ӘБІЛДА АЙМАҚТЫ ЕСКЕ АЛУ КЕШІ ӨТТІ Избранное

Пятница, 12 Апрель 2024 04:36 Автор  Опубликовано в Мәдениет Прочитано 1542 раз

Әл-Фараби атындағы қалалық ғылыми-әмбебап кітапханасында ақын, халықаралық «Физули» сыйлығының иегері Әбілда Аймақтың 70 жылдығына орай «Мен шығармын шынында өлең деген» атты еске алу кеші өтті.

abilda

 

Кеш қонағы ретінде ақын-жазушылар, жоғары оқу орындарының студенттері, мектеп оқушылары, өнерсүйер қауым қатысты. Рухани кеш ақынның үзеңгілес достары-қаламдастары, шәкірттерінің, зиялы қауым өкілдерінің жылы естеліктерінен бастау алып, марқұмның қалам ұшынан тамған өлең-жырлармен шырқалуымен жалғасты. Іс-шарада ақынның шығармашылығына арналған «Рухы биік, тағлымы терең ақын» тақырыбында кітап көрмесі ұйымдастырылды.
– Әбілда Аймақ қазақ поэзиясында өз орны бар ақын. Өкінішке қарай, көзі тірісінде лайықты бағасын ала алмай кетті. Әйтпесе Фариза Оңғарсынова, Мархабат Байғұт сияқты классик ақын-жазушылардың өзі Әбілда ағамыздың шығармашылығына жоғары бағасын берген болатын. Ағамыз тым қарапайым жан еді. Өлең-жырдың майданында қаншалықты биік болса, өмірде соншалықты қарапайым болды, – деді Әл-Фараби атындағы қалалық ғылыми-әмбебап кітапханасының директоры Анар Жаппарқұлова.
Ұйымдастырушылардың айтуынша, еске алу кешінің тағы бір мақсаты – ақынның шығармашылығы арқылы өскелең ұрпақтың бойында тілге, Отанға деген махаббат сезімін ояту.
– Әбілда ағамыздың қасында 20 жылдан астам уақыт жүрдім. Аға-іні болып сыйластық. Менің өлеңдерімді оқып, ұдайы бағыт-бағдар беріп тұратын. «Соңыңыздан ерген шәкірттерден кімнен үміт күтесіз?» деп журналистер сұрақ қойғанда, менің атымды атайтын. Әбекеңнің жаны жұмсақ еді, барлық адамға жақсылық жасауға асығып тұратын, – деді ақынның шәкірті, жазушы Қанат Сапарбай.
Айта кетейік, биыл «Бір ел – бір кітап» акциясы аясында ел бойынша Бердібек Соқпақбаевтың шығармалары насихатталуда. Ал, Шымкент қаласы бойынша «Бір қала – бір кітап» акциясы аясында
Мархабат Байғұт, Әбілда
Аймақ, Қаныбек Сарыбаев және Шойбек Орынбайдың шығармашылығы насихатталып, әдеби кештер ұйымдастырылуда.

Абылайхан ОРАЗАЛИЕВ

Редакция

Қалалық «Шымкент келбеті» «Панорама Шымкента» газеттері 1990 жылдың 21 шілдесінен бастап шығады. Басылымның құрылтайшысы - Шымкент қаласы әкімдігі. Шығарушы - «Шымкент ақпарат орталығы» ЖШС-і. Қоғамдық-саяси газет қаланың тыныс-тіршілігін сипаттап, жаңалықтармен хабардар етеді.