Шымкент қаласының жолаушылар көлігі және автомобиль жолдары басқармасы тарапынан қаладағы жолдардың сапасын арттыру бағытында жүйелі жұмыстар жүргізіліп келеді. Басқарма мамандары 2024 жылғы атқарылған жұмыстары, 2025 жылға жоспары және 2023-2024 жылдары кездесулерде көтерілген халық мәселелерін шешу туралы айтып берген болатын.
Басқарманың деректеріне сүйенсек, Шымкент қаласы бойынша жолдардың жалпы ұзындығы 3 899,5 шақырымды құрайды. Оның ішінде асфальтбетонды жабындысы бар жолдар – 2 924,6 шақырым, шағал тас төселген жолдар – 567,4 шақырым, ал, топырақ жолдар – 407,5 шақырымды құрайды.
Өткен 2024 жылы атқарылған жұмыстар нәтижесінде жақсы және қанағаттанарлық жағдайдағы көшелердің үлесі 75 пайызға жеткізілді. 2024 жылы жалпы қала аумағындағы көшелер желісінде құрылыс-жөндеу жұмыстарын жүргізуге және күтіп ұстауға бюджеттен 60,9 млрд. теңге бөлініп, 365,8 шақырымдық 501 көше мен 1 көпірде құрылыс-жөндеу жұмыстары жүргізілді. Жыл соңында жалпы ұзындығы 269,5 шақырымдық 424 көше мен 1 көпір пайдалануға берілді. Соның ішінде 59,5 шақырымдық 20 көшеде құрылыс және қайта құру жұмыстары жүргізіліп, 23,1 шақырымдық 6 көшеде жұмыстар аяқталған. Осы мақсатқа бюджеттен 16,9 млрд. теңге бөлінген.
Биыл жақсы және қанағаттанарлық жағдайдағы көшелердің үлесін 79 пайызға дейін жеткізу жоспарланып отыр. Ол үшін жолдағы құрылыс-жөндеу жұмыстары мен көшелерді күтіп ұстауға бюджеттен 57,5 млрд. тг бөлінді. Осы қаржының есебінен жалпы ұзындығы 222 шақырымдық 271 көшеде құрылыс-жөндеу жұмыстары жүргізіледі. Жыл соңына дейін 197 шақырымдық 263 көшені пайдалануға беру
жоспарланған.
Г.ТЕМІРХАНҚЫЗЫ
