапалы дүние ұсынғым келеді. Бұл мақсатымнан еш уақытта тайған емеспін, – деп түсіндірді жас кәсіпкер.
Мегаполисте Ерболдай қолы алтын, мамандығына адал, еңбекқор жігіттердің көптігі қуантады. Теріні кәдеге жаратып, кәсібін дөңгелете білген жас кәсіпкердің өнімдері алдағы бес-он жылдықта брендке айналары сөзсіз.

 

screenshot 5 56 650x410 1 650x410 1 650x410

Әлемді жаулаған Covid-19 індеті елімізді айналып өтпеді. Бүгінде дертті жұқтырғандар саны 650-ге жетті.

Адамдарды ғана емес, тұтас мемлекетті әлекке салған вируспен күресті әр ел әрқалай жүргізуде. Білім іздеп шетел асқан жерлесіміз Алиасқар
Сатылдыдан Германиядағы коронавирус пандемиясы жайлы сұрап білдік.
германия фото– Мен Германияның Бремен қаласында орналасқан Jacobs University-нің 2-курс студентімін. Индустриалды инженерия және менеджмент мамандығы бойынша білім алып жатырмын. Ақпан айында кезекті демалыстан соң Қазақстаннан оқуымды жалғастыру үшін қайта келдім. Бұл уақытта вирусты жұқтырғандар саны күрт көбейді. Олар Италия, Иран, Испания сынды елдерден келген азаматтар арқылы таралды, - деп әңгімеледі Алиасқар.
Кейіпкеріміздің айтуынша, Германияның ірі мегаполистері елдегі алғашқы індетті жұқтыру ошағына айналған. Ал тұрғындар вирусты елемеген. Сөйтіп, көзге көрінбейтін қауіпті дерт Бременге де жеткен. 13 наурызда шаһарда вирусты жұқтырғандар саны 56 болып, қала карантинге жабылған. Алиасқар елге қайту мүмкіндігі туғанда жауапты шешім қабылдағанын айтады.
– Егер өз елдеріңізде жағдай тұрақты болса, қайтуларыңызға болады деп соңғы шешімді қабылдауға мүмкіндік берді. Бірақ мен отбасым мен туыстарым, елдегі азаматтардың денсаулығын уайымдадым. Мұндай уақытта қара бастың күйттемей, отандастарымның жағдайына алаңдап, сонда қалу туралы бір тоқтамға келдім. Бұл сөзімді ата-анам да құптады. Қазір университеттің жатақханасындамыз. Тәртіп қатал. Жағдай тұрақты. Ал қаладағы індетті жұқтырғандар саны едәуір артып, 300-ге жетті, - дейді ол.
Алиасқардың айтуынша, кампусты қадағалауға алғандар көбейген. Тамақтану уақыты ұзартылып, адамдар арақашықтығына ерекше мән беріледі. Екі адамнан артық жүруге тыйым салынған. Егер тәртіпке бағынбаса, 100-150 еуро көлемінде айыппұл салынады. Оған көнбегендер қатаң жауапкершілікке тартылатынын айтты.
– Бастапқыда тұрғындар пандемияны елемеді. Ескертулерге құлақ аспай туған күн тойлап, адамдар көшелерде толассыз жүрді. Мұның ақыры жақсылыққа алып келмеді. Дерт күшейіп, жұқтырғандар саны күн сайын еселене түсті. Адамдар вирусты жұқтырғандардың саны 50-60 мыңға жеткенде ойлана бастады. Қазір аса қажеттілік болмаса, көшеге шығуға рұқсат жоқ. Дәріханалар мен дүкендер жұмыс істеп тұр. Біз онлайн режимінде білім алып жатырмыз. Қажетімізді сырттан онлайн тапсырыспен алдырамыз. Төлемдер де карталар арқылы жасалады. Гигиеналық және санитарлық тазалық шараларына аса мән беріледі. Бір қуантарлығы бұл жерде пандемияға байланысты баға өскен жоқ. Үйдегілермен сөйлескенде елде аласапыран болып, адамдар даурығып жатқанын айтқан еді. Ал Германияда олай емес, - дейді жерлесіміз.
Алиасқар Сатылды барлығы өз орнына келетініне сенімді. Індет те саябырсып адамдар бұрынғы істерін қолға алатын күн алыс емес деп есептейді. Елі мен туған жерін сағынып, Отанына аман келуді қалаған жас жерлестеріне індетпен күресте ескертпелерге құлақ асып, тазалыққа мән беруге үндеді. Үйден шықпай, вирустың алдын алуға үлес қосуға шақырды.

 

 

Онлайн емес, қашықтан оқиды

Среда, 08 Апрель 2020 05:26

Без имени-1

Елдегі төтенше жағдайға байланысты мектеп оқушылары төртінші тоқсанды қашықтан оқуына тура келіп отыр. Сәуірдің алғашқы күндері сынақ ретінде республика аумағындағы бірқатар мектеп оқушылары онлайн дәріс өтті.

