Қаланың тұрақты дамуы ең алдымен инвестициялық ахуалға байланысты. Капитал тарту артқан сайын экономикаға жаңа серпін беріліп, оның игілігі әлеуметтік инфрақұрылым арқылы тікелей халықтың тұрмыс сапасына әсер етеді. Осы тұрғыдан алғанда, Шымкенттің соңғы жылғы көрсеткіштері инвестор сенімі мен мемлекеттік жоспарлаудың бір арнаға тоғысқанын аңғартады.
Жыл қорытындысымен қала экономикасына тартылған инвестиция көлемі 859,5 млрд теңгеге жетіп, 7,5 пайызға өсті. Бұл – мегаполиске инвесторлардың қызығушылығы артқанын және бизнес үшін қолайлы орта қалыптасып келе жатқанын білдіреді. Тартылған қаржының басым бөлігі нақты сектор мен қаланың ұзақмерзімді дамуына бағытталған жобаларға жұмсалуы экономикалық өсімнің сапалы болуына негіз қалайды.
Инвестициялық белсенділіктің нәтижесі әлеуметтік салада да айқын көрініс тапты. 2025 жылы бюджет есебінен 3 мектеп пайдалануға беріліп, тағы 10 мектеп пен 1 балабақша күрделі жөндеуден өтті. Бұл – халық саны жылдам өсіп келе жатқан қала үшін аса өзекті мәселе. Білім беру нысандарының жаңаруы оқу орындарындағы орын тапшылығын азайтып, балалар үшін қолайлы әрі қауіпсіз орта қалыптастыруға мүмкіндік береді.
Сонымен қатар тұрғындардың салауатты өмір салтын ұстануына жағдай жасау мақсатында 2 модульді спорт кешені пайдалануға берілді. Мұндай нысандар әсіресе шағын аудандар мен жаңа қоныстанған елдімекендерде әлеуметтік теңгерімді сақтаудың тиімді құралына айналып отыр.
Қалалық инфрақұрылымды дамыту бағытында жол құрылысы да басты назарда болды. Халық тығыз қоныстанған барлық елдімекендерде жалпы ұзындығы 1 059 шақырым асфальт жол салынды. Бұл көрсеткіш қала ішіндегі көлік қатынасын жақсартып қана қоймай, тұрғындардың күнделікті өмір сапасына тікелей әсер ететін маңызды қадам саналады.
Жалпы алғанда, инвестиция көлемінің өсуі мен оның әлеуметтік инфрақұрылымға бағытталуы Шымкенттің дамуы тек экономикалық көрсеткіштермен шектелмей, нақты адамға, нақты аула мен көшеге жұмыс істей бастағанын көрсетеді. Мұндай тәсіл қаланың болашақтағы орнықты дамуына берік негіз қалайды.
