Шымкент қаласының әкімі Ғабит Сыздықбеков қаланы кезекті аралау барысында Абай ауданында жүргізіліп жатқан кәріз жүйесінің құрылысымен танысты. Құрылыс жұмыстарын осы айдың соңына дейін аяқтау жоспарланып отыр. Жоба іске асқан жағдайда жақын маңдағы тұрғын алаптар толық кәріз жүйесіне қосылып, халықтың санитарлық және тұрмыстық жағдайы жақсарады. Сонымен қатар, Ғ.Сыздықбеков Тельман шағын ауданында 1200 орындық мектептің құрылысын тексерді. Шаһар басшысы құрылыс басқармасы мен мердігер ұйымға жаңа оқу жылы басталғанға дейін барлық жұмысты толық аяқтауды тапсырды.
Мұнан кейін қала әкімі Әл-Фараби ауданында 35748 әскери бөлімінің әскери қалашығында салынған балалар және спорт алаңдарын аралап көрді.
– Мұндай бастамалар әскери қызметшілер мен олардың отбасылары үшін қолайлы өмір сүру ортасын қалыптастыруға, балалардың бос уақытын тиімді ұйымдастыруға және әлеуметтік қолдауды күшейтуге мүмкіндік береді, – деді Ғабит Әбдімәжитұлы.
Сондай-ақ, Ғ.Сыздықбеков Еңбекші ауданында Момынов көшесіндегі теміржол өткелінің үстінен салынып жатқан жолайрықтың құрылысын тексерді. Қала басшысы мердігер мекемемен бірге құрылыс барысын, мерзімін, сапа мәселесін және жол бойындағы ирригациялық арықтардың орнатылуын талқылады. Бұдан бөлек шаһар басшысы «Көктем 88» сауда үйінде кәсіпкерлердің қоныстану барысы және нысанды абаттандыру жағдайымен танысты. Бұрынғы «Көктем» базары аумағында сауда жасаған кәсіпкерлер жаңа сауда алаңдарына біртіндеп орналаса бастады. Осыған орай, қала әкімі кәсіпкерлермен және әкімшілікпен бірге сауда үйіндегі жағдай мен айналаны абаттандыруға қатысты мәселелерді талқылады.
Сонымен қатар, қала әкімі Қазиев көшесін Арғынбековтен Төлеметовке дейін ұзарту мақсатында жүріп жатқан жол құрылысы барысын тексерді. Қалалық жолаушылар көлігі және автомобиль жолдары басқармасына жұмысты жеделдетіп, сапалы әрі белгіленген мерзімде аяқтауды тапсырды.
Жалпы, қала әкімі Ғ.Сыздықбеков қаланың әлеуметтік-экономикалық дамуына қатысты өзекті мәселелерді дер кезінде анықтап, атқарылып жатқан жұмыстың барысын бақылауда ұстау үшін шаһарды тұрақты түрде аралап отырады. Өткен аптадағы кезекті бір аралау барысында шаһар басшысы қаладағы медициналық жедел жәрдем станциясына барды.
Бұл мекеменің көлік паркі он жаңа арнайы санитарлық автокөлікпен толыққан болатын. Олар жедел медициналық көмек көрсетуге қажетті заманауи құрал-жабдықтармен, өкпені жасанды желдету аппараттарымен, дефибриллятор-мониторлармен, электрлік сорғыш құрылғылармен және реанимациялық жинақтармен жабдықталған. Жыл соңына дейін тағы осындай 15 автокөлік жеткізіледі деп жоспарланып отыр.
Сонымен қатар, Ғ.Сыздықбеков Алпамыс батыр, Аққыстау көшелерінде және Бозарық айналма жолында жүргізіліп жатқан орташа және күрделі жөндеу барысын тексерді. Мердігер мекемелерге жұмысты сапалы орындап, белгіленген мерзімде аяқтау қажет екендігін ескертті.
Қала әкімі әрі қарай Абай ауданындағы индустриялық аймақта орналасқан сауда-логистикалық орталыққа инженерлік инфрақұрылым тарту жұмысын пысықтады. Жобаның іске асырылуы кәсіпорындардың тұрақты жұмыс істеуіне мүмкіндік беріп, орталықтың одан әрі кеңеюіне жол ашады. Шаһар басшысы мердігер ұйымға құрылыс қарқынын арттыруды тапсырды.
Сондай-ақ, әкім Тұран ауданында «Автонұр» базарын аралап, өзекті мәселелерді қарады. Нысанды жаңғырту аясында кәсіпкерлерді көшіру үшін жалпы ауданы 8 000 шаршы метр жаңа сауда үйінің құрылысы жүргізіліп жатыр. Бұдан бөлек, 500 көлікке арналған автотұрақ пен кіреберіс жолды кеңейту аясында абаттандыру іс-шаралары кешені көзделген. Қала әкімі тиісті басқармалар мен аудан әкімдігіне барлық абаттандыру жұмыстарын үйлесімді ұйымдастыру міндетін жүктеді.
