Шымкент қаласы әкімінің орынбасары, қала әкімдігінің ресми өкілі Сәрсен Құранбек кезекті рет баспасөз брифингін өткізді. Сәрсен Абайұлы шаһарда энергетика және инфрақұрылымды дамытудағы атқарылып жатқан жұмыстар туралы баяндап, БАҚ өкілдерінің сауалдарына жауап берді.
Қала әкімінің орынбасары шаһарда ауыз су, кәріз жүйелері, электр жарығы, табиғи газбен қамту, жарықтандыру бағытында жүзеге асып жатқан жұмыстарға егжей-тегжейлі тоқталып өтті. Сонымен қатар, жүйелердің тозу деңгейі, оларды төмендету мәселелеріне де тоқталды.
Шаһарда 80 елді мекенге ауыз су жүйелері толық тартылған. 2024 жылы 27 мыңға жуық адам ауыз су жүйесіне қосылуға мүмкіндік алды. Құрсай шағынауданында өткен жылы құрылыс жұмыстары атқарылып, қазіргі таңда жұмыстар 95 пайызға аяқталған. 2025 жылы ауыз сумен қамту көрсеткішін 100 пайызға жеткізу жоспарда тұр.
– Ауыз су жүйесімен қамтуда бірқатар мәселе бар. Мәселен, қаладан шалғай орналасқан Айкөл тұрғын алабында су ұңғымасы қазылып, су құбырлары тартылған болатын. Бірақ ол жердегі су жүйесі бүгінде толығымен тартылып кеткен. Су ұңғымасынан ешқандай су шықпайды. Сондықтан, қала әкімдігіне қарасты «Су құбыры және канализация басқармасы» МКК аптасына үш рет автокөлікпен су тасымалдап, тұрғындарды ауыз сумен қамтып отыр. Түптің түбінде орталық магистралды жүйеден, «Құрсай» шағынауданынан осы Айкөлге су құбырын тартатын боламыз. Ол шамамен 17 шақырымды құрайды. Осы жұмыстарды жүзеге асыру арқылы аталған мәселені шешеміз.
Текесу тұрғын алабында да су ұңғымасы қазылған болатын. Бірақ өткен жылы осы құбырдан шығып жатқан судың кермектігі жоғарылап, техникалық су деңгейіне дейін төмендеген. Сол себепті бүгінгі таңда су ұңғымасынан шығып жатқан су техникалық мақсатта пайдаланылып жатыр. Ал тұрғындар ауыз суды Абай-Текесу аумағындағы су көзінен алып отыр. Бұл аумақты ауыз сумен қамтуда Жұлдыз шағынауданынан 13,8 шақырымнан су құбырын тарту жұмыстары жүргізіледі, – деді қала әкімінің орынбасары.
Шаһарда ауыз су жүйесіндегі тағы бір мәселе – жазғы уақытта жаппай суды пайдалану кезінде су тапшылығы туындауы. Бұл негізінен, қаланың орталық бөліктеріне тиесілі. Су сақтағыштардың тозығы жетуінен осындай мәселе туындап отыр. Сәрсен Абайұлы қалада тозығы жеткен су құбырлары және кәріз жүйесін жаңалау жұмыстары кезең-кезеңімен атқарылатынын айтады.
Баспасөз мәжілісінде БАҚ өкілдері мектептерге баратын аяқжолдар, жарықтандыру, көшелерге атау беру, табиғи газбен қамту, көгалдандыру мәселелері бойынша сұрақтар қойды. Қала әкімдігінің ресми өкілі барлық сауалға толыққанды жауап берді.
Тағабай ҚАСЫМОВ
