Жақында Шымкент қаласының дәрігерлері омыртқаға бірегей ота жасады. Биіктен құлаған 40 жастағы науқас мойын омыртқасы сынып, жұлын зақымданған күйде ауруханаға түскен. Дер кезінде көмек көрсетілмегенде аса қауіпті жарақаттан науқастың сал болып қалу қаупі бар еді. Нейрохирургиялық операцияның ерекшелігі сынған омыртқаға мойынның алдыңғы жағынан арнайы фиксация жасалуында. Тәжірибелі нейрохирург Айбол Сансызбаев жүргізген ота сәтті өтті. Сынған омыртқа бекітіліп, жұлын қалпына келген. Ешқандай асқынусыз науқас үйіне шығарылды.
Одан бөлек қаламыздың дәрігерлері алғаш рет лапароскопиялық әдіспен ұйқы безіне де ота жасады. Осыған дейін тек Сызғанов атындағы университетте жасалған ота түрін енді шымкенттік мамандар да меңгерді. №1 қалалық клиникалық ауруханаға ұйқы безі құйрығының ісігі диагнозымен түскен науқас басқа қалалардағы клиникаларда бірнеше рет тексеруден өткен. Алайда ол ота жасату үшін осы мекемеге таңдау жасаған. Дәрігерлер толық диагностикалық тексерулер жүргізіп, науқасты отаға дайындады.
Екі сағаттық операция кезінде көлемі 10–11 см ісік алынып тасталды. Лапароскопиялық әдістің ерекшелігі – науқас тез оңалады, тіліксіз орындалады және косметикалық тұрғыдан да тиімді.
Ұйқы безі қатерлі ісігі – ең агрессивті әрі емдеуі қиын ісіктердің бірі. Оның алғашқы белгілері ісік айтарлықтай үлкейгенде немесе басқа ағзаларға таралған кезде ғана байқалады. Негізгі симптомдары: іштің жоғарғы бөлігіндегі немесе арқадағы ауырсыну, тәбетсіздік, жүрек айну, салмақтың күрт төмендеуі, сондай-ақ кейбір жағдайларда қант диабетінің кенеттен пайда болуы. Сондықтан уақытылы тексеруден өту аса маңызды.
