Жастардың еңбек нарығына сенімді қадам басуына өндірістік тәжірибе зор мүмкіндік береді. Бүгінде ол тек білім мен дағдыны шыңдайтын алаң ғана емес, сонымен қатар ақылы түрде ұйымдастырылып, кәсіби мотивацияны арттыратын тиімді құралға айналып отыр.
Қазіргі таңда «Жол активтерінің ұлттық сапа орталығы» Шымкент қалалық филиалында жоғары оқу орнын бітірген екі түлек тәжірибеден өтуде. Ең бастысы – олар өз мамандығына сай тәжірибе жинақтап қана қоймай, еңбекақы алып, уақытша жұмыспен де қамтылды.
Солардың бірі – Ерқасым Худайбергенов. Түркістан облысының Мақтарал ауданында дүниеге келген жас маман Алматыдағы М.Тынышбаев атындағы Қазақ көлік және коммуникациялар академиясында «Автомобиль жолдары және аэродромдар» мамандығын игерген. Бүгінде бала күнгі арманы болған салада алғашқы кәсіби қадамдарын жасап жүр.
– Кішкентай кезімнен жол саласына қызығып, осы салада еңбек етуді армандадым. Қазір сол арманға бір табан жақындадым. Университеттен кейін жұмыс таба алам ба деп алаңдайтынмын. Бір күні «Ярмарка вакансий» сайтынан өз мамандығыма сай жұмыс іздедім. Осы филиалда орын бар екенін көріп, университет арқылы осы жерге жіберілдім. Бұл мен үшін үлкен мүмкіндік болды, – дейді жас маман.
Филиалда тәжірибеден өтушілер зертханалық жұмыстарға қатысып, жол сапасын тексеру әдістерін меңгеруде.
– Жас мамандар теориялық білімін тәжірибемен ұштастырып, тәжірибелі инженерлерден үйреніп жатыр. Олардың білімі мен қабілетіне қарай еңбекақы төлеу қарастырылған. Университетті бітірген соң, үздіктердің жол саласында тұрақты жұмысқа орналасуына мүмкіндік мол, – дейді филиал директорының міндетін атқарушы Ермек Намазов.
Қазіргі таңда елімізде жол саласына білікті кадр тапшылығы сезілуде. Сондықтан орталық жаңа буын мамандарын даярлауға ерекше көңіл бөліп отыр. Бұл бастама жас түлектердің кәсіби дамуына ғана емес, тұтас саланың тұрақты дамуына серпін берері анық.
С. ТҰРҒАНТАЙҚЫЗЫ
