Астанада бокстан World boxing ұйымы аясындағы әлем кубогы бәсекесі мәресіне жетті. Бұл сында ел боксшылары жалпыкомандалық есепте үздік шықты. Отандастарымыз жалпы 16 жүлде – 8 алтын, 4 күміс, 4 қола жүлде еншіледі. Осылайша ұлттық құрама боксшылары жалпы командалық есепте 1-орынға тұрақтады. Президент Қасым-Жомарт Тоқаев бокстан Әлем кубогының финалын жанкүйерлермен бірге тамашалады.
World Boxing Әлем кубогына қатысу үшін 29 елден 250 боксшы келген. Бұл – рейтингтік жарыс. Жеңімпаздардың әрбір ұпайы олимпиадаға жолдама алуға әсер етеді.
Турнирде Қазақстан құрамасының үздік былғары қолғап шеберлері бақ сынады. Назым Қызайбай, Махмұд Сабырхан, Бекзат Нұрдәулетов, Виктория Графеева, Наталья Богданова және Санжар Тәшкенбай, Сабыржан Аққалықов және Айбек Оралбай World Boxing кубогының алтын медалін жеңіп алды. Ал Нұрбек Оралбай, Елдана Тәліпова, Алуа Балқыбекова және Надежда Рябец күміс жүлдеге ие болды. Сағындық Тоғамбай, Аида Әбікеева, Айдана Забынбекова қола жүлдеге қол жеткізді.
Мемлекет басшысы ұлттық құрама боксшыларымен әңгімелесіп, алдағы жауапты бәсекелерде сәттілік тіледі.
– Жеңістеріңіз құтты болсын! Бокспен тек мықты, күш-жігері мол адамдар шұғылданады. Бұл – ерекше спорт. Баршаңызға сәттілік тілеймін. Мемлекет әрқашан сіздерді қолдайды. Қазақстанда бокстың келешегі зор болатынына ешқандай күмәнім жоқ, – деді Қасым-Жомарт Тоқаев.
Байрақты бәсекеде біршама жағдайларға қанық болдық. Ұлттық құрама боксшыларының алдағы жауапты сындарға дайындығына баға берілді. Сонымен, бұл бәсекеде ағайынды Оралбайлар ерледі. Айбек Оралбай аса ауыр салмаққа төселіп келетінін байқатты. Биыл Азия чемпионатында топ жарған болатын. Енді міне, дүбірлі бәсекеде де алтын жүлдемен қуантты. А.Оралбай шешуші сында Германия боксшысы Никита Путиловпен қолғап түйістірді. Өте тартысты өткен айқаста жерлесіміздің мерейі үстем болды. Есеп: 5:0. Аса ауыр салмақтағы басты үміт артар боксшы ширек финалда италиялық Диего Лензиден, жартылай финалда әзірбайжандық Махаммад Абдуллаевтан (Әлем чемпионатының 2 мәрте қола жүлдегері) басым түсті. Ал Нұрбек Оралбай 80 келіде финалға дейін жетіп, күміс жүлдені қоржынға салды.
Әлем чемпионы Бекзад Нұрдәулетов (86 келі) финалда Үндістан боксшысы Жугну Жугнуды қапы қалдырды. Жерлесіміз гонг соғылған сәттен белсенділік танытып, 1-раундта нокдаунға да жіберді. Қалған уақытта да Бекзат басымдығын сақтап, 5:0 есебімен басым түсті.
Әлем чемпионы Санжар Ташкенбай, жастар арасында әлем чемпионы Сабыржан Аққалықов та бабында екенін байқатып, мәртебелі кубокты иеленді. Жас дарындар жанкүйерлер сенімін ақтай білді.
Сондай-ақ, Олимпиада ойындарының жүлдегері, үш дүркін әлем чемпионы Назым Қызайбай бастаған әйелдер құрамасы да жеңістерімен қуантты.
Бұған дейін шымкенттік өрен Махмұд Сабырханның қадамы сәтті екенін жазған едік. Жерлесіміз 55 келіде жапониялық қарсыласының шаршы алаңға шықпауына байланысты шаппай-ақ бас бәйгені олжалады. Руи Ямагучи (2022 жылғы жастар арасындағы әлем чемпионатының қола жүлдегері) финалдық жекпе-жектен бас тартты.
Жерлесіміз бұл жолғы бәсекеде Оңтүстік Корея, Филиппин, Болгария және Жапония елінің мықтыларын жеңді. Барлық жекпе-жегінде керемет бокс үлгісін көрсетіп, жанкүйерлердің қолдауына ие болды. Иә, әлем чемпионы Махмұд Сабырхан ширығып тұр. Мұнымен тоқтамақ емес. Алда әлем чемпионаты сынды маңызды жарыстар бар.
Бас бапкер Қайрат Сәтжанов әлем кубогын қорытындылап, алдағы әлем чемпионатына осы сында топ жарғандар баратынын мәлімдеді. Және 70 килода тағы бір жерлесіміз Төрехан Сабырханға сенім артылатынын атап өтті. Сонымен, ағайынды Махмұд және Төрехан Сабырхандар алдағы әлем чемпионатына қызу дайындық жүргізуде. Біз жерлестерімізге сәттілік тілейміз.
Тағабай ҚАСЫМОВ
