2024 жылы 75 келіде жастар арасында әлем чемпионы атанған Санжарәлі Бегалиев биыл 80 келіге ауысқан болатын. Ол бұған дейін Сербиядағы халықаралық турнирде топ жарып, Әзірбайжанда өткен «Жібек жолы» жарысында финалға дейін жеткен еді.
World Boxing ұйымының U19 және U22 жас санаттары бойынша алғашқы Азия чемпионаты аяқталды. Аталған сында жерлесіміз Санжарәлі Бегалиев қарсылас шақ келтірмей, U22 Азия чемпионы атанды. Дарынды жас боксшы Джан Сён Ву (Оңтүстік Корея), Анкуш (Үндістан) және Рахматулло Бойматовтен (Өзбекстан) айласын асырды. Тартысты өткен финалдық жекпе-жекте Бегалиев 3:2 есебімен жеңіске жетті.
Айта кетсек, жауапты бәсеке 30 шілде – 12 тамыз аралығында Таиланд астанасы Бангкокте өтті. Жарысқа 25 елден 396 боксшы (237 ер және 159 әйел) қатысты. Атап айтқанда, Қазақстан, Ауғанстан, Филиппин, Гонконг, Үндістан, Индонезия, Иран, Ирак, Жапония, Оңтүстік Корея, Сауд Арабиясы, Қырғызстан, Малайзия, Моңғолия, Непал, Қатар, Қытай, Сингапур, Шри-Ланка, Таиланд, Түркіменстан, Өзбекстан, БАӘ, Вьетнам және Бутан құрамалары бақ сынады.ф
