Шымкенттік Нұрсұлтан Зиябеков Қазақстанның Тұңғыш Президенті-Елбасы Нұрсұлтан Назарбаевпен екі рет кездесіп, бата алған санаулы жастың бірі.
Бала кезден өзіне Нұрсұлтан есімі тектен текке қойылмағанын анасынан көп естіп өскен ол Елбасымен кездесуді мектеп қабырғасында жүргенде-ақ армандайтын. Қазақстанның тұңғыш Президентімен жүздесу үшін жақсы оқу керектігін, қай салада болмасын жоғары жетістікке қол жеткізуі қажеттігін мектепте жүріп жақсы түсінген бала Нұрсұлтан бар күшін сапалы білім алуға жұмсайды.
– Газет-журналдардан, теледидардағы жаңалықтардан Нұрсұлтан Назарбаевтың талантты жастармен кездескені туралы ақпараттарды оқып, көрген сайын, мен де сондай боламын, ерте ме кеш пе Елбасымен кездесуге қатысамын деп алдыма мақсат қоятынмын, – дейді Нұрсұлтан Зиябеков.
Асқақ арманы алдамады. Шымкенттегi Қ.Сыпатаев атындағы №7 гимназия мектебiнде жақсы оқыған бала Нұрсұлтан бесінші сыныпты бітіретін жылы халықаралық қазақ-түрiк ерлер лицейiне түсуге бақ сынап көрді. Қатаң іріктеу, арнайы тест тапсыру сынақтарынан сүрінбей өткен ол лицейде білім алумен қатар өзінің қарым-қабілетін жан-жақты сынап көруге мүмкіндік алды. Лицейдегі қоғамдық жұмыстарға белсене қатыса жүріп, болашақта кім болатындығын нақтылай түсті. Талаптың тұлпарына мінген жас 2010 жылы лицейді бітіретін шақта «Болашақ» бағдарламасы бойынша АҚШ-тағы жоғары оқу орындары мен елордадағы Назарбаев университетiне оқуға түсуге бағын сынап көрді. Мақсатына жетіп, екі оқу орнынан да оқуға қабылданғаны туралы хабарлама алғандағы әсері әлі есінде. Әсіресе, әкесі ерте қайтыс болып, бауыры Мейіржан екеуін анасы жалғыз өзі өсіріп, ержеткізгендіктен әзиз жанның үмітін ақтағанына қуанғаны есінен кетпейді.
Дегенмен, беделді деген екі оқу орнының бірін таңдауы керек. Бала Нұрсұлтан ел астанасындағы Назарбаев университетiн таңдады.
–Нұрсұлтанның есімін атасы қойған. Қазақ ырымшыл халықпыз ғой. Әр ырымның астарында жақсы ниет жатады. Қайынатамның бұл ниетіне жақсылықтан үміттену, баланың болашағынан зор сенім арту деп қабылдадым. Оның үстіне еліміз Тәуелсіздік алған алғашқы жылдарда Нұрсұлтан есімді ұл көбейіп жатты.
Жолдасым жол апатынан қаза тапқанда қос ұлым оң, солын танып та үлгермеген бала еді. Нұрсұлтаным кiшкентайынан алғыр, зерек болып өсті. Өзі қатарлы балалармен салыстырғанда ойы озық, бауырына өте мейірімді. Өз айтқанынан қайтпайтын қайратты бала, – дейдi анасы Әлима Қасымқызы.
Өз мақсатына жетуден аянбайтын Нұрсұлтан білім іздеп шетелге кетпей, Назарбаев Университетін таңдағанына еш өкінген емес.
– Университетімізде шетелден шақырылған профессорлар бiзге жоғары деңгейде бiлiм бердi. Ағылшын тiлiн үйренуге басымдық берiлдi. Бұл әрине жақсы, дегенмен, шетелдiк оқытушыларға біздің елдің тұрмысы, ұлттық салт-дәстүр, мәдениеті таңсық. Оларға неге осыны үйретпеске, мәдениетімізбен таныстырмасқа деген ой келді. Өзім қатарлас студенттерге де рухани байлығымызды насихаттап, қазақстандық патриотизмді тек қазақ тілі арқылы насихаттау керек деп ойладым. Осы ойдың жетегімен студенттік «Сәруар» ұйымын құрдым. Достарыммен бірігіп студенттiк журнал шығардық, – дейдi
Нұрсұлтан Зиябеков.
