Шымкенттегі демалыс орындары мен саябақтарда дәстүрлі «Шымқала кештері» – ашық аспан астындағы мәдени кеші ұйымдастырылды. Қала тұрғындары мен қонақтары бұл жолы да шығармашылықпен көмкерілген ерекше кештің куәсі болды.
Сенбіде Shym city саябағында ұйымдастырылған кеште «Шымкент цирк» оркестрі өнер көрсетті. Жанды музыка, көңілді ритм мен балаларға арналған әсерлі композициялар көрермендердің ыстық ықыласына бөленді. Ашық алаңдағы оркестр әуені қала тұрғындары үшін нағыз музыкалық мерекеге айналды.
Ал, «Спутник» скверінде көрермендерге Шымкент қалалық орыс драма театрының актерлері ерекше кеш тарту етті. Көңілді қойылымдар мен сахналық көріністер көрермендердің көңілінен шығып, кештің шырайын келтірді.
Кешке арнайы келген қала тұрғыны Гүлсезім Темірханқызы әсерін жасырмады.
– Кешке інілеріммен бірге келдік. Әуен де, атмосфера да өте жылы. Балалар мәз. Осындай кештердің апта сайын өтетіні қуантады. Бастысы, әр кеште әр түрлі өнер жұлдыздары концерттік бағдарлама ұсынады, – дейді ол.
Бүгінде осы рухани өмірдің бір бөлшегіне айналған «Шымқала кештері» мәдени жобасы қала тұрғындарына мереке сыйлап отыр. Ашық аспан астында өтетін бұл өнер кештері – театр мен музыка, шығармашылық пен күлкінің бір арнада тоғысқан көркем кештері. Осы аптада аталмыш шара бірнеше саябақта және демалыс орындарында өткізіліп, жексенбі күні де жалғасты.
«Шымқала кештері» – күнделікті қарбалас тірліктен сәл де болса сергіп, отбасымен уақыт өткізуге таптырмас мүмкіндік. Қала тұрғындарының осындай кештерді асыға күтетінін ескерсек, мұндай бастамалар алдағы уақытта да жалғасын табатынына сенім бар.
Г.МОЛДИЯР
