Португалия – жеңiмпаз
Среда, 13 Июль 2016 05:20  |
 |
1 ай бойы жанкүйер қауымның дегбірін алған Еуропа біріншілігі де тарихтың жылнамасына жазылды. Париждегі 92 мың адам сиятын «Stade de France» стадионында өткен ақтық сын кездесуі шын мәнінде, шиеленісті жағдайда өрбіді. Португалия мен Франция құрамаларының арасындағы финалдық матчтың негізгі уақытында жеңімпаз анықталмады. Ойын барысында Дидье Дешам жаттықтыратын француз ойыншылары өз жанкүйерлерінің алдында барын салып, допқа иелік етуде басымдық танытты. Дегенмен, төреші қосқан жарты сағаттық қосымша уақытта 28 жастағы португалдық шабуылшы Эдер шеберлігімен танылып, командасын алға шығарды, есеп – 1:0. Бұл нәтиже ойын соңына дейін өзгерген жоқ. Осылайша, Португалия құрамасы өз тарихында алғаш рет Еуропа біріншілігінің жеңімпазы атанды.
Өзектi мәселеңiз болса...
Пятница, 08 Июль 2016 06:57
Егер де сіздің қандай да бір әлеуметтік-қоғамдық мәселелерге қатысты шағым-ұсыныстарыңыз болса, қала әкімдігінің ресми http://shymkent.gov.kz/ сайтының «Халықтық бақылау» тармағына сауал жолдаңыз. Онда сіздерге әкімдіктің жауапты сала мамандары сауалдарыңызға лайықты жауап береді. Осы орайда, қала тұрғындарының шілде айында жолданған шағым-ұсыныстарына берілген жауаптарды назарларыңызға ұсынамыз.
С. МЕЛДЕХОЖАЕВ, көшесінің тұрғындары:
– «Қорғасын» шағынауданындағы С. Мелдехожаев көшесінің көпқабатты тұрғын үйлері жыл бойы жаңбыр мен еріген қар суларынан зардап шегіп келеді. Мұндағы үйлер сай жерде орналасқан. Сол себептен де, көшемізге ұзындығы 250 метр аумаққа су ағатын лотоктар салып, асфальтты қайта жөндеуден өткізіп беруіңізді сұранамыз.
– Аталған кемшіліктерді жою жұмыстарына қажетті сметалық құжаттамалар әзірлеуге қалалық бюджеттен қаржы бөлінді. Қазіргі таңда, мемлекеттік сатып алу процедураларының құжаттамалары дайындалуда.
Мердігер мекеме анықталғаннан кейін, қажеттілігіне орай Мелдехожаев көшесі бойындағы №92, 94, 95, 97, 98, 99, 100, 101 үй аулаларына ирригациялық жүйе жүргізуге сметалық құжаттамалар әзірленіп, бюджетке ұсыныс енгізіледі. Сонымен қатар, Мелдехожаев көшесіндегі пайда болған шұңқырларды жамау жұмыстарын, ағымдағы жөндеу жұмыстарының есебінен атқаратынын хабарлаймыз. Жұмыстар бөлінген қаржы аясында атқарылатын болады.
Қайрат ҚАДЫРОВ, қала тұрғыны:
– Тұрғын үй құрылысын салу үшін жер теліміне кезекке тұрған едік. Жалпы, жер телімі қашан, кімдерге беріледі?
– Қазақстан Республикасы Ұлттық экономика министрінің 27.03.2015 жылғы «Жеке тұрғын үй құрылысы үшін жер учаскелеріне құқықтар беру қағидаларын бекіту туралы» №255 бұйрығына сәйкес, азаматтардың өтініштері арнаулы есепке алынып, жер комиссияның қорытындысы негізінде кезекке қойылады. Осы бұйрықтың 2 тармағында көрсетілген талаптарына сәйкес, жеке тұрғын үй құрылысы үшін жер учаскесін алуға кезекке тұрғызылу үшін мүдделі тұлғалар жеке куәлік көшірмесін тіркеп, жер учаскесі орналасқан жергілікті атқарушы органға жазбаша өтініш білдіру қажет екендігі көрсетілген.
Аталған заңнамада арнайы жеке бағдарламалар қарастырылмағандықтан азаматтардың өтініштері тек ғана кезектілік ретімен, жеке тұрғын үй құрылысы үшін жер учаскелерін табыстау аймақтардың нақты жоспарлау жобалары дайындалып, бөлінетін жерлердің инженерлік инфрақұрылым жүйелері жүргізіліп, арнайы алаңшалардың дайындалуына қарай қанағаттандыруға жататындығын хабарлаймыз.
Нұркен ТОҚАЕВ, қала тұрғыны:
– Біз «Қайтпас-1» шағынауданында Айбол аялдамасының бірінші көшесінде тұрамыз. Мұнда көше атауы және үй нөмірлері атымен жоқ. Бұл мәселе қашан шешімін табады?
