Бүгінде әлем бойынша инфекциялық аурулардың таралуы жаһандық денсаулық сақтау саласы үшін үлкен алаңдаушылық тудырып отыр. Солардың бірі – Конго-Қырым геморрагиялық қызбасы (КҚГҚ). Бұл – аса қауіпті вирус арқылы жұғатын жұқпалы ауру, оның клиникалық ағымы ауыр, кей жағдайларда өлімге әкелуі мүмкін.
Конго-Қырым қызбасының қоздырғышы – Nairovirus туыстығына жататын вирус. Бұл вирус адамға көбіне кенелер арқылы, яғни табиғи ошақтарда тіршілік ететін кенелердің шағуы арқылы жұғады. Сондай-ақ, ауру жұқтырған малдың қанымен немесе басқа да биологиялық сұйықтықтарымен жанасқанда да жұғуы мүмкін. Медициналық қызметкерлерге науқастармен тікелей жұмыс істеу кезінде де жұғу қаупі жоғары.
КҚГҚ белгілері кененің шаққанынан кейін 1–3 күн ішінде байқала бастайды. Алғашқы симптомдар:
• Жоғары дене қызуы (39–41°C),
• Бастың қатты ауруы,
• Бұлшықет пен буындардың ауыруы,
• Әлсіздік, жүрек айну, құсу.
Кейінірек:
• Теріден, мұрыннан, асқазаннан қан кету,
• Ішкі ағзалардан қан кету белгілері пайда болуы мүмкін.
Аурудың алдын алу үшін ең тиімді әдіс – профилактика. Оған мыналар жатады:
• Табиғи ошақтарда (орман, жайылым) болғанда жабық киім кию, кенелерден қорғанатын құралдар (репелленттер) қолдану,
• Мал сою кезінде қорғаныш қолғап, көзілдірік пайдалану,
• Науқастармен жанасқанда медициналық стандарттарға сай қорғаныс құралдарын қолдану.
Конго-Қырым қызбасы – сирек кездесетін, бірақ өте қауіпті ауру. Оның алдын алу – әр адамның, әсіресе ауыл шаруашылығы және медицина саласында жұмыс істейтін азаматтардың міндеті. Кенелерден сақтанып, қауіпсіздік шараларын қатаң ұстану арқылы біз өзімізді де, жақындарымызды да қорғауға мүмкіндік аламыз.
А.ЖҰМАНОВА,
«СТУДЕНТТІК ЕМХАНА»
ЖШС-і ЖТЖ бөлімінің
меңгерушісі
