Шымкент қаласының әкімі Ғабит Сыздықбековтің төрағалығымен кезекті аппарат мәжілісі өтті. Онда қаланың әлеуметтік-экономикалық және инфрақұрылымды дамыту мәселелері талқыланды.
Күн тәртібінде қалалық жолаушылар көлігі және автомобиль жолдары, жайлы ортаны дамыту, энергетика және инфрақұрылымды дамыту басқармаларының атқарған жұмыстары бойынша есебі тыңдалды.
Бүгінде қала аудандарында жол құрылысы қарқынды жүргізіліп отыр. Ішкі орам көшелерін асфальттау, қалпына келтіру жұмыстары жүйелі түрде жалғасып келеді. Сонымен қатар, «Халық қатысатын бюджет» жобасы аясында жаңадан ойын және спорт алаңшалары, гүлзарлар салынып, халық игілігіне беріліп жатыр. Сонымен қатар, қалада жаңадан бой көтеріп жатқан тұрғын үйлерді электр энергиясымен қамтамасыз ету мақсатында үш мекен-жайда инженерлік инфрақұрылым құрылысы жүргізіліп отыр.
Көше қиылыстары мен жол жиектеріне мерзіміне сәйкес, раушан, қызғалдақ және біржылдық гүлдер отырғызылып, көріктендіру жұмыстары жүргізілген. «Отбасы» аллеясы, «Этно», «Жеңіс» саябақтарында балалар ойын алаңдары орнатылып, пайдалануға берілді. Сонымен қатар, С.Бәйтереков атындағы гүлзарда, «Алатау» және «Абай» саябақтарында да балаларға арналған алаңдар іске қосылды.
Су нысандарының жағдайын жақсарту бағытында да бірқатар жұмыстар атқарылып отыр. Атап айтқанда, «Қошқар-ата» өзенінің жағалауын абаттандыру, «Кәусар» каналының бірінші және екінші кезеңі, «Ақсай-Қарабастау» каналы мен «Ақжар» су қоймасына күрделі жөндеу жұмыстары жүргізіліп жатыр. Сонымен қатар, каналдарды механикалық тазалау жұмыстары тұрақты түрде іске асырылуда.
Мәжіліс қорытындысы бойынша қала әкімі жауапты сала басшыларына жұмыстың сапалы әрі уақытылы орындалуын қамтамасыз етуді тапсырды.
Шымкент қаласының Өңірлік коммуникациялар қызметі
