Міне, еліміздің ең ардақты мерекелерінің бірі – Қазақстан Республикасының Конституциясының 30 жылдығы да келіп жетті. Ата Заңымыздың қабылдануы – халқымыздың тәуелсіздік жолдарындағы ең ұлы жетістіктерінің бірі. Конституция – елдің негізгі заңы ғана емес, мемлекеттің тірегі, қоғамның тұғыры.
Ұлы Дала елінің тарихына үңілсек, қазақ қоғамында да әрқашан заң үстемдігіне ерекше мән берілген. Әділдік – ел бірлігінің өзегі болған. Халықтың өмірін реттеп, дау-жанжалын шешкен билер институты – соның айғағы. Төле би, Қазыбек би, Әйтеке би сынды дана тұлғаларымыз «Тура биде туған жоқ, туғанды биде иман жоқ» деп, әділеттілікті бәрінен жоғары қойған. Біздің бүгінгі Конституциямыздың бастауында да сол дәстүр жатыр. Әз-Тәуке хан тұсындағы «Жеті жарғы» – қазақ халқының құқықтық мәдениетінің асыл қазынасы. Бүгінгі Ата Заңымыз сол дәстүрдің заңды жалғасы. Яғни, біз үшін әділет пен заң үстемдігі – тарихи құндылық.
1995 жылы бүкіл халықтық референдумда қабылданған Конституция Қазақстанның жаңа дәуірін ашты. Ол біздің мемлекетімізді демократиялық, зайырлы, құқықтық және әлеуметтік мемлекет ретінде бекітті. Әрбір азаматтың құқығы мен бостандығын қорғау – басты қағида болып жазылды. Бұл – «Заңды сыйлаған ел биікке шығады» деген сөздің айқын дәлелі. Сонымен бірге, Президентіміз Қасым-Жомарт
Кемелұлы Тоқаевтың бастамасымен 2022 жылы елімізде ауқымды конституциялық реформа жүргізілді. Ол да бүкілхалықтық референдум арқылы қабылданды. Бұл өзгерістер Әділетті Қазақстанды құру жолындағы маңызды қадам болды.
Реформаның негізгі ерекшеліктеріне тоқталар болсақ, Парламенттің өкілеттігі кеңейтілді, Мәжіліс пен Мәслихаттардың рөлі күшейді, Конституциялық сот құрылып, әрбір азаматқа тікелей жүгіну мүмкіндігі берілді. Саяси партия құру жеңілдетілді, саяси бәсеке артты.Жер және табиғи байлықтар халыққа тиесілі екені нақты жазылды.
Бұл өзгерістердің
барлығы – «Халық үніне құлақ асатын мемлекет» қағидасының жүзеге асуы. Президентіміз айтқандай, «Әділетті мемлекет – Адал еңбек пен Ар-намысты бағалайтын мемлекет».
Ата Заңымыз арқылы елімізде орнатылған құқықтық жүйе Қазақстанның экономикалық дамуына, халқымыздың әл-ауқаты мен өмір сүру сапасының артуына да оң ықпал еткені сөзсіз. Осы орайда айтулы мерекеге Шымкент қаласы да оң нәтиже, жақсы жетістіктермен келіп отыр. Атап айтқанда, биылғы қаңтар-маусым айларында Шымкент қаласында өнеркәсіп өнімінің көлемі 679,9 млрд. теңгені құрап,
15,9 пайызға артты. Оның ішінде өңдеу өнеркәсібі –
17,9 пайызға өсті. Ауыл шаруашылығының жалпы өнім көлемі 24,5 млрд. теңгені құрады немесе 3,4 пайызға артты. Инвестиция көлемі
359,9 млрд. теңгеге ұлғайып, 31 пайызға өсті. Құрылыс жұмыстарының көлемі
111,9 млрд. теңгені құрап,
20,2 пайызға ұлғайды. Пайдалануға берілген тұрғын үй көлемі 517,2 мың шаршы метр немесе 14,5 пайызға өсті.
Конституция – қағаздағы сөз ғана емес, ол – біздің күнделікті өміріміздің негізі. Әрбір азаматтың жүрегінде заңға құрмет болуы тиіс. Заң үстемдігі орнаған жерде әділет салтанат құрады, ал әділет бар жерде тұрақтылық, татулық, дамудың негізі бар.
Айдар ҚҰЛЖАНОВ
