Шымкент қаласындағы заңсыз салынған жатақхана мәселесіне байланысты құзырлы органның өкілдері тұрғындардың айтарына құлақ түрді. Ақиқатты алға тартқан тұрғындар заңсыз салынған жатақхананың сүрілгенін қалайды. Өйткені, қолданыстағы заң ережелерін ескерместен, бой көтерген алты қабатты ғимарат бүгінде сол маңайдағы көпқабатты тұрғын үйдің ауласына күн сәулесін түсірмей тұр. Бұл ғана емес, тар жерді тамаша қылған жатақхананың өзі де талапқа сай болмай шыққан.
«Біздің үйдің қасына заңсыз салынған ғимаратқа байланысты бірнеше жылдан бері күресіп келеміз. Президент заң мен тәртіпті сақтау керектігін үнемі атап өтеді. Алайда біздің жағдайымызда бұл талап өрескел бұзылып отыр», – дейді Гүлдана Нұрединова.
Мәселе мынада, салынған ғимарат пен сол маңайдағы үшінші үйдің арасындағы ара қашықтық небәрі тоғыз метр. Ал қолданыстағы ережеде бұл 25 метр болуға тиіс. Сондай-ақ балалар алаңы мен ғимарат арасындағы қашықтық кемінде 10 метр болуы керек. Бірақ қазір бұл аралық та бар-жоғы 2 метр ғана екен.
Мәселені көзбен көру үшін келген сәулет және қала құрылысы басқармасы басшысы Арман Әбдешов басқарма тарапынан түсініктеме берді. Оның айтуынша, зерттеу барысында бұл құрылыс нысанында кейбір заң бұзушылықтар болғаны рас. 2023 жылы эскиз жобасы кейбір талаптарға сәйкес келмесе де, бекітіліп кеткен. Сол кездегі жауапты мамандар бұған қатысты тиісті жазасын алыпты. «Сот шешімі кәсіпкердің пайдасына шыққанымен, тұрғындардың шағымдары ескеріліп, Құрылыс істері жөніндегі комитет тексеру жүргізді. Тексеру нәтижесінде өрт қауіпсіздігі талаптары, ғимарат арасындағы қашықтық нормалары және инсоляция стандарттарының бұзылғаны анықталып, эскиздің күші жойылды. Қазір бұл шешім кассациялық сотта қаралып жатыр. Егер сот қайта қарау кезінде белгілі бір бөлігін ғана заңсыз деп тапса, тек сол метрлік аумақ реттелуі мүмкін. Бірақ ғимараттың толығымен бұзылуы екіталай.
Бұл жерде құрылысқа рұқсат беру кезінде кеткен қателіктер немқұрайдылық па, білімсіздік пе, әлде сыбайластық па – оны нақты айту қиын. Дегенмен қазіргі басқарма заңдылықты сақтау үшін қажетті шараларды қабылдап жатыр», деді ол.
Сондай-ақ Шымкент қалалық орта сапасы және бақылау басқармасы басшысы Мерлан Керимжанов қыркүйекте Құрылыс комитеті басқармаға ғимараттың қабылдау актісін жою жөнінде ұсыныс жолдағанын жеткізді. Себебі тамызда қабылданған нысан тұрғындардың арыз-шағымына сәйкес тексеріліп, заң бұзушылықтарды анықтаған.
«2023 жылы «ғимараттың биіктігі үш қабаттан аспауға тиіс» деген нұсқама берілген. Бұл талап сақталғанымен, құрылыс толық аяқталмай жатып, пайдалануға берілген. Техникалық және авторлық қадағалаушылар бұл процесті дұрыс бақылай алмады, сондықтан айыппұл салынды. Қазір қалалық орта сапасы және бақылау басқармасы соттың бірінші инстанциясында жеңіске жетті. Сот ғимаратты пайдалануға қабылдау актісінің күшін жою туралы талабымызды қанағаттандырды. Егер бұл шешім заңды күшіне енсе, ғимарат заңсыз деп танылып, ішіндегі тұрғындар міндетті түрде шығарылады. Бүгінде апелляция және кассация процестерін күтіп отырмыз», деді ол.
Демек, тұрғындардың талап-арызы обьективті қаралса, таяу уақытта заңсыз салынған ғимарат мәселесі шешімін табатын сыңайлы.
Ж.ТҰРСЫНӘЛІҚЫЗЫ
