Соңғы уақытта қала аумағында үлескерлердің қаражатын тартуға рұқсаты жоқ құрылыс салушылардың азаматтарға тұрғын үй құрылысына қатысудың «тиімді» шарттарын ұсыну жағдайы жиілеп кетті. Мұндай ұсыныстар оңтайлы болып көрінгенімен, іс жүзінде қаржыңызды жоғалту қаупі жоғары.
Қазақстан Республикасының заңнамаларына сәйкес үлестік құрылысқа жеке және заңды тұлғалардың ақшалай қаражатын тарту уәкілетті орган (әкімдік) берген тиісті рұқсат болған жағдайда ғана мүмкін. Мұндай рұқсат жобаның бақылаудан өткенін, құрылыс салушының қаржылық тұрақтылық жөніндегі талаптарға сәйкес келетінін және құрылыс нысанының үлестік құрылыс нысандарының ресми тізіліміне енгізілгенін білдіреді.
Неліктен рұқсаты жоқ
объектілерге қаржы құю қауіпті? Себебі:
– Құрылыстың аяқталатынына кепілдік жоқ;
– Үлескерлердің тәуекелдері сақтандырылмайды;
– Қаржыны қайтаруды қамтамасыз ету мүмкіндігінің төмендігі;
– Құрылысты тоқтату немесе құрылыс салушының банкроттыққа ұшырау ықтималдығы жоғары.
Сондықтан жаңа құрылысқа бөліп төлеу шартымен қаржы құяр кезде келесі мәселелерге назар аударуды ұсынамыз:
– Құрылыс компаниясының «Қазақстан тұрғын үй компаниясы» АҚ-ның немесе қала әкімдігінің ресми сайтындағы тізімде бар екеніне көз жеткізіңіз;
– Егер құрылыс салушы ресми тізілімге енгізілмеген болса, келісімшарт жасамаңыз.
Арзан – қауіпсіз дегенді білдірмейді! Тұрғын үй құрылысына үлескер болу – бұл сіздің болашағыңызға салынған инвестиция және ол заңмен қорғалуы тиіс.
Д. БЕКЕМБАЕВ
Шымкент қаласы прокуратурасының басқарма аға прокуроры
