Шымкент қаласында балалардың жазғы демалысын ұйымдастыру, жаңа оқу жылына дайындық, қоғамдық көлік желісін жақсарту мен азық-түлік бағасын тұрақтандыру бағытында кешенді шаралар атқарылып жатыр. Бұл туралы өңірлік коммуникациялар қызметінде өткен баспасөз мәслихатында Шымкент қаласы әкімінің орынбасары Сәрсен Құранбек мәлімдеді.
Жаз мезгілінде әлеуметтік жағдайы төмен және көп балалы отбасылардан шыққан 8 мыңға жуық бала қала сыртындағы сауықтыру лагерлеріне жолдама алған. Бұл – мемлекет тарапынан балалардың қауіпсіз әрі пайдалы демалысын қамтамасыз етуге бағытталған маңызды қолдау. Сонымен қатар, жаңа оқу жылына дайындық та қарқынды жүріп жатыр. Биыл 27 546 бүлдіршін мектеп табалдырығын алғаш рет аттамақ. Бүгінде оның 21097-сі тіркеліп үлгерген. Өтініштердің басым бөлігі электронды форматта egov.kz порталы арқылы қабылданған. Әкімдік ата-аналарға қағаз түрінде емес, цифрлық өтініш берудің ыңғайлы екенін ескертті. Сондай-ақ, әлеуметтік жағдайы төмен отбасыларға «Мектепке жол» акциясы аясында әр оқушыға 46500 теңгеден қаржылай көмек көрсетілмек. Бұл көмекті 56 мыңнан астам бала алатыны белгілі болды. Жалпы осы мақсатқа жергілікті бюджеттен 2,6 миллиард теңгеден астам қаржы бөлініп отыр.
Әлеуметтік қолдаумен қатар жұмыспен қамту саласында да жүйелі істер қолға алынған. Сәрсен Абайұлы Құранбектің айтуынша, жыл басынан бері 770 адам қысқа мерзімді оқыту курстарына жіберілген. Оның 610-ы колледждерде және оқу орталықтарында білім алып жатса, қалғаны жұмыс беруші мекемелер базасында өндірістік тәжірибеден өтуде. Бұл азаматтарға мемлекет есебінен шәкіртақы төленеді. Қайта даярлау курстары негізінен сұранысқа ие мамандықтарды қамтиды. Атап айтқанда, аспаз, тігінші, электрик, визажист, шаштараз және есепші сынды бағыттар бар.
Баспасөз жиынында қоғамдық көлік мәселесі де назардан тыс қалған жоқ. Қала аумағында қазіргі таңда 2335 аялдама бар. Биылдың өзінде 300-ге жуық жаңа аялдама павильоны орнатылып, ескілері жаңартылған. Сонымен қатар, автобустарға дыбыстық хабарлау жүйесі кезең-кезеңімен енгізілуде. Қазірдің өзінде 1003 қоғамдық көлікке бұл жүйе орнатылып үлгерген. Жыл соңына дейін тағы 117 автобусқа орнату жоспарланған. 2025 жылдың соңына дейін бұл технология барлық бағыттарда толық іске қосылмақ.
Күн тәртібіндегі тағы бір өзекті мәселе – азық-түлік бағасын тұрақтандыру. Соңғы уақытта сиыр етінің бағасы шарықтағаны белгілі. Осыған байланысты әлеуметтік дүкендер желісі арқылы еттің бір келісін 2620 теңгеден сату ұйымдастырылған. Алайда, сүйексіз ет пен деликатес өнімдері әлеуметтік маңызы бар азық-түлік тізіміне кірмейтіндіктен, олардың бағасы нарық талабына сай қалыптасады. Бағаны негізсіз өсірген 197 кәсіпкерге әкімшілік шара қолданылып, тәртіпке келтіру жұмыстары жүргізілген.
Шаһардың санитарлық тазалығы да әкімдіктің жіті бақылауында. Жақында Қаратау ауданында тұрғындар тарапынан заңсыз қоқыс төгу дерегі анықталып, жергілікті атқарушы орган тарапынан тиісті хаттама толтырылып, аумақ тазаланған. Мұндай жұмыстар алдағы уақытта да жалғасатын болады. Қаладағы тазалық пен тәртіпті күшейту мақсатында «Таза
Қазақстан» акциясы аясында сенбіліктер тұрақты түрде ұйымдастырылып келеді.
Жиын барысында тұрғындар тарапынан әлеуметтік желілер арқылы жолданған сауалдар мен ұсыныстар да назарға алынды. Ресми өкіл қала әкімдігінің әр пікірге жауап беріп, қоғаммен ашық жұмыс істеуге дайын екенін білдірді.
Гүлжауһар ТЕМІРХАНҚЫЗЫ
