Шымкент келбеті

Шымкентте «Дені сау бала» жобасы жүзеге асырылып жатыр

Дені сау ұрпақ — ұлт болашағы. Иә, ұлт болашағының кемелдігін қамтамасыз ету мақсатында Мемлекет басшысы Қ.Тоқаев 2022 жылды «Балалар жылы» деп бекітіп, өскелең ұрпақтың білімі мен білігіне, денсаулығына, әлеуметтік дамуына үлкен мән беріп отыр. Бүгінде Шымкентте балалардың денсаулығын жақсартып, созылмалы аурулардың алдын алу мақсатында қалалық денсаулық басқармасы тарапынан көптеген жұмыстар атқарылып жатыр. Әсіресе, балалар жылына орай кешенді іс-жоспар бекітілген. Тақырыпты тарқатар болсақ.

«Дені сау бала» — ауқымды жоба

— Шымкент қалалық денсаулық сақтау басқармасы қолға алған іс-шаралар негізінде «Дені сау бала» жобасы жүзеге асырылып жатыр. Бүлдіршіндердің, мүмкіндігі шектеулі балалардың денсаулығын жақсартып, оңалту жұмыстарын жүргізу үшін жобаға меншік нысанына қарамастан, қаланың барлық медициналық ұйымдары қатысып отыр. Мәселен, Шымкентте 39 баланы дамыту кабинеті жұмыс істеп тұр. Онда тәжірибелі медицина қызметкерлері кішкентай бүлдіршіндерге проактивті скринингтер жүргізеді, жас ата-аналарды бала күтіміне үйретіп, сәбидің тамақтандыру дағдысын қадағалайды. Емшек сүтінің пайдасы, қажет болған жағдайда қосымша тағамдарды енгізу нормасын үйретеді, - дейді Шымкент қалалық денсаулық сақтау басқармасының бөлім басшысы И.Глазебная.

Ресми деректерге сүйенсек, жобаның «Арман жолы» бағыты бойынша 6 ай ішінде 3773 бала оңалту емін қабылдаған. Бұл нәтижені өткен жылдың сәйкес кезеңімен салыстырар болсақ, биылғы жұмыс 29,7 пайызға артық орындалған. Сонымен қатар, мамандар оңалтудан өткен балалардың 1 891-і (50,1%) ерекше балалар екенін айтып отыр.

Кез келген дертті ерте кезеңде анықтау ұрпақ саулығының кепілі екені анық. Осы мақсатта биыл 1 жасқа дейінгі балалардың денсаулығын бақылау және жүйелі түрде скринингтен өткізу жұмыстары күшейтілген.

— Жоба аясында арнайы жұмыс жоспары бекітіліп, «Ерте анықтау — табыс кепілі» бағытында 1 жасқа дейінгі балаларды проактивті бақылаумен және скринингттік тексерумен қамту көзделген. Онда неонаталдық, аудиологиялық, офтальмологиялық, психофизикалық тексеру жүргізіледі. Мәселен, проактивті скринингтен өтуі тиіс 76 039 баланың бүгінге дейін 64 245-і қамтылды. Бұл 84,5 пайызды құрап отыр. Жыл соңына дейін жаңа туылған балалардың санына қарай тексеру динамикасы өзгеріп отыратынын да айта кеткен жөн. Сонымен қатар, мектеп жасындағы балалардың да денсаулығын бақылау мәселесі жобадан тыс қалмады. «Оқушы денсаулығы» бағыты бойынша қала мектептерінде 140 медициналық бекет бар. Өткен оқу жылының соңына дейін профилактикалық тексеруге жататын 225 737 оқушының 146 729-ы, яғни 65 пайыз тексеруден өткен. Жаңа оқу жылында да бұл жұмыс өз жалғасын табатын болады, - дейді Инна Михайловна.

Қуантарлығы сол, жуырда «Балаларға күлкі сыйла!» акциясы ұйымдастырылып, балаларды тегін стоматологиялық тексеруге меншік нысанына қарамастан 22 медициналық ұйым қатысқан. Оның ішінде 10-ы мемлекеттік, 6 жеке БМСК және 7 жеке стоматологиялық клиника. Акция аясында 737 баланың I-II дәрежелі үстіңгі және орта тісжегісі емделген.

