Шымкент келбеті

ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ОҚО бойынша департаменті «Memkyzmet.kz» сайтын іске қосты. Бұл жөнінде департамент басшылығы Шымкент қаласы әкімдігінің үлкен мәжіліс залында мемлекеттік қызметкерлерге сайт қызметінің тиімділігін түсіндірді.

Енді кез келген азамат кешенді аттестация жайында толық мәліметті осы сайт арқылы біле алады.

– Аттестаттаудың негізгі мақсаты – мемлекеттік қызметкердің жалпы, кәсіби деңгейін анықтау, біліктілігін айқындау, – дейді агенттіктің ОҚО бойынша департаментінің басшысы Әли Көмекбаев. 

Сайттан мемлекеттік қызметке орналасу үшін тапсырылатын тесттің қажетті заңдар жинағын тауып, сол арқылы тестілеуге тіркелуге де мүмкіндік бар. Сондай-ақ, департамент басшысы мобильді топ құрылғысы жөнінде де атап өтті. Яғни, мемлекеттік қызмет көрсету барысында қандай да бір құқықбұзушылық деректеріне немесе әкімшілік кедергілерге куә болсаңыз, 8 (7252) 51-51-51 сенім телефонына хабарласуыңызға болады.

Шымкентте наурыз айының алғашқы жұлдызынан бастап, қалалық ақпараттық сервисі іске қосылды. Кез келген азамат қажетті ақпаратты алу үшін ендігі жерде заманауи бірыңғай сервис қызметін пайдалана алады. Ол үшін ғаламтор жүйесіне қосылудың қажеті де жоқ.

Ақпараттық сервистік картасын пайдалану арқылы қала тұрғындары мен қонақтары 76 бағыт бойынша жолаушы тасымалдайтын қоғамдық көлік қызметімен (жүру бағыты, кестесі, уақыты) танысу мүмкіндігі бар. Сонымен қатар, сервис қаладағы 11 мыңнан астам әкімшілік ғимаратын интерактивті үлгіде көрсетеді. Бұл қатарда кәсіпкерлік нысандарымен қатар, емханалар мен ауруханалардың, балабақшалар, спорт мектептері мен әлеуметтік қызмет көрсету орындары, тұрғын үй-коммуналдық шаруашылығы нысандарының мекенжайын анықтауға болады. Яғни, 15 800 мекеме жөнінде жан-жақты ақпарат (мекенжай, байланыс, жұмыс уақыты, төлем амалдары, суреттері) 3D-моделінде беріледі. 

Ақпараттық сервис қызметінің мобильді қосымшасын Google Play және App Store жүйесі арқылы ақысыз түрде жүктеп алуға болады.

Шымкентте Әл-Фараби ауданы бойынша заңсыз саудамен айналысқан дүңгіршектер алынуда.

Осы мақсатта аудан әкімдігінің қызметкерлері рейдке шықты. Тексеру барысында жеті дүңгіршек орнынан алынды.

Жалпы, өткен жылы аудан аумағындағы 88 дүңгіршек заңсыз деп танылған. Жыл басынан бері тағы 15 дүңгіршек жойылды. 

– Басты мақсат – заңсыз сауда орындарын болдырмау. Қала тұрғындарына кедергі келтіретін орын қалыптастырмау, қала көркін бұзбау. Жалпы, аудан аумағындағы жол бойында, жүргінші жолдарындағы заңсыз дүңгіршек толығымен жойылады, – дейді Әл-Фараби ауданы әкімінің орынбасары Серік Нұрманов.

Рейд барысында жұмысшы топ азаматтарға түсіндірме жұмыстарын жүргізіп, ҚР Әкімшілік кодексі бойынша айыппұл салынатынын ескертті.

Шымкентте биыл қала тұрғындарына 1600-ге таяу коммуналдық пәтер кілті табыс етіледі. Тұрғын үй және әлеуметтік нысандар құрылысының жай-күйі қала әкімі Ғабидолла Әбдірахымовтың төрағалығымен өткен әкімдік мәжілісінде кеңінен талқыланды.

