Шымкент қаласы Тұран ауданына қарасты Қазығұрт шағын ауданында құрылыс және тұрмыстық қалдықтарды бейберекет төгу деректерін болдырмау мақсатында рейдтік шара өтті. Тазалық пен тәртіпке бағытталған бұл жұмысқа полиция қызметкерлері мен қоғамдық белсенділер жұмылдырылды.
Тұрғындар тарапынан ең жиі кездесетін заңбұзушылық — тұрмыстық және құрылыс қалдықтарының жол жиегіне немесе шарбақ сыртындағы бос аумақтарға тасталуы. Бұл мәселені шешу үшін учаскелік полиция инспекторлары күнделікті бақылау жасап, заң бұзушыларға ескерту береді. Шара нәтижесіз болған жағдайда, ҚР ӘҚБтК 505-бабының 1-бөлігіне сәйкес әкімшілік хаттамалар толтырылып, 78 640 теңге көлемінде айыппұл салынады.
– Жыл басынан бері осы бап бойынша 300-ден астам құқықбұзушылық тіркелді. Біз әрбір анықталған жағдайды Тұран аудандық полиция басқармасына ресми түрде хаттамалар тапсырып отырамыз. Қоғамдық белсенділермен бірге кез келген уақытта, тіпті түнгі мезгілде де түсіндіру жұмыстарын жүргіземіз, – дейді №62 учаскелік тірек пунктінің полиция капитаны Мұзафар Абдрахманов.
Тұрғындардың айтуынша, кейде заңсыз қоқыс тастауға тұрғындардың өзі емес, қаладағы инфрақұрылымның толық жолға қойылмауы себеп болады. Мәселен, қалдықты заңды түрде тапсыру үшін арнайы полигонмен келісімшарт қажет. Бұл мәселе белсенді азаматтардың да назарынан тыс қалмаған.
– Біз еріктілермен бірге тауға шығып, қалдықтарды жинадық. Бірақ қалаға оралғанда сол қоқысты тастайтын жер таба алмадық. Қаланың сыртындағы қоқыс полигоны келісімшарт талап етті. Ондай келісім болмағандықтан амалсыздан Ташкент тас жолының бойындағы контейнерге қалдыруға мәжбүр болдық. Бұл – заң бұзушылық, бірақ белсенділік танытқан адам үшін де қолайлы тастау орындары қарастырылуы керек, – дейді Қазығұрт мөлтек ауданының белсенді тұрғыны Сүлеймен Қамбаров.
Айтуынша, бүгінде Қазығұрт мөлтек ауданында қоқыс шығару жұмыстары екі мекеме арқылы жүзеге асырылады: коммуналдық мемлекеттік мекеме ішкі орамдарды тазаласа, «Бастау 03» ЖШС аптасына бір рет ірі көлемді қоқысты жинап әкетеді. Дегенмен кей жағдайларда олардың жұмысы уақытында орындалмай, тұрғындардың шағымына себеп болады.
– Бұрын бұл компания өте нашар жұмыс істеді. Арнайы техникасы болмаған, КамАЗ, ГАЗ сияқты көліктермен ғана қызмет көрсететін. Әкімшілікке шағымданған соң, компанияға сөгіс жарияланып, мәселе реттелді. Қазір арнайы техникалармен жұмыс істеп, қоқысты уақытылы алып кетуде, – дейді Сүлеймен Қамбаров.
Мұндай рейдтік шаралар алдағы уақытта да жалғасын табады. Мамандардың айтуынша, тұрғындардың өз учаскелерін таза ұстауы – тек айыппұлдан қорқу емес, ортақ жауапкершілік пен мәдениеттің көрінісі болуы тиіс.
Г.ТЕМІРХАНҚЫЗЫ