Скрининг жүйелі жүргізіліп жатыр

«Балалар жылына орай жаңа туған сәбиден 17 жасар жасөспірімдерге дейін қамтитын скринингтік тексерудің ауқымы кеңейді. Биыл Шымкент қалалық №6 емханасында 28 161 баланы скринингтен өткізу жоспарланған болатын. Жарты жылдық қорытындыға сәйкес, скринингтен өткендердің саны 16 946-ға жетіп отыр. Яғни, 60 пайыздан астамы тексеруден өтіп, оның 4224-і денсаулығынан анықталған дертіне байланысты «Д» есепке алынды». Шымкент қалалық №6 емхананың бас дәрігері Айгүл Қылышбаева Ақпараттық-коммуникациялық орталықтың көшпелі брифингінде осылай деген болатын.

Емхана дәрігерлерінің айтуынша, жалпы тәжірибелік дәрігерлер скринингтік тексеруден өткен балалардың талдама қорытындыларын зерделеп, дерті бар балаларды тиісті бейінді дәрігерлердің кеңесіне жолдайды.

— Профилактикалық медициналық қарап-тексеру аяқталғаннан кейін бейінді мамандардың қорытындысы мен зертханалық-диагностикалық зерттеулерді ескере отырып, педиатр, терапевт немесе жалпы тәжірибелік дәрігерлер кешенді бағалау жүргізіп, балалардың «денсаулық тобын» айқындайды. Мәселен, 1 топқа дені сау балалар, ал 2 топқа дені сау, бірақ функциялық ауытқулары бар, сондай-ақ жіті және созылмалы ауруларға қарсы тұру қабілеті төмен бар балалар алынады. Ал, денсаулығына байланысты диспансерлік есепте тұратындар 3, 4, 5 топ тізіміне алынып, тиісті бейіндік дәрігерлер динамикалық бақылау және сауықтыру жұмыстарын жүргізеді, - деді Айгүл Орынбасарқызы.

Айта кетейік, Шымкент қалалық №6 емханасына 64 899 тұрғын тіркелген. Оның 26022-сі 14 жасқа дейінгі балалар.

Ата-аналардың жауапкершілігі артқан

Көшпелі брифинг барысында Шымкент қалалық №6 емханасының балаларды скринингтен өткізуге арналған арнайы бөлімнің жұмысымен танысудың сәті түсті. «Аудиограмма» бөлмесінің жауапты мейіргері Ш.Самбетованың айтуынша, мұнда жаңа туған сәбиден бастап 6 жасқа дейінгі бүлдіршіндердің есту қабілеті толығымен тексеруден өтеді.

— 2021 жылдың соңында емханаға отоакустикалық эмиссияны және есту әсерінен туындаған әлеуетті тіркеу әдісімен аудиологиялық скринингке арналған құрылғы алынып, мамыр айында іске қосылды. Мұнда арнайы медициналық нұсқаулыққа сәйкес, 3 айлық сәбилер, 1-2 және 3,6 жасар бүлдіршіндер тексеруден өтіп жатыр. Биыл аудиоскрининг аппаратынан 5360 баланы өткізу жоспарланып, бүгінге дейін 1421 бүлдіршін қамтылды. Аудиологиялық скрининг жаңа туған нәрестелердің, ерте жастағы балалардың есту қабілетінің бұзылуын уақтылы анықтау, ерте араласу, мүгедектікке әкелетін ауруларды оңалту және алдын алу үшін жүргізіледі, - дейді Ш.Самбетова.

Емхана дәрігерлері ата-аналардың жауапкершілігі артқанын алға тартып отыр. Аудиоскринингке шақырылғандар дер кезінде келіп, дәрігерлердің кеңесін ұқыптылықпен орындайтын болыпты. Тіптен, скрининг жасына сәйкес болмаса да, аудиоскринигтен өтуге өтініш білдіретіндердің саны артқан.

Шымкенттік тұрғын Нұргүл Беркімбай 6 жасар қызын аудиоскринингтен өткізуге ертіп келіпті.