Қалалық құрылыс бөлімінің басшысы Тәжібай Егетаев өз баяндамасында өткен жылы 60 нысанның құрылысы жүргізілгенін, оның ішінде 15 нысан пайдалануға берілгенін мәлімдеді. Биыл бюджеттен 13,5 млрд. теңге қаралып, 24 тұрғын үйдің құрылысы басталды. Атап айтқанда, «Тұрғын үй құрылыс жинақ банкі» арқылы 11 тұрғын үй (пәтер саны – 558); коммуналдық (арендалық) 13 тұрғын үй (пәтер саны – 1600-ге таяу). Бұған қоса, «Тұран» шағынауданында 9 қабатты 5 тұрғын үйдің (пәтер саны – 270) құрылысын жүргізу үшін мемлекеттік сатып алу конкурсы жарияланды.

Өз кезегінде, қала әкімі Ғабидолла Әбдірахымов тұрғын үй кезегінде тұрған азаматтарды баспанамен қамту бағытында жұмысты ширатуды тапсырды. Үй құрылыстарының сапасын бақылау үшін арнайы комиссия құрылмақ және «Шаңырақ» бағдарламасының орындалу деңгейі ұдайы назарда болады.

Күн тәртібінде сонымен қатар, инженерлік-инфрақұрылым жүйелерінің ахуалына талдау жасалды. 2016 жылы мемлекет бюджеті есебінен 6,5 миллиард теңге қаралып, 12 инженерлік жүйенің құрылысы жүргізілген. Қазіргі таңда 3 нысан пайдалануға берілді. Биыл 9 нысанның құрылысына 5,4 миллиард теңге бөлінген.

Жиынды қорытындылаған қала әкімі Ғ. Әбдірахымов күн тәртібіндегі мәселелердің өзектілігіне тоқталып, сала мамандарына нақты міндеттер жүктеді. Берілген тапсырмалардың орындалу барысын өз қадағалауына алатынын жеткізді.

Егер де сіздің қандай да бір әлеуметтік-қоғамдық мәселелерге қатысты шағым-ұсыныстарыңыз болса, қала әкімдігінің ресми http://shymkent.gov.kz/ сайтының «Халықтық бақылау» тармағына сауал жолдаңыз. Онда сіздерге әкімдіктің жауапты сала мамандары сауалдарыңызға нақты жауап береді. Осы орайда, қала тұрғындарының қазірге дейінгі жолдаған шағым-ұсыныстарына берілген жауап төмендегідей болды.

Жұлдыз ЕРЕЖЕПОВА, қала тұрғыны:

Сұрақ: 10 ұл-қызды өсіріп жетілдірген көпбалалы анамды шипажайларға жеңілдікпен жібере аламыз ба және тұрғын үй алуына қаншалықты мүмкіндігі бар? 

Жауап: Азаматша Жұлдыз Ережепованың ата-анасы Шымкент қаласынан тұрғын үй алу мақсатында кезекке тіркелу үшін қаланың тұрғылықты тұрғыны және халықтың әлеуметтік жағынан әлсіз тобы санатына енуі, сондай-ақ, соңғы бес жыл көлемінде Қазақ-стан Республикасы аумағында иелігінен тұруға жарамды тұрғын үйі болмауы тиіс. Осы жағдайда ғана барлық қажетті құжаттарымен Халыққа қызмет көрсету орталықтарына хабарласуына болады.

Сондай-ақ, көп балалы ана ретінде 8 Наурыз – Халықаралық әйелдер күніне орай, «Алтын алқамен», Күміс алқамен» марапатталған немесе бұрын «Ардақты ана» атағын алған, сондай-ақ 1-2 дәрежелі «Ана даңқы» ордендерімен марапатталған көпбалалы аналарға, біржолғы 5 айлық есептік көрсеткіш мөлшерінде әлеуметтік көмек көрсетіледі.

Күлімқыз ӘБДУӘЛИЕВА, қала тұрғыны:

Сұрақ: Маған 2008 жылы Бәйтерек көшесінде орналасқан үйім қажеттілігіне байланысты мемлекет меншігіне алынатыны хабарланған. Шектеуге байланысты, оны сатып жіберуге де мүмкіндік берілмеуде.

Жауап: Сіздің көрсеткен мекенжайыңыз бойынша Шымкент қаласы әкімдігінің 20.06.2008 жылы мемлекет мұқтажы үшін мәжбүрлеп иеліктен шығару туралы қаулысы қабылданып, «Шымкент жер» МКК-ны тарапынан мемлекет мұқтажына қайтаруға бағытталған жұмыстарды жүргізу жүктелген. Алайда, Шымкент қаласы әкімдігінің 29.11.2011 жылы №1361 санды қаулысы негізінде «Шымкент жер» МКК таратылған.
Осыған байланысты Сіз жер учаскесіне қатысты құқық белгілейтін құжаттарыңызбен Шымкент қаласы жер қатынастары бөліміне келіп, толық мәлімет алуыңызға болатынын мәлімдеймін.

Нұрлан ЕСІРКЕПОВ, қала тұрғыны:

Сұрақ: «Шұғыла» шағынауданынындағы көшелердің атауы мен үй нөмірлері заңды түрде бекітілмеуі тұрғындарға көптеген қиындықтар туындатуда. Көше атаулары тақтайшаларға жазылып ілінгенімен, ол Әділет басқармасында тіркелмеген.

Жауап: ҚР Ұлттық экономика министрінің 2015 жылғы 22 желтоқсандағы №783 және Қазақстан Республикасының Инвестициялар және даму министрінің 2015 жылғы 28 желтоқсандағы №1262 бірлескен бұйрығымен бекітілген жылжымайтын мүлік объектілерін адрестеу қағидасына сәйкес мекенжайлар беріледі. Осыған байланысты сәулет және қала құрылысы органының бұйрығымен осы Қағидалардың 9-тармағында көрсетілген жылжымайтын мүлік объектілеріне реттік нөмір береді.

Сонымен қатар, «ҚР аумағында жылжымайтын мүлік объектілерінің мекенжайын айқындау жөнінде анықтама беру» Қазақстан Республикасы Ұлттық экономика министрінің м.а. 2016 жылғы 21 қаңтардағы №23 бұйрығына сәйкес, заңды немесе жеке тұлғаға мекен жай беру немесе нақтылау керек болған жағдайда мемлекеттік қызмет реестріне кіру себебінен халық қызмет көрсету орталықтары арқылы тиісті құжаттарды өткізу керек және құжаттарды заңдастыру ақысыз жүргізілетінін мәлімдейміз.

Жанат ӘМІРӘЛИЕВА, қала тұрғыны:

Сұрақ: Қ.Төлеметов көшесінде орналасқан көпқабатты үйде тұрамыз. Жақын маңда мектеп ғимараты жоқ. Балаларымызды шалғайда орналасқан мектептерге беру үшін тікелей және тұрақты түрде қатынайтын қоғамдық көлік бағыты қарастырылмаған.

Жауап: Сіздің мәселеңіз бойынша Шымкент қаласының жолаушылар көлігі және автомобиль жолдары бөліміне, яғни «Қайтпас-2» шағынауданы Төлеметов көшесі бойындағы оқушылардың мәселесін шешу мақсатында №59, №88 жалпы орта мектептерге тікелей автобус маршрутын қарастыруды және қарастыру кезінде, сабақ уақытысында (таңертең, түсте, кешке) жүру кестесін жиілету бойынша хат жолданған.
Сонымен қатар, Шымкент қаласы Төлеметов көшесі бойынан 1200 орындық жаңа мектеп салу үшін, қажетті жер телімі қарастырылып жатқанын назарыңызға жеткіземіз.

