ОТБАСЫНЫҢ ӨНЕГЕСІ – ОТАН ӨНЕГЕСІ Избранное

Пятница, 13 Май 2022 04:38 Автор  Опубликовано в Қала Прочитано 415 раз

Шымкент бала туу және отбасын құру көрсеткіші жағынан алдыңғы қатарда. Мәселен, 2020 жылы 6776 жұп некесін қиса, 2021 жылы Шымкентке 7880 шаңырақ қосылған. Бұл туралы халықаралық отбасы күніне орай өткізілген салтанатты іс-шара барысында Шымкент қаласы әкімінің бірінші орынбасары Шыңғыс Мұқан мәлімдеді.

508

 

Мереке қарсаңында шымкенттік жас жұбайлар Бекзат Асқарбекұлы мен Мадина Оразбайқызының некесі қиылып, алтын той иелері Нышанбек Ануаров пен Зейнепкүл Рысқұловаға Шыңғыс Жұмабекұлы арнайы куәлік табыстады.
— Халықаралық отбасы күні дүние жүзінде тойланады. Себебі, «Отан – отбасынан басталады» дегендей, әрбір отбасы – мемлекеттің берік іргетасы. Ал, әрбір отбасының бақыты – мемлекеттің бақыты. Бүгінде әлемде экономикалық өлшемдер емес, «мемлекетті құраушы отбасылар қаншалықты бақытты?» деген критерий маңызды. Шымкент бала туу және отбасын құру көрсеткіші жағынан алдыңғы қатарда. Мәселен, 2020 жылы 6776 жұп некесін қиса, 2021 жылы Шымкентке 7880 шаңырақ қосылған. Салыстырмалы түрде өңірімізде неке бұзушылардың саны азайғаны да қуантады. Бұл біздің өңірдегі отбасы институтының, үлкендердің өнегелі жолының жемісі деп білеміз. Шаңырақ көтеріп, неке қиған жас жұбайларға алтын той иелерінің жолын берсін деп тілейміз, - деді Шыңғыс Жұмабекұлы.
Нышанбек Ануаров — ұзақ жылдар «Фосфор» АҚ-да аға заңгер, заң бөлімінің меңгерушісі қызметтерін атқарған, ортасына сыйлы қария. Зейнепкүл Рысқұлова — 1973 жылдан зейнеткерлікке шыққанға дейін денсаулық сақтау саласында фельдшерлік қызмет атқарған. Отағасы екеуі бүгінде мәпелеп өсірген ұл-қыздарынан 14 немере, 2 шөбере сүйіп отыр.
Ашық аспан астында өткен жиында алтын той иесі жас жұбайларға ақ тілегін айтып, батасын берді.
— Өмір деген үлкен теңіз. Ол теңіздің толқынды, тынышсыз күндері де, тып-тынық, мамыражай күндері де болатыны сөзсіз. Бүгінгі қол ұстасып, сол теңізге бет алған кемелерің толқынды күндерден аман өтсін! Қазақта «Үйлену оңай, үй болу қиын» деген аталы сөз бар. Бойдақ күндердегі тегіс жолды аңсамай, отбасылық өмірде өздеріңе артылған міндетті бірге, адал атқарыңдар. Өніңдер, өсіңдер, - деді Нышанбек қария.
Жас жұбайлар мен алтын той иелері жиын соңында Алаш арыстарының ескерткішіне гүл шоқтарын қойды.
Айта кетейік, жылдың алғашқы тоқсанында Шымкентте 1784 жас жұбайлар шаңырақ көтерген.