Бұл додаға Шымкент қаласы атынан №88 мектептің мұғалімі Пак Темур Андреевич қатысты. Онлайн сайыста үміткерлер Абайдың білім, ғылым және өнер туралы өлеңдерін оқыды, «Абай жолы» эпопеясынан үзінді әңгімелеп берді, ұлы ғұламаның қара өлеңдерін жатқа айтты. Соған қоса әр үміткер «Абайдың тілі – адамзаттың рухани қазынасы» тақырыбында бейнеролик дайындаған болатын.
Сонымен, әділқазылардың бірауыз шешімімен үшінші мегаполистің намысын қорғап, Абай шығармаларын көркем шеберлікпен орындаған Темур бас жүлдеге ие болды.
Жерлесімізді жеңісімен құттықтап, бір ауыз әңгімелесу үшін хабарласқанымызда жергілікті телеарна бағдарламасына қонаққа баратынын айтты. Сол жақта жолыққанда бұл жігіттің қазақтың қарапайым ұлынан ешқандай айырмашылығы жоқ екенін аңғардық. Оның себебі де бар.
Темур Абай шығармашылығымен бала кезінен бері таныс. Жай таныстық емес, ұлы ағартушының шығармашылығын жанына жақын тұтқанын айтады. Мектеп жасынан өзі секілді қазақ тілін жетік меңгерген құрдастарымен облыстық, республикалық байқауларда талай рет жүлдегер атанған. Ал осының бәрінің негізінде ата-ана тәрбиесі жатыр.
– Әкем мен анам Шардара қаласында танысып, отбасылы болған. Бірнеше жылдан кейін әкем үйдің кенжесі болғандықтан, қарашаңыраққа – Мақтаарал ауданының қазіргі Қызылқұм ауылына көшіп келеді. Біз сонда туып-өстік. Кішкентайымыздан отбасымызбен қазақи ортада тәрбиелендік. Қазақ халқының салт-дәстүрін меңгеріп, ұлттық мерекелерді ауылдастарымызбен бірге атап өтетінбіз. Жалпы, ауылда «сен қазақсың, сен кәріссің» деп немесе басқаға бөлмей, бәріміз тең болдық. Ауылда жұмыс істейтін әкем сол кезден болашақты болжап, осы елдің азаматы болсын деп, мені қазақ сыныбына берген. Ата-анам әлі де сол жерде тұрады. Осылайша аты-жөнім мен ұлтым кәріс болғанымен, жаным қазақ. Жұбайым да қазақ. Қазір, шүкір, Құдайдың берген бірнеше ұл-қызын бірге тәрбиелеп отырмыз, - деп жымиды Темур.
Темур Пак бүгінде мектепте дене шынықтыру пәнінен сабақ береді. «Қазақстан халқы Ассамблеясына 25 жыл» мерекелік медалімен марапатталған. Қазіргі таңда ҚХА корей этномәдени бірлестігінде жастар қанатының төрағасы қызметін қоса атқарады.
– Біз – Қазақстанға қоныс аударған кәрістердің үшінші ұрпағымыз. Сонау нәубет жылдары құшағын кең ашып, бізге қамқорлық көрсеткен қазақ халқына мың алғыс деп айтамыз. Сондықтан еліміздегі түрлі этнос өкілдерінің басын бір шаңырақ астына біріктірген Ассамблеядағы жұмысым да жаныма жақын. Қазақ және кәріс халқының тұтастығына өзімнің үлесімді қосқым келеді. Отбасымызда қазақша сөйлесеміз. Тіпті, Оңтүстік Кореядағы туыстарыммен қазіргі заманауи әдістермен байланысқа шыққанда да оларға қазақша үйретіп отырамын. Жай үйретіп қоймай, акцентпен сөйлесе, дұрыс нұсқасын айтамын, - дейді Темур.
Бұл жолғы байқауға Темурды Шымкент қалалық тілдерді оқыту-әдістемелік орталығының мамандары мұқият дайындаған. Жұмысынан бос кезінде, үйінде дайындалған Темур оқыған Абай өлеңдерінің үзінділерін 4 жастан асқан қызы да жаттап алған екен. Осылайша бір кездері елімізге жер аударылған кәріс этносы өкілдерінің төртінші ұрпағы қазақ болып өсіп келеді...