– Қазіргі таңда, Қазақстан Республикасы Президенті Әкімшілігінің тапсырмасына орай әкімшілік-аумақтық бірліктер мен олардың құрамдас бөліктеріне, объектілерге атау беру және қайта атау мәселелері (есімдері ономастикалық объектілерге берілетін тұлғаларға қатысты нақты критерийлерді әзірлеуге қатысты) уақытша тоқтатылған. Соған байланысты, Қазақстан Республикасы Үкіметінің «Әкімшілік-аумақтық бірліктерге, елді мекендердің құрамдас бөліктеріне атау беру, оларды қайта атау, сондай-ақ олардың атауларының транскрипциясын нақтылау мен өзгерту кезінде тиісті аумақ халқының пікірін ескеру қағидаларын бекіту туралы» 2014 жылғы 24 ақпандағы №138 қаулысының нормаларына сәйкес, Шымкент қаласының «Қайтпас-1» шағынауданының көшелеріне атау беру мәселесі әкімшілік-аумақтық бірліктер мен олардың құрамдас бөліктеріне, объектілерге атау беру және қайта атау мәселелері есімдері ономастикалық объектілерге берілетін тұлғаларға қатысты нақты критерийлері қабылданғанан соң қаралатын болады.
Жарасбек СПАБЕКОВ, қала тұрғыны:
– «Көкбұлақ» тұрғын алабындағы Бадам өзенінің арнасына салынған бетондардың сапасы төмен. 3-4 жыл бұрын салынған бетондар бүгінде көтеріліп, жардың шеті құлауда. Алдағы уақытта егістіктер мен үйлерге қауіп төндіруі мүмкін. Осы мәселені шешіп берсеңіздер екен...
– Қазіргі таңда өзен арнасына зерделеу жұмыстары жүргізіліп, Бадам өзеніне бұдан 3-4 жыл бұрын ҚР ІІМ Төтенше жағдайлар комитеті «Қазселденқорғау» МКМ Оңтүстік Қазақстан аймақтық пайдалану техникалық басқармасының филиалының тапсырысымен орнатылған дамбы, қазіргі кезде көп жерінен жарылып орнатылған темір бетон плиталарының суға кету қаупі бар екендігі анықталды. Осы мәселе бойынша Оңтүстік Қазақстан облысы Төтенше жағдайлар департаментіне арнайы хат жолданды.
Алибек ТИШКИНБАЕВ, қала тұрғыны:
– Ата-ананың қамқорлығынсыз қалған бала ретінде тұрғын үй кезегінде қандай да бір жеңілдікті иелене аламын ба?
– Сіз ата-анасынан айрылған жетім және ата-анасының қамқорлығынсыз қалған балалар тізімінде №1165 кезекте тіркелгенсіз. Қазақстан Республикасы «Тұрғын үй қатынастары туралы» Заңының 74 бабына сәйкес, жетім және ата-анасының қамқорлығынсыз қалған балалар бірінші кезекте тұрғын үй алу басымдық құқығына ие және мемлекеттік тұрғын үй қорынан тұрғынжайлар бөлген кезде жетім балаларға және ата-анасының қамқорлығынсыз қалған балаларға коммуналдық тұрғын үй қорынан тұрғын жайлардың жалпы санының кемінде жиырма пайызы бөлінеді.
Қазіргі таңда Сізге дейін осы санат бойынша тіркелген 1164 азамат өз кезектерін күтуде. Сондықтан Сіздің тұрғын жай мәселеңіз кезек ретімен оң шешімін табады. Қазақстан Республикасының 2007 жылғы 12 қаңтардағы №221 «Жеке және заңды тұлғалардың өтініштерін қарау тәртібі туралы» Заңының 14-бап, 6-тармағына сәйкес, жауапқа қанағаттанбаған жағдайда құзырлы органдарға шағым жасауға құқыңыз бар.
Венера УМАРҒАЗИЕВА, қала тұрғыны:
– Ш. Уәлиханов көшесіндегі жерасты өткелін құрылыс аумағы ретінде жауып тастаған. Ол жерде тазалап жатқан кәсіпкер жоқ. Өткелді ашып, қоқысты жойып беруіңізді сұраймыз.
– 13.05.2016 жылы Еңбекші ауданы әкімі аппаратының, Еңбекші аудандық тұтынушылардың құқықтарын қорғау басқарамасының, ОҚО мемлекеттік сәулет құрылыс бақылау басқармасының, «Иновация 7» ЖШС-ның және Еңбекші аудандық жергілікті полиция бөлімінің жауапты мамандары бірлесе, арызда көрсетілген мәселе бойынша Ш.Уәлиханов көшесі №192 көпқабатты тұрғын үйге жапсарлас орналасқан нысандарға комиссиялы түрде зерделеу жұмыстарын жүргізіп, акт түзді. ҚР «Жеке және заңды тұлғалардың өтініштерін қарау тәртібі туралы» Заңының 10 бап, 1 тармағына сәйкес, егер сіз берілген жауапқа қанағаттанбаған жағдайда, құзырлы органдарға немесе сотқа шағымдануға құқылысыз.
Серік ӘБІШЕВ, қала тұрғыны:
– Тұл жетім әрі 1 топ мүгедегі ретінде үй кезегін уақытынан бұрын иелене аламын ба?
– Сіз халықтың әлеуметтік жағынан әлсіз тобы тізімінде, 1 топ мүгедегі ретінде ретінде 08.08.2014 жылдан бастап №5590 болып тіркелгенсіз. 24.07.2015 жылғы өтінішіңіз және ұсынған құжаттар негізінде халықтың әлеуметтік жағынан әлсіз тобы тізімінде тіркелген кезегіңіз ата-анасынан айырылған және ата-анасының қамқорлығынсыз қалған балалар тізіміне ауыстырылды. Бүгінгі таңда бұл санат бойынша №893 кезекте тіркеліп тұрсыз.
Қазіргі таңда Сізге дейін 892 азамат (жетім) өз кезектерін күтуде. Сондықтан Сіздің тұрғынжай мәселеңіз кезек ретімен оң шешімін табады.
Дайындаған
Ж. СЕРІКҰЛЫ
«Shymkent Bike» – «жасыл қала» брендiн қалыптастырады
Пятница, 08 Июль 2016 05:13Шымкентте ертең алғашқы велостанса пайдалануға берiледi
Мамандар бүгінде Шымкент қаласының экологиялық ахуалы сын көтере бермейтінін айтып, дабыл қағуда. Мегаполис қаланың басты экологиялық мәселесінің бірі – көлік санының тым көптігінен болып отыр. Ресми деректерге сүйенсек, Оңтүстік Қазақстан облысында 545 мыңнан астам көлік бар. Ондағы көліктердің отыз пайызы Шымкент қаласында тіркелген.
Велосипедпен жүрудiң пайдасын бiлсек
Қаланың орталық көшелерінде жиі орын алатын көлік кептелісін реттеп, экологиялық ахуалын жақсартудың бірден-бір мүмкіндігі – велосипед стансаларын көптеп пайдалануға беру болмақ. Бұл бағытта қала әкімдігі шілде айының соңына дейін 40 велостансаның қызметін іске қосуға мүдделілік танытуда. Бұл үшін қажетті құрал-жабдықтар мен велосипедтер Франция елінен жеткізілуде. Велосипедті жалға берілетін «Shymkent Bike» автоматтандырылған стансалар жобасының алғашқы сатысында 200 велосипедті сатып алу көзделген.
«Shymkent bike» жобасы аясындағы алғашқы велосипед стансасы сенбі күні, яғни, 9 шілдеде Әл-Фараби алаңында ресми түрде ашылмақ. Үлкен өзгерістер қарсаңында, Шымкент қаласының әкімі Ғабидолла Әбдіраxымов қала көшелерінде веложол жүйесін енгізу жұмыстарын тексеріп, келешектегі мүмкіндіктерін бағамдады.
– Ендігі жерде қала тұрғындары велосипед пайдалану үшін арнайы карта сатып алу мүмкіндігіне ие. Олардың бір жылдық төлемақысы 11 500 теңге болып бекітілді. Ондағы 10 000 теңге жол жүру құнына, 1000 теңге картаның өзіне берілсе, ал 500 теңге пайдаланушы балансы болып есептеледі, – дейді сала мамандары.
Төлем картасын сатып алған жағдайда азаматтарға арнайы PIN-код беріледі. Бұл жоба елімізде тек Астана қаласында қолданыста болып келген еді. Астаналық тұрғындар картаны маусымына 6 айға қолдана алса, шымкенттіктер 1 жыл бойына пайдалану мүмкіндігіне ие. Сондықтан да бағасында сәл айырмашылық бар.
Станса қызметін пайдалану үшін азаматтарға ескерте кететін жайт, велосипедте анықтама қызметі жапсырылған. Әуелі картаны бекітіп, кодын енгізсеңіз, велосипед автоматты түрде қозғалысқа дайын болады. Іске қосылғаннан соң коммуналдық велосипед жарты сағат тегін қызмет көрсетеді. Әрбір велосипедке борттық компьютер, себет сөмкелер мен заттар орнатылған.
Әлемге әйгiлi, жанға жайлы...
