Шаһарда көлік қызметкерлерінің кәсіби мерекесіне орай сала мамандарына арналған бірқатар тәжірибелік-танымдық іс-шаралар өтті. «Жұмысшы мамандықтар жылы» аясында ұйымдастырылған іс-шара сала қызметкерлерінің еңбегін насихаттау, кәсіпорындар арасында тәжірибе алмасу, серіктестікті нығайту, үздік мамандарды марапаттау мақсатында қолға алынған.
«NOMAD MOTORS SHYM» ЖШС-нде (KIA дилерлік орталығы) өткен іс-шараға Жол-көлік колледжінің әкімшілік өкілдері, арнайы пән оқытушылары мен өндірістік оқыту шеберлері, колледж білім алушылары, талапкерлер қатысты. Қатысушыларға өндірістік процесс пен заманауи құрал-жабдықтар таныстырылып, автокөліктерге қызмет көрсету және жөндеудің заманауи тәсілдері көрсетілді.
Қалалық білім басқармасының бас маманы Айгүл Рүстемова жұмысшы мамандықтар жылы аясында атқарылып жатқан жұмыстар, мақсатты білім беру тапсырысы, әлеуметтік серіктестікті дамыту аясындағы жобалардан хабардар етті.
Сондай-ақ, бүгінгі бағдарлама аясында «Автокөлікті бояу процесінде қолданылатын жаңа технологияларға шолу» тақырыбында шеберлік сағаты көпшілік назарына ұсынылады. BASF концернінің Ұлттық эксперті, COLORFACTORY GROUP компаниясының техникалық директоры М.Романов автокөліктерді бояуда қолданылатын заманауи химиялық және технологиялық шешімдерді таныстырды.
Тәжірибелік-танымдық іс-шаралар кәсіпорын мен білім беру ұйымдары арасындағы әріптестік байланысты нығайтып, білім алушылардың болашақ кәсіби бағытын анықтауға септігін тигізбек.
***
«Жұмысшы мамандықтар жылы» еліміздің кәсіптік-техникалық білім беру жүйесіне жаңа серпін берді. Осы бастаманың аясында техникалық бағыттағы оқу орындары мен өндірістік мекемелер арасындағы серіктестік нығайып келеді. Мұндай оң үрдістердің бірі – Жол-көлік колледжі мен көлік саласындағы жеке кәсіпкерлердің табысты әріптестігі арқылы көрініс тауып отыр.
Жарты ғасырдан астам тарихы бар Жол-көлік колледжі бүгінде елдегі техникалық білім беру ісінің алдыңғы қатарында келеді. Оқу орны заманауи құрал-жабдықпен қамтамасыз етілген, оқу-өндірістік шеберханалар мен арнайы кешенде студенттер тәжірибеден өтіп, заман талабына сай білім алып жүр. Колледждің оқу-өндірістік шебері Киелібек Жүнісовтің айтуынша, көлік жөндеу, сервистік қызмет көрсету, автоэлектрик секілді мамандықтарға қызығушылық жылдан-жылға артып отыр.
– Президентіміздің жұмысшы мамандықтарын қолдауы салаға тың серпін берді. Бүгінде жастар техникалық бағыттағы мамандықтардың болашағы зор екенін жақсы түсінеді. Өйткені, қазір әр отбасында кемінде бір, кейде екі автокөлік бар. Сонымен қатар нарықта Toyota, Hyundai, KIA маркалы көліктердің жаңа түрлері, Қытай автокөліктері көбейіп жатыр. Яғни, қызмет көрсету орталықтарына уақыт талабына, сұранысқа сай білікті мамандар қажет, – дейді ол.
Колледжде бүгінде үш мыңға жуық студент білім алып жүр. Олар оқу бағдарламасымен қатар нақты өндірістік тәжірибеден өтеді. Жаз мезгілінде, әсіресе, автосервис бағытындағы студенттер түрлі сервистік орталықтарда тәжірибе жинақтайды. Бұл бағытта колледж бен кәсіпкерлер арасында тұрақты серіктестік орнаған.
Мәселен, «ROYAL MOTORS» автосалоны жыл сайын Жол-көлік колледжінің студенттерін өндірістік тәжірибеден өткізеді. Автосалонның негізін қалаушы Бағлан Көпбаевтың айтуынша, қазіргі нарықта кәсіби білікті жұмысшы мамандардың орны ерекше.
– Қазіргі таңда Қытай автокөліктерінің үлесі 95 пайызға жетіп отыр. Бұл көліктер қолжетімді бағамен, бөліп төлеу мүмкіндігімен халық арасында үлкен сұранысқа ие. Соған сай сервистік қызмет көрсету бағытында да мамандар қажет. Біз колледжбен бірлесе жұмыс істейміз. Жаз мезгілінде студенттер бізде тәжірибеден өтіп, жұмыс тәсілдерін меңгереді. Олардың ішінде жұмысқа қалатындары да бар, – дейді кәсіпкер.
«Жұмысшы мамандықтар жылы» аясында өткен көлік қызметкерлерінің кәсіби мерекесіне арналған іс-шара тәжірибе алмасуға және серіктестікті нығайтуға бағытталды. Жас мамандардың қатысуымен өткен басқосуда үздік қызметкерлер марапатталды.
Тағабай ҚАСЫМОВ,
Гүлжауһар БАЖАҚАЙ