— Біз отбасымызбен қалалық №6 емханаға тіркелгенбіз. Жуырда учаскелік медбике хабарласып, 6 жасар қызымды аудиоскринингтен өткізуге шақырды. Ол үшін ешбір дерт белгісі болуы маңызды емес екенін, есту қабілетінде қандай да бір ақау болса, дер кезінде әрекет ету арқылы баланың денсаулығын жақсартуға болатынын түсіндірді. Үш перзентімнің ішінде қызым скринингтен өтетін жаста болған соң, біреуін ғана әкеліп отырмын. Қорытындысы жақсы, бұл шара биыл баланы мектепке берер алдында сенімділік сыйлап отыр, - дейді Н.Беркімбай.

Дәрігерлердің айтуынша, қалаға өзге аудандар мен өңірлерден көшіп келген, пәтер жалдап тұратын азаматтардың көптігінен емханаға қарасты аумақтағы «Д» есепке алынған балалардың саны жиі өзгеріп тұрады екен.

— Аудиоскрининг арқылы баланың есту қабілетін ғана емес, оның ағзасындағы мүгедектікке әкелетін аурулардың алдын алуға, оңалту жұмыстарын жүргізуге мүмкіндік туады. Мәселен, «Дене шынықтыру» бөлмесі амбулаторлы оңалту жұмыстарын жүргізуге, «Д» есепке алынған балалардың ата-анасына үй жағдайында да жасалатын емнің әдіс-тәсілдерін үйрету мақсатында жасақталған. Мұнда тілі кеш шыққан балалар, моторикасы дамымаған бүлдіршіндер, церебральді сал ауруының жеңіл түріне шалдыққан, яғни қимыл-қозғалысын дамыту қажет балалар келіп, денсаулығына қарай ем алады. Яғни, емханадағы мамандармен мультидисциплинарлы топ құрылған.   Әр бала 10 күн бойы 20-30 минут аралығында амбулаторлы ем алады. Ата-анасы да біздің ем барысын көріп, қажетіне қарай үй жағдайында қайталайды. Монтессори әдісімен моториканы дамытуға арналған бұрыш, құрғақ бассейн, қимыл-қозғалыс үшін ортопедиялық кілемшелер мен механикалық жүгіру тренажері бар. Ата-аналар оңалту жұмысынан соң логопед, дефектолог дәрігерлердің кеңесіне жүгінеді. Қазіргі уақытта ДЦП диагнозымен 31 бала, сөйлеу қабілетінің кешігуі бойынша 50-ден астам бүлдіршін ем алып жүр. Ал, жағдайы күрделі балалар арнайы орталықтарда жолдама негізінде ем қабылдайды, - дейді емхананың балалар неврологы Ақбота Манашева.

P.S. Ұлт келешегін ойласақ, тек балалар жылының аясында ғана емес, барлық уақытта өскелең ұрпақтың денсаулығына ерекше көңіл бөлінуі керек. Мұны жуырда қалалық денсаулық сақтау басқармасының басшысы Н.Асылбеков те тілге тиек еткен-ді. Бас дәрігердің айтуынша, биыл неонатолог дәрігерлер шетелдік мамандардан сабақ алып, біліктілігін арттырмақ. Сондай-ақ, балаларға күрделі оталарды мегаполисте жасау үшін хирургияны да дамыту көзделіп отыр. Лайым ұлтымыздың келешегі, әр отбасының көзқуаныштары аман болғай.

«Ақын-жазушыларға шығармашылық қолдау көрсету мәселесі жиі сөз болады. Біздің қоғамда ақындық пен жазушылық кәсіп емес. Бірақ, ол — сіздерге қонған дарын. Дарын сіздердің артықшылықтарыңыз». Жас қаламгерлермен кездескен Шымкент қаласы әкімінің міндетін атқарушы Шыңғыс Мұқан осылай деді.

Кездесуге жас ақындар Сүндет Сейітов, Салтанат Мадиярқызы, Арайлым Мұратәлиева және жазушы Жәудір Нартай қатысты. Еркін форматтағы отырыс барысында жас қаламгерлердің жұмыспен қамтылу мәселесі де назардан тыс қалмады.

