Қысқы жылыту маусымы кезеңінде газдан уланудың алдын алудың маңызы зор. Осы орайда тұрғындарға ақпараттық-түсіндірме жұмыстары жүргізілуі тиіс. Шымкент қаласы Төтенше жағдайлар департаменті газдан уланудың және тұрғын үйлердегі өрттердің алдын алу мақсатында түсіндірме жұмыстарын жүргізу іс-шарасын өткізді.
Шымкент қаласы төтенше жағдайлар департаменті басшысының орынбасары Еркін Отарғалымұлы өрт жағдайларының 57 пайызы электр желілерінің ақаулығынан болатынын атап өтті. Ал, елді мекендерде жылыту пештерінің мұржалары 3 айда бір рет тазалануы қажет.
Бүгін жоспарға сәйкес, төтенше жағдайлар департаменті, полиция департаменті және «Газ техникалық қызметі» мекемесі қызметкерлері бірлесе Қайнарбұлақ тұрғын алабында азаматтарға ақпараттық-түсіндірме жұмыстарын жүргізіп, жаднамалар таратты. Мамандар тұрғындарға газосигнализатор, желдеткіш құрылғысын орнатып, ал пеш жаққан кезде мұржаны үш айда бір рет тазалап тұру қажет екенін ескертті.
Тағабай ҚАСЫМОВ
