Ұрпақтар сабақтастығы деген осы болар. Кезінде талай халықаралық бәсекелерде жүлдегер атанған белгілі балуан Асхат Жаңбыров бүгінде шәкірт үшін шырылдап жүр. Халықаралық дәрежедегі спорт шебері, Азия чемпионатының күміс жүлдегері, Болат Тұрлыханов кубогының қола жүлдегері, ҚР чемпионатының екі дүркін жеңімпазы Асхат Жаңбыров білікті бапкер екенін дәлелдеп келеді.
А.Жаңбыров грек-рим күресінен ҚР жасөспірімдер құрамасының бапкері және Шымкент қаласы жасөспірімдер құрамасының аға бапкері қызметінде жүріп, тәжірибе жинады. Былтыр ғана шәкірті Ердәулет Ләсім ересектер арасында Мардан Сапарбаев мемориалында жеңімпаз атанған еді. Е.Ләсім жасөспірімдер арасында әлем чемпионатында бесінші орын алды. Он жылдан аса халықаралық бәсекелерде белдескен балуан көп ұзамай бапкерлік мансабында да алғашқы жеңістеріне қол жеткізіп үлгерді.
Қазіргі таңда белгілі балуан ҚР жасөспірімдер құрамасының аға бапкері қызметін атқаруда. Үл үміт артқан шәкірттері Бішкек кілемінде 5 алтын, 4 күміс жүлде олжалап, жалпыкомандалық есепте бірінші орын алды. 38 келіде Нұрислам Пахитжан, 41 келіде Әли Алмас, 48 келіде Дияр Аманалы, 52 келіде Самға Ермек, 57 келіде Марлен Төлеш жеңімпаз атанды. 44 келіде Сұлтанбек Серікбай, 68 келіде Әділжан Мұратов, 75 келіде Темірлан Серік, 85 келіде Ислам Мәлік күміс жүлде алды. Оның ішінде шымкенттік палуандар да керемет жетістікке қол жеткізді. Дияр Аманалы Қырғызстан, Тәжікстан, Үндістан балуандарын жеңіп, чемпиондық атаққа қол жеткізсе, Марлен Төлеш Жапония, Қырғызстан, Тәжікстан балуандарынан айласын асырды.
Енді шәкірт үшін шырылдайсың. Біз Асхатқа алда бұдан да жоғары жетістіктерге жетуіне тілектестік білдіреміз.
Бішкек бозкілемінде 20 жасқа дейінгі жастар арасында Азия чемпионаты жалғасын табады. Бұл сында да шымкенттік балуандарға үміт артамыз. Атап айтқанда, Ерасыл Мұсан (55 кило), Есбол Шәмілов (63 кило), Омар Дүйсембек (77 кило) және Бейбіт Қорғанов (97 кило) сынды талантты жастар жүлдеге таласпақ. Біз жас палуандарға сәттілік тілейміз.
Т.ДҮЙСЕНБЕКҰЛЫ
