– Қала тұрғындарын 30 тамыз – Конституция күнімен құттықтаймын! Мереке күні Бозарық қосалқы станциясын іске қосқалы отырмыз. Шаһар инфрақұрылымы үшін маңызды бұл нысан Мемлекет басшысының тапсырмасы аясында жүзеге асырылды. Қаладағы электр энергиясымен қамтамасыз ету мәселесін алдағы уақытта толық шешеміз. Шымкент ірі өндірістік орталық ретінде дамып келеді. Осы орайда Бозарық станциясы стратегиялық нысан ретінде электр қуаты жетіспеушілігі мәселесін шешуде сеп болады. Қала аумағына кіретін 81 елдімекендегі электр энергиясымен қамту сапасын жақсартады. Осы құрылыстың басы-қасында жүріп, еңбегі сіңген баршаңызға алғыс айтамын. Ел қуаты артып, Шымкент қаласы дами берсін! – деді Мұрат Дүйсенбекұлы.
Қала әкімі бұдан кейін арнайы тетікті басып, қосалқы станцияның жұмысын іске қосты. Бұған дейін бірнеше тәулікке созылған сынақ жұмыстары кезінде станциядағы трансформаторлар мен агрегаттарға жоғары кернеулі электр қуаты берілді.
Айта кетейік, Қазақстан Республикасы Конституциясы күні қарсаңында ел игілігіне берілген бұл электр станциясының құрылысы 2015 жылы басталған. Алдағы уақытта мұнда 5 қосалқы станция қосылып, электр энергиясын алады. Олардың арасында «Нұрсәт», «Астана-1» және «Астана-2» қосалқы станцияларындағы жұмыстар аяқталуға таяу. Ал «1-М-1» станциясындағы құрылыс қарқынды жалғасып, «Ынтымақ» қосылқа станциясының жобалық-сметалық құжаттары әзірленуде. Нәтижесінде қаланың солтүстік бөлігінде орналасқан Асар-2, Тұран, Ынтымақ-2, Солтүстік саяжай, Батыс, Бозарық, Қайнарбұлақ, Шымкент сити, Достық және Нұрсәт – барлығы 10 шағынаудандағы 250 мыңға жуық тұрғынды сапалы электр қуатымен қамтуға мүмкіндік туады.
Р.s. Бұрын Бозарық тұрғындарының жекеменшік әрі тозығы жеткен трансформаторға күні қарап, бір күн жанып, екі күн сөнетін энергия тапшылығын тартып келген. Енді Бозарық қосалқы станциясы аумақтағы басқа да елдімекендерге жарық нұрын шашады.
