Қазақстан – сан түрлі этнос өкілдері бейбіт өмір сүріп жатқан мемлекет. Біздің еліміз ұлтаралық келісім мен татулықты басты құндылық ретінде сақтап, әлемге тұрақтылықтың жарқын үлгісін көрсетіп келеді. Ақыны Жамбыл Жабаевтың «Келісім дауылға төтеп беретін үй секілді» деген қанатты сөзі осы идеяны тереңінен ашып, ел бірлігінің маңызын көрсетеді.
Қазақ халқы ежелден дархан көңілімен ерекшеленіп, түрлі ұлт өкілдерін бауырына басқан. ХХ ғасырдағы тарихи қиындықтар – күштеп ұжымдастыру, саяси репрессиялар мен депортациялар кезінде Қазақстан көптеген этностарға пана болды. Осы қиын кезеңдерде қазақ халқы мейірімділігі мен жанашырлығын көрсетіп, тағдыр тәлкегіне ұшыраған халықтарға қолдау білдірді. Сол себепті бүгінде Қазақстандағы ұлтаралық татулықтың негізі тарихпен тығыз байланысты.
1995 жылы құрылған Қазақстан халқы Ассамблеясы – еліміздегі этносаралық келісімді нығайтуға бағытталған бірегей институт. Бұл ұйым әртүрлі этномәдени бірлестіктердің басын қосып, олардың өзара ынтымақтастықта жұмыс істеуіне мүмкіндік береді. Ассамблеяның арқасында Қазақстанда әр халықтың тілі, мәдениеті мен салт-дәстүрлері сақталып, дамып келеді.
Қазақстанның ұлтаралық келісім саясаты тек бейбіт өмірді қамтамасыз етіп қана қоймай, елдің экономикалық және әлеуметтік дамуына да ықпал етеді. Бүгінде елімізде жүзден астам этнос өкілі өмір сүріп, өз мәдениетін, ділін сақтай отырып, біртұтас қазақ қоғамының ажырамас бөлігіне айналған. Мемлекет басшысы Қасым-Жомарт Тоқаев өз сөзінде: «Біздің басты байлығымыз – ел бірлігі мен татулығы» деп атап өткен болатын. Осы ұстанымды басшылыққа ала отырып, Қазақстан тұрақтылық пен келісім саясатын жалғастырып келеді. Осы күні әлем түрлі сын-қатерлерге тап болуда. Жаһандану, геосаяси өзгерістер және экономикалық дағдарыстар жағдайында ұлтаралық келісімді сақтау бұрынғыдан да маңызды.
Қазақстанның бейбітшілік пен келісім саясаты еліміздің болашағына берік негіз қалап, жас ұрпаққа бірлікті сақтау міндетін жүктейді. Біз, қазақстандықтар, татулық пен тұрақтылықтың қадірін біліп, ел болашағы үшін осы құндылықтарды сақтап, нығайтуымыз қажет. Себебі келісім дауылға төтеп беретін берік үй іспетті. Бірлік бар жерде – береке бар.
Асан ДЖАЛИЛОВ,
Шымкент қалалық ҚХА жанындағы
Ғылыми-сарапшылық тобы жанындағы
Жас ғалымдар клубының мүшесі,
Қ.А.Ясауи атындағы ХҚТУ-дің 2-курс докторанты
