Президентіміздің бүгінгі мәлімдемелері біздің елдің дамуында маңызды кезеңдерді көрсетіп, әрбір азаматтың азаматтық жауапкершілігін арттыру қажеттілігін баса айтты. Бұл сөздер, шын мәнінде, біздің қоғамымыздың даму бағытында жаңа бетбұрыстар мен реформаларды қажет ететін уақыттың келгенін айқындайды. Заңның үстемдігі, отбасы мен некенің институтын нығайту, мемлекеттік рәміздерге деген құрмет — барлығы да біздің бірлігімізді, тұрақтылығымызды және болашаққа деген сенімімізді нығайтуға бағытталған маңызды қадамдар.
Әсіресе, отбасы мен неке институтын нығайту, мемлекетіміздің құндылықтарын сақтай отырып, әрбір азаматқа өз таңдауын жасай алу құқығын беру — біздің қоғамдағы татулық пен келісімді сақтаудың кепілі болып табылады. Мемлекет тек заң мен тәртіпті сақтауды ғана емес, сонымен қатар әр азаматтың ар-намысын, бостандығын және құқықтарын қорғауды қамтамасыз етеді. Бұл әрқайсымыздың азаматтық жауапкершілігімізді арттырып, елімізді алға жетелейді.
Мемлекеттік рәміздерді қадірлеу мәселесі де өзекті. Қазақстанның туы мен елтаңбасы — біздің егемендігіміздің, еркіндігіміздің символы. Оларды дұрыс және салтанатты түрде пайдалану арқылы біз тек өз Отанымызға деген құрметімізді емес, сондай-ақ ұлттық бірегейлігімізді де нығайтамыз. Бұл — әрқайсымыздың ұлттық патриотизмімізді көрсететін маңызды белгі.
Цифрландыру мен жасанды интеллект дәуірінде біз өз ұлттық мұрамызды сақтап, оны жаһандық кеңістікке шығаруымыз қажет. Ұлттық цифрлық мұра қорының құрылуы — бұл өз тарихымыз бен мәдениетімізді әлемге таныту, әрі оны келешек ұрпаққа аманат ету жолындағы маңызды қадам. Бұл бастама біздің білімімізді, ғылымымызды, ұлттық құндылықтарымызды цифрлық форматқа енгізуге мүмкіндік береді.
Ұлы бабаларымыздың мұрасын ұлықтау — баршамыздың міндетіміз. Әл-Фараби, Яссауи, Абай сияқты ұлы тұлғалардың ілімдерін дәріптеу, олардың өмірі мен шығармашылығын зерттеу — еліміздің мәдени мұрасын сақтаудың негізі. Олардың өсиеттерін тек мерейтойлар кезінде ғана еске алып қоймай, тұрақты түрде ғылыми жиындар өткізіп, терең зерттеуіміз қажет. Бұл да біздің ұрпақтан-ұрпаққа жалғасатын білім мен мәдениеттің негізін қалыптастырады.
Біздің болашағымыз — ортақ күш-жігерде. Біз барша азаматтарымызды осы жолда белсенді болуға шақырамыз. Қазақстанның жарқын болашағы үшін бірлік пен келісімде болайық!
Ұлттық бірегейлігімізді сақтай отырып, елдігімізді өркендетейік!
Орынбай РАХМАНБЕРДИЕВ, мемлекет және қоғам қайраткері
