Шымкентте зейнеттегі ардагерлер үшін оңалту орталықтарымен бірге белсенді ұзақ өмір сүру орталықтары да тұрақты жұмыс істеп келеді. Онда еңбек ардагерлері, зейнеткер қарттар мен апалар бас қосып тұрады. Белсенді өмір орталықтарында дене шынықтырумен қатар, бір сәт қолөнермен шұғылдануға, ән-күйге әуестенуге де жағдай жасалған.
Орталықта қариялар бильярд, үстел теннисі, шахмат, тоғызқұмалақ сынды спорт түрлерінен бақ сынап жатса, аналар жағы ән-күймен, бимен айналысады. Жоғары білімді дәрігерлер, медбикелер зейнеткерлердің қан қысымын өлшеп, денсаулығын қадағалап, қажетті дәрі-дәрмекпен қамтамасыз етіп отырады. Белсенді ұзақ өмір сүру орталықтарын басқарып отырған Мәрия Алданазарова мен ұжым мүшелері зейнеткерлерге қызмет көрсетуде белсенділік танытып келеді.
Қариялар әр жұмада дендросаябақта таза ауа жұтып, түрлі жаттығу жасауды тұрақты дәстүрге айналдырған. Іс-шара жоспарларына сәйкес түрлі тақырыпта мәдени-көпшілік шараларды да ұйымдастырады. Жақында халық әртісі Ескендір Хасанғалиевтің 85 жылдығына арналған ән кешін төрт бірдей орталықта кезектесіп өткізді. Ән кештерінде өнер таланттары әсем әнмен зейнеткерлерге ерекше көңіл-күй сыйлады. Танымал әнші-сазгердің 200-ге жуық әнінің ішіндегі кең тараған «Анаға сәлем», «Әдемі-ау» әндерін Сәуле Бейсейтова нақышына келтіре шырқады. Ал «Студенттердің қоштасу әні», «Ауылым-әнім» әндерін Қыдыр-Әлі Дүйсенбеков баян, гитарамен сүйемелдеп, орындап шықты. «Гүлсезім», «Елігім-еркем» әндерін Сәлімжан Кемелов ағамыз баяу дыбыспен бабына келтіріп орындаса, «Атамекен» әнін жиналғандар орындарынан тұрып, хормен шырқады.
Жалпы миллионнан астам тұрғыны бар мегополиске 4 белсенді ұзақ өмір орталығы аздық етеді. Себебі орталықтар екі ауысымда ардагерлерге қызмет көрсетсе де, қамтылмаған елді мекендер аз емес. Бұл – уақыттың талабы.
Пердеш ЕСЕНБЕКОВ,
журналист-ардагер
