– 2022 жыл – Балалар жылы. Сондықтан бүгінгі іс-шараны «Бала денсаулығы – ұлт саулығы» деп атадық. Көптеген ата-аналардың өтініштерін ескере отырып, Шымкент қалалық клиникалық балалар ауруханасының білікті мамандарын арнайы шақырдық. Олар бүгін балалардың денсаулығын тексеріп, кеңестерін берді. Бұл үшін балалар ауруханасының бас дәрігері Динара Жұмаділоваға алғыс айтамыз. Ары қарай да балалардың саулығын жақсартуда әріптестікті нығайтамыз деген жоспарымыз бар, - деді Шымкент қалалық №6 емхананың бас дәрігері Айгүл
Қылышбаева.
Ашық есік күніне келген ата-аналардың қарасы көп болды. Келушілердің басым бөлігі пульмонолог, аллерголог, невропатолог, кардиолог мамандардың көмегін алды. Тәжірибелі дәрігерлер бірқатар ата-анаға қосымша медициналық тексеріс жасап, балалар ауруханасының мамандарына жүгінуге кеңес берді.
Дана Ташкенбаева аллерголог-дәрігердің кеңесін алды. – Баламның терісі қышынып, ем-дом алып жүргенбіз. Нақты себебін анықтай алмадық. Аллерголог қосымша тексеріс жүргізуге кеңес берді. Аурудың пайда болу себептерін түсіндіріп берді. Зертханалық талдаулардан кейін жолдамамен балалар ауруханасына баратын боламын, - деді Д.Ташкенбаева.
Сондай-ақ ашық есік күні аясында емхананың хирург, стоматолог, лор дәрігерлері балаларды қабылдады.