Велосипед тебу – адамның аяқ бұлшық еттерін нығайтып, ағзаның қалыпты жұмыс жасауына мүмкіндік туғызады. Сондай-ақ, қан айналымының дұрыс жүруіне оң әсерін тигізеді. Бастысы, бойдағы энергия мен таза ауаны, денсаулық пен көтеріңкі көңіл күйді сақтауға өз үлесін қосары сөзсіз.
 |
 |
Қалалық велоқауымдастық директорының міндетін атқарушы Евгений Малаховтың айтуынша, Шымкентте бүгінгі таңда велосипедті жанына серік еткен жандардың қатары 9 мыңнан асып жығылады. Дегенмен, қаланың инфрақұрылымдық жағдайын жақсарта отырып, бұл көрсеткішті бірнеше есеге арттыру мүмкіндігі бар. Қызмет орнына аталмыш көлік түрімен қатынайтын қала әкімінің әрекеті кім-кімге де үлгі болардай.
Жоба жетекшілерінің берген мәліметі бойынша, бүгінде Астана қаласы велосипедпен жүрудің орташа көрсеткіші бойынша Мәскеу, Париж және Сан-Францискодан озық тұр. Яғни, әрбір мың адамға шаққандағы көрсеткіш деңгейі Астанада – 5,9, Мәскеуде – 5,7, Парижде – 3,2, ал Сан-Францискода – 3 адамнан келеді. Жобаның өзіндік тиімділігі сол, Астанада велосипедті пайдаланушылар орташа алғанда күніне 6 шақырымдай жол жүруде. Ендігі жерде аталмыш жоба Шымкент және Алматы қалаларында да жүзеге аспақ. Қазіргі таңда бұл қалаларда велосипед қозғалысына оңтайландырылған арнайы жолақтар салынуда. Бұл жоба қаланың экологиялық ахуалын жақсартып, велотуризмді қалыптастыруға оң ықпалын тигізбек.
Жалпы, Еуропаның алдыңғы қатарлы елдерінде қала аумағында велосипедпен қатынауға ерекше көңіл бөлінеді. Әлемде шайтанарбаны шыр көбелек айналдырып жүрген елдердің қатарында Финляндия көш тізгінін қолға алып тұр. Бұл елдің жазы қысқа, қысы ұзақ. Осыған қарамастан, аталмыш мемлекет велосипедтің санын арттырып келеді. Оның жолын салу үшін де қазынадан қомақты қаржы бөлінеді. Қысқасы, оны фин халқы ұлттық жоба деп санайды. Сондай-ақ, олар елге келген жиһанкездерге велосипед қызметін де ұсынады. Олармен көршілес Норвегия елі де сол саясатты ұстанады. Одан кейінгі орынды Чехия, Дания, Германия, Бельгия секілді елдер иеленеді. Мәселен, Данияда бір адам жылына велосипедпен 853 шақырым жолды артқа тастайды екен. Веложолдары 400 шақырымға жуықтаған Копенгаген нақ бүгінгі таңда «Еуропаның велосипед астанасы» атануға ниетті. Сонымен қатар Азияның Үндістан, Малайзия, Қытай секілді мемлекеттерінде де велосипед мініп жүрген жандардың қатары қалыңдаған. Мәселен, жапондықтардың 15 пайызынан астамы жұмысқа велосипедпен барады.
Мамандардың айтуынша, велосипедте күніне 6 шақырым жол жүру инфаркт миокардын 50 пайызға азайтады. Сондай-ақ, велосипедшілер жылына 900 миллион литр бензинді үнемдейді екен.
Ширек финал шежiресi жазылды
Вторник, 05 Июль 2016 06:40Қазақ спорт журналистикасының қайраткері Несіп Жүнісбаевтың сөзімен айтсақ, нақ қазір Франция футболмен «тыныстап» тұр. Олай демегенде ше, Еуропа біріншілігінің ширек финалдық кездесулері ұзақ уақыт бойы дүйім жанкүйер қауымның жадында сақталары анық. Турнирдің әу бастан-ақ, фавориттері саналған Германия мен Италия құрамалары өзара ширек финалда кездесіп, барша жанкүйер қауымды «ала доптың сиқырымен» арбағандай еді. Сондай-ақ, Еуропа біріншілігіне алғаш рет жолдама алған Уэльс құрамасы ә дегеннен «айды аспанға шығарғандай» болды.
Ширек финалдық ойындардың алғашқы кездесуі – Польша мен Португалия құрамаларының арасында өтті. Небары ойынның екінші минутында Португалия құрамасының қорғанысы сыр беріп, Левандовский мергендігімен танылды. Жылдам доп соға алған Польшаның бұл «ерлігі» еуропадағы «бразилиялықтарды» айтарлықтай есептен жаңылдырғаны анық. Дегенмен, «ойын тізгінін» қолда ұстаған Фернанду Сантуш шәкірттері көп кешікпей-ақ есепті теңестірді. Поляк қақпашысы Лукаш Фабьянский шабуылшы Саншештің соққысына тойтарыс бере алған жоқ. Нәтижесінде, Марсельде ойналған матчтың негізгі уақыты 1:1 есебімен тең аяқталды. Қосымша белгіленген жарты сағаттық уақытта да осы есеп өзгерген жоқ. Сол себепті де, жеңімпазды ойыннан кейінгі орындалған 11 метрлік «лотореяның» нәтижесімен анықтауға тура келді. Шешуші сында 5:3 есебімен алға шыққан Португалия алғаш болып жартылай финал жолдамасына иелік етті.
Жартылай финал кезеңінің екінші жолдамасын Уэльс – Бельгия құрамалары өзара сарапқа салды. Бірінші таймның 13-ші минутында Бельгия құрамасының футболшысы Радже Наингголану гол салып, есепті ашса, Уэльс құрамасының капитаны Эшли Уильямс 30-шы минутта есепті теңестірді. Екінші таймда Хэл Робсон-Кану мен Сэм Воукс салған доптар Уэльс құрамасына түпкілікті жеңісті алып келді. Қорытынды есеп – 3:1! Енді Уэльс шілде айының 6-жұлдызында жартылай финалдық ойынын Португалия құрамасына қарсы өткізеді. Айта кетейік, қос құрама бұған дейін өзара 3 рет кездескен болатын. Оның екеуінде Португалия, ал бірінде Уэльс құрамасы өз жеңісін тойлаған. Бұл ретте көпшілік қос құрама капитандары, мадридтік «Реалдың» шабуылшылары Криштиану Роналду мен Гарэт Бэйлдің өзара тартысын асыға күтері анық.
Ширек финал ойындарының үшінші кездесуі, турнир фавориттері – Германия мен Италия арасындағы матч күллі әлем халқының назарын өзіне аударғаны даусыз. Бұл ойынға дейін қос құрама өзара 20 рет кездескен. 5 матчта Германия құрамасы жеңіске жетсе, Италия 11 ойында ұтқан. 4 кездесу тең аяқталған. Көпшілік қауым шын мәнінде, өздері қалаған нағыз «футбол спектаклін» тамашалады. Ойынның 65-минутында Германия сапынан Месут Өзил салған допқа Италия құрамасының жартылай қорғаушысы Бонуччи 78-минутта жауап қайырды. Бұл кездесудің негізгі уақыты 1:1 есебімен тең аяқталды. Бордо қаласының «Матмут-Атлантик» стадионына жиналған 60 жанкүйер қосымша уақытта да жеңімпазды көре алмады. Дегенмен, 11 метрлік футбол «лотореясында» Германия құрамасы үздік шықты.
Сондай-ақ, турнирдегі ең ірі есеп ширек финалда тіркелді. Өз кезегінде, Франция құрамасы Исландияны 5:2 есебімен ұтып, жартылай финалға жолдама алды.
Франция құрамасы бірінші таймда-ақ басымдығын байқатты. Жиру, Погба Гризманн және Пайе салған доптарға Исландия сапынан Сигторссон мен Бьярнасон 2 доппен жауап қайтара алды. Нәтижесінде, осы турнирде тамаша ойынымен жанкүйер ықыласына ие болған Исландия сапарын тәмамдады.
Жартылай финалда Франция құрамасы Германиямен кездеседі. Ойын 7-шілдеде Марсель қаласының «Велодром» стадионында өтеді.
Агроқұрылым әлеуетi: жаңашыл әдiстер мен кешендi мiндеттер
Пятница, 01 Июль 2016 05:04Дәрігерлер денінің саулығын ойлаған әрбір адам күніне орта есеппен 400 грамм жеміс-жидек жеуі керектігін айтады. Ағзасындағы қажеттілікті өтеу үшін нақ қазіргі уақыт – дер мүмкіндіктің сәті. Яғни, жеміс-жидек пен көкөністің нағыз піскен шағы. Әлбетте, ел аумағында жылыжай алқабын кеңейтуде көшбасшы болып табылатын Шымкентте қай кезде де жаңа піскен жергілікті өнімдерді іздеп табу аса қиындықты туындатпасы анық. Дегенмен, мамандар агро азық-түлік белдеуінде орналасқан қаланың мүмкіндігі бүгінгіден әлдеқайда жоғары екенін жасырмайды.
Бүгінде Шымкент қаласының ауылшаруашылығы мақсатындағы жері 63196 гектарды құрайды. Яғни, бұл көрсеткіш қаланың жалпы жер аумағының 55 пайызына жуықтайды. Бұл қатарда егістік жер 431 мың, жайылым 20016, шабындық 243, бау және көпжылдық екпелер 937 гектарға жетіп отыр. Әкімшілік аумақтық шекараның өзгеруіне байланысты 3,5 мыңнан аса агроқұрылым қосылып, бүгінгі таңда қала бойынша барлығы 4152 ауылшаруашылығы тауар өндірушілері еселі еңбек етіп келеді.
Жыл он екі ай бойына еңбек етіп, несібесін жерден терген шаруалар үшін қазіргі таңда мемлекет тарапынан үлкен қолдау көрсетілуде. Атап айтсақ, көктемгі және күзгі егісті егіп, жинауға жеңілдетілген бағамен жанар-жағармай, минералды тыңайтқыш, гербицидтер берілуде. Сондай-ақ, шаруалардың ашық топырақта егілген егіс, көкөніс, дәнді және майлы дақылдарға (арпа, мақсары, жоңышқа, дәндік жүгері) бау, жүзім, жылыжай, (фермерлік, өнеркәсіптік) кешендеріне және асыл тұқымды мал шаруашылығына субсидия алу мүмкіндігі бар. Бұл өз кезегінде, қаладағы агроқұрылымды дамытуда лайықты нәтижесін де беріп келеді.
– Шаруа қауым еңбек етсе ғана оның нәтижесі болатындығын бүгінде жақсы түсінеді. Сол себепті, мемлекет тарапынан берілетін қаржылай қолдауды тиімді пайдалануда. Қазір жердің құнары төмен болғандықтан, оған тыңайтқыш сеппей, өнім алу мүмкін емес. Бұл бағытта шаруаларға тыңайтқыштар, тіпті, дербес арамшөптерге қарсы химикаттарды алуға да мемлекет жәрдем береді, – дейді қалалық ауылшаруашылығы және ветеринария бөлімінің басшысы Ғани Құрманбай.
Сала маманының айтуынша, жерді игеруде ауыспалы егіс технологиясын ендіру – жердің құнарын сақтауға айтарлықтай сеп болмақ. Осы мақсатта қала әкімдігі тарапынан арнайы бағдарлама дайындалуда. Бағдарлама аясында әсіресе, селекция, сапалы тұқым өндіру, терең қопсыту технологиясы, қарқынды бау әдісін қолдану аясын кеңейту қарастырылмақ. Мәселен, бүгінде тәжірибеге енгізілген тамшылатып суғару әдісі 840 гектар аумаққа ұлғайтылыпты. Дегенмен, оның көлемін әлі де болса 5 есеге дейін ұлғайту мәселесі алдағы күндердің еншісіне бұйырмақ.
Сала мамандары сонымен қатар, өнім көлемін ұлғайтуда материалдық-техникалық базаның ахуалы да сын көтермей тұрғанын айтады. Яғни, қаладағы агроқұрылымды техникамен қамту көрсеткіші 50 пайыздан аспайды. Осындай қиындықтардың салдарынан қала халқын ауылшаруашылық өнімдерімен қамту деңгейі әлі де төмен екені байқалады. Атап айтқанда, қала тұрғындарын көкөніспен қамту деңгейі 67 пайызға тең.
Дегенмен, тек ағымдағы жылы жылыжай көлемі 5,09 гектарға артып, жалпы аумағы 124 гектарға жуықтаған. Алғашқы жартыжылдықта ондағы өндірілген өнім көлемі 8 мың тоннаға жетіпті.
Испандық технологиямен жабдықталған «ҚазАгроном» ЖШС-і бүгінде 3,04 гектар аумақта дайындалған жылыжай өнімдерін нарыққа шығарып келеді. Шаруашылық басшысы Мұрат Гелашвилидің айтуынша, испандық технология бойынша өнеркәсіптік жылыжайдың құрылысын жүргізуге орта есеппен 250-320 миллион теңге қаржы жұмсалатын көрінеді. Аталмыш өнеркәсіптік жылыжайдың өзіндік ерекшелігі сол, толығымен автоматтандырылған, жұмыс күшін көп қажет ете бермейді. Ең бастысы, жоғары өнім бере алады.
Айта кетейік, бүгінде қала аумағындағы жылыжайлардың басым бөлігінде, атап айтқанда, 70 гектары қияр, 30 гектарында қызанақ өнімдері дайындалуда. Өз кезегінде, бірқатар жергілікті шаруашылық иелері өз өнімдерін еліміздің өзге өңірлері мен көршілес Ресейге де экспортқа шығарып отыр.
Шымкентте тепкен доп Еуропа қақпаларында туламақ
Среда, 29 Июнь 2016 06:05«Ордабасы» Еуропа лигасындағы алғашқы кездесуін Белградта бастамақ. Оңтүстіктің командасы Сербияның «Чукарички» клубымен кездеседі. Алғашқы ойын 30 маусымда Белградта, ал қарымта матч 7 шілдеде Шымкентте өтеді.
«Чукарички» – 1926 жылы құрылған. Өткен маусымда Еуропа лигасының бірінші іріктеу кезеңінен іркілмей өткенімен, екінші іріктеу кезеңінде Әзірбайжанның «Габаласынан» екі матчта да жеңіліп, турнирден шығып қалған болатын. Команданы 40 жастағы жергілікті маман Милан Лешняк баптайды. Аталмыш белградтық клуб Сербия біріншілігінің соңғы екі жылдағы қола жүлдегері аталады.
Айта кетейік, жуырда ғана Шымкентке арнайы келген Халықаралық футбол Федерациясының өкілдері Қажымұқан атындағы Орталық стадионның жағдайымен танысқан болатын. Нәтижесінде, ойын алаңының халықаралық талапқа сай келмейтін басты 10 кемшілігін анықтаған. Және аталған кемшіліктерді қалпына келтіру үшін қысқа уақыт мерзімін тағайындаған еді.
Осы орайда Орталық стадион директорының орынбасары Құрманбек Ордабаев бүгінде аталған кемшіліктер бойынша тиісті жұмыстардың атқарылғанын жеткізді. Атап айтқанда, стадионның сол жақ бетіне бояу беріліп, делегаттардың және матч төрешілерінің бөлмесі талапқа сай қайта дайындалыпты. Сондай-ақ, допинг бақылау орны мен пресс-конференция залы да толық қызмет көрсетуге әзір.
Сыйымдылығы жағынан ел аумағындағы ең үлкен стадиондардың бірі болып табылатын кешенде қазіргі таңда бағаналардағы жарықпен қамту жұмыстары жүргізілуде. Бұл үшін облыстық бюджеттен 212 миллион теңге қаржы бөлініпті. Дегенмен, «Ордабасы» алғашқы айналымнан сүрінбей өткен жағдайда, келесі кезең ойындарын өткізу үшін Алматының орталық стадионын жалға алуына тура келеді. Себебі, қауымдастықтың ресми өкілдері Шымкенттегі орталық стадионның бүгінгі жағдайын тек бірінші ойынды қабылдауға ғана қабілетті деп таныған.
Бақтияр Байсейітов баптайтын «Ордабасы» командасы бүгінде УЕФА рейтінгісінде 319 орында тұр. Сондай-ақ, ел біріншілігінің ХҮІІІ тур ойындарынан кейін әзірге үздік бестікті түйіндеп келеді. Еурокубок ойындары қарсаңында «Ордабасы» бұған дейін Керекудің «Ертіс» футбол клубында ойнаған грузиялық жартылай қорғаушы Гогита Гогуамен келісім-шартқа қол қойды. Десе де, «трансферлік терезе» ашылғалы бері команда капитаны Азат Нұрғалиев өткен жылғы ел біріншілігінің жеңімпазы «Астана» командасына ауысқан болса, шабуылшы Дәуренбек Тәжімбетов ендігі жерде «Тараз» футбол клубының намысын қорғайтын болады.
Кiл үздiктер сұрыпталды
Среда, 29 Июнь 2016 06:00Футбол тарихында алғаш рет құрлықтағы 24 үздік құраманың басын қосқан Еуропа біріншілігінде ширек финалға шыққан командалар белгілі болды. Бұған дейін жолдама мәселесін шешіп тастаған Польша, Уэльс, Португалия, Франция, Германия, Бельгия құрамаларының қатарын Италия және Исландия толықтырды. Енді сәйкесінше, жартылай финалға берілер жолдама үшін Польша – Португалия, Уэльс – Бельгия, Германия – Италия және Франция – Исландия құрамалары өзара бақ сынайтын болады.
Жалпы, плей–офф ойындарын саралайтын болсақ, біріншілік барысында алғаш болып Бельгия бір ойында төрт доп соқты. «Ғ» тобының үздігі атанған Венгрия құрамасы бұл жолы Бельгияның қарқынды шабуылдарына төтеп бере алған жоқ. Қорытынды есеп – 4:0! Бельгия сапында Алдервейрелд, Батшуайи, Азар және Феррейра-Карраско мергендігімен танылды. Сондай-ақ, Германия да Словакия құрамасының қақпасына жауапсыз үш доп соғып, турнирдің басты фавориті кім екенін тағы бір «еске салды». Дегенмен, «неміс машинасы» үшін ширек финал ойыны аса шиеленісті жағдайда өткелі тұр. Себебі, олардың ендігі қарсыласы соңғы өткен Еуропа біріншілігінің финалисі Италияның өзі болмақ.
Плей-офф сатысындағы тағы бір жаңа дерек – EURO тарихында алғаш рет матчтың 2 минутында-ақ 11 метрлік айып добы белгіленді. Франция – Ирландия кездесуінде француз командасының қорғаушысы Погба айып алаңына енген ирландық шабуылшы Лонганы дөрекі әрекетімен ғана тоқтата алды. Төреші нұсқаған 11 метрлік айып добын орындауда Риццоли қателескен жоқ. Еске сала кетсек, бұған дейінгі ең жылдам 11 метрлік айып добы 2008 жылғы біріншілікте тіркелген еді. Ол кезде хорватиялық Лука Модрич Австрия құрамасының қақпасына ойынның 4-ші минутында айып добын орындаған еді.
Алғашқы рекордтар тiркелдi
Франциядағы доп додасының бұған дейінгі өткен құрлық біріншіліктерінен өзгешелігі сол, жаңа регламент негізінде қатысушылардың қатары 24 командаға дейін ұлғайды. Нәтижесінде, төртжылдықтың басты додасына Исландия, Солтүстік Ирландия, Словакия, Уэльс және Албания секілді құрамалар да қатысу мүмкіндігін иеленді. Өз кезегінде, бұрын тек алғашқы екі орынды жеңіп алған құрамалар ғана жарысты жалғастырған болса, бұл жолы үздік көрсеткіш көрсеткен үшінші орын иегерлері де осы саптан табылды.
Бұл жолғы Еуропа біріншілігінде жанкүйерлер саны бойынша жаңа рекорд тіркелді. Өткен жексенбіде Парижде Франция – Швейцария арасындағы матчты тамашалауға 90 мың жанкүйер жиналған. Бұған дейін де жанкүйерлердің саны бойынша жаңа рекорд нақ осы турнирде тіркеліп үлгерген еді. Франция – Румыния арасындағы турнирдің алғашқы матчын тамашалағандар 87 мың көрермен болды.
Кiм жеңiмпаз атанады?
Белгілі футбол сарапшылары нақ қазіргі кезде бәсті кімге тігерін нақты болжай алатын емес. Дегенмен, Германия құрамасының бүгінгі деңгейін жоғары бағалайтындар көп. Шын мәнінде немістер командасының барлық шебінде де әлемдік деңгейдегі жұлдыздар шоғыры бар. Мануэль Нойер, Матс Хуммельс, Томас Мюллер, Тони Крос секілді шебер ойыншыларымен бір қатарда құрлықтың үздік клубтарында жетекші рөлге ие жас толқын өкілдері жүр. Фавориттер қатарында Криштиану Роналду секілді дара жұлдызы бар Португалия құрамасының да орны айрықша аталады. Сондай-ақ, басты үміткерлер тізімінде алаң иесі – Франция құрамасы да осы жолы топ жарып шығудан үмітті. Италия құрамасының да өткен біріншіліктегі жетістігін қайталауға мүмкіндігі мол.
Жеңiмпаз үшiн – 27 миллион еуро...
Биыл УЕФА ұйымы жарыстың жалпы жүлде қорын арттырып, ұтысқа 301 миллион еуро тігіп отыр. Бұл қатарда ширек финал жолдамасын иеленген құрамалар – 1,5 миллион еуромен марапатталды. Алда ширек финалға өткендер – 2,5 миллион, ал жартылай финалға жолдама алғандар – 4 миллион еуроны иеленбек.
УЕФА қауымдастығы да EURO–2016 турнирінен 2,2 миллиард еуро пайда табуды жоспарлап отыр. EURO–2012 турнирінде қауымдастық 1,4 миллиард еуро табыс тапқан еді. Турнир қатысушылары санының артуы өз кезегінде, Федерацияның қаржылық табысын ұлғайтуына айтарлықтай мүмкіндік беруі тиіс.
Турнирді өткізу мәртебесіне ие болған Франция елі стадиондарды жөндеп, жаңа спорт кешендерін тұрғызу үшін 1,7 миллиард еуро қаржысын жұмсапты. 1 айға созылатын құрлық біріншілігін тамашалау үшін әлемнің 2 миллион тұрғыны елге келеді деп күтілуде. Бұл ретте, қауіпсіздік шарасына да айрықша мән беріліп отыр. Бұл мақсатта жалпы саны 80 мың полицей мен 12 мың жеке күзет қызметкері тыныштыққа жауап береді.
Жеке сот орындаушыларға басымдық берiледi
Среда, 29 Июнь 2016 05:03Бұл тақырып Шымкент қаласының Абай аудандық сотында өткен «дөңгелек үстел» жиынында кеңінен талқыға салынды. Жиынға аудан прокуратурасы, әділет басқармасының өкілдері мен мемлекеттік және жеке сот орындаушылары қатысты.
– Қоғамда енді ғана еңсе түзеген жаңа институттың аяғынан нық тұрып, жетілуіне барлық мемлекеттік мекемелер, заңды тұлғалар және азаматтар бірлесе қолдау көрсеткені жөн деп есептеймін, – деп атап өтті Абай аудандық сотының судьясы Еркен Отарбаев.
Жиын барысында сондай-ақ, сот жүйесінің жүктемесін азайтуға және азаматтық қоғамдағы дау-жанжалдың азаюына бағытталған құқықтық таластар мен дау-жанжалдарды шешудің балама тәсілдерін жетілдіру сұрақтары да талқыланды.