Жеңісті жақындатуға үлес қосқан тыл ардагері Анар Жапабаева бүгінде 91 жаста. Әлі де ширақ. Өзі жүріп-тұрады. «Жеңістің 80 жылдығы» және ҚР Конституциясының 30 жылдығына орай 14 құрсақ көтерген батыр анаға құрмет көрсетілді.
Абай аудандық ардагерлер кеңесінің мүшесі, әділ билер кеңесінің төрайымы Орынша Тәжібаева тыл ардагерін мерекемен құттықтап, азық-түлік себетін табыс етті.
Бүгінде Абай ауданында Ата Заңның 30 жылдық мерекесіне орай тағылымды іс-шаралар өтіп жатыр. Бүгінгі тыл ардагерінің шаңырағындағы жүздесудің де мәні өте зор. 100-ден астам немере, 7 шөпшек сүйіп отырған А.Жапабаева өмірлік хикаяларын әңгімелеп берді. Қазір де таңғы салқында жүретінін, көп қимылдайтынын айтады. Іс-шара соңында батыр ана көпшілікке батасын берді.
Тағабай ҚАСЫМОВ
