Харбинде (Қытай) өткен ІХ Қысқы Азия ойындарында фристайл-акробатика өкілдері тарихи жеңіске қол жеткізді. Ұлттық құрама сапында Шымкент қаласының спортшылары 1 алтын, 1 күміс, 2 қола жүлде жеңіп алды. Ерлер арасында командалық сайыста Шерзод Хаширбаев чемпион атанды. Ол жұптық сайыста 97.92 ұпай жинады. Қысқы Азия ойындарының жүлдегерлерін Шымкент әуежайынан жерлестері, спорт мектебі басшылары, жанкүйерлері зор қошеметпен күтіп алды.
«Енді олимпиада ойындарына дайындаламыз»
Іс-шарада қалалық дене шынықтыру және спорт басқармасының басшысы Маратбек Мықтыбеков жеңімпаздар мен жүлдегерлерді құттықтап, алдағы бәсекелерде сәттілік тіледі. Қысқы спорт өкілдері жыл басынан бері жастар арасында әлем чемпионаты, Дүниежүзілік Универсиада және Қысқы Азия ойындарында жүлдегерлер қатарынан көрінгенін атап өтті.
– 2025 жыл сәтті, жеңісті басталып отыр. Фристайл-акробатикадан Дінмұхамед Райымқұлов жастар арасында әлем чемпионатында топ жарды. Бұл – тарихи жеңіс. Италияда өткен дүниежүзілік универсиада ойындарында шорт-трекші Айбек Темірхан қола жүлдеге ие болды. Ал Азия ойындарында да шымкенттік спортшылар жақсы нәтижеден көрінді. Бізде резерв бар. Хоккейден, мәнерлеп сырғанаудан жас спортшыларымыз өсіп келеді. Әзірге, қалада бір ғана қысқы спорт мектебі жұмыс істейді. Оқу-жаттығу жиындарын өткізуге барлық жағдай жасалған. Фристайл-акробатика өкілдерінің шетелде дайындалуына көмек бердік. Бапкерлер, дәрігерлермен бірлескен жұмыстың нәтижесінде осындай жеңіске куә болып отырмыз. Ендігі жауапты сындарда да спортшыларға үміт артамыз, – деді басқарма басшысы.
Тарихтан сыр тартсақ, жерлестерімізді Азия ойындарына дайындаған білікті жаттықтырушы Бағлан Іңкәрбек 2014 жылы Сочи Олимпиадасына қатысқан еді. Белгілі спортшы қазіргі уақытта фристайл-акробатикадан ҚР құрама командасының бас бапкері және Шымкент қаласының аға жаттықтырушысы қызметінде. Іс-шарада ағайын-туыс, бауырлары Бағлан Іңкәрбекке шапан жауып, құрмет көрсетті.
Бас бапкер бұл жеңіс бастамасы екенін, келесі жылғы Олимпиада ойындарына жолдама жеңіп алып, абыроймен қайтуға жұмыс істейтінін атап өтті. Енді өз шәкірттерін Олимпиада ойындарына үкілеп қосуға ниетті.
Қысқы Азия ойындарында жерлестеріміз Шерзод Хаширбаев, Аяна Жолдас, Асылхан Асан, Ардана Маханова жүлдегер атанды. Дінмұхамед Райымқұлов жастар арасында әлем чемпионатынан жеңімпаз болып оралды. Жүлдегер спортшылар қолдау көрсеткен баршаға рақметін айтып, келесі жарыстарға дайындыққа кірісетіндерін жеткізді.
Жеңіс жолы үзілмек емес
2025 жылғы Қысқы Азия ойындарында Қазақстан құрамасы 20 медальға қол жеткізді. Отандастарымыз төрт алтын медаль жеңіп алды. Чемпион атанғандардың қатарында биатлоншы, сондай-ақ, ерлер арасындағы хоккей, шорт-трек және фристайл-акробатика командалары бар.
Фристайл-акробатика және шорт-трекшілер тарихи жеңіспен қуантты. Ал ерлер хоккей құрамасы бұл жарыста бесінші рет чемпион атанып отыр. Фристайлшылар Азия ойындарының тарихында тұңғыш рет жеңіс тұғырының ең биік сатысына көтерілді. Синхронды секіруде Шерзод Хаширбаев пен Роман Иванов бірден екі Қытай командасын артта қалдырып, топ жарды. Екінші мүмкіндікте олар 97,92 ұпай жинады. Екінші орынға Қытай құрамасы (93,48 ұпай) жайғасса, үшінші орынды да қытайлық спортшылар (91,57 ұпай) иеленді. Ал Асылхан Асан мен Дінмұхаммед Райымқұлов 83,96 ұпаймен төртінші орын алды.
Аралас командалар арасындағы сайыста Аяна Жолдас, Шерзод Хаширбаев және Асылхан Асан екінші орынға ие болды. Қорытынды есепте жерлестеріміз 235,39 ұпай жинап, осы көрсеткіш оларға күміс медаль алып келді. Бірінші орынды Қытай спортшылары иеленсе, Жапония өкілдері үшінші орынға тұрақтады.
Сонымен қатар, Қазақстан құрамасының спортшысы Аяна Жолдас жекелей сында қола жүлде жеңіп алды. Финалда төрешілердің шешімі бойынша 76,54 ұпай жинады. Аяна Жолдас пен Ардана Маханова синхронды секіруде үшінші нәтиже көрсетті. Бірінші орынды Қытай құрамасы иеленді. Екінші орынға да қытайлық спортшылар жайғасты. Осылайша, фристайл-акробатикадан Қазақстан құрамасы 1 алтын, 1 күміс және 2 қола жүлдемен оралды.
Фристайл-акробатикадан Қазақстан ұлттық құрамасының бас бапкері Бағлан Іңкәрбек спортшылар тапсырманы екі етпей орындағанын айтады.
Қарсыз өлкеде қысқы спортқа аңсары ауған жастар бір шоғыр. Шымкент қаласының №8 қысқы спорт түрінен мамандандырылған балалар мен жасөспірімдер спорт мектебі 2010 жылдың 17 қыркүйегінде ашылып, жұмысын бастады. Содан бері көптеген спортшылар ел намысын абыроймен қорғап жүр.
Бүгінде спорт мектебінде қысқы спорттың 4 түрі – фристайл, конькимен мәнерлеп сырғанау, шорт-трек, шайбалы хоккей бөлімі жұмыс істейді. Жалпы 319 спортшы жаттығу жасайды. Дарынды жастар бар. Басқарма басшысы, бапкерлер олардың талабын ұштап, тәжірибесін арттыруға бірлесе жұмыс істеуде. Келесі Олимпиада ойындарына бір жыл уақыт қалды. Харбиннен жарқын жеңіспен оралған жерлестеріміз Олимпиада ойындарына дайындыққа кірісіп кетті.
Т.ҚАСЫМОВ