Мұнан соң ата-аналар да онлайн жиналыс жасады. Бірақ интернет жылдамдығы төмендеп, платформаларға кіріп-шығу мұң болды. Нәтижесінде еліміздің бас ұстазы онлайн емес, қашықтан оқимыз деп мәлімдеді. Ал үшінші мегаполисте қашықтан оқыту қалай жүзеге асырылады?
Ақпараттық-коммуникациялық орталықта өткен баспасөз брифингінде шырайлы шаһарда 213 білім беру ұйымы қашықтан оқыту форматына көшетіні айтылды. Баспасөз жиынында Шымкент қаласы әкімінің орынбасары Алмасбек
Мамытбеков пен қалалық білім басқармасының басшысы Жанат Тәжиева елдегі пандемияға байланысты онлайн білім беру жүйесіне дайындықтары және атқарылып жатқан жұмыстар жөнінде жан-жақты баяндады.
Спикердің айтуынша, қаладағы мемлекеттік 147 және жекеменшік 25 орта білім беру ұйымы қашықтан оқыту жүйесіне дайын. 222 мың оқушы 6 сәуірде басталатын IV тоқсанда республикалық және жергілікті арналар мен интернет платформаларының көмегімен білім алады.
–Шымкент оқушылары үшін төртінші тоқсан ерекше форматта өтеді. Өйткені елдегі қалыптасқан жағдайға байланысты балалар қашықтан оқыту жүйесіне көшіп отыр. Миллионды қала оқушылары білім беру жүйесінің екі бағыты бойынша қамтылмақ. Оның бірі – - Интернет платформа. Екіншісі – Телараналар арқылы, бұл ең тиімді әрі оңай тәсіл, – деді қала әкімінің орынбасары Алмасбек Мамытбеков.
Ал қалалық білім басқармасының басшысы Ж.Тәжиева онлайн білім беру жүйесіне қатысты мәселелер толық шешімін табатынын айтты. Ата-анаға қиындық болмас үшін қалалық білім басқармасы арнайы балалардың тізімін жасап, үйінде компьютері жоқ көмекке мұқтаж балаларға мектептегі компьютерлерді жеткізіп, интернет желісін жалғатып беріпті. Мұқтаж отбасыларға оның ақысын да төлеп берген. Ол қаржы мектепке тартылған интернетке кететін шығын есебінен жабылған.
– Білім басқармасы 222 мыңнан астам оқушының материалдық жағдайын саралап, оларды бірнеше топқа бөлді. 30364 бала аз қамтамсыз етілген отбасыдан шыққан. Оның 17 мың 616-на компьютер қажеттілігі туындаған. Бұл мәселені шешу мақсатында қала мектептеріндегі 10 192 компьютер оқушыларға таратылып берілді. Ал, қалған 7424 балаға қажетті компьютер сатып алу үшін республикалық бюджеттен 2250,0 миллион теңге бөлінді. Ол қаржыға 9000 компьютер сатып алуға мемлекеттік сатып алу жұмыстары ұйымдастырылуда. Бұл жуық арада шешіледі, – деді басқарма басшысы.
Сала мамандарының хабарлауынша, 17 мыңнан астам ұстаз ерекше форматтағы оқыту жүйесіне тас түйін дайын отыр. Олар алдын ала әлеуметтік желілер мен мемлекеттік бағдарламаларды демалыс кезінде қарады. Жаңа оқу тоқсанына қатысты жоспарларын түзіп қойған. Әр пән мұғалімі соңғы тоқсанда оқытылуы қажет сабақтардың арнайы кестесін жасаған. Қашықтан оқыту жүйесі Қазақстан үшін таңсық емес. Алайда мектеп оқушылары жалпы бұндай жаппай қашықтан оқыту жүйесін бірінші рет қолданып отыр. Сондықтан қиындық болуы заңдылық. Ал қаладағы 26 мың 308 колледж студенті мен жоғары оқу орнындарының 106 мыңға жуық студенті 16 наурыздан бастап қашықтан оқыту форматында білім алуда.
– Ұстаздардың сабағын жазып үлгермеген бала телеарналар арқылы да сабақ оқуына мүмкіндігі бар. Республикалық «Балапан» және «Ел Арна» телеарналарында күнделікті сабақтар жүреді. Қазір үш мыңнан астам дәріс әзірленген. Ол сабақтар жергілікті «Айғақ», «Оңтүстік» және «Отырар» телеарналарынан берілетін болады. Жалпы бұл жүйе орта білім мекемелерінде алғаш рет қолданылып отыр. Сондықтан ұстаздарға артылған жауапкершілік үлкен. Дегенмен біз бар күшімізді саламыз, – деді білім басқармасының басшысы.
Баспасөз брифингінде жалақы мәселесі де шет қалған жоқ. Жауапты мамандар балабақшалар жұмысын тоқтатқанмен қызметкерлердің жалақылары толық төленетінін айтты.
– Қазіргі таңда қаламызда 75 386 бала болса, 521 балабақша бар. Олардың 82-сі мемлекеттік, 439 – жекеменшік. Төтенше жағдай режимін қамтамасыз ету жөніндегі Шымкент қалалық өңірлік комиссиясының шешімімен қаладағы барлық балабақша қызметінің уақытша тоқтатылған мерзімінде меншік түріне қарамастан мекеме қызметкерлерінің жалақылары толық көлемде сақталу туралы шешім қабылданды, – деді Ж.Арысбекқызы.
Ал мектеп ұстаздарының жалақысы қашықтан жұмыс істуіне қарамастан толық сақталмақ, дейді қаланың бас ұстазы. Жанат Арысбекқызы сонымен қатар, ата-аналар мен оқушыларды пандемия кезінде санитарлық және гигиеналық тазалықты сақтай отырып, үйде қалуға шақырды.

 

Страница 4 из 33