Шымкент қаласының орталықтандырылған балалар кітапханалары жүйесіне қарасты №2 комьюнити орталығында №75 мектеп-гимназияның 5-сынып оқушыларымен әдеби кеш өтті. Акция аясында өткен кеште сынып жетекші Ж.Қиясованың қатысуымен жазушының «Оң қол» шығармасына талдау жасалды. Қаламгер өмірі мен шығармашылығынан буктрейлер ұсынылып, оқушылар «Оң қол» көркем фильмінен үзінді тамашалады. Балалар шығарма желісі бойынша көрініс сахналап, оқиғаға сай салған суреттерін кітапханаға табыстады.
Акция Шымкент қаласының орталықтандырылған балалар кітапханалар жүйесі №5 кітапхана бөлімшесінде жалғасып, Т.Әбдіктің шығармаларына арналған «Көркем жазушы – Төлен Әбдік» атты әдеби сағат өтті. Жиынға №55 жалпы орта мектептің 7-сынып оқушылары қатысты. Кітапханашы Ұлдар Бакирова қаламгердің өмір жолымен таныстырды. Жазушы туындыларының көркемдік ерекшелігін, оның қазақ әдебиетіндегі философиялық прозаны дамытқан талантты қаламгер екенін баяндады. Т.Әбдік шығармалары адамгершілікке, ізгілікке, мейірімге, еңбексүйгіштік сынды қасиеттерді дәріптейтінін түсіндіріп өтті.
Төлен Әбдікұлы тұлғаның екіге бөлінуі сынды психологиялық мәселені де қозғаған. «Оң қол», «Парасат майданы», «Тозақ оттары жымыңдайды», «Ақиқат», «Қайырсыз жұма» атты шығармаларында тұлғаның екі ойда болуы, екі тұлғада өмір сүруі көрініс тапқан. Оқушылар жазушы шығармаларының қысқаша мазмұнына тоқталып, өлеңдерін мәнерлеп оқыды. Ойларын ортаға салып, пікір алмасты. Соңынан «Парасатты прозаның падишасы» атты кітап көрмесіне шолу жасалды.
А.ДҮЙСЕНБЕКОВА,
Шымкент қаласының орталықтандырылған балалар кітапханалар жүйесіндегі №2 комьюнити орталығының меңгерушісі,
К.МЫРЗАБАЙ,
№5 кітапхана бөлімшесінің меңгерушісі
