Версия для печати

Өзіңде өмір сүру – бір бақыт! Избранное

Пятница, 19 Июнь 2020 04:15 Автор  Опубликовано в Қоғам Прочитано 3622 раз
Оцените материал
(0 голосов)

 DSC1925

Ұлы Жібек жолының бойына қоныс тепкен, ежелден Қазақстанның экономикалық, сауда, және мәдени-тарихи орталығына айналған Шымкент шаһары еліміздің  еңсесі биік, етегі кең, күні шуақты, тұрғындарының тұрмысы қуатты қала.

Халқының саны жағынан республикада үшінші орында тұрған Шымшаһарда 100 -ден аса ұлт пен ұлыстың өкілдері тату-тәтті тірлікпен ортақ
шаңырақты гүлдентуге жұмыла үлес қосып келе жатқаны бұл қаланың бірлік пен ынтымақтың мекеніне айналғанын айғақтайды.
Осы уақытқа дейін ғалымдардың зерделеуі бойынша Шымкент қаласының аумағындағы қоныс мекендер XI−XII ғасырларда орын тепкен деген гипотеза болатын. Сонымен қатар Шымкенттің бұдан да ертеректе пайда болғаны жөнінде болжам бар. Бұған мамандар археологиялық қазбалар мен құрылыс барысында табылған көптеген жәдігерлерді дәлел етуде. Қалай болғанда да тарихы сонау көне ғасырлардан тамыр тартатын ескі шаһардың шежіресі бүгін 2200 жылдық өлшеммен таразыланып отыр. Сол ықылым заманның өмір тынысын танытатын тарихи орынның бірі ретінде Ескі қалашық бүгінде Шымкентті ежелгі манифактуралық, мәдени мекенмен табыстырады. Бұл қалашық Шымшаһарды туризмнің тамаша орталығына айналдырудың ғаламат жолы әрі жобасы болып отыр.
Шымкент биыл ТМД елдерінің мәдени астанасына айналды. Қазақстандағы үшінші мегаполис мәртебесін алған қаланың бұрынғыдан да көркейіп, ажарлана түсуіне оның мәдени астана атануы да зор серпін берді. Қаламыз сәулетті құрылыстарымен, абаттанған көркімен, жап-жасыл келбетімен, қызылды-жасылды түнгі жарқыраған шамдарымен көрген жанның көңілін көркейтетін кейіпке ене түсуде.
Шымкент Еуропалық
Ресей мен Батыс Сібірді Орта Азиямен жалғайтын, маңызды транзиттік мекен саналады. Бұл орайда халықаралық жол құрылысы жоғары қарқынмен өріс алған. Республикалық маңызы бар жолдармен қатар қала аумағындағы жолдардың сапасын жақсарту бағытында да өнімді жұмыстар жүріп жатыр.
Қала экономикалық қуаты жағынан республикадағы алдыңғы шептегі орындардың біріне ие. Өнеркәсіп өндірісі, кәсіпкерлік сала, агрошаруашылық жан-жақты дамыған шаһарда өндірістік өмір тарихы ғасырлармен шектесетін шежірелі кәсіпорындар да жұмыс істейді. Солардың бірі ретінде 1883 жылы ашылған дәрі-дәрмек өндіретін сантонин зауыты қазір «Химфарм» АҚ-на айналып, SANTO маркасымен дәрілік өнімдерін экспортқа шығарып келеді. Оңтүстік Қазақстанның табиғи-климаты дермененің өсуіне қолайлы, ал дермене - сантонино өндірісі жер шарында өте сирек кездеседі. Шымкенттің алғашқы және қазіргі таңбасында дермене бұтақшасының бейнелену себебі де содан.
Дәулетіне сәулеті сай мегаполис шаһарда тұрғын үй салу қарқындап жүріп жатыр. Жаңа шағынаудандар, көшелер, даңғылдар, саябақтар, скверлер пайда болды. Білім беру, медицина және мәдениет мекемелерінің саны өсіп, жаңа спорттық-сауықтыру кешендері бой көтерді. Қайта жаңарып, жасанған демалыс кешені құрамында дендробақ, зообақ, жасанды көл және ипподром тұрғындардың бой сергітетін арайлы аймағына айналды
Бір сөзбен айтқанда ескі заманнан-ақ Шымқала адамдардың өмір сүруіне қолайлы мекен саналады. Осынау шырайлы да шұғылалы шаһарда өмір сүрудің өзі бір бақыт!

Асхан ҚОЖАКЕЛДІҚЫЗЫ

ҚазМУ-дің 1979 жылғы түлегі. Көкшетау облыстық «Көкшетау правдасы» газетінде, Сарыағаш аудандық «Сарыағаш» («Қызыл ту») газетінде бөлім меңгерушісі, облыстық «Оңтүстік Қазақстан» газетінде бас редактордың 1-ші орынбасары қызметтерін атқарды. Қазір қалалық «Шымкент келбеті» газетінде жауапты хатшы.