Шымкент қаласында ерекше балалардың денсаулығына қатысты мәселелер қаралған «Ізгі істер уақыты» форумы өтті. Ерекше балаларға медициналық көмек көрсету бойынша ғылыми-практикалық конференцияға Қазақстан мен Ресейдің сала мамандары, дәрігерлер қатысты. Жиын барысында сөз алған Шымкент қаласы денсаулық сақтау басқармасының басшысы Нұрлыбек Асылбеков ерекше балаларды емдеп, сауықтыру үшін жүйелі жұмыстар атқарылып жатқанын айтты.
– Бүгінгі таңда 5 762 ерекше бала динамикалық бақылауға алынған. Жүйке-бұлшықет және зат алмасу ауруларына шалдыққан балаларға арнайы терапия қолжетімді болып отыр. Эпилепсиямен ауыратын балалар үшін антиэпилептикалық емдеу ауқымы кеңейді. Сонымен қатар, эпилепсия хирургиясының мүмкіндіктері де артты: фармакорезистентті эпилепсия кезінде кезбе жүйке пульс-генераторын орнату, генетикалық эпилепсия кезінде қалқанша денені кесіп алып тастау (коллозотомия), ошақты эпилепсия формаларында гемисферотомия операциялары жасалуда. Церебралды сал диагнозы қойылған тірек-қимыл аппараты бұзылған балаларға арналған оңалту және қалпына келтіру қызметтері де бұрынғыдан көбірек көрсетіле бастады. Қалалық балалар клиникалық ауруханасында ерекше балаларға наркозбен стоматологиялық көмек көрсетуге арналған стоматологиялық кабинет ашылды. Дәл сондай кабинет 18 жастан асқан ерекше диагнозы бар жандарға №1 қалалық клиникалық ауруханада ашылған. Сондай-ақ, неонаталдық жастан бастап пациенттерге нейровизуализация әдістері қолжетімді бола бастады, – деді Нұрлыбек Абибуллаұлы.
Басқарма басшысы Н.Асылбековтің айтуынша, ең алдымен, кадр даярлауға баса мән беріліп жатыр. Шымкент дәрігерлері екі жылдан бері Израиль, Түркия секілді мемлекеттерде біліктілік жоғарылату курстарынан өткен. Емханалардың мамандарын да оқыту – күн тәртібінде тұрған мәселе. Басқармаға қарасты мекемелердің психологтары кезең-кезеңімен оқытылып жатыр.
Шымкент қаласының штаттан тыс бас неврологы Гүлнұр Панова: «Бұл форумның мақсаты – ерекше балалардың өмірін жеңілдету және түрлі асқынулардың алдын алу. Қалалық балалар ауруханасында сирек кездесетін жұлын-бұлшықет атрофиясымен ауыратын балалар әр төрт ай сайын ем алып отырады. Мұндай балалардың қозғалу, тамақтану, тіпті, тыныс алуы қиындайды. Осындай және церебралды сал ауруы, эпилепсия диагнозы бар балалардың өмірін жеңілдету үшін әр 6 ай сайын немесе баланың денсаулық жағдайына қарай арнайы емдік терапия қолданылып отырады. Ауруханамыздың базасындағы стоматологиялық кабинетте аутизмі бар балаларға да қызмет көрсетіледі. Жұлын-бұлшықет атрофиясы бар балаларға «Спинраза» деген дәріні енгізу арқылы қозғалыс жүйесін жақсартамыз. Соңғы екі жыл ішінде гендік және зат алмасу ауруларын хромосомалық деңгейде анықтау сапасы артты: тандемді масс-спектрометрия және MLPA (ДНҚ-ның мақсатты бөліктерімен олигонуклеотидті зондтардың гибридизациясына негізделген әдіс) қолданыла бастады», – деді.
Аталған форум елімізде осымен төртінші рет өткізіліп отыр. «Ізгі істер уақыты» қайырымдылық қорының атқарушы директоры Елена Береговая Қазақстан мен Ресейдің дәл осы бағытта тәжірибе алмасуына себеп көп екенін айтады. Екі елдегі ерекше жандардың өмір сапасын жақсартуды көздеген ауқымды форумда қазір есейіп кеткен ерекше балалардың мәселесі кеңінен талқыланды. Өйткені, бұл тек балалық шақта ауырып, кейіннен тоқтатып қоя салмайтын созылмалы проблема.
– Біз жеке тәжірибесі, кейсі мол спикерлерді шақырдық. Олар тек теориялық түрде емес, іс жүзінде де тәжірибе алмасады. Нәтижесінде әрбір қатысушы өз жұмысына қолданар қажетті мағлұмат алып кетеді, – деп сөзін қорытындылады Елена Береговая.
Мөлдір КЕНЖЕБАЙ