— Ақын-жазушыларға шығармашылық қолдау мәселесі жиі сөз болады. Шетелдерде жазушылар өте бай. Олар шығармасымен елді елітіп, сол туындысына алған қаламақысымен өмір сүреді. Біздің қоғамда ақындық пен жазушылық кәсіп емес. Бірақ, ол — сіздерге қонған дарын. Дарын сіздердің артықшылықтарыңыз. Сіздер де өз өнімдеріңізді өткізе білулеріңіз керек. Әуелі, шығарма арқылы оқырман жүрегіне жол табу маңызды. Екінші, шығармашылық маркетингті дамыту қажет. Яғни, өніміңіз оқырманға өту үшін сіздер олармен жақын болыңыздар, - деді Шыңғыс Жұмабекұлы.

Жиын барысында жас қаламгерлердің алдағы жоспары талқыланды.

— Жуырда өздеріңіз ұйымдастырған «ШАМ» бірлестігінің шығармашылық кешіне қатысып, поэтикалық дуэльдеріңізді тамашаладым. Алайда, аудитория әлі де аз. Шымкентте 200-ден аса мектеп, 8 ЖОО, 30-дан астам колледж бар. Сіздер арнайы шығармашылық бағдарламамен осы білім ұйымдарындағы замандастарыңызбен кездесіп, өздеріңізді таныстырыңыздар, - деді Ш. Жұмабекұлы.

Жас қаламгерлер кездесу барысында өз пікірлерін білдіріп, бүгінгі поэзия мен проза тілі жайлы әңгіме өрбітті.

Ширек ғасырға жуық тойланып келе жатқан Елорда күнін шымкенттіктер «Арбат» демалыс аймағында салтанатты түрде атап өтті. Мерекелік іс-шара Шымкент қалалық мәдениет үйі жанынан құрылған «Қаратау» қазақ халық аспаптар ансамблінің концерттік бағдарламасымен ашылды.

Түркештің «Көңіл ашар», Құрманғазының «Балбырауын», Желдібайдың «Ерке сылқым» күйлері ұлттық аспаптардың күмбірлеген қоңыр үнімен шымкенттіктерді қазақтың дархан даласына жетелей түсті.

— Өткен жылы Тәуелсіздігіміздің 30 жылдығын тойласақ, одан кейінгі айтулы мереке – елорданың Сарыарқа төріне көшірілуі. Бүгінде астанамыз Қазақстанның ең жас қаласы ретінде әлемге танылып үлгерді. Мерекеге орай Шымкент мәдениет үйінің майталмандары дәстүрлі ән шырқап, ұлттық би, күйімізді әуелетіп, Сіздерге ерекше көңіл-күй сыйлайды, - деді Шымкент қалалық мәдениет үйі директорының міндетін атқарушы Сайлаубек Лесбаев.

Шымкент қалалық мәдениет үйінің өнерпаздары «Үкілі қыз», «Бүлдірген», «Ақтамақ», «Ақ бұлақ» әндерін шырқап, халықаралық және республикалық байқаулардың лауреаты «Қазына» би ансамблі «Алмалы бақ», «Достық» билеріне мың бұралып биледі.

Кеш барысында қала қонақтары мен тұрғындары арасында викториналық сұрақтар қойылып, ойын ойнатылды. Әр жеңімпаз арнайы сыйлық алып, кеш эстрада әншілерінің концертіне ұласты.

Еліміздің өңірлеріндегі эпидемиологиялық ахуалды бағалау матрицасына сәйкес, Алматы қаласы 4 шілдеден бастап «сары» аймаққа өтті. Өңірде КВИ жұқтыру дерегінің күрт өсуіне байланысты Алматы қаласының санитариялық-эпидемиологиялық бақылау департаментінің басшысы арнайы қаулы шығарып, жабық нысандарда бетперделік режим енгізді. Себебі, 4 шілде күні республика бойынша тіркелген 159 науқастың 88-і алматылық екені анықталған. Яғни, алматылықтар ойын-сауық орталықтарына, сауда үйіне, жабық базарлар мен банктерге, кинотеатр, театр, циркке, концерт залдары мен спорттық іс-шараларға медициналық бетперде киіп баруы тиіс. Ал, 6 айдан бері «жасыл» аймақта отырған Шымкенттегі ахуал қалай? Тақырыпты тарқатар болсақ.

