Шымкент келбеті

Әлеуметтің әлеуетін арттыруға бағытталған «Бизнестің жол картасы – 2020» бағдарламасы бүгінде өз кәсібін дөңгелетуге ден қойған ел азаматтарына айтарлықтай сеп болуда. Бұл орайда, мемлекеттік бағдарламаның игілігін көріп, жәрдем алған белсенді топтың үлес салмағын сараптар болсақ, шымкенттік кәсіпкерлердің қатары қалың екенін аңғарамыз.

Тек ағымдағы жылы «Бизнестің жол картасы – 2020»бағдарламасы аясында Шымкент қаласында 57 жобаның қаржыландырылуы жоспарланған болатын. Күні бүгінге дейін жалпы саны 79 жоба мақұлданып, межелі жоспар 139 пайызға орындалған. Нақтылай кетсек, бағдарламаның бірінші бағыты, яғни, несиенің пайыздық мөлшерін субцидиялау бойынша 62 жобаға қолдау көрсетіліп, 20 миллиард 1 миллион теңгенің жәрдемі көрсетілген. Сондай-ақ, банктегі несиелерді кепілдендіру бойынша – 4 жоба, өндірістік инфрақұрылымды дамыту бағытында – 1 жоба, грант негізінде – 7 жоба іске асырылған. Ал, үшінші бағыт, яғни, экспортқа бағытталған банктегі несиелерді субсидиялау бойынша тиісінше, жалпы құны 4 679,7 миллион теңгені құрайтын 5 жоба қолдау тауып отыр.  
– Жалпы, аталмыш бағдарлама Мемлекет басшысы артқан сенім үдесінен шықты деп толық айта аламыз. Әлем елдерін әбігерге салған дағдарыс кезінде қабылданған құжат қоғам үшін өзінің қажеттілігін байқатып, айтарлықтай нәтиже беруде, – дейді қалалық кәсіпкерлік бөлімінің басшысы Асқар Қаныбеков.
Сонымен қатар, биыл «Максимум» аймақтық инновациялық орталығы» ЖШС-і арқылы 1 846,3 миллион теңгені құрайтын 32 жоба мақұлданған. Ондағы жылдық қаржы несиелері 7 пайызбен, ал, лизинг несиелері 8 пайызбен ұсынылғанын да атай кеткен жөн.

Елімізде Үдемелі индустриялық-инновациялық бағдарлама аясында пайдалануға берілген кәсіпорындардың өз өнімдерін шығара бастағаны көңілге қуаныш ұялатады. Осы бағытта бірегей жобаларын ұсынған «Textiles.kz» компаниялар тобы да отандық өнімдердің өрісін кеңейтіп, мақта талшығын қажетке жаратпақ ниетте. Нәтижесінде, тұтынушыларға сапалы өнімдер ұсынылмақ.

Шымкент қаласында «Textiles.kz» компаниялар тобына кіретін «Ютекс» және «Меланж» акционерлік қоғамдарының тоқыма фабрикалары қайта іске қосылды. Айта кетейік, бұл тоқыма фабрикаларының жұмысы бірнеше жылдан бері тоқтап тұрған болатын. Шикізат алуға және өндірістік шығындарды жабуға айналымдық қаражаттың жеткіліксіздігі, сонымен қатар, 2008-2009 жылдары әлемдік қаржылық-экономикалық дағдарыс пен әлемдік нарықтағы мақта шикізаттарына бағаның көтерілуі «Ютекс» пен «Меланж» мекемелерінің жұмысын уақытша тоқтатуға себеп болған еді.
Бүгінде аталмыш кәсіпорындар «Textiles.kz» компаниялар тобының «Дағдарыстан кейінгі қалпына келтіру-2020» бағдарламасына енгізілген. Өз кезегінде, кәсіпорындардың қызметін қайта жандандыру үшін Қазақстанның Даму Банкі жалпы құны 64,5 миллион АҚШ долларын құрайтын несие желісін беріп отыр. Оның ішінде, 5 миллион АҚШ доллары – «Ютекс kz» АҚ кешені өндірістік құрылысының аяқталуына, қалған 59,5 миллион АҚШ доллары – «Меланж», «Ютекс» және «Ютекс kz» акционерлік қоғамдарына мақта талшықтарын сатып алуға жұмсалмақ. «Меланж» және «Ютекс» акционерлік қоғамдары фабрикаларының өндіріс қуаттылығы жылына 17,8 мың тоннаны құрайтын болады. Ал құрылысы 2016 жылы аяқталатын «Ютекс kz» фабрикасы өндірісінің қуаттылығы жылына 8,4 мың тоннаны құрауы тиіс.
– Бүгінде Оңтүстік өңірінде суды көп қажет ететін мақтаны егуді азайтып, суды аз қажет ететін дақылдарды өсіру қолға алынып жатқаны жасырын емес, – дейді ОҚО Кәсіпкерлер палатасының директоры Жеңісбек Дулатов. – Себебі, мақта талшығын өсіруге қолайлы аймақ саналатын Мақтааралда ағын су өте өзекті мәселе болып отыр. Осы орайда, суармалы жер көлемін ұлғайту үшін республикалық бюджеттен 32 миллиард теңге бөлініп отыр. Бұл қаржыға каналдар, арық-атыздар тазартылып, жердің сорын шаятын тиісті қондырғылар орнатылады. Демек, мақта шаруашылығын жолға қойып, өндірісті өркендетуге өңірдің мүмкіндігі әбден жеткілікті. Шаруашылықтың дамуына мүдделілік танытып отырған кәсіпорын қызметі алдағы уақытта жергілікті шикізатпен толық қамтылуы тиіс.
Бүгінгі таңда аталмыш фабрикаларда 400-ден астам адам жұмыс істейді. Аталған үш тоқыма кәсіпорны толыққанды іске қосылған сәтте мұнда 2000-нан астам адам тұрақты жұмыспен қамтылатын болады. Және мұндағы өнімдер Қазақстанның ішкі нарығын толығымен қамтамасыз етпек. Сонымен қатар, экспорт көлемін ұлғайта отырып, дайын өнімдердің негізгі бөлігі Қытай мен Еуропа елдеріне де бағытталмақ. Нақ қазіргі таңда «Қазақстан Темір Жолы» АҚ мекемесі төсек-орын тыстары мен арнайы киімдерді сатып алуға ұзақмерзімді келісімшартқа отыруға мүдделілік танытуда.
– Еліміз кедендік одаққа мүше болғанда жеңіл өнеркәсіп саласында тер төгіп жүргендердің қуанышында шек болған жоқ, – дейді облыстық кәсіпкерлер палатасының директоры Жеңісбек Камалидинұлы. – Ресеймен арадағы қатынастың жеңілдегеніне, кедендік рәсімдеу жұмыстарына уақыт шығындамайтынына көңіл тоғайды. Сала кәсіпорындары бұрынғы кеңестік кездегі іскерлік байланысты орнатуға ұмтылуда. Осының нәтижесінде, еліміздегі кәсіпорындардың саны мен қуаттылығы артып, жаңа жұмыс орын­дары көптеп ашыла бастады. Салық төлеу, тоқтап қалған кәсіпорындарды сауықтырып, іске қосу ар­қылы ел экономикасына айтарлықтай оңды ықпал жасалып отыр.
Тоқыма фабрикаларының іске қосылуы өз кезегінде, мақта бағасының тұрақталуына да сеп болуы тиіс. Қазірдің өзінде кәсіпорын 20 мың тонна «ақ алтынды» сатып алып отыр. Мемлекеттік сауықтыру бағдарламасына енгізілген кәсіпорын тиісінше, алдағы 4 жыл бойы салық төлеуден босатылмақ. Айта кетейік, өз жұмысын алғаш 2005 жылы бастап, небәрі 3 жыл уақыт қызмет жасаған бұл кәсіпорын сол кезде 2 мыңға жуық адамды жұмыспен қамти отырып, бюджетке жылына 2 миллиард шамасында салық төлеп келген еді. Нарықта өзіндік талғамымен тұтынушыларының жоғары бағасына ие болып үлгерген алпауыт кәсіпорын өз өнімдерін көпшілікке қолжетімді бағада ұсынбақ.

Облыстық ішкі саясат басқармасының ұйымдастыруымен «Нұр Отан» партиясы ОҚОФ ғимаратының мәжіліс залында жергілікті бұқаралық ақпарат құралдары арасында «Интернет медиа-технологияны меңгеру тәсілдері» тақырыбында семинар өтті.

Семинар барысында ҚР Президенті жанындағы жастар саясаты жөніндегі кеңес мүшесі, саясаттанушы Жарқын Түсіпбекұлы «Әлеуметтік медиа», «Аbai.kz» ақпараттық порталының бас редакторы Дәурен Қуат «Дәстүрлі БАҚ және жаңа медиа» тақырыбында дәрістер оқыды. Шараға облыстағы жас журналистер мен блогерлер қатысты. Жиынды ашқан ОҚО ішкі саясат басқармасының басшысы Берік Құрманғали аталған шара БАҚ өкілдерінің кәсіби деңгейін шыңдап, заман талабына сай жедел ақпарат алу мүмкіндіктерін ашатындығын атап өтті.
– Үш миллионнан астам тұрғыны бар Оңтүстік өңірі үшін бұқаралық ақпарат құралдарының маңызы өте зор. Ол ең әуелі, оқырманын қоғамдағы түрлі ақпараттармен таныс ете отырып, ағартушылық міндетті де атқарады. Бұл орайда, жаңа медиа-технологиялар БАҚ арасындағы өзара бәсекелестікті қалыптастырары сөзсіз. Бүгінде жалпы саны 400-ден асатын ақпарат құралдарын тіркеген өңірде заман талабына бейімделген жаңа медианы меңгеруге барынша қолайлы мүмкіндік бар, – дейді
Берік Уәлиұлы.
Еркін пікір алмасу жағдайында өткен жиында семинарға қатысушылар әлеуметтік желілерге ақпарат беру, имидж қалыптастыру, ақпараттық қауіпсіздікті сақтау, бейнематериал салу мен ақпаратты жарнамалау жайын кеңінен талқылады.

Бесінші шақырылған Шымкент қалалық мәслихатының кезектен тыс қырық екінші сессиясы өтті. Сессияға қала әкімі Дархан Сатыбалды, қалалық мәслихаттың депутаттары, бөлім басшылары қатысты. Жиынды сессия төрағасы Ғани Ахметбаев жүргізіп отырды.

Күн тәртібінде «2014-2016 жылдарға арналған Шымкент қаласының бюджеті туралы» шешіміне өзгерістер мен толықтырулар енгізу мәселесі қаралды. Баяндамашы, қала әкімінің орынбасары Гүлжан Құрманбекованың айтуынша, облыстық бюджеттен бөлінген нысаналы даму трансферттерінің көлемі 2014 жылға 1 миллиард 944 миллион теңгеге кеміген. Сонымен қатар, 2015 жылға 1 миллиард 396 миллион теңгеге, 2016 жылға 40 миллион теңгеге қысқарып отыр. Атап айтқанда, ағымдағы жылы құрылысы басталған бірқатар білім беру нысандары, мемлекеттік коммуналдық тұрғын үй қоры, инженерлік коммуникация инфроқұрылымдары, сумен жабдықтау, көріктендіру нысандары, спорт және жылу-энергетика саласын дамытуға бағытталған қаржы үнемдеу есебінен келер жылға өтпелі болып қала бермек.
Күн тәртібінде сондай-ақ, Шымкент қаласының аумағына құрылыс салу Ережесін бекіту туралы және «2014 жылға арналған Шымкент қалалық мәслихатының және оның аппаратының қызметін қамтамасыз етуге арналған шығыс сметасы туралы» шешіміне өзгерістер енгізу мәселелері қаралды. Күн тәртібінде қаралған мәселелерге мәслихат депутаттары бірауыздан қолдау танытты.
Сессияны қорытындылаған қалалық мәслихат хатшысы Нұрлан Бекназаров облыс орталығының қоғамдық өміріне белсене қатысқаны үшін бірқатар азаматтарды қалалық мәслихаттың Грамотасымен марапаттады.