Қала әкімі Ғ.Сыздықбеков алдағы жылыту маусымына дайындық барысымен танысты. Бүгінде жылумен қамту нысандарында ауқымды қалпына келтіру және алдын алу жұмыстары жүргізіліп жатыр. Қазіргі таңда гидравликалық сынақтардың нәтижесінде 98 ақау анықталып, оның 68-і жойылды. Бұл анықталған ақаудың шамамен 70 пайызын құрайды. Жөндеу жұмыстары тек магистральді желілерде ғана емес, ішкі орамдық жүйелерде де жалғасып жатыр.
Көп қабатты тұрғын үйлердің жылыту маусымына дайындығына ерекше назар аударылған. Қазір 2 154 көпқабатты тұрғын үйдің 456-сы дайын. Сонымен қатар, әлеуметтік нысандар – мектептер, ауруханалар, мәдениет және спорт мекемелері де жоспарлы түрде әзірленіп жатыр. 212 нысанның 104-і дайын.
Бұған қоса, қазандықтар мен сорғы станцияларының да дайындығы қатар жүргізілуде. 27 қазандықтың 16-сы, 40 мектеп қазандығының 20-сы дайын. Сорғы станцияларында да жөндеу бригадалары жұмыс істеп жатыр. Мұнда жоспарланған жұмыстың 47 пайызы орындалды.
Қазіргі таңда жабдықтарға жүргізіліп жатқан ағымдағы және күрделі жөндеу жұмыстары аяқталуға жақын. Қыркүйекке дейін ескі құбырлардың жылу оқшауламасы толық ауыстырылады. Сонымен қатар, 2 927 шибер тексерілуде, олардың шамамен 80-і жаңасына ауыстырылады. Бірқатар нысандарда ғимараттар мен қоршауларды сырлау, әктеу жұмыстары да жүріп жатыр.
Қатты отынмен жұмыс істейтін қазандықтар үшін 1 650 тонна көмір сатып алу жоспарланған. Қаладағы ауқымды жобалардың бірі аясында 137 учаскеде 33,2 шақырым жылу құбыры ауыстырылады. Бұл жұмыстар 10 қазанға дейін аяқталады. Бұған қоса, Күншығыс шағынауданындағы желілер жаңартылып жатыр. Онда ұзындығы 0,45 шақырым құбыр ауыстырылады. Сонымен қатар, 2029 жылға дейінгі ұлттық жоба аясында ЖЭС-3-тен ОНС-1 негізгі сорғы станциясына дейінгі магистральды жылу желісі қайта жаңғыртылады. Жалпы ұзындығы 17 шақырым құбыр жаңарады. Жобаның алғашқы кезеңі 2025–2026 жылдарға жоспарланған. Осы аралықта 4,5 шақырым құбыр ауыстырылады.
«ШК»-ақпарат