Екпе ерікті түрде және тегін жүргізіледі

— Ақпан айынан бастап Шымкентте эпидемиологиялық жағдай тұрақталған болатын. Алайда, 6 шілдеде COVID-19 инфекциясымен 28 жағдай тіркелді. Балалар арасында 4 жағдай анықталған. Вирус жұқтырғандардың басым бөлігі – ересектер. Науқастар профилактикалық тексеру кезінде және өз бетімен медициналық көмекке жүгінгенде анықталған, - дейді Шымкент қалалық санитариялық-эпидемиологиялық бақылау департаменті жұртшылықпен байланыс бөлімінің бас маманы Ұлжан Әлібаева.

Сала мамандарының айтуынша, коронавирустың симптомды түрімен ауырғандар емдеу хаттамасына сәйкес ем алса, симптомсыз түрімен ауырғандар 10 күн медициналық бақылауда болады.

— Індетті алдын алудың ең тиімді жолы вакцинация екендін атап өту керек. Дер кезінде алынған вакцина – дерттің таралып кетпеуіне бірден-бір себеп. Алайда, белгілі бір уақыт өткеннен кейін екпенің күші әлсірей бастайды, сондықтан уақтылы ревакцинациядан өту маңызды. Шымкент қаласында вакцинациялау, ревакцинациялау және қайта ревакцинациялау Қазақстанда қолдануға рұқсат етілген «QazVac», «Vero Cell», «Комирнати» (Phizer, АҚШ) вакциналарымен жүргізіліп жатыр. Вакциналар алғашқы медициналық көмек көрсету мекемелерінде жеткілікті. Вакцинациялау алдын ала ақпараттандырылған жазбаша келісіммен, ерікті түрде және тегін жүргізіледі, - дейді Шымкент қаласының санитариялық-эпидемиологиялық бақылау департаментінің басшысы Ә.Төлебаев.

 

10 853 азамат 4 мәрте екпе алды

— Он күннен бері коронавирус инфекциясы қайта тарап жатыр. Әр аймақтағы ахуал әртүрлі. Алайда, вирус кеңінен тарап кетпеу үшін санитарлық-эпидемиологиялық талаптарды сақтап, екпе алу арқылы ұжымдық иммунитет қалыптастыру қажет. Бүгінде вакцинация жұмысының 4 кезеңі басталды. Алғашқы екі кезең 100 пайызға орындалып, екпе алуы тиіс тұрғындар толығымен қамтылған болатын. 5 шілдеге дейін ревакцинацияның үшінші кезеңінен 347 728 адам өтіп, 65 пайызға орындалса, 10 853 азамат 4 мәрте екпе алып үлгерді. Ревакцинация үшін екпе қоры жеткілікті. Бүгінде Шымкент қаласы бойынша емханалардағы 45 бекетте екпе салу жұмыстары жүргізіліп жатыр. Сонымен қатар, кез келген екпенің сақтау мерзімі шектеулі. Сондықтан «Комирнати» (Phizer, АҚШ) екпесі бұған дейін 60 жастан жоғары егде кісілерге, жүкті және емізулі әйелдерге салынса, бүгінде оның ауқымын кеңейтіп, медицина қызметкерлері мен мемлекеттік қызметкерлерге ревакцинация үшін қолданылып отыр, - дейді Шымкент қалалық денсаулық сақтау басқармасының басшысы Н.Асылбеков.

Сала мамандарының айтуынша, бүгінде Шымкентте 60-70 пайызға жуық ұжымдық иммунитет қалыптасқан. Алайда, оны белгілі межеде сақтап тұру үшін ревакцинациядан өту маңызды.

— Науқастар әзірге соңғы хаттама негізінде ем алып жатыр. Жеңіл, симптомсыз түріне шалдыққандар амбулаторлық негізде бақылауда болып, 10-14 күннен кейінгі сараптама қорытындысына қарай оқшаулау кезеңінен шығады. Ал, вирустың орташа және күрделі түрін жұқтырған науқастар стационарлық режимде емделіп жатыр. Дегенмен, қала тұрғындары екпені 6 ай сайын салдыру керектігін естен шығармаса дейміз. Себебі, 6 айдан асқан соң, екпенің вирусқа қарсы күші, тиімділігі азаяды, - дейді қаланың бас дәрігері.

Бүгінде коронавирустың алдын алу мақсатында Шымкентте тиісті сала мамандарының қатысуымен арнайы іс-шара жоспары бекітілген.

— Шымкент қаласы әкімінің бірінші орынбасары Шыңғыс Жұмабекұлы жағдайдың алдын алу және жұмысты тиімді ұйымдастыру мақсатында тиісті сала мамандарының қатысуымен іс-шара жоспарын бекітті. Ол жерде тек емдеу мекемелерінде төсек-орындар ұйымдастыру ғана емес, дәрі-дәрмек қорын жасақтау, алдын алу сынды өзекті мәселелер қамтылған. Мәселен, емханалардағы төсек-орын саны санитарлық-эпидемиологиялық ахуалға қарай өзгеріп отырады. Қазіргі уақытта оптимистік сценарий негізінде емханалардан 733 орын дайындалған. Оның 4 шілдеге дейін 18 пайызына науқастар қабылданды. Ал, дәрі-дәрмек қоры 2 айға жетеді, - дейді Нұрлыбек Абибуллаұлы.

Пандемияның өткен толқындарында Шымкентте 3 мыңнан аса орын жасақталған. Алайда, мамандар ұжымдық иммунитеттің қалыптасуына орай, ондай қауіптің жоқ екеніне сендірді.

— Вирустың таралуын шектеу, ең алдымен, тұрғындарға тікелей байланысты. Қоғамдық орындарда ара қашықтық сақтау, жабық мекемелерде бетперде тағып, антисептик қолдану сынды санитарлық талаптарды сақтау өте маңызды, - дейді Н.Асылбеков.

P.S. Денсаулық сақтау министрлігінің хабарлауынша, пандемия басталғалы елімізде 1 млн 308 207 тұрғын коронавируспен ауырған. Ал, 6 шілдеде республикада 330 адам тіркеліпті. Оның ішінде Нұр-Сұлтан қаласында - 36, Алматы қаласында - 191, Шымкент қаласында – 28, Ақмола облысында – 11, Алматы облысында - 10, Атырау облысында - 9, Шығыс Қазақстан облысында - 4, Жамбыл облысында - 12, Батыс Қазақстан облысында - 1, Қарағанды облысында - 12, Қостанай облысында - 4, Қызылорда облысында - 3, Павлодар облысында - 4, Солтүстік Қазақстан облысында - 1, Түркістан облысында 4 адам коронавирус инфекциясын жұқтырған. Мамандар елдегі эпидахуалды тұрақтандыру үшін тұрғындарды екпе алып, ұжымдық иммунитетті қалыптастыруға шақырып отыр.

Шымкенттіктер мен қала қонақтары шаһардың көрікті жерлері мен саябақтарында ғана демалмайды. Шілденің шіліңгір ыстығында қаланың бұрыш-бұрышындағы субұрқақтардың саясында дамылдап, тыныға алады. Әуенді, әсем, ерекше талғаммен жасалған субұрқақтардың қала көркіне сән беріп тұрғаны анық. Ал, демалыс орындарындағы қауіпсіздік мәселесі мен күтімі жайлы сала мамандарының пікіріне жүгіндік.

— Шымкентте 37 субұрқақ бар. Олар толығымен консервациядан шығарылып, оның 35-і бекітілген кестеге сәйкес тұрақты жұмыс істеп тұр, – дейді Шымкент қалалық жайлы ортаны дамыту басқармасының бас маманы Әуесбек Әзбердіұлы.

Биыл жыл бойы субұрқақтар мен ұңғымаларды күтіп ұстауға жарияланған мемлекеттік сатып алу конкурсында мердігер мекеме «Dim Nur Company» ЖШС-і жеңімпаз атаныпты. Бүгінде компания күтім жасау жұмыстарын бастап кеткен.

— Тәуелсіздік және Абай саябағындағы субұрқақтың сорғы құрылғысы күйіп кетуіне байланысты уақытша тоқтатылды. Қазіргі таңда жөндеу жұмыстары жүргізіліп жатыр. Таяу күндері іске қосылады. Сонымен қатар, қала тұрғындары субұрқақтарға шомылуға тыйым салынғанын назарда ұстаса дейміз. Әр нысанның жанына «субұрқаққа шомылуға тыйым салынған» деген жазуы бар арнайы тақтайшалар орнатылған, - дейді Ә.Опабек.

Қаладағы 37 субұрқақтың 3-еуі әуенді. Олар Тәуелсіздік саябағында, Әкімшілік іскерлік орталықта және этносаябақта орналасқан.

Кестеге сай жұмыс істейді

Қаладағы субұрқақтар жұмысы арнайы кестемен қадағаланады. Яғни, олардың қосылатын уақыты, судың тазалығы, демалушылардың қауіпсіздігі — барлығы назарда. Бұл туралы қаладағы су бұрқақтардың күтіміне жауапты мердігер «Dim Nur Company» ЖШС-інің маманы Мұхтар Әлімұлы мәлімдеді.

М.Тұрабаевтың айтуынша, қаладағы әуенді нысандар кешкі сағат 20.00-21.00 және 22.00-23.00 аралығында қосылады.

— Тәуелсіздік және Абай саябағындағы фонтандардың сорғы құрылғысының істен шығуына байланысты жөндеу жұмыстары жүргізіліп жатыр. Оншақты күнде қала тұрғындары бұл су бұрқақтарды да саялай алады. Қалған 34-і сағат 08.00-10.00, 12.00-16.00, 17.00-22.00 аралығында қосулы тұрады. Барлық субұрқақтың жұмысы автоматтандырылған. Дейтұрғанмен, су сорғы қызметіне шамадан тыс күш түсіп, күйіп кетпеуі үшін арнайы кесте негізінде жұмыс істейді,- дейді маман.

Сапа мен қауіпсіздік – басты назарда

Мердігер компанияның қызметіне сорғы қызметін қадағалау, жарықтандыру және субұрқақтың кафельді, гранитті бассейндеріне күтім жасау, жөндеу жұмыстары кіреді.

— Алғашқы он күндікте нысандардың кестеге сай жұмыс істеуі қадағаланбақ. Одан әрі кейбіріне ағымдағы әрлеу жұмыстары жүргізіледі. Қазіргі уақытта ерекше күтім қажет субұрқақтар зерделеніп жатыр, - дейді Мұхтар Әлімұлы.

Бүгінде мердігер компания әр техникалық қызметкерге 2-3 субұрқақтан бекіткен. Ал, ірі нысандарда жекелеген мамандар жұмыс істейді. Яғни, олар кестеге сай жұмыс істеуі мен техникалық қауіпсіздігін қадағалайды.

— Шілде түсіп, күннің ысуына байланысты бүлдіршіндер субұрқақ суына шомылып жатады. Алайда, ол өте қауіпті. Себебі, субұрқақтардың су сорғысы, жарығы барлығы электр энергиясымен жұмыс істейді. Су астында арнайы сорғы, генератор, жарық лампаларының сымдары болады. Техникалық ақаулар туындаған жағдайда адам өміріне қауіп төндіретіні анық. Сондықтан барлық нысанға ескерту белгілері орнатылды. Енді ата-аналардың қадағалауы маңызды, - дейді М.Тұрабаев.

P.S. Әр әрекет бір мәдениетке сүйенетіні анық. Қаламыз көрікті, саялы болуы үшін тиісті мекемелер күтіміне жауап берсе, бізге қойылатын талап – демалыс мәдениетін қалыптастыру. Яғни, әр келуші демалыс аймағында тазалық пен қауіпсіздік шараларын сақтап, жауапкершілікпен қарауы тиіс. Жауапты мекеме мамандарының да тілегі сол.