Шымкент қаласы Қоғамдық кеңесінің кезекті отырысы өтті. Отырысты Шымкент қаласы қоғамдық кеңесінің төрағасы Бұхарбай Парманов жүргізді. Жиынға кеңес мүшелері, БАҚ өкілдері, тиісті мемлекеттік орган басшылары қатысты.
Күн тәртібіне сәйкес, Қазақстан Республикасы Ұлттық экономика министрлігі табиғи монополияларды реттеу комитетінің Шымкент қаласы бойынша департаментінің басшысы К.Көшекбаевтың, қалалық жайлы ортаны дамыту басқармасының басшысы Ә.Оңғардың, ішкі саясат және жастар істері басқармасының басшысы А.Жұмағұлованың баяндамалары тыңдалып, назарға алынды.
Шымкент қаласы табиғи монополиялар субъектілерінің тіркелімінде 76 қызмет түрі бойынша 56 субъект енгізілген. Бұдан басқа, қоғамдық маңызы бар нарықтың 1 субъект бар.
Департамент 5 базалық субъектінің қызметін реттейді. Олардың қатарында «Су құбыры және канализация», «Су ресурстары – Маркетинг», «3-Энергоорталық», «Қуатжылуорталық-3» және «QAZAQGAZ AIMAQ» секілді кәсіпорындар бар. Барлығының 5 жылдық тарифтері заң талабына сәйкес бекітіліп, сол тарифтер бойынша жұмыс істеп жатыр.
Шымкент қаласының қалалық жайлы ортаны дамыту басқармасының 2025 жылға жоспарланған бюджеті 26 миллиардтан астам қаржыны құрайды. Оның ішінде мемлекеттік-жекеменшік әріптестік аясында іске асырылатын жобаларға – 15 млрд. 175,6 млн. теңге бағытталған. Оның ішінде каналдардың техникалық жай-күйін күтіп ұстау және жақсарту, су ағынын бақылау және арттыру жұмыстарына – 3 млрд. 106,6 млн теңге, күтіп ұстау шығындарына – 217,4 млн теңге, дендрологиялық саябақты күтіп ұстау шығындарына – 763,3 млн теңге, «Жасыл Белдеу» мекемесіне қарасты аумақтарды күтіп ұстауға – 515,6 млн теңге, сондай-ақ, қала көшелері мен саябақ аумақтарын абаттандыру, көгалдандыруға 4 млрд 332,7 млн теңге бағытталған.
Мұнан кейін қалалық ішкі саясат және жастар істері басқармасының басшысы А.Жұмағұлованың басқарманың ағымдағы жұмысы жөнінде баяндады. Оның айтуынша, басқарманың биылға арналған тиісті іс-шаралар жоспары бекітіліп, оған сәйкес тиісті жұмыстар жүргізілуде.
Қоғамдық кеңес мүшелері баяндамашыларға өз тараптарынан тиісті сұрақтар қойып, ұсыныстарын айтты. Кеңес төрағасы Б.Парманов күн тәртібінде қаралған мәселелер бойынша қоғамдық бақылау жүйелі түрде жүргізілетінін атап өтті.
Мөлдір КЕНЖЕБАЙ
