Шымкент қалалық ішкі саясат және жастар ісі жөніндегі басқарма басшысының орынбасары Бексұлтан Әділхановтың айтуынша, тәуелсіздіктің 30 жылдығы аясында жыл басынан бері әр айға бөлек атау беріліп, кең көлемде аталып келеді.
— Кешенді жоспар 109 тармақтан тұрады. Жыл басынан бері 100-ден аса іс-шара ұйымдастырылды. Оның ішінде ең бастылары деп ресми түрде ашылған Shymqala этноқалашығын, елімізде ең алғаш болып Шымкентте өткізілген «Жастар лигасы» спорт сайысын, Әз-Наурыз мерекесін 10 күн бойы атап өтуін, жаңарған 3 кітапхананың ашылуын, Елорда күні қарсаңында 11 инвестициялық жобаның іске қосылуын айтуға болады, – деді Бексұлтан Ержанұлы.
Мерекелік іс-шаралар екінші жартыжылдықта да жоспарға сай өткізіледі. Атап айтқанда Отбасы күніне орай мерейлі отбасылар слеті ұйымдастырылып, 7 жаңа өндіріс орнын ашу, кітапхана және 4 мектепті ел игілігіне беру, Бозарық қосалқы стансасын іске қосу және 2400-ден аса пәтер кілтін табыстау жоспарлануда.
Шымкент қалалық «Рухани жаңғыру» жобалық кеңсесінің меңгерушісі Зәуре Оралбаева үшінші мегаполисте тәуелсіздіктің 30 жылдығы қарсаңында «Қайырымды істер марафоны» жалпыұлттық жобасы аясында атқарылып жатқан істер туралы бөлісті. Мемлекет басшысының бастамасымен жүзеге асырылған іс-шараларға жергілікті меценаттар қолдау көрсетіп, тарихи ескерткіштер жаңартылып, жаңа спорт алаңшалары ел игілігіне берілген.
Бұл ретте Шымкент қалалық мәслихатының депутаты Рәшкүл Оспанәлиева Нұр Отан партиясы Шымкент қалалық филиалының көмегімен қайырымдылық мақсатында 90 млн теңге көлемінде қаржы жиналып, халық игілігіне жұмсалғанын атап өтті.