Қазақ – әдет-ғұрып пен салт-дәстүрді ерекше қастерлейтін, атадан мұра қылып, бүгінмен сабақтастыра білген дана халық. Әрбір салты мен дәстүрінің тәрбиелік мәні тереңде жатады. Өз ұрпақтарын қасиетті салт-дәстүрімен, өнегелі әдет-ғұрпымен, ырым-тыйыммен тәрбиелеп, ұлағатты ұл мен инабатты қызды теріс жолға түсірмей, түзу жолға бастай білген.
Шымкент қаласындағы Орталықтандырылған балалар кітапханалар жүйесіне қарасты №2 кітапхана бөлімшесінің ұйымдастыруымен халқымыздың салт-дәстүрін, тарихын білу, оны қастерлеу мақсатында «Салт-дәстүрім – салтанатым» атты ертеңгілік өтті. Қаладағы №118 «Әсел» бөбекжай бақшасының «Балдырған-4» мектепалды даярлық тобында өткен бұл іс-шарада, бүлдіршіндері өнерін ортаға салып, тәрбиешілерін қуанышқа бөледі.
Ертеңгілікте бүлдіршіндерге қазақтың ұлттық салт-дәстүрі, әдет-ғұрпы және ырым-тыйым сөздері, ұлттық ойын түрлері таныстырылып, түсінік берілді. Бейнеролик арқылы «Бесікке салу», «Тұсау кесу» сияқты салт-дәстүрлерден көріністер көрсетілді.
Бүлдіршіндер салт-дәстүр жайлы тақпақтар оқып, ән салып, би биледі. Сонымен қатар балалар «Қыз қуу», «Асық ату» сияқты қазақ халқының мәдени мұрасы саналатын ұлттық ойындарды ойнап, ырым-тыйым сөздерді айтуда белсенділіктерін танытты.
Қазақ халқының мәдениеті мен салт-дәстүрлерін жалғастыратын осындай өскелең ұрпақтарымыз аман болсын.
Ақмарал ДҮЙСЕНБЕКОВА,
Шымкент қалалық
ОБКЖ-нің №2 кітапхана
бөлімшесінің меңгерушісі
