Ұлыстың Ұлы күні – Наурыз мерекесі Шымкент қаласы Көксай шағын ауданы тұрғындарына жақсылығымен келіп, зор қуаныш сыйлап отыр. Қала әкімінің тапсырмасымен өткен жылдан бері осы шағын ауданды жаңғырту тұжырымдамасы қолға алынып, нәтижесінде көптеген отбасы жаңа, жайлы баспанаға ие болып жатыр.
Нақты айтар болсақ, Наурыз мерекесі қарсаңында қала әкімі Ғабит Сыздықбеков Нұрлыбаев көшесі №4,9,14 үйлерінде тұратын 35 отбасына жаңа пәтер кілттерін табыстады. Бұл – ел тұрғындары үшін аса маңызды әлеуметтік жобалардың бірі. Тозығы жеткен, апатты үйлерде өмір сүріп келген тұрғындар енді заманауи, кең әрі ыңғайлы пәтерлерде тұрады.
Қала әкімі өз сөзінде тұрғындарды қоныстойымен құттықтай келе «Біз үшін ең бастысы – халықтың әл-ауқатын жақсарту, өмір сүру сапасын арттыру. Бүгін 35 отбасы жаңа баспанаға көшіп, үлкен қуанышқа кенеліп отыр. Бұл тек баспана емес, болашаққа деген сенімнің нышаны. Тұрғындарға қолайлы жағдай жасау – біздің басты міндетіміз», деп атап өтті.
Көксай шағын ауданын жаңғырту тұжырымдамасы аясында тек тұрғын үйлер ғана емес, әлеуметтік нысандар да бой көтереді. Жауаптылардың айтуынша, жоспарға сәйкес, көпқабатты тұрғын үйлер, саябақтар, скверлер, спорт кешені, әкімдік ғимараты, мектеп кеңейту жұмыстары, сондай-ақ көпфункционалды сауда-логистикалық орталық салынбақ. Бұл өзгерістер қаланың тарихи бөлігін заман талабына сай абаттандыруға және қала келбетін жақсартуға мүмкіндік береді.
«Бұрынғы үйіміз өте ескі еді, балаларымыз үшін қатты алаңдайтынбыз. Енді жарық, жаңа әрі кең пәтерге ие болып, қуаныштан көзімізге жас үйірілді. Бұл біздің тұрғындар үшін үлкен қуаныш. Осындай қамқорлық танытқан қала басшылығына ризашылығымыз шексіз» дейді жаңа үйлі болған көксайлық тұрғын Амира Тасболатова.
Көксай шағынауданын жаңғырту жобасы аудан тұрғындары үшін жаңа мүмкіндіктер ашып, олардың өмір сапасын жақсартуға ықпал етуде. Қоныс тойын тойлағалы отырған 35 отбасы үшін бұл Наурыз мейрамы ерекше есте қалары анық. Алдағы уақытта да қала әкімдігі халықтың өмір сүру сапасын арттыруда осындай әлеуметтік маңызы зор жобаларды жалғастыруға ниетті.
Айта кетейік, тұжырымдаманың негізгі бағытының бірі — тұрғындарды тозығы жеткен үйлерден бөлме саны бірдей, әрленген жаңа қонысқа көшіру болатын. Осы уақытқа дейін ауданның 22 отбасына пәтер кілті табысталған еді.
Салтанат ЖАМАЛДИНОВА