Бала Нұрсұлтан өз есімі оған зор жауапкершілік жүктейтінін жақсы біледі. Сондықтан да қателікке ұрынбауға тырысып бағады. Ал мектеп жасынан «Елбасымен кездессем екен, «менің атымды атам сіздің құрметіңізге орай қойған» деп айтсам ғой....» деген бала қиялы жүзеге асатын сәт туғанда тіптен қуанды.
– Тұңғыш Президент –
Елбасы Н.Ә.Назарбаев біздің университетке Астана саммитiнен кейiн келiп, студенттерге дәрiс оқыды. Мұндай мерейлi сәт естен әсті шығар ма?! Нұрсұлтан атамыздың әр сөзі есімде. Елбасы студенттерге бiлiмнің мүмкіндіктері туралы, ғылымды дамыту керектігі туралы терең мағыналы әңгіме айтты. Ел жастарына үлкен мүмкіндіктер жасалып отырғанын жеткізді. Тұңғыш Президентіміздің бұл әңгімесі маған қатты әсер етті. Мен ғана емес, кездесуге жиналған жастарға үлкен сенім артылып отырғанын сезінудің зор рух бергені сөзсіз. Әлi есiмде, студенттердің бірі Нұрсұлтан Назарбаевтан «Егер сіз осы оқу орнына түссеңiз қай мамандықты таңдаған болар едiңiз?» деп сұрады. Елбасы өз жауабында кезiнде инженер-металлург мамандығын меңгергенін, егер қазіргі таңда тағы да сол сәттегідей мамандық таңдау мүмкіндігі туса еш ойланбастан қайтадан инженер-металлург мамандығын таңдайтынын айтты. Бұл маған «адам өз мақсатынан айнымау керек. Дұрыс таңдау жасай білу қажет және оған еш өкінбеген жөн» деген ойды санама мықтап енгізуге түрткі болды. Расында да бүгiнгі тұрмыста техникалық мамандықтарға деген зәрулiк басым. Сол себепті де мамандық таңдаушы жастар осы салаға көбірек көңіл бөлсе деймін, – дейді Нұрсұлтан Зиябеков студенттік шақты еске ала отырып.
Ол Елбасымен Назарбаев Университетінде өткен келесі бір кездесуде де биік мінберден сөз сөйлеп, бүгінгі жастардың арман-мұраттары жайлы өз ойын паш етті.
–Бір байқағаным Елбасы жастармен тең дәрежеден пікір алмасады. Бұл мүмкіндік жастардың өз ойын еркін айтуына негіз болады. Білім, ғылым жайында тереңінен ой қозғағанда Елбасының көп оқитыны, қайсыбір сала туралы болмасын көп мағлұмат білетіні аңғарылып тұрады. Елбасы алдында екі рет сөз сөйледім. Екеуінде де пікірімді ыстық ықыласпен қабыл алып, «Өркенің өссін! Қазақстанның болашағы өзіңдей жастардың арқасында жарқын болмақ. Елді дамытуға үлес қоса беріңдер!» деп батасын берді. Жүзінен нұр төгіліп тұрады, – дейдi жас Нұрсұлтан.
Назарбаев Университетін саясаттану және халықаралық қатынастар мамандығы бойынша табысты аяқтаған Нұрсұлтан Зиябеков бүгінде өз кәсібі бойынша жемісті еңбек етіп жүрген жас мамандардың бірі. Өз арманына жету жолында тынбай еңбек етуден жалықпайтын жалынды жастың әлі талай белесті бағындырары сөзсіз. Себебі, оның мақсаты – айқын, талабы – таудай.