Нұржан АСАНОВ, қала тұрғыны:

Сұрақ: Қаратау ауданы №47 үйде барлығы 114 пәтер бар. Қыс маусымындағы берілетін ыстық су мен жылудың сапасы көңілімізден шықпайды. Сонымен қатар, мұнда үй тұрғындарының автокөліктеріне автотұрақ қаралмаған.

Жауап: Оңтүстік Қазақстан облыстық ішкі істер департаменті тарапынан 2016 жылы «Нұрсәт» шағынауданы бойынша жалпы 69 дана бейнебақылау камерасы орнатылып, оның ішінде осы №47 үйдің (қарама-қарсы 41 үйдің алдына) ауласынада орнатылған. 

Сонымен қатар, лифт мәселесі бойынша қызмет көрсетуші «Элитлифт» ЖШС мекемесі техникалық ақауға байланысты уақытша тоқтап тұрғанын және 2017 жылдың 25 қаңтарына дейін кемшіліктерді толық қалпына келтіретінін мәлімдеуде.

Сондай-ақ 2016 жылы ӘІО Астана даңғылы бойындағы №38,39,40,41,42,43,44,45,46,47 үй аулаларына түнгі жарық шамдары орнатылды. Жарық шамдарын қосу техникалық жағдайға орай 2017 жылдың 1 тоқсанында қосу жоспарланған.

Динара БЕГАЛИНА, қала тұрғыны:

Сұрақ: «Нұрсәт» шағынауданының тұрғындары атынан сұрайтынымыз, Шаяхметов көшесінен Рысқұлов көшесіне дейін автобус бағыты қарастырылса...

Жауап: Бүгінгі таңда Шымкент қаласының шалғай аумақтарына қатынайтын әлеуметтік маңызы бар 10 автобус бағытын ашу жоспарлануда. Аталған бағыттар ішінде №150 автобус бағыты Астана, Шәймерденов көшелері арқылы «Сайрам» шағынауданында орналасқан № 65 мектеп, «Солтүстік» шағынауданында орналасқан №41 мектеп, №17 шағынауданындағы №24 мектеп және №18 шағынауданында орналасқан №38 орта мектептердің аумағынан өтетін болып жоспарланғанын хабарлаймыз.

Ерболат ТӨЛЕУОВ, қала тұрғыны:

Сұрақ: Байтұрсынов көшесіндегі №73 үй ауласына абаттандыру және балалар алаңшасын орнату жұмыстары жүргізіле ме?

Жауап: Байтұрсынов көшесі №73 көпқабатты тұрғын үйдің ауласын абаттандыру және балалар ойын алаңшаларын орнату үшін Әл-Фараби ауданы әкімі аппараты тарапынан сметалық құжаттама дайындалған. Аталған жұмыстарды жүргізуге қаржы бөлдіру мақсатында Шымкент қалалық мәслихатына хат ұсынылғанын және қаржы қаралған жағдайда жұмыстар атқарылатындығын хабарлаймыз.

Аауылшаруашылығы өнімдері қала тұрғындарының қажеттілігін толық қамтамасыз етуі тиіс. Бұл жөнінде қала әкімі Ғабидолла Әбдірахымовтың төрағалығымен өткен мәжілісте кеңінен талқыланды.

Алдымен қала әкімі күн тәртібіндегі түйткілді мәселелерге тоқталды.

– «Шаңырақ» бағдарламасы аясында апатты жағдайдағы есі үйлер көп ұзатпай бұзылуы тиіс. Істі тездетпеген жағдайда тұрғындардың қауіпсіздігіне нұқсан келтіретін үлкен мәселелер орын алуы мүмкін, – деді Ғабидолла Рахматоллаұлы. – Сондай-ақ, Түркістан көшесінің бойындағы көлік және аяқжолдар күрделі жөндеуді қажет етеді. Дегенмен, «Қырғы базар» маңындағы көлік жолдарының аралығына темір қоршаулар орнату арқылы жүргіншілердің қауіпсіздігіне байланысты бірқатар өзекті мәселелер шешімін тапқаны байқалып отыр. Ал ирригация жүйелер ретке келтіру жұмыстарында әлі де олқылық бар. Қала тазалығы мен көгалдандыру бағытындағы негізгі міндеттерді наурыз айында жүзеге асыруды тапсырамын.

Күн тәртібіне сәйкес, ауылшаруашылығы саласындағы қызмет сапасын мейлінше жетілдіру жайы талқыланды. Көлемі 117 мың гектарды құрайтын Шымкент қаласының аумағындағы ауылшаруашылық жерi – 62,219 мың гектар. 38 мың гектар аумаққа елдiмекендер орналасқан. Жалпы, облыс орталығында ауылшаруашылық өнімдерін өндірумен айналысатын 4 152 кәсіпкер тіркелген.

Жиынды қорытындылаған қала әкімі Ғ. Әбдірахымов күн тәртібіндегі мәселелердің маңызы жоғары екенін айта келе, алдағы уақытта тиісті жұмыстардың атқарылатынын жеткізді. Сонымен қатар, сала мамандарына нақты міндеттер жүктеп, орындалу барысын өз қадағалауына алатынын айтты.

Мемлекет басшысы Н. Назарбаевтың «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына арнаған Жолдауы «Нұр Отан» партиясының облыстық және жергілікті филиалдарына жаңа міндеттер жүктейді. Ондағы көрсетілген басымдықтар өңірлік партия жұмысының негізгі өзегіне айналмақ. «Нұр Отан» партиясы Оңтүстік Қазақстан облыстық филиалының кезектен тыс ХХХІ конференциясында Жолдаудың мән-маңызы талқыланды.

Конференцияға облыстық партия филиалы саяси кеңес мүшелері, облыстық мәслихат депутаттары, аудан, қалалардан сайланған делегаттар, мемлекеттік органдардың басшылары және БАҚ өкілдері қатысты. Жиында облыстық мәслихат хатшысы, «Нұр Отан» партиясы ОҚО филиалы Сыбайлас жемқорлықпен күрес жөніндегі комиссияның төрағасы Қайрат Балабиев баяндама жасады.

– Елбасы Жолдауында атап көрсетілгендей, ел экономикасының негізгі тірегі саналатын кәсіпкерлік саласына, жергілікті тауар өндірушілерге кең көлемді қолдау көрсетіледі. Осы мақсатта, өңірде 11 индустралді аймағы құрылған. Өнеркәсіп өнімдерінің көлемі бойынша Оңтүстік өңірі ел аумағында 3-орынға ие. Ендігі жерде, 1 миллиард теңгені құрайтын өңірдің тауар айналымын еселей түсуге нақты қадамдар жасалуда. Бұл тұрғыда, Оңтүстік – аграрлы өңір болғандықтан, ішкі ресурстарды тиімді пайдалана отырып, елдегі жетекші орынға шығу мүмкіндігіміз бар, – деп атап өтті Қайрат Рахымұлы.

Өз кезегінде, жарыссөзге шыққан «Шымкент келбеті», «Панорама Шымкента» газеттерінің бас редакторы Айгүл Қапбарова, облыстық мәслихат депутаты, «Ескі Иқан» бастауыш партия ұйымының төрағасы Зуппархан Чалданов, партия мүшесі Валерий Гордиенко Елбасы Жолдауын белсенді түрде жүзеге асыруға шақырды.

Жолдауды кең көлемде насихаттау мақсатында құрылған ақпараттық-насихаттық топ бүгінде өңірдің барлық аудан-қалаларында жергілікті тұрғындармен кездесулер өткізуде. Бұл үшін саяси кеңес мүшелерінің әрқайсысы 820 бастауыш партия ұйымдарының қызметін жандандыруға бекітілген.

Күн тәртібіне сәйкес, «Нұр Отан» партиясынан облыстық №11, №25 және №31 сайлау округтері бойынша облыстық мәслихат депутаттығына үміткерлер ұсынылды.
Жиын қорытындысы бойынша қарар қабылданды.

Кәсіптен несібе терген азаматтарға ендігі жерде «Жұмыспен қамтудың жол картасы – 2020» бағдарламасы шеңберінде зор қолдау көрсетілгелі отыр. Яғни, агроөнеркәсіп кешенін дамыту бағытында ауыл кәсіпкерлеріне 16 миллион теңгеге дейін жеңілдетілген несие беру қарастырылған. Сондай-ақ, «Нәтижелі жұмыспен қамту және жаппай кәсіпкерлікті дамыту» деп аталатын жаңа бағдарлама екі қолға бір күрек таба алмай жүрген жастарды арнайы оқытып, жұмысқа орналастыруға мүмкіндік бермек. Бизнестің әлеуетін көтеру және жұмыспен қамтудың жоспарлы қызметі Шымкент қаласы әкімдігінің халықты жұмыспен қамту орталығы директорының орынбасары Ержан Серікбаевпен сұхбатымыз осы мәселе төңірегінде өрбіді.

– Ержан Жомартұлы, мемлекеттік бағдарлама азаматтарды жұмыспен қамтуда және жұмыссыздық деңгейін төмендетуге қаншалықты мүмкіндік береді?

– Бағдарламаның негізгі мақсаты – халықты нәтижелі жұмыспен қамтуға жәрдемдесу және азаматтарды кәсіпкерлікке тарту.
Бағдарламаның нысаналы индикаторларына қол жеткізу үшін жұмыс үш бағыт бойынша яғни, бағдарламаға қатысушыларды техникалық және кәсіптік біліммен және қысқа мерзімді кәсіптік оқумен қамтамасыз ету, жаппай кәсіпкерлікті дамыту, халықты жұмыспен қамтуға жәрдемдесу және еңбек ресурстарының ұтқырлығы арқылы еңбек нарығын дамыту аясында жүргізіледі.
Жекелей тоқтала кетсек, бағдарламаға қатысушыларды техникалық және кәсіптік біліммен және қысқа мерзімді кәсіптік оқумен қамтамасыз ету бағыты шеңберінде мынадай міндеттер шешілетін болады: еңбек нарығының қажеттіліктерін ескере отырып, техникалық және кәсіптік білімі бар кадрларды даярлау, жұмысшы кадрларды еңбек нарығында сұранысқа ие кәсіптер және дағдылар бойынша қысқа мерзімді кәсіптік оқыту. Бұл тұрғыда, өмірлік қиын жағдайға тап болған және тұрмысы төмен отбасылардың мүшелері қатарындағы орта мектеп түлектері, жоғары білімі жоқ, жұмыс іздеп жүрген адамдар, сондай-ақ азаматтардың өзге санаттары аталмыш бағдарламаға қатыса алады.
Олардың оқу төлемақысы, бір реттік ыстық тамағы, стипендиясы мен жол жүру жеңілдігі мемлекет тарапынан қамтамасыз етіледі. Осы орайда, бағдарлама шеңберінде биыл техникалық және кәсіптік білімі бар кадрларды даярлауға Шымкент қаласы бойынша 1267 азаматты оқыту жоспарлануда.
Кадрларды даярлау білім беру ұйымдарында, оның ішінде, мобильді оқу орталықтары арқылы жүргізіледі. Қысқа мерзімді кәсіптік оқу цифрлық сауаттылық дағдыларына, ағылшын тіліне және кәсіпкерлік негіздеріне оқыту бойынша да өткізіледі. Оқу мерзімі кәсіптің ерекшелігіне қарай бір айдан алты айға дейінгі мерзімді құрайды.
Екінші, жаппай кәсіпкерлікті дамыту шеңберінде бағдарламаға қатысушыларды «Бастау Бизнес» жобасы бойынша кәсіпкерлік негіздеріне оқыту, ауылдағы және қалалардағы кәсіпкерлік бастамаларды қолдау қарастырылған. Оның негізгі мәні, кәсіпкерлік дағдыларына оқытуға, оның ішінде ауыл шаруашылығы кооперативтерін қалыптастыру қағидаттарына, сондай-ақ олардың бизнес жобаларын сүйемелдеуге бағытталған.
Үшінші, халықты жұмыспен қамтуға жәрдемдесу арқылы еңбек нарығын дамыту және еңбек ресурстарының ұтқырлығы бағыты аясында жұмыссыздарды және өзін-өзі жұмыспен қамтыған адамдарды жұмыспен қамтамасыз етуге жәрдемдесу, еңбек ресурстарының ұтқырлығын арттыру, жұмысқа орналастыру бойынша бірыңғай цифрлық алаң құру міндеттері шешімін табуы тиіс.

– Кәсібін ашуды ойға алған азаматтар үшін ұсынылатын микрокредиттеу шартының тиімділігі қандай?

– Микрокредиттер микробизнесті ашу, жұмыс істеп тұрған бизнесті кеңейту, ауыл шаруашылығы кооперативтерін ашу үшін ұсынылады. Микрокредиттер азаматтарға кәсіпкерлік негіздеріне оқыту курстарынан өткеннен кейін не соңғы екі жыл ішінде басқа бағдарламалар шеңберінде кәсіпкерлік негіздеріне оқыту курстарынан өткендігі туралы сертификаты бар болса беріледі.
Микрокредит жұмыс істеп тұрған бизнесті кеңейту және ауыл шаруашылығы кооперативтерін құру үшін жаңа тұрақты жұмыс орындарын құру шартымен ұсынылады. Осы шартқа сәйкес, азаматтардың микрокредитті 16 миллион теңгеге дейін алу мүмкіндігі бар. Айта кетейік, бағдарлама шеңберінде шағын несиелеуге Шымкент қаласы бойынша 296 адамды тарту жоспарланып отыр.
Сондай-ақ, 29 жасқа толмаған азаматтар үшін «Жастар практикасы» бағдарламасы биыл да жалғасын табады. Ондағы ұсынылған жұмыс орындарының саны шектелмейді. Бұл жұмыс уақытша сипатқа ие, яғни, 6 ай уақыт мерзімінен аспайды. Айлық жалақысы бұған дейін 38 мың теңге болса, бүгінгі таңға оның көлемі 56 мың теңгеге дейін көтерілді. Бұл да жұмыс іздеген жастар үшін зор мүмкіндік.

– Жаңа тұрғылықты жерге ерікті түрде қоныс аудару үшін қандай жеңілдіктер қарастырылған?

– Еңбек ресурстарының ұтқырлығын арттыру бағыты бойынша жұмыс күші тапшы өңірлерді жұмыс күшімен қамтамасыз ету, өңірлердегі диспропорция мен демографиялық теңгерімсіздікті жоюға бағдарламада басты басымдық берілген. Қазақстан Республикасының азаматтары, оралмандар және олардың отбасы мүшелері жаңа тұрғылықты жерге ерікті түрде қоныс аудару бойынша Бағдарламаға қатысушылар болып табылады.
Жаңа тұрғылықты жерге ерікті түрде қоныс аудару үшін жиырма тоғыз жасқа дейінгі жастар, оның ішінде балалар ауылдарының тәрбиеленушілері мен балалар үйлерінің, он алтыдан жиырма үш жасқа дейінгі жетім балалар мен ата-анасының қамқорлығынсыз қалған балаларға арналған мектеп интернаттардың түлектері, орта, техникалық және кәсіптік, орта және жоғары білім беру ұйымдарының түлектері, жұмыс берушінің экономикалық жағдайының нашарлауына әкеп соққан өндірістердің және орындалатын жұмыстар мен көрсетілетін қызметтер көлемінің төмендеуіне байланысты жұмыстан босатылған адамдар осы аталған бағдарламаға қатыса алады.

– Әңгімеңізге рахмет!

Сұхбаттасқан
Жеңісбек СЕРІКҰЛЫ